“Amamas Long Litimapim Nem Bilong God” Kibung Distrik
1 Maski yumi stap long taim nogut, i gat planti as na yumi ken amamas. Wastaua bilong Februeri 15, 1995, i kamapim nem bilong ol kibung distrik bilong 1995-1996, olsem: “Amamas Long Litimapim Nem Bilong God.”
2 Yumi litimapim nem bilong Jehova, long wanem, em i bin lainim yumi long tok i tru. (Ais 54:13; Jo 8:32) Olsem na yumi amamas long helpim ol narapela i wok long painim gutpela sindaun na amamas, na bai ol i ken save long tok i tru. (Ese 9:4; Ap 20:35) Na yumi stap olsem wanpela lain brata Kristen, na dispela tu i mekim na yumi amamas. Gutpela famili bilong spirit i helpim yumi long kisim bel isi na amamas. Em nau, em sampela as na yumi ken amamas, na dispela amamas i kirapim yumi long litimapim nem bilong Jehova. Ol tok na soim bilong kibung bai stori long sampela as moa na yumi ken stap amamas nau long dispela taim nogut bilong las de.
3 Tripela De Kibung: Olsem wanem? Yu bin askim bos long givim hap taim long yu na bai yu ken go long kibung long tripela de olgeta? Wanem kibung i klostu long hap bilong yu? Wok Kingdom bilong Oktoba 1995 i kolim ol nupela det na ples em olgeta 9-pela kibung bai kamap long en long Papua Niugini—ol tupela de kibung i kamap long 3-pela ples, ol tu i insait long dispela 9-pela kibung. Ating kuskus bilong kongrigesen i tokim yupela pinis long ol samting kongrigesen i mas save long en. Bai i gat 5-pela kibung long tok Pisin, na 3-pela long tok Hiri Motu. Long kibung i kamap long Pot Mosbi, bai ol i mekim ol tok long tok Inglis, tok Motu, tok Pisin, na long han (Auslan) bilong helpim ol yaupas.
4 Program bilong tripela de kibung bai kirap long Fraide long 9:40 a.m. Long Sarere, program bilong tupela na tripela de kibung bai kirap long 9:00 a.m., na long Sande, program bai kirap long 9:30 a.m. Program bai pinis long Sande long 3:50 p.m.
5 Bai Yu Go Long Kibung?: Bilong wanem yumi mas go long kibung long olgeta de bilong en? Long wanem, Jehova i laik bai yumi mekim olsem. Long nau i gat planti samting i laik bagarapim bilip bilong yumi. Taim ol bikpela hevi i painim ol Kristen long Judia, Pol i tok, ol “i no ken lusim pasin bilong bung wantaim.” (Hi 3:12, 13; 10:25) Maski ol Filipai i bin i stap namel long “ol lain i bin lusim stretpela pasin na mekim planti rong,” ol “i stap olsem ol lait namel long ol.” (Fl 2:15) Bilong wanem ol dispela Kristen bilong bipo ol i narapela kain? Long wanem, ol i larim spirit holi i stiaim ol long bung wantaim ol narapela Kristen na ‘kirapim ol long laikim ol arapela na mekim ol gutpela pasin long ol.’—Hi 10:24.
6 Ol man bilong graun i laik pulim yumi na bai yumi no strong tumas long bung wantaim ol brata na litimapim nem bilong Jehova. Jehova i singautim yumi long larim spirit bilong em i soim rot long yumi na kisim amamas long olgeta de bilong kibung. Olsem wanem? Yu wantaim famili olgeta bilong yu, yupela bai go long kibung? Long olgeta taim yumi mas strongim bilip bilong yumi na laikim moa yet ol narapela. Jehova i save putim ol kibung distrik bilong helpim yumi long mekim olsem.
7 Kisim Planti Gutpela Samting i Go Bek Wantaim Yu: Yu mas mekim wanem na bai kibung i ken helpim gut yu? Yu mas putim gut yau na harim tok—nogut tingting i raun na i tingim ol narapela samting. Dispela i hatwok liklik. Tasol i no ol yangpela tasol i hatwok long putim gut yau—yumi olgeta i hatwok liklik. Olsem na yumi mas redi gut pastaim na bai yumi inap putim gut yau long ol tok bai kamap. Askim yu yet, ‘Wanem nem bilong kibung?’ Na tingim gut long bel ol dispela tok! Na askim yu yet, ‘Bilong wanem mi laik go long kibung, na mi bai mekim wanem long dispela 3-pela de bilong kibung? Taim program i pinis long apinun, bai mi wok long painim amamas tasol, o bai mi makim hap taim bilong kisim gutpela malolo na tingim gen ol bikpela tok bilong kibung?’
8 Wastaua (tok Inglis) bilong Februeri 1, 1984, i gat wanpela tok, “Yu Tingim Gut Long Bel Ol Tok Yu Harim o Tingting i Raun?” Em i stori long sampela samting yumi ken mekim na bai miting i ken helpim gut yumi, na i tok: “Yumi mas bosim gut tingting, em nambawan bikpela samting yumi mas mekim.” Taim brata i kirap long mekim tok, ating yumi save putim gut yau, tasol bihain liklik, tingting bilong yumi i kirap na wokabaut. Yumi ken mekim wanem na bai yumi no mekim dispela samting?
9 Olsem: Sapos inap, yu mas slip hariap long nait. Tasol sapos ples bilong slip i stap longwe liklik long ples bilong kibung, ating bai yu hatwok long slip hariap o malolo gut olsem yu mekim long haus bilong yu yet. Tasol sapos yu stretim gut ol samting, ating bai yu inap kisim gutpela malolo.
10 Sapos yu raitim sampela hap tok long notbuk, dispela bai helpim yu long putim yau na harim tok. Tasol sapos yu wok long raitim planti tok tumas, ating bai yu lus long harim sampela bikpela tok. Olsem na taim yu raitim tok, tingting long kamapim long wanpela Baibel-stadi o long wanpela brata o sista i sik na i no inap lusim haus. Maski yu no tingim wanpela man stret, bai yu gat as bilong raitim ol tok, na taim kibung i pinis, ating bai yu inap painim rot long kamapim ol bikpela tok bilong program long wanpela long famili bilong yu i no bilip. Sapos yu raitim tok long notbuk na kamapim long narapela, dispela bai helpim yu na bai yu no lusim kwik tingting long dispela tok. Tok yu kamapim bai pas gut long tingting bilong yu.
11 Long ol yia i go pinis, yumi bin putim bikpela kontribusen bilong ol kaikai, na dispela em inapim bikpela hap mani mipela i bin tromoi bilong baim ol samting bilong kibung. Tru, long klostu olgeta kibung bai i no gat kaikai moa, tasol yumi mas tromoi yet bikpela hap mani long baim ples bilong putim kibung na ol samting bilong saun samting. Yumi save baim olsem wanem? Yumi baim long rot bilong ol kontribusen ol brata i givim long laik bilong ol yet. Dispela em i stret wantaim Song 96:8 na 2 Stori 31:12.
12 Amamas Long Litimapim Nem Bilong Jehova Long Gutpela Pasin Yumi Bihainim: Tru, klostu olgeta brata i save bihainim gutpela pasin long taim bilong kibung, tasol sampela brata i save wokabaut nating na toktok wantaim ol narapela taim ol brata i mekim ol tok. Na sampela ol i sindaun longwe long hap bilong sindaun, na ol i no harim gut ol tok. Sapos yumi mekim olsem, dispela bai makim olsem yumi no pilim tru ol gutpela samting Jehova i bin putim bilong helpim yumi.
13 Long olgeta taim yumi mas askim yumi yet: ‘Mi maus bilong husat, na i gat wanem as na mi go long dispela kibung?’ Yumi tenkyu long ol samting bilong spirit God i bin givim long yumi, na dispela wantaim ol tok na pasin bilong yumi em i kamapim klia olsem yumi tingim ol samting bilong God na yumi laikim em tru. (Je 3:13; 1 Pi 2:2, 3, 12) Long sampela hap ol brata i bin sanap strong inap planti yia na karim ol hevi taim gavman i tambuim wok bilong ol, na yumi lukim olsem long taim bilong kibung ol i save sindaun i stap na putim gut yau na harim ol tok na ol soim.
14 Klos na Bilas Bilong Yu i Makim Yu i Wanem Kain Man: Long 1 Samuel 16:7 Jehova i tok, “ol man i save lukluk long bodi. Tasol mi save lukim tingting na laik bilong man na mi skelim ol.” Olsem na planti man i skelim yumi i wanem kain man long klos na bilas yumi pasim. Ol i mekim olsem taim yumi go long ol kibung bilong lotuim Jehova na long kisim save long pasin Kristen. Sapos yu wanpela yangpela i save go long skul o yu wok mani na yu stap klostu long ol narapela i save bihainim pasin bilong dispela graun long bilasim skin, ating bai yu hatwok liklik long holimpas ol lo em Kristen i mas bihainim long pasim ol gutpela klos.
15 Long ol wan wan kantri, pasin bilong bilasim skin em i narapela narapela. Kristen i mas pasim ol gutpela klos i stret. Husat i mas makim wanem klos yumi ken pasim? Papamama i mas was gut—nogut ol pikinini i bihainim ol wanskul bilong ol long pasin bilong bilasim skin. Sosaiti i bin kamapim sampela gutpela tok bilong helpim yumi long skelim gut dispela samting. Mipela laik kirapim yupela long kaunim gen stori, “Yu Ting Olsem Wanem Long Klos Bilong yu?” long Kirap! bilong Ogas 8, 1987.
16 Klostu olgeta brata na sista, taim ol i go long kibung, ol i save pasim ol gutpela klos i stret. Sapos ol elda i lukim sampela i save pasim ol klos i no stret, orait, paslain long taim bilong kibung, long pasin isi, gutpela sapos ol elda i tokim ol olsem pasin bilong ol long bilasim skin em i no stret, na i no stret tru sapos ol i bilas olsem na go long kibung. Na sapos ol Baibel-stadi bilong yu i laik go long kibung, gutpela sapos yu stori wantaim ol long klos na bilas i stret long ol i ken pasim, olsem yumi lukim antap.
17 Kamera na Kaset Samting: Mipela laik stori gen long pasin bilong mekim wok long kamera na kaset samting. Sapos yu laik mekim wok long kamera, video-kamera, o kaset samting, yu mas tingim gut man i sindaun klostu long yu. Maski yu wokabaut o yu sindaun long sia bilong yu na tepim ol tok, ating dispela inap pulim ai na tingting bilong ol narapela. No ken skruim kaset samting long paua bilong saun samting, na nogut video-kamera samting i pasim rot bilong ol man i wokabaut i go i kam. Pasin bilong kisim piksa o putim ol tok bilong kibung long kaset o video-kaset, em samting bilong ol wan wan yet. Ol tok na piksa yu putim long kaset samting em inap helpim yu long tingim gen ol tok bilong kibung taim yu go bek long ples. Tasol nogut yu mekim bikpela wok tumas long kaset samting na pulim tingting bilong ol narapela o yu yet yu lus long harim sampela tok. Olsem wanem? Taim yu go bek long ples, bai yu gat hap taim bilong harim gen ol dispela tok? Sapos yu raitim sampela tok long notbuk, ating em inap.
18 Ples Bilong Sindaun: Mipela laik kirapim gen tingting bilong yupela olsem: YU KEN KISIM OL SIA BILONG FAMILI BILONG YU TASOL WANTAIM OL MAN I BIN KAM WANTAIM YU LONG KA BILONG YU. Sosaiti i singautim yumi long kam long kibung. Ol i bin baim ples bilong kibung long ol kontribusen ol brata i save givim long laik bilong ol yet. Olsem na sapos yumi laikim na tingim tru ol brata, bai yumi no pasim nating ol sia, a?
19 Long sampela kibung, ol brata i makim wanpela hap bilong ol lapun na lek nogut ol i ken sindaun long en. Sapos yu no lapun samting, no ken sindaun long dispela hap. Na redi oltaim long helpim dispela lain long painim sia sapos ol i no gat narapela bilong helpim ol.
20 Kaikai Bilong Yumi Long Taim Bilong Kibung: Wok Kingdom bilong Septemba 1995 i tok: “Wanpela nupela pasin bilong helpim yumi na bai yumi no gat hatwok tumas, i olsem: Kirap long ol kibung distrik bilong 1995-1996, bai ol i no ken wokim planti kaikai, na long sampela kibung, bai i no gat kaikai. Mipela laik kirapim olgeta wan wan long bringim kaikai na koldring bilong ol yet, sapos inap.” Wok Kingdom i stori long as na ol i kamapim dispela nupela pasin, na ol samting olgeta brata na sista i ken mekim bilong lukautim ol yet long kaikai na koldring. Gutpela sapos yumi olgeta i kaunim gen dispela hap long Wok Kingdom, na ol Baibel-stadi i laik go long kibung, stori wantaim ol long ol dispela tok. Em bikpela samting long yumi mas tokim ol Baibel-stadi long bringim kaikai na koldring bilong ol yet i kam long kibung, sapos ol inap.
21 Mipela laik stori gen long ol samting yu ken bringim bilong kaikai long belo, olsem: liklik kaikai tasol bilong strongim skin, wankain olsem planti man i kisim i go wantaim ol long ples wok, olsem sanwis o prut, o rais o kaukau samting yu kukim pinis. Na bilong dring, yu ken bringim samting olsem kopi, ti, koldring, o wara—tasol no ken putim long samting ol i bin wokim long glas, nogut i bruk. No ken bringim ol bikpela eski samting bilong putim kaikai na koldring long en—kisim ol liklik eski inap long putim aninit long sia bilong yu. Na no ken bringim bia o wain samting. Na tu, no ken kaikai taim program i no pinis yet—sapos yu mekim olsem, dispela bai makim olsem yu no tingim gut ol gutpela kaikai bilong spirit ol brata i givim long yumi.
22 Sapos ol brata i lukautim kibung i kamapim sampela toksave long pasin bilong kukim kaikai long ples kibung o long ples slip Sosaiti i bin putim, orait, yumi mas bihainim ol dispela toksave. Gutpela sapos yu tingim gut dispela samting: Ol i makim taim bilong malolo long belo bilong yumi ken kisim liklik kaikai na toktok na amamas wantaim ol brata na sista. Yumi lain bilong Jehova i save, yumi no go long kibung bilong kisim ol samting bilong skin, nogat; yumi bung long wanem yumi laik kisim ol gutpela kaikai bilong spirit.
23 Namba wan kibung distrik, “Amamas Long Litimapim Nem Bilong God,” bai kamap long Disemba 15, 1995. Olsem wanem? Yu stretim pinis ol samting na bai yu redi long bung wantaim ol brata sista na kisim ol gutpela samting bilong spirit? Mipela i beten askim Jehova long blesim wok yu mekim bilong kam long kibung na lain long rot bilong yumi ken amamas long litimapim nem bilong God.
[Blok long pes 6]
Sampela Samting Bilong Kibung Distrik Yumi Mas Tingim
Baptais: Ol bai makim ples sindaun bilong ol man i laik kisim baptais, olsem na gutpela sapos ol man i laik kisim baptais ol i sindaun long ol dispela sia taim program i no kirap yet long Sarere long moningtaim. Tasol mipela i lukim olsem sampela i bin putim klos waswas i no stret inap long man i kisim baptais. Man i laik kisim baptais, em i mas kisim klos waswas na taul bilong em i kam long kibung. Klos waswas i mas stret long ol Kristen i pasim. Taim brata i mekim pinis tok bilong baptais na beten, siaman bilong program bai givim sampela toksave long ol man i laik kisim baptais na bihain bai yumi mekim singsing. Taim yumi mekim pinis laspela hap bilong singsing, ol atendan bai tokim ol man i laik baptais long wanem hap ol i mas i go long en bilong kisim baptais. Baptais i makim olsem man i dediket long Jehova, na em samting bilong em yet wantaim Jehova, olsem na i no stret long man i laik baptais i holim han samting bilong narapela na tupela o tripela i kisim baptais wantaim, nogat; mipela i no save baptaisim ol man long dispela rot.
Kat Bilong Pasim: Taim yumi go i kam long kibung na taim yumi stap long ples kibung, gutpela sapos yumi pasim dispela kat long klos bilong yumi. Ol man i lukim dispela kat ating bai ol i laik save long kibung bilong yumi, na nau rot bai op bilong yumi ken autim tok long ol. Yumi mas kisim dispela kat na karamap plastik bilong en long kongrigesen bilong yumi yet, long wanem, bai yumi no inap kisim long kibung. No ken lusim tingting long karim kat “Medical Directive.” Ol painia na ol brata sista i wok long Betel, ol i mas karim kat wantaim ol, em kat Bilong Toksave Olsem Man i Mekim Wok Painia.
Ol Pikinini: Papamama, oltaim yupela i mas save ol pikinini bilong yupela i stap we, na yupela i mas lainim ol long pasin bilong sindaun gut; dispela em i wok bilong yupela. Taim brata i givim tok, gutpela sapos pikinini i sindaun klostu long yupela, na gutpela tu sapos ol i go long toilet taim program i no kirap yet. Lainim ol olsem, taim ol i mas go long toilet, ol i mas wasim gut han bilong ol.
Was Gut: Sapos yumi was gut, ating bai yumi no kisim hevi. Planti taim ol raskol i save stilim samting long man i lusim ples bilong em na i go i stap long narapela hap. Olsem na yu mas lokim gut ka long olgeta taim, na no ken larim sampela samting i stap ples klia insait long ka; nogut ol man i brukim ka na kisim. Taim planti man i bung wantaim, dispela i pulim ol stilman i kam. Na tu, sampela man i kam long kibung ol i no Kristen tru. Olsem na no ken lusim sampela samting i stap long sia bilong yu, nogut ol dispela samting i pulim ai bilong ol. LONG OLGETA TAIM YU MAS SAVE, OL PIKININI BILONG YU I STAP WE.
Sapos yu laik save long sampela samting bilong kibung, no ken ringim bos bilong ples kibung. Sapos ol elda i no save, orait, salim pas i go long atres bilong kibung i stap long fail bilong kuskus bilong kongrigesen.
Nupela Pasin Bilong Kisim Kaikai i Helpim Yumi Olsem Wanem
◼ Taim program i no kirap yet, na taim program i kirap pinis, na bihain long pinis bilong program, bai i no gat planti wok tumas long mekim olsem bipo, na yumi inap toktok gut wantaim sampela brata sista moa
◼ No gat planti samting tumas bilong lukautim, olsem bokis ais samting
◼ Planti brata sista moa inap harim olgeta tok bilong kibung
◼ Bai i gat planti volantia moa bilong helpim ol narapela dipatmen
◼ Sampela hap taim moa i stap bilong mekim ol narapela wok bilong spirit
Sampela Kain Samting Yumi Ken Bringim Bilong Kaikai Long Belo
◼ Liklik kaikai tasol bilong strongim skin
◼ Sanwis, kaikai yu kukim pinis, prut
No Ken Bringim Ol Dispela Samting i Kam Insait Long Ples Kibung
◼ Bia o wain samting
◼ Ol bikpela bikpela samting bilong putim kaikai na koldring long en