“Pret Long God” Kibung Distrik Bilong 1994-1995
Namba Wan Hap
1 Kirap long taim bilong Abel na Noa na i kam inap nau, ol bilipman i bin kamapim bel bilong ol olsem ol i pret long God. (Hi 11:4, 7) Pasin bilong pret long God i makim olsem yumi “tingim bikpela strong bilong Man bilong wokim yumi na yumi daun olgeta long em na yumi pret long mekim ol samting em i no save laikim.” (it-1-E pes 818) Long mun Disemba na Janueri bai yumi go long “Pret Long God” Kibung Distrik, na long dispela rot bai yumi kamapim klia yumi daun olgeta long God. Olsem wanem? Bai yu go long kibung long olgeta de na bai yu no ken lusim wanpela hap tok bilong program, kirap long namba wan singsing i go inap long laspela beten?
2 Long olgeta yia yumi save wet long harim ol tok bilong kibung distrik. Tru, ating yumi mas lusim bikpela hap strong na mani na bai yumi inap kam long kibung, tasol yumi bai kisim planti blesing. Taim kibung i pinis na yumi go bek long haus, yumi amamas na stap bel gut na stap strong long ol samting bilong spirit. (Skelim wantaim 1 King 8:66.) Taim yumi go long kibung yumi lusim ol samting yumi save mekim long olgeta de, na long kibung yumi bung wantaim ol brata sista na dispela i strongim yumi. Tasol yumi mas save: As na yumi bung wantaim, em bilong lotuim Jehova. Em i tokim yumi long mekim olsem. Em i skulim yumi long ol tok yumi mas bihainim na bai yumi ken stap gut.—Lo 31:12, 13; Sng 122:1.
3 Tripela De Kibung: Inap 15 kibung bai kamap long Papua Niugini long dispela yia. Wastaua bilong Februeri 15, 1994, i gat lista bilong ol ples bilong kibung. Long kibung i kamap long Pot Mosbi, bai ol i mekim ol tok long han (Auslan) bilong helpim ol yaupas; long dispela rot ol yaupas inap kisim olgeta tok bilong program. Long ol narapela kibung bai ol i no mekim ol tok long han; long Pot Mosbi tasol.
4 Program bai kirap long Fraide long 9:20 long moningtaim, na pinis long Sande long 3:15 long apinun. Long Sarere na Sande, program bai kirap long 8:30 long moningtaim.
5 Yumi Daun Olgeta Long Jehova na Dispela i Kirapim Yumi Long Go Long Kibung: Pol i tokim ol Kristen Hibru long ol i mas “litimapim nem bilong [God] na pret long em na aninit long em.” (Hi 12:28) Ol i redim kibung distrik bilong yumi bilong dispela yia bilong helpim yumi long mekim olsem. Ating sampela samting bai kamap na i laik pasim rot bilong yumi long go long kibung, na dispela inap traim yumi olsem: Yumi strong long go long kibung o nogat? Tasol maski ol dispela samting i olsem ol bikpela maunten i laik pasim rot bilong yumi, long strong bilong Jehova bai yumi inap painim rot long go long kibung. (Mt 17:20) Sapos yu no inap kisim malolo bilong yu long taim bilong kibung, kirap long Fraide long moningtaim na i go inap Sande long apinun, orait, gutpela sapos yu beten long Jehova na askim bos bilong yu long givim hap taim long yu na bai yu ken i go long kibung.
6 Bilong Kibung i Ken Helpim Yumi: Yumi save lusim bikpela hap taim na strong bambai yumi inap go long kibung distrik. Olsem na nogut yumi go bek long haus long Sande long apinun, na sori tru, yumi no bin harim planti tok bilong kibung. Olsem wanem? Sapos yu stap long wanpela bikpela kaikai na ol man i kaikai i stap, bai yu lusim dispela kaikai bambai yu inap lukautim sampela narapela wok? Long planti kibung long yia i go pinis, sampela i bin lusim ples kibung taim program bilong moningtaim i pinis. Tasol yumi strong long ol samting bilong spirit na yumi pret long God, olsem na yumi no ken lusim wanpela liklik hap bilong ol samting Jehova i bin redim bilong yumi.—Skelim wantaim 1 Korin 2:9, 10.
7 Ating planti bilong yumi i no gat tingting long lusim kibung taim program i no pinis yet. Tasol maski yumi no mekim olsem, ating yumi inap lusim bikpela hap tok bilong kibung. Dispela samting inap kamap olsem wanem? Olsem: Sapos yumi no redi gut pastaim. Olsem na yumi mas kirap long moningtaim tru bilong yumi ken kaikai gut na stretim gut ol samting, na taim program i no kirap yet yumi sindaun pinis. Na bikpela samting i olsem: Long nait yumi mas slip hariap na bai yumi inap tingim gut olgeta tok ol brata i mekim; nogut tingting i raun.
8 Bilong kibung i ken helpim yumi, gutpela sapos yumi raitim sampela tok tasol long notbuk. I no bikpela man tasol i mas raitim ol tok long notbuk; ol liklik tu i mas mekim olsem. Wanpela pablisa i gat 16 krismas em i tok: “Mi raitim ol skripsa em brata i mekim tok i kamapim. Long dispela rot, taim mi stap long haus, mi inap tingim gen ol tok em i mekim.” Na wanpela manki, em tu i gat 16 krismas, em i tok: “Mi raitim ol bikpela tok tasol. Dispela i helpim mi long tingim gut ol tok na tingting bilong mi i no raun.” Samting yu mas bringim long kibung i olsem: Baibel, buk singsing, notbuk, na pen o pensil. Tru, sapos papamama i gat ol liklik pikinini, ating ol i mas bringim sampela samting i kam bilong lukautim gut ol, tasol i no gutpela tumas sapos ol i bringim ol bikpela bikpela samting bilong putim kaikai na koldring long en na planti tumas ol narapela narapela samting—nogut ol dispela samting i kisim bikpela hap spes tumas na i pasim rot bilong ol narapela.
9 Sampela brata i save putim ol tok bilong kibung long kaset o video-kaset na bai ol i ken harim gen long haus bilong ol. Em samting bilong ol wan wan yet, tasol taim ol i wok long stretim ol samting long kaset, ating ol i lus long harim sampela bikpela tok. Na tu, planti brata i save tok, taim ol i go bek long haus na kirap gen long mekim ol samting bilong ol, ol i no gat hap taim bilong harim gen ol dispela tok.
10 Gutpela sapos yumi wok strong bambai yumi sindaun pinis taim program i no kirap yet. Maski yumi stori i stap wantaim ol pren bilong longtaim, taim siaman i toksave olsem program i laik kirap, gutpela sapos yumi tingim gut ol brata bilong mekim ol tok na ol brata sista bilong yumi, na kwiktaim yumi mas pinis long toktok na sindaun long sia bilong yumi.
11 Olgeta kibung distrik ol i taim bilong amamas, long wanem, Jehova i givim planti blesing long ol man i kam bung. Kibung i helpim yumi long ol samting bilong spirit na ol samting bilong skin. Yumi mas save, long planti kibung ol brata i mas tromoi bikpela mani bilong baim ples kibung. Na tu, pe bilong kaikai i wok long go antap. Yumi baim ol dispela samting olsem wanem? Long rot bilong ol kontribusen, em yumi save givim long laik bilong yumi yet. Long olgeta ples kibung, bai i gat planti bokis kontribusen i stap na bai ol man i kam bung i gat rot bilong helpim ol brata long baim ol samting bilong kibung. Dispela i stret wantaim tok bilong Song 96:8, em i kirapim yumi long ‘litimapim biknem bilong Bikpela, na bringim ofa na go long haus bilong em.’
“Pret Long God” Kibung Distrik Bilong 1994-1995
Namba 2 Hap
12 Pasin Bilong Yu Bai Litimapim Nem Bilong God? Long olgeta yia, long pasin isi, Wok Kingdom Bilong Yumi i kirapim tingting bilong yumi olsem em bikpela samting long yumi mas bihainim gutpela pasin long taim bilong kibung distrik. Tru, oltaim yumi mas bihainim stretpela pasin, tasol taim yumi bung wantaim planti narapela brata, ol ausaitman i save skelim gut pasin bilong yumi. Pasin bilong yumi, maski i gutpela o i no gutpela, em inap winim ol tok yumi mekim long wok autim tok. Yumi laik bai ol tok na pasin bilong yumi i ken litimapim nem bilong Jehova, a?—Snd 27:2; 1 Pi 2:12.
13 Taim “God i Skulim Yumi” Kibung Distrik i pinis long yia i go pinis, wanpela sekuriti long wanpela haus pasindia i tok: “Pasin bilong ol dispela yangpela i gutpela tru—inap longtaim pinis mi no bin was long kain yangpela olsem.” Orait, nau em i stori long sampela narapela yangpela em ol i no mekim gutpela pasin; ol i bin bagarapim planti samting. Em i stori pinis, na nau em i tok long ol pikinini Witnes olsem: “Ol i save sindaun gut na mi amamas long ol i stap. Gutpela sapos ol kibung ol narapela lain i holim long dispela hap i ken wankain olsem dispela.”
14 Wanpela niusman i stori long kibung i bin kamap long narapela kantri, na em i tok: ‘Ol manmeri wantaim ol pikinini, ol i bilas gut. Inap 4-pela de ol i putim gut yau long ol tok na raitim sampela hap tok long notbuk. Ol Witnes Bilong Jehova ol i stap klin tru, na dispela i makim olsem ol i tingim God.’ Tasol sampela Witnes i no bin mekim gutpela pasin olsem.
15 Long sampela kibung mipela i lukim planti man tumas i wokabaut nating taim ol brata i mekim ol tok bilong kibung. Pairap bilong ol i mekim na ol narapela i hatwok long putim yau long ol tok. Tru, ating sampela i gat wok ol i mas mekim taim brata i mekim yet tok, tasol gutpela sapos yumi ol narapela i sindaun i stap na putim gut yau long ol tok, a?
16 Klostu olgeta papamama i strong long ol pikinini bilong ol i mas go long ol miting long olgeta wik. Olsem na long taim bilong kibung, ol i mas strong long ol pikinini bilong ol i mas sindaun klostu long ol, na ol i no ken raun nating taim brata i mekim tok. OLTAIM YU MAS SAVE OL PIKININI BILONG YU I STAP WE NA OL I MEKIM WANEM.
17 Klos na Bilas: Long nau, sapos man i no bilas gut o mekim gut skin, ol narapela i no gat tok long dispela. Planti man i no save bilas gut na mekim gut skin taim ol i go long lotu o ol i go kaikai long haus kaikai. Dispela tok bilong niusman long paragraf 14 i kamapim klia olsem, i gat sampela man i stap yet ol i laik bai ol narapela i pasim gutpela klos, olsem long taim ol i go long lotu. Sapos yumi no bilas gut o mekim gut skin, dispela i kamapim klia yumi wanem kain man o meri. Yu mas save: Inap 3-pela de, ples bilong mekim kibung bai i kamap olsem wanpela bikpela Haus Kingdom.
18 Mipela laik toksave long ol man i laik kisim baptais, olsem: I gat sampela klos waswas i no stret long pasim long taim bilong kisim baptais. Klos waswas i mas stret long ol Kristen i pasim. Husat i gat wok long skelim dispela samting? Em ol elda. Sapos i gat sampela long kongrigesen i laik kisim baptais, ol elda i mas was gut, nogut klos ol i pasim i pundaunim sampela man. (2 Ko 6:3, 4) Nogut ol i pasim klos waswas i no haitim gut skin o T-siot i gat toksave long en. Gutpela sapos ol elda i toktok wantaim ol man i laik kisim baptais long ol dispela samting; ol i ken mekim olsem long taim ol i kamapim ol askim bilong baptais i stap long buk Lo Bilong Yumi.
19 Ples Slip: Planti brata sista, ol yet inap stretim rot bilong ol i ken stap wantaim ol wantok bilong ol, o long hotel samting. Tasol sapos yu laik bai ol brata i ken helpim yu long painim ples slip, orait raitim nem na ol narapela tok long wanpela pepa na givim long kuskus bilong kongrigesen na em bai stretim ol samting wantaim ol brata i wok long Dipatmen Bilong Rum Slip. Na tingim dispela samting: Sapos yu kisim ples slip long haus bilong wanpela brata, nogut yu ting i orait long yu ken i stap planti de moa long haus bilong em, olsem taim kibung i no kirap yet na taim kibung i pinis. Ol dispela rum i bilong taim bilong kibung tasol. Sapos yu stap long haus bilong wanpela brata, yu wantaim ol pikinini bilong yu i mas tingim gut haus bilong em—nogut ol pikinini i holim sampela samting bilong dispela brata o brukim sampela samting o raun long hap bilong haus em brata yet i slip long en. Na i no stret sapos yu askim brata long baim kaikai o PMV samting bilong yu. Olgeta brata sista i kam long kibung i mas lukautim ol yet long ol samting bilong skin. (2 Te 3:7, 8) Sapos sampela i givim hevi long brata i givim ples slip long ol, orait, taim dispela brata i kamap long ples kibung, em i mas kamapim dispela samting long brata i lukautim rum slip na em bai amamas long helpim em.
20 Kaset Samting: Olsem yumi stori pinis, pasin bilong putim ol tok long kaset o video-kaset, em samting bilong ol wan wan. Tasol sapos yu laik mekim wok long kaset samting, yu mas tingim gut man i sindaun klostu long yu. Maski yu sindaun long sia bilong yu na tepim ol tok, ating dispela inap pulim ai na tingting bilong ol narapela. Na taim yu mekim wok long video-kamera, nogut yu pasim rot na ol narapela i no inap lukim brata i mekim tok. Na no ken askim ol brata long Dipatmen Bilong Saun long putim ol tok long kaset bilong yu, na nogut video-kamera samting i pasim rot bilong ol man i wokabaut i go i kam.
21 Ples Bilong Sindaun: Sampela taim i hatwok long painim sia bilong sindaun, long wanem, sampela narapela i bin pasim ol sia. Olsem na mipela i laik kirapim tingting bilong yupela olgeta olsem: YU KEN KISIM OL SIA BILONG FAMILI BILONG YU TASOL WANTAIM OL MAN I BIN KAM WANTAIM YU LONG KA BILONG YU.
22 Bai Yu Go Long Kibung? Long yia i go pinis, inap 6,972 i bung long ol “God i Skulim Yumi” Kibung Distrik i kamap long Papua Niugini, na planti i tok ol i bin pilim tru ol tok bilong kibung, ol dispela tok i bin givim nupela strong long ol. Inap 170 i kisim baptais, long wanem, ol i bin bihainim ol tok bilong Baibel God i bin skulim ol long en. Yumi amamas long harim ol gutpela tok bilong kibung long yia i go pinis, na dispela i mas kirapim yumi long wok strong long go long kibung bilong dispela yia, em “Pret Long God” Kibung Distrik.
23 Yu mas beten na stretim gut ol samting bambai yu inap kam long kibung long olgeta 3-pela de na redi long harim namba wan singsing na olgeta tok i go inap long laspela beten. Gutpela sapos yu stori long ol dispela tok wantaim ol nupela man i laik kam long kibung.—Ga 6:10.
24 Long Disemba 23, 1994, namba wan “Pret Long God” Kibung Distrik bai kamap long Papua Niugini. Olsem wanem? Yu stretim pinis ol samting na bai yu redi long bung wantaim ol brata sista na kisim ol gutpela tok bilong spirit? Mipela i beten askim Jehova long blesim hatwok yu mekim bilong kam long “Pret Long God” Kibung Distrik na kisim ol gutpela kaikai long tebol bilong Jehova.
Sampela Samting Yumi Mas Tingim Bilong Kibung Distrik
Baptais: Ol bai makim ples sindaun bilong ol man i laik kisim baptais, olsem na gutpela sapos ol man i laik kisim baptais ol i sindaun long ol dispela sia taim program i no kirap yet long Sarere long moningtaim. Tasol mipela i lukim olsem sampela i bin putim klos waswas i no stret inap long man i kisim baptais. Man i laik kisim baptais, em i mas kisim klos waswas na taul bilong em i kam long kibung. Klos waswas i mas stret long ol Kristen i pasim. Taim brata i mekim pinis tok bilong baptais na beten, siaman bilong program bai givim sampela toksave long ol man i laik kisim baptais na bihain bai yumi mekim singsing. Taim yumi mekim pinis laspela hap bilong singsing, ol atendan bai tokim ol man i laik baptais long wanem hap ol i mas i go long en bilong kisim baptais. Baptais i makim olsem man i dediket long Jehova, na em samting bilong em yet wantaim Jehova, olsem na i no stret long man i laik baptais i holim han samting bilong narapela na tupela o tripela i kisim baptais wantaim, nogat; mipela i no save baptaisim ol man long dispela rot.
Kat Bilong Pasim Long Klos: Taim yumi go i kam long kibung o taim yumi stap long ples kibung, gutpela sapos yumi pasim dispela kat long klos bilong yumi. Ol man i lukim dispela kat ol i ken luksave olsem yumi wanpela Witnes, na ating bai ol i laik save long kibung bilong yumi na bai rot i op bilong yumi ken autim tok long ol. Dispela samting i bin kamap tru olsem long taim bilong kibung long biktaun Mosko na Kiev long yia i go pinis. Yumi mas kisim dispela kat na plastik karamap bilong en long kongrigesen bilong yumi yet, long wanem, bai yumi no inap kisim long kibung. Ol painia na ol brata sista i wok long Betel, ol i mas karim kat wantaim ol, em kat Bilong Toksave Olsem Man i Mekim Wok Painia.
Wok Volantia: Olsem wanem? Yu inap makim sampela hap taim bilong mekim sampela wok long kibung? Maski yu inap mekim wok inap sampela aua tasol, dispela bai helpim gut ol brata bilong yumi na yu bai amamas long wok yu mekim. Ol pikinini i no winim yet 16 krismas, ol tu inap mekim sampela wok bilong helpim kibung, tasol ol i mas wok wantaim papa o mama bilong ol o narapela brata o sista i bikpela pinis.
Was Gut: Sapos yumi was gut, ating bai yumi no kisim hevi. Planti taim ol raskol i save stilim samting long man i lusim ples bilong em na i go stap long narapela hap. Olsem na yu mas lokim gut ka long olgeta taim, na no ken larim sampela samting i stap ples klia insait long ka; nogut ol man i brukim ka na kisim. Taim planti man i bung wantaim, dispela i pulim ol stilman i kam. Na tu, sampela man i kam long kibung ol i no Kristen tru. Olsem na no ken lusim sampela samting i stap long sia bilong yu, nogut ol dispela samting i pulim ai bilong ol. Na mipela i bin kisim tok olsem, sampela ausaitman i bin traim stilim ol pikinini. LONG OLGETA TAIM YU MAS SAVE, OL PIKININI BILONG YU I STAP WE.