Bihainim Gut Pasin Bilong Em
1 Jisas em i nambawan man tru na i winim olgeta narapela man i bin i stap long graun. Em i makim gutpela rot ol disaipel bilong em i ken bihainim. Maski yumi no gutpela man olsem Jisas, yumi mas bihainim gut “pasin bilong em.” (1 Pi 2:21) Yumi mas laik long kamap wankain olsem Jisas, na yumi mas wok strong long helpim ol narapela long kisim save long tok i tru.
2 Jisas em i man bilong autim tok, na tu, em i nambawan gutpela tisa. “Ol bikpela lain manmeri ol i kirap nogut tru long skul bilong en.” (Mt 7:28) Olsem wanem em i mekim gut dispela wok? Orait, gutpela sapos yumi skelim gut pasin bilong em long skulim ol man.
3 Olsem Wanem Yumi Ken Bihainim Jisas: Papa bilong Jisas i bin skulim em. (Jo 8:28) Em i laik givim biknem long Jehova na litimapim nem bilong Em. (Jo 17:4, 26) Taim yumi mekim wok bilong autim tok na lainim ol man, yumi tu i laik givim biknem long Jehova; yumi no laik litimapim nem bilong yumi yet.
4 Olgeta samting Jisas i lainim ol man long en, em i kisim long Tok Bilong God. Oltaim em i save kamapim ol tok bilong Baibel. (Mt 4:4, 7; 19:4; 22:31) Yumi laik kirapim ol man i harim tok bilong yumi long ol i mas lukim ol tok bilong Baibel; long dispela rot ol inap save ol tok yumi autim na lainim ol man long en, yumi kisim long Baibel, em tok bilong Nambawan Bikpela.
5 Jisas i save mekim liklik tok tasol i no hatwok long save long en. Olsem: Taim em i stori long ol samting yumi mas mekim na bai God i ken lusim rong bilong yumi, em i kirapim yumi yet long lusim rong bilong ol narapela. (Mt 6:14, 15) Olsem na taim yumi laik helpim ol narapela long save long tok bilong Kingdom, mekim tok i no hatwok long save long en.
6 Jisas i save kamapim ol tok piksa na askim bilong kirapim tingting bilong man. (Mt 13:34, 35; 22:20-22) Sapos yu mekim ol tok piksa i stori long ol samting ol man i save long en, dispela inap helpim ol long kisim gut ol tok bilong Baibel i hatwok liklik long man i save long en. Gutpela sapos yumi kamapim ol askim i kirapim man long tingim ol tok em i harim. Na kamapim sampela askim bilong stiaim man long kisim gut ol tok na kamapim bekim i stret.
7 Taim ol man i laik save long sampela tok i hatwok long kisim gut, Jisas i save lusim hap taim bilong helpim ol. Long dispela rot, ol man i laik harim tok, olsem ol disaipel bilong em, ol inap kisim as bilong ol tok Jisas i lainim ol long en. (Mt 13:36) Olsem na taim ol man i givim askim long yumi, na ol i laik tru long save long bekim bilong en, gutpela sapos yumi tu i helpim ol. Sapos yumi no save long bekim bilong en, orait, yumi mas wok long painim save long dispela samting na go bek lukim dispela man.
8 Na Jisas i mekim sampela ol narapela samting bilong lainim ol man. Olsem: Em i wasim lek bilong ol disaipel bilong em, maski em i Bikpela bilong ol. (Jo 13:2-16) Sapos yumi mekim pasin daun, dispela bai kirapim ol man long bihainim ol tok yumi lainim ol long en.
9 Jisas i kamapim ol tok bilong helpim man i laikim stretpela pasin na bai em i ken pilim tru ol tok long bel. Yumi tu i laik bai ol tok yumi mekim i ken go daun long bel bilong man. Ol man i gat wanpela laik i stap long skin bilong ol, em laik bilong lotuim wanpela bikpela man na sindaun gut wantaim ol narapela na stap bel isi na amamas—yumi laik kamapim ol tok bilong helpim kain man olsem.
10 Long mun Disemba yumi ken helpim ol man long save long ol samting yumi lainim pinis long Jisas, na tilim buk Nambawan Man Tru i Winim Olgeta Narapela Man. Sapos yumi bihainim pasin bilong Jisas long lainim ol man, ating dispela inap kirapim ol man i gat gutpela bel long putim gut yau taim yumi stori long ol samting Jisas i bin lainim ol man long en.—Mt 10:40.