‘Yupela i Mas i Stap Tisa’
‘Wokboi bilong Bikpela i mas i stap gutpela tisa.’—2 TIMOTI 2:24.
1, 2. Ol Kristen i mas bihainim wanem pasin bilong Jisas i nambawan tru?
LONG kirap bilong yia 31 C.E. Jisas i stap ausait na em i mekim tok long bikpela lain manmeri ol i kam bung bilong harim em i lainim ol man. Em i no gat maikrafon samting bilong helpim em na bai ol man inap harim gut ol tok em i mekim, tasol em i stap long maunten na em i mekim tok na ol man inap harim. Ol i kirap nogut long ol tok em i mekim na long pasin bilong em long lainim ol man. Baibel i tok: “Jisas i pinisim dispela tok, na bikpela lain manmeri ol i kirap nogut tru long skul bilong en.” (Matyu 7:28) Jisas i save skulim gut ol man. Em i nambawan gutpela tisa.
2 Na em i tokim ol disaipel bilong em ol tu i mas kamap tisa. Em i tok: “Olsem na yupela i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.” (Matyu 28:19, 20) Aposel Pol tu i tok ol Kristen i gat wok long lainim ol man. Em i tokim ol Kristen bilong lain Hibru: “Taim inap pinis long yupela i stap tisa.” (Hibru 5:12) Na em i tokim Timoti: “Wokboi bilong Bikpela i no ken pait. Nogat. Em i mas wok isi long olgeta man. Em i mas i stap gutpela tisa.”—2 Timoti 2:24.
3. I gat wanem wok tisa bilong Kristen?
3 Bilong wanem ol i mekim bikpela tok olsem long wok tisa? Long wanem ol Kristen i mas lainim ol man taim ol i go long ol haus na autim tok o ol i autim tok long rot o mekim go-bek o Baibel-stadi. Olsem na ol i mas save long pasin bilong lainim man. Taim ol i bung wantaim ol narapela man, ol i save painim rot bilong autim tok na lainim ol. (Lukim Jon 4:7-15). Na tu, taim wokman Kristen i mekim tok long Haus Kingdom o em i givim sampela tok long wanpela brata o sista, em i mekim wok tisa. Na ol strongpela meri Kristen i mas i stap olsem tisa na lainim ol yangpela meri long “gutpela pasin” ol i mas bihainim. (Taitas 2:3-5) Ol papamama Kristen ol i mas ‘skulim ol pikinini long tok bilong Jehova.’ Ol i mas mekim gutpela wok tisa bambai ol inap mekim olsem. (Efesas 6:4; Diuteronomi 6:6-8) Olsem na aposel Pol i tok, yumi ol Kristen “i mas i stap gutpela tisa”!
4, 5. I gat wanem samting bilong helpim yumi long kamap gutpela tisa?
4 Tasol wok tisa i hatwok. Yumi mas lain bambai yumi inap mekim gut. (2 Timoti 4:2) Tasol planti Kristen ol i no gat “save bilong dispela graun,” orait olsem wanem ol inap kamap gutpela tisa? (1 Korin 1:26) Jehova i mas helpim ol. (Matyu 19:26) Jehova i save givim gutpela tingting long ol man i beten askim em long givim tingting long ol. (Jems 1:5) Spirit holi bilong em i save helpim ol man i wok long bihainim laik bilong em. Na em i givim Baibel long yumi. Baibel em i “gutpela bilong givim save long yumi,” na em inap helpim yumi long “mekim olgeta gutpela wok,” wok tisa tu.—2 Timoti 3:16, 17.
5 Baibel i helpim yumi long kamap gutpela tisa. Long wanem Baibel i stori gut long ol wok Jisas i mekim bilong lainim ol man. Jisas em i gutpela tisa tru na ol man i harim tok bilong em ol i kirap nogut long pasin bilong em long lainim ol man. (Mak 1:22) Sapos yumi kisim save long ol pasin em i mekim na yumi wok long bihainim ol dispela pasin, dispela bai helpim yumi long kamap gutpela tisa. I gat tupela samting yumi mas skelim long wok tisa, em olsem: Ol pasin bilong tisa yet na pasin bilong em long skulim ol man. Orait, nau yumi ken skelim pasin bilong Jisas na dispela bai lainim yumi na helpim yumi long mekim gutpela wok tisa.
Tisa Yet . . .
6. Kolim wanpela pasin bilong Jisas yumi mas bihainim taim yumi skulim ol man. Bilong wanem dispela pasin i bikpela samting?
6 Wanpela taim Jisas i tok: “Dispela tok mi givim yupela, em i no bilong mi yet. Nogat. Em i bilong God, em i bin salim mi na mi kam.” (Jon 7:16) Na wanpela taim em i tok: “Mi no mekim wanpela samting long tingting bilong mi yet. Nogat. Mi save autim tok olsem Papa i bin soim mi.” (Jon 8:28) Jisas i kirapim ol man long tingim Papa bilong em. Em i Krais, tasol em i no tingting long litimapim nem bilong em yet, oltaim em i litimapim nem bilong Jehova. (Matyu 6:9; Jon 17:26) Dispela pasin daun i helpim Jisas long kamap nambawan gutpela tisa. Ol tisa Kristen long nau tu i mas i gat wankain pasin daun. Ol i no ken litimapim nem bilong ol yet; ol i mas litimapim nem bilong Jehova, em i As bilong ol tok ol i skulim man long en. Long dispela rot ol man i lain bai ol i kamap wokboi bilong God na ol i no ken kamap disaipel bilong wanpela man.—Lukim Aposel 20:30.
7, 8. (a) Jisas i gat wanem gutpela tingting long tok i tru? (Sam 119:97) (b) Sapos yumi gat kain gutpela tingting olsem, olsem wanem dispela inap helpim yumi long kamap gutpela tisa moa?
7 Na Jisas i kam bilong “autim tok tru,” olsem na em i mas save gut long tok i tru. (Jon 17:17; 18:37) Taim em i gat 12-pela krismas tasol em i tingim tru ol samting bilong Baibel. (Luk 2:46, 47) Em i laikim tumas tok i tru. (Sam 40:8) Jisas i save tru long ol tok i tru na em i laikim tumas na dispela samting i kirapim em long autim tok na helpim ol narapela man bambai ol i ken save long tok i tru. Em i laik lainim ol gut long dispela tok.—Jon 1:14; 12:49, 50.
8 Orait, olsem wanem long yumi? Ating yumi kisim planti save liklik long tok i tru, tasol yumi laikim tumas? Oltaim yumi save stadi bambai yumi inap mekim gutpela wok moa long en? Yumi amamas long toktok wantaim ol narapela man long tok i tru? Taim yumi wok long kisim save na yumi save gut long tok i tru, yumi save laikim moa yet, na yumi amamas long tokim ol narapela man long en. Man bilong raitim sam em i tok, “man i save laikim tumas lo bilong God, na em i save [kaunim] dispela lo long san na long nait,” dispela man i ken amamas. Baibel i tok olgeta samting dispela man i mekim “i save kamap gutpela,” wok tisa bilong em tu.—Sam 1:1-3.
9. I gat wanem narapela pasin bilong Jisas i helpim tru wok tisa bilong em?
9 Tasol sapos yumi save long wanpela samting, dispela tasol i no mekim yumi i kamap gutpela tisa. Taim yu stap long skul, ating i gat wanpela tisa bilong yu em i save tru long ol tok em i laik lainim ol manki long en, tasol em i no lainim ol gut, em i no gutpela tisa. Wanem as bilong dispela? Ating em i sot long wanpela pasin em i pasin tru bilong Jisas, em pasin bilong sori. Jisas i save tingim tru ol narapela man na sori long ol. Baibel i tok: “[Jisas] i lukim bikpela lain manmeri, na bel bilong en i sori long ol. Long wanem tingting bilong ol i paul nabaut, na ol i stap nogut tru, olsem sipsip i no gat wasman.” (Matyu 9:36) Maski skin bilong em i les o em i gat planti wok, em i redi tasol long helpim ol man. (Jon 4:6-26) Em i save mekim gutpela pasin long ol na pasin isi; em i no les kwik long ol liklik pasin kranki bilong ol. Em i laik helpim ol. (Luk 5:12, 13) Tisa Kristen i mas i gat ol dispela gutpela pasin bambai wok bilong em i ken kamap gutpela.
10. Bilong wanem yumi yet yumi mas bihainim gutpela pasin yumi laik lainim narapela man long en?
10 Na tingim namba foa samting i mekim Jisas i gutpela tisa tru: “Em i no bin mekim sin, na ol i no painim wanpela tok giaman long maus bilong em.” (1 Pita 2:22) Em i no mekim wanpela samting em inap pundaunim ol man na bai ol i no laik harim tok bilong em. Orait, olsem wanem long yumi? Pol i raitim pas long ol Rom na em i tok: “Yes, yu save skulim arapela man, tasol bilong wanem yu no save skulim yu yet? Yu save tokaut long man i no ken stil, tasol ating yu yet yu save stil?” (Rom 2:21) Olsem tasol elda i tokaut long ol brata i mas autim tok, em yet i save autim tok? Na brata i mekim tok bilong kirapim ol brata sista long kaunim Baibel, em yet i save kaunim? Sampela taim yu no ken toktok, pasin bilong yu tasol inap skulim man i mekim pasin birua na bai em i ‘tanim bel.’ (1 Pita 3:1) Tru tumas, gutpela pasin inap winim gutpela tok. Na sapos pasin bilong yu i no stret wantaim tok bilong yu, kwiktaim bai sumatin i save na tok bilong yu bai i lus nating; sumatin i no ken bihainim.
11. Nau yumi laik stori long wanem samting moa bilong wok tisa?
11 Tisa i laik litimapim nem bilong Jehova, na em i save gut long tok i tru na em i lainim tumas, na em i save sori long ol man, na em i save makim gutpela pasin ol i ken bihainim—olgeta dispela samting i mekim na em i stap gutpela tisa. Ol sumatin i save pilim ol gutpela pasin bilong kain tisa olsem, na maski em i no save tumas long ol pasin bilong skulim gut narapela man, tasol bai ol i harim gut tok bilong em. Tasol pasin bilong skulim gut narapela man em i bikpela samting na yumi mas lain gut long mekim. Nau yumi ken skelim sampela pasin yumi ken bihainim na bai yumi inap skulim gut ol man. Yumi ken skelim sampela pasin Jisas i bihainim na dispela inap helpim yu long kamap gutpela tisa moa.
. . . na Pasin Bilong Em long Skulim Man
12. (a) Matyu 5:3-12 i kamapim wanem gutpela pasin bilong Jisas long skulim ol man? (b) Olsem wanem yu inap bihainim dispela pasin bilong helpim yu long kamap gutpela tisa moa?
12 Sapos yu laik save long gutpela pasin bilong Jisas long skulim ol man, yu ken kaunim ol tok i stap long Matyu sapta 5:3-12. Olsem wanem long ol dispela tok? Jisas i tingim gut ol tok em i laik mekim. Em i mekim ol sotpela tok tasol, na em i kolim wanpela tok planti taim bilong helpim ol man long tingim, olsem: “Ol man i . . . em ol i ken amamas.” Em i kolim ol tok i no hatwok long save long en. Em i kamapim ol bikpela tok i tru, tasol em i no kolim ol bikpela bikpela tok. Em nau, sapos yu laik kamap gutpela tisa yu mas MEKIM OL TOK I NO HATWOK LONG SAVE LONG EN. Kaunim ol narapela tok Jisas i mekim long Matyu sapta 5 i go inap long sapta 7, na bai yu lukim sampela narapela bikpela tok i tru em i bin kamapim long ol tok i no hatwok long save long en. (Matyu 5:23, 24, 31, 32; 6:14; 7:12) Orait, nau yu ken tingting long olsem wanem yu ken bihainim dispela pasin. Tingim sampela tok i no hatwok long save long en, em yu ken kamapim bilong stori gut long sampela strongpela tok i tru, olsem tok bilong taim bilong ol man bilong ol arapela lain, o bilong wanem Baibel i tok sampela bai kisim laip long heven na sampela long graun.
13, 14. Olsem wanem ol tok piksa i helpim ol man long kisim gut ol tok Jisas i mekim?
13 Nau kaunim Matyu 5:14-16. Ol man bilong pasin daun ol i harim tok bilong Jisas, Jisas i kirapim ol long mekim gutpela tok na gutpela pasin na bai ol i stap olsem lait na ol man i ken save long tok i tru. Ating ol i kirap nogut long dispela samting em i tokim ol long mekim, long wanem long taim bilong ol, ol saveman bilong lo na ol Farisi tasol i stap tisa bilong ol Juda. Tasol Jisas i kamapim gut dispela tok na ol i kisim gut. Em i mekim olsem wanem? Em i mekim gutpela tok piksa. Dispela pasin Jisas i save bihainim bilong skulim ol man em inap helpim yu tu long kamap gutpela tisa, olsem: MEKIM OL TOK PIKSA.
14 Bilong wanem yumi mas mekim ol tok piksa? Long wanem tingting bilong yumi i save kisim gut ol tok piksa. Na sapos yumi stori long sampela samting ol man i save gut long en, dispela inap helpim ol long kisim save long ol samting bilong spirit. Olsem na Jisas i mekim tok piksa na em i tok, Jehova, em Man bilong harim beten, em i olsem wanpela papa i givim gutpela samting long ol pikinini bilong em. Rot i go long laip i gat hatwok na Jisas i mekim tok piksa long dispela samting na em i tok i olsem man i laik i go insait long liklik dua. Em i tok ol profet giaman i olsem weldok i pasim skin bilong sipsip, na ol i olsem diwai i karim kaikai nogut. (Matyu 7:7-11, 13-21) Ol dispela tok piksa i helpim ol man long kisim gut ol tok Jisas i laik lainim ol long en. Ol i no save lusim tingting long ol dispela tok.
15. Stori long olsem wanem ol Kristen i ken mekim wok long ol tok piksa long nau bilong kamap gutpela tisa moa.
15 Ol tisa Kristen long nau tu ol i save mekim wok long ol tok piksa bilong helpim ol man long kisim gut nupela tingting. Bilong soim ol man tok bilong bikpaia o hel i no stret, sampela i bin tok piksa olsem: ‘Sapos yu lukim wanpela papa em i laik givim strafe long pikinini bilong em i bikhet na em i putim han bilong pikinini i go insait long paia na holim i stap, bai yu ting olsem wanem long dispela papa?’ Na sapos yumi laik lainim ol man olsem sampela tasol bai ol i go long heven na ol narapela manmeri bai stap oltaim long graun, orait, yumi ken tok piksa long wanpela lain man, em sampela tasol ol i insait long gavman bilong ol na ol narapela i stap aninit long dispela gavman na wok bilong en i helpim ol. Tasol taim yu mekim tok piksa, yu mas stori long ol samting em man i harim em i save gut long en. Na yu no ken stori tumas na mekim bikpela tok bilong kamapim as bilong en. Sapos olsem bai man i no inap kisim gut.
16. Tasol wanem kain piksa i gutpela moa?
16 Na sampela taim yumi no ken mekim tok piksa, yumi ken soim wanpela samting long ol man olsem piksa bilong lainim ol. Jisas i bin mekim olsem. Taim ol i tokim em: “I orait yumi ken givim takis long Sisa o nogat?” em i soim wanpela mani bilong takis long ol na lainim ol. (Matyu 22:17-22) Taim em i laik lainim ol long bihainim pasin daun, em i singautim wanpela pikinini i kam na sanapim em namel long ol. (Matyu 18:1-6) Na taim em i 1aik lainim ol disaipel long givim bel olgeta long mekim wok bilong God, em i tokim ol long lukim wanpela rabismeri em i givim olgeta mani bilong em—inap olsem 10 toea samting—long tempel. (Mak 12:41-44) Sampela brata long nau, taim ol i mekim tok long Haus Kingdom, ol i save wokim piksa o raitim sampela tok long blekbot, o ol i mekim wok long slait, em dispela kain piksa ol i save sutim long banis. Na taim yumi mekim Baibel-stadi yumi ken mekim wok long ol piksa long ol buk o narapela samting bilong helpim yumi long lainim gut ol man. Samting ol man i lukim long ai, dispela i helpim gut ol, winim ol tok yumi mekim.
17. Kolim narapela pasin Jisas i save bihainim taim em i skulim ol man.
17 Orait, nau yu ken kaunim Matyu 12: 10-12 na lukim gutpela pasin bilong Jisas long mekim tok long ol Farisi. Ol i givim askim long em bilong trikim em, tasol em i save tru na em i bekim tok long ol. Yes, em i mekim gutpela tok piksa. Tasol em i mekim olsem wanem? Em i mekim wanpela askim. Long dispela rot em i stiaim tingting bilong ol man i harim tok bilong em na helpim ol long kisim stretpela tingting long Sabat. Tru tumas, sapos yumi MEKIM OL ASKIM olsem Jisas i bin mekim, dispela inap helpim yumi long lainim gut ol man. Jisas i mekim wok long ol askim bilong kirapim tingting bilong ol man i harim tok bilong em, na bilong kirapim ol birua long senisim tingting bilong ol.—Matyu 17:24-27; 21:23-27; 22:41-46.
18. Stori long olsem wanem ol Kristen long nau i ken mekim wok long ol askim taim ol i toktok wantaim ol man long sampela bikpela as tok bilong Baibel.
18 Ol Kristen long nau tu i ken mekim wankain wok long ol askim. Man i bilip long God Triwan na em i kolim tok bilong Matyu 28:18 bilong helpim dispela bilip bilong em na em i tok Jisas i gat olgeta strong, olsem na em i bikpela olsem God, orait, tisa i gat save pinis, em bai givim askim long dispela man, olsem: ‘Tru, Jisas i gat bikpela namba, tasol Baibel i tok wanpela man i bin givim dispela namba long Jisas. Husat dispela Man? Na taim em i no kisim yet dispela bikpela namba, em i stap olsem wanem?’ Kain askim olsem inap kirapim tingting bilong man i bilip long God Triwan na stretim tingting bilong em long dispela skripsa. Na man i bilip olsem ol man nogut i save go long bikpaia, ating em bai kolim tok piksa bilong maniman na Lasaras bilong strongim dispela bilip bilong em. (Luk 16:19-31) Orait, ating sampela askim inap helpim em, olsem: Taim dispela rabisman i dai, em i go we? Sapos em i go long heven, orait, olsem wanem? Ating olgeta man long heven ol i stap wantaim Ebraham? Na olsem wanem na Ebraham i stap long heven, long wanem Jisas i tok, paslain long taim bilong em i no gat wanpela man i bin go long heven? (Jon 3:13) Ol kain askim olsem bai helpim dispela man long save ol dispela tok em i tok piksa. Ol samting i painim rabisman na maniman taim ol i “dai” i olsem piksa na i makim sampela samting. Baibel i no tok i gat wanpela ples paia bilong ol man nogut.—Eklisiastis 9:10.
19. Olsem wanem ol askim inap helpim yumi long skulim gut ol man?
19 Ol askim i kirapim tingting bilong sumatin na helpim em long lain na kisim save. Ol askim tisa i mekim bilong kirapim tingting bilong sumatin na i no bilong sumatin i bekim, ol dispela kain askim tu i gutpela. Jisas i mekim dispela kain askim long Matyu 11:7-11. Na ol askim i gat narapela wok tu. Yumi mas save long tingting bilong man pastaim na bai yumi inap helpim em. Jisas inap save long tingting bilong man, tasol yumi, nogat. I gat wanpela rot tasol bilong yumi ken save long ol tingting i stap long bel bilong man, em olsem: Yumi mas tingim sampela gutpela askim na givim long em bilong kirapim em long kamapim tingting bilong em.—Provep 18:13; 20:5.
20. Sapos yumi ‘was gut long pasin yumi yet i mekim, na long wok bilong skulim ol man,’ bai yumi kisim wanem gutpela pe? (1 Timoti 4:16)
20 Tru tumas, yumi mas lain bambai yumi inap kamap gutpela tisa. Tisa i mas lain long bihainim ol gutpela pasin na em i mas wok strong long lain long pasin bilong skulim man. Em hatwok, tasol yumi inap lain. Sapos yumi laik i stap Kristen, yumi mas i stap tisa. Planti wok em Kristen i mas mekim i gat wok tisa insait long en. Olsem na yumi mas bihainim tok bilong Pol, em i tok: “Was gut long pasin yu yet yu mekim, na long wok bilong skulim ol man.” Tru, sampela ol i gat save long skin bilong ol na ol i no hatwok long mekim wok tisa na sampela, nogat. Tasol sapos yumi wok strong long lain na yumi wetim Jehova i helpim yumi, yumi olgeta yumi inap mekim gutpela wok tisa. Sapos yumi wok strong olsem bai yumi kisim gutpela pe. Pol i tok: “Sapos yu mekim olsem, bai wok bilong yu em i mekim gut yu yet, na bai em i mekim gut ol man i harim maus bilong yu tu.”—1 Timoti 4:16.
Yu Inap Stori?
◻ Wanem ol gutpela pasin i helpim Jisas na em i gutpela tisa?
◻ Ol dispela pasin inap helpim yumi olsem wanem?
◻ Bilong wanem tisa i mas mekim ol tok i no hatwok long save long en?
◻ Olsem wanem na ol tok piksa na askim inap helpim yumi long mekim gutpela wok tisa?
[Piksa long pes 9]
Pasin bilong Jisas long skulim ol man i narapela kain long pasin bilong ol bikman bilong lotu
[Piksa long pes 11]
Olsem Jisas, olsem tasol ol Kristen long nau tu i bihainim olgeta rot bilong skulim ol man