Tingting Gut na Mekim Gutpela Tok Taim Yumi Skulim Man
“Man i gat gutpela tingting, em i save tingting gut pastaim na bihain em i mekim gutpela tok. Na dispela i save mekim ol man i laikim tumas long harim tok bilong en.”—SINDAUN 16:23.
1. Bilong skulim narapela long Tok Bilong God, bilong wanem yumi no ken givim save tasol long em?
YUMI ol tisa bilong Tok Bilong God i gat wok long givim lait, olsem save, long bel bilong ol sumatin bilong yumi—i no long tingting tasol bilong ol. (Efesus 1:18) Olsem na taim yumi skulim ol man, i no inap yumi givim save long ol na em tasol, nogat. Sindaun 16:23 i tok: “Man i gat gutpela tingting, em i save tingting gut pastaim na bihain em i mekim gutpela tok. Na dispela i save mekim ol man i laikim tumas long harim tok bilong en.”
2 Aposel Pol i save bihainim dispela tok taim em i mekim wok tisa. Taim em i stap long Korin, “long olgeta de Sabat [em] i save go long haus lotu bilong ol Juda na em i save toktok wantaim ol. Em i laik kirapim tingting bilong ol Juda na ol Grik bai ol i bilip long Jisas.” (Aposel 18:4) Wanpela dikseneri i tok, tok Grik ol i tanim long dispela ves olsem “kirapim tingting,” em i makim pasin olsem: “mekim tok i kirapim man long senisim tingting bilong em long ol tok yu kamapim i stret long tingting bilong em o long ol tok i kirapim em long tingim stretpela pasin em i mas bihainim.” Long rot bilong kamapim gut as bilong tok bambai ol man i ken bilipim, Pol i bin kirapim ol man long kisim nupela tingting. Em i save gut tru long pasin bilong pulim tingting bilong man long bihainim wanpela tok, olsem na ol birua i pret long em. (Aposel 19:24-27) Tasol Pol i no mekim dispela wok bilong skulim man long strong bilong em yet. Em i tokim ol Korin: “Tok mi bin mekim na gutnius mi bin autim, em mi no mekim long pasin bilong ol saveman, bai bikpela save bilong mi i ken senisim tingting bilong yupela. Nogat. Mi bin soim strong bilong Holi Spirit long yupela. Mi bin mekim olsem, long wanem, mi no laik bai save bilong man i kamapim bilip bilong yupela. Nogat. Mi laik bai strong bilong God tasol i kamapim dispela bilip.” (1 Korin 2:4, 5) Olgeta Kristen i gat spirit bilong God Jehova long helpim ol, olsem na olgeta inap kamap tisa i save gut long pasin bilong mekim tok bilong pulim tingting bilong narapela long bihainim wanpela tok. Tasol ol inap mekim olsem wanem? Orait nau yumi ken stori long sampela kain pasin bilong skulim gut man.
Putim Gut Yau
3. Taim yumi skulim man, bilong wanem yumi mas save long tingting bilong em? Yumi mas mekim wanem na bai yumi inap putim tok i go daun long bel bilong sumatin?
3 Namba wan pasin bilong skulim gut man em pasin bilong putim yau—pasin bilong toktok, nogat. Olsem Sindaun 16:23 i tok, bilong pulim tingting bilong narapela long laikim tumas wanpela tok, yumi mas tingting gut—yumi mas save long tingting bilong man. Jisas i save gut long tingting bilong ol man em i lainim. Jon 2:25 i tok: “Em yet i save pinis long tingting bilong ol man.” Tasol olsem wanem yumi inap save long ol tingting i stap long bel bilong man yumi lainim? Wanpela samting yumi ken mekim, em yumi mas putim gut yau long toktok bilong man. Jems 1:19 i tok: “Yupela olgeta i mas putim yau kwik long harim tok, tasol yupela i no ken hariap long mekim toktok.” Tru, i no olgeta man i amamas long kamapim tingting bilong ol. Tasol taim ol sumatin yumi stadi wantaim ol long Baibel ol i save tru olsem yumi tingim gut ol, ating ol bai amamas long kamapim tingting tru i stap long bel bilong ol. Pasin bilong mekim ol gutpela askim long pasin sori, sampela taim dispela inap helpim yumi long kisim save long ol tingting i stap long bel bilong ol na “pulim” i kam antap.—Sindaun 20:5.
4 Em i bikpela samting tru long ol elda Kristen i mas putim gut yau taim man i toktok. Long dispela rot tasol ol inap save tru long ol tok ol i mas mekim bilong “bekim gut tok bilong olgeta man.” (Kolosi 4:6) Sindaun 18:13 i tok: “Putim gut yau pastaim, na bihain yu ken bekim tok. Sapos yu no mekim olsem, orait yu mekim longlong pasin na yu gat sem.” Wanpela taim, tupela brata i laik helpim wanpela sista i bin lusim sampela miting na ol i kamapim sampela tok bilong helpim em long was gut long pasin bilong laikim tumas ol samting bilong dispela graun. Sista i bel hevi tru ol i no bin askim em i gat wanem as na em i bin lusim sampela miting. Nau tasol ol dokta i bin katim em na skin bilong em i no strong tumas. Olsem na taim yumi laik givim tok long narapela, pastaim harim tok bilong em—dispela em i bikpela samting!
5. Ol elda i ken mekim wanem taim hevi i kamap namel long ol brata?
5 Sampela taim, ol elda i mekim wok tisa ol i mas givim strongpela tok long narapela. Long dispela kain taim tu ol i mas putim gut yau. Tasol taim hevi i kamap namel long ol wanwok Kristen, ol i mas putim yau moa yet. Ol i mas putim yau pastaim na bihain mekim sampela tok—long dispela rot tasol ol inap bihainim pasin bilong “dispela Papa em i no save ting long nem bilong yumi na em i skelim yumi.” (1 Pita 1:17) Ating bel bilong ol brata insait long kain hevi olsem bai i kirap tru, na elda i mas tingim tok bilong Sindaun 18:17: “Taim wanpela man i sanap long kot na toktok, i luk olsem tok bilong en bai i win. Tasol taim arapela man i askim em long kliaim dispela tok, ol man i no save husat tru bai i win.” Olsem na elda i mekim gutpela wok tisa, em i mas putim gut yau long tok bilong tupela brata wantaim em hevi i stap namel long ol. Long rot bilong beten em inap helpim bel bilong tupela long stap isi. (Jems 3:18) Sapos narapela i belhat long narapela, em i ken tokim tupela long kamapim tingting bilong ol long em stret—nogut tupela i tok pait wantaim. Long rot bilong ol gutpela askim, ating elda inap kamapim klia wanem samting i as tru bilong dispela hevi. Taim hevi i kamap namel long tupela, planti taim as bilong dispela i olsem: tupela i no bin toktok gut wantaim—i no olsem narapela i laik mekim nogut long narapela, nogat. Tasol sapos ol i bin brukim sampela lo bilong Baibel, orait nau gutpela tisa i bin putim gut yau taim tupela i toktok na em i save long tingting bilong ol, em inap kamapim ol tok bilong skulim gut ol.
Kamapim Klia Ol Tok
6. Olsem wanem Pol na Jisas i stap olsem gutpela piksa long pasin bilong kamapim klia ol tok taim ol i skulim ol man?
6 Narapela pasin bilong skulim gut man, em pasin bilong kamapim klia ol tok inap long ol man i ken kisim gut. Tru, yumi laik bai ol man i stadi long Baibel ol i mas save long tok i tru “i bikpela tru, na i go longpela moa, na i go antap tru, na i go daun moa.” (Efesus 3:18) Sampela tok bilong Baibel i kirapim tingting bilong man na sampela taim i hatwok long kisim gut insait bilong en. (Rom 11:33) Tasol taim Pol i autim tok long ol Grik, em i toktok tasol long ‘Krais i bin i dai long diwai.’ (1 Korin 2:1, 2) Na Jisas tu, taim em i autim tok em i kamapim klia ol tok ol man i amamas long harim. Taim em i mekim bikpela tok bilong em long maunten, em i kolim ol tok i no hatwok long ol man i kisim gut. Tasol dispela tok em i mekim i kamapim sampela bikpela tok i tru.—Matyu, sapta 5-7.
7. Taim yumi mekim ol Baibel-stadi, olsem wanem yumi inap kamapim klia ol tok?
7 Taim yumi stadi wantaim ol man long Baibel, yumi tu i mas kamapim klia ol tok inap long ol man i ken kisim gut. Olsem wanem yumi inap mekim olsem? Long rot bilong tingim “ol samting i bikpela samting tru.” (Filipai 1:10, NW) Taim yumi stadi wantaim man long ol strongpela tok, yumi mas kolim klia ol tok. Yumi mas kamapim ol bikpela skripsa tasol; nogut yumi kaunim na stori long olgeta skripsa em buk i kolim sapta na ves tasol. Bilong mekim olsem, yumi mas redi gut pastaim. Na yumi no ken kamapim planti narapela tok i karamapim ol bikpela tok bilong stadi o larim ol liklik samting i pulim yumi long toktok long sampela narapela samting na nau sumatin i no inap tingim gut ol bikpela tok. Sapos sumatin i kamapim askim bilong samting i no insait long stadi, orait long pasin isi yu ken tokim em, taim stadi i pinis bai yu bekim dispela askim.
Kamapim Ol Gutpela Askim
8 Narapela pasin bilong skulim gut man, em pasin bilong kamapim ol gutpela askim. Krais Jisas i bin mekim wok long planti askim taim em i skulim ol man. Jisas i askim Pita: “ ‘Saimon, yu ting wanem? Ol king bilong dispela graun i save kisim pe bilong ol kain kain takis long husat? Ol i save kisim long ol lain bilong ol yet, o long ol arapela man?’ Na Pita i tok, ‘Long ol arapela man.’ Na Jisas i tokim em, ‘Olsem na ol lain bilong ol yet i no mas givim takis.’ ” (Matyu 17:24-26) Jisas em i Pikinini bilong dispela Man ol i lotuim em long tempel, olsem na i no gat wok long Jisas i givim takis bilong tempel. Tasol Jisas i helpim ol man long kisim gut dispela tok i tru long rot bilong ol gutpela askim. Em nau, long dispela rot Jisas i helpim Pita long tingim ol tok em i save pinis long en bambai em i ken kamapim bekim i stret.
9. Olsem wanem yumi ken mekim wok long ol askim taim yumi mekim ol Baibel-stadi?
9 Yumi tu ken mekim gutpela wok long ol askim taim yumi mekim ol Baibel-stadi. Sapos sumatin i bekim kranki wanpela tok, ating yumi laik kolim bekim i stret, tasol sapos yumi mekim olsem, yu ting sumatin bai holimpas dispela tok long tingting bilong em? Planti taim i gutpela sapos yumi kamapim sampela askim moa bilong stiaim tingting bilong sumatin long kamapim bekim i stret. Olsem: Sapos em i hatwok long save olsem i gat wanem as na i bikpela samting long em i mas mekim wok long nem bilong God, orait yu ken askim em, ‘Nem bilong yu i bikpela samting long yu? . . . Bilong wanem i bikpela samting long yu? . . . Sapos man i no laik tru long kolim nem bilong yu, bai yu pilim olsem wanem? . . . Em nau, i stret yumi ken ting olsem God tu i laik bai yumi kolim nem bilong em, a?’
10. Olsem wanem ol elda i ken mekim wok long ol askim bilong helpim ol man i bin kisim hevi na bel bilong ol i bagarap?
10 Ol elda tu i ken mekim gutpela wok long ol askim taim ol i go lukim ol brata. Planti long kongrigesen i bin kisim kain kain hevi long han bilong ol man bilong dispela graun na bel bilong ol i bagarap, na ating ol i pilim olsem ol i no klin na ol i no inap long wanpela man i ken laikim ol. Elda i ken toktok gut wantaim kain man olsem na tok: ‘Maski yu ting yu no klin, Jehova i gat wanem tingting long yu? Sapos gutpela Papa bilong yu long heven i bin larim Pikinini bilong em i dai bilong baim bek yu, ating dispela i makim olsem God i laikim tumas yu, a?’—Jon 3:16.
11. Pasin bilong kamapim ol askim em ol man i harim ol i no gat wok long bekim long maus, i save mekim wanem? Olsem wanem brata i mekim pablik-tok i ken mekim wok long dispela kain askim?
11 Narapela pasin bilong skulim gut man, em pasin bilong kamapim sampela askim ol man i harim ol i no gat wok long bekim long maus. Ol dispela kain askim i gat wok long helpim man long wokim tingting na skelim gut ol samting. Planti taim ol profet bilong bipo i bin kamapim dispela kain askim bilong kirapim man i harim tok long wokim gut tingting. (Jeremaia 18:14, 15) Jisas i bin mekim gutpela wok long dispela kain askim. (Matyu 11:7-11) Kain askim olsem i gutpela long kamapim taim brata i mekim pablik-tok. Nogut em i tok tasol olsem man i mas givim bel olgeta long mekim wok bilong Jehova bambai Jehova i ken orait long em. Ating mobeta em i mekim askim, ‘Sapos yumi no givim bel tru long mekim wok bilong Jehova, yu ting Jehova bai orait long yumi?’
12. Pasin bilong mekim ol askim bilong kamapim tingting bilong sumatin em i gutpela olsem wanem?
12 Pasin bilong mekim ol askim bilong kamapim tingting bilong sumatin em i gutpela bilong helpim yumi long save, sumatin i bilip tru long samting em i lainim o nogat. (Matyu 16:13-16) Ating sumatin bai bekim tok i stret olsem i no stret yumi mekim pasin pamuk. Tasol gutpela sapos yumi kamapim sampela askim moa, olsem: Wanem tingting bilong yu yet long lo bilong God long pasin pamuk? Yu ting dispela lo em i strong tumas? Sapos yu bihainim ol lo bilong God o nogat, yu ting dispela em i bikpela samting?
Ol Tok Piksa i Save Putim Tok i Go Daun Long Bel Bilong Man
13, 14. (a) Taim yumi mekim tok piksa, i olsem yumi mekim wanem? (b) Olsem wanem ol gutpela tok piksa inap helpim man long kisim gut tok?
13 Pasin bilong mekim ol gutpela tok piksa em i narapela rot bilong putim tok i go daun long bel bilong man i harim tok na man i stadi long Baibel. Tok Grik yumi tanim olsem “tok piksa,” i olsem “putim klostu long o putim wantaim.” Taim yumi mekim tok piksa, yumi save stori long wanpela samting long rot bilong ‘putim dispela samting klostu long’ narapela samting i wankain liklik. Olsem: Jisas i kamapim dispela askim: “Bai yumi tok, kingdom bilong God i olsem wanem samting? Yumi ken mekim wanem kain tok piksa?” Bilong bekim dispela askim, Jisas i stori long pikinini bilong mastet, em planti man i save pinis long en.—Mak 4:30-32.
14 Ol profet bilong God i bin mekim wok long planti strongpela tok piksa. God i bin mekim wok long ol Asiria bilong givim strafe long ol Israel, tasol taim ol i kirap na mekim pasin i nogut tru, Aisaia i kamapim hambakpasin bilong ol long rot bilong dispela tok piksa: “Inap long wanpela tamiok i tok olsem em yet i bikpela, na strong bilong en i winim strong bilong man i holim em na i katim samting long en, a? Inap wanpela so i tok em yet i winim man i holim em na katim samting, a?” (Aisaia 10:15) Taim Jisas i skulim ol man, em tu i save mekim planti tok piksa. Ol man i tok, “em i no autim klia wanpela tok long ol manmeri. Nogat. Em i save autim long tok piksa tasol.” (Mak 4:34) Ol gutpela tok piksa i save mekim gutpela wok, long wanem, ol i kirapim tingting na bel wantaim. Ol i helpim man i harim tok long kisim kwik ol nupela tok long rot bilong skelim dispela tok wantaim ol samting em i save pinis long en.
15, 16. Olsem wanem yumi inap mekim ol gutpela tok piksa? Stori long sampela.
15 Olsem wanem yumi ken mekim ol tok piksa i save putim tok i go daun tru long bel bilong man? Namba wan samting, tok piksa i mas stret long samting yumi stori long en. Sapos tok piksa i no makim stret samting yumi stori long en, dispela tok piksa bai paulim tingting bilong man—em i no givim save long em. Wanpela taim wanpela man i mekim tok na em i laik kamapim pasin bilong lain remnan long daun long Krais Jisas, olsem na em i tok piksa long wanpela dok i save bihainim tok bilong papa bilong en. Tasol yu ting dispela kain tok piksa long skelim pasin daun bilong lain remnan wantaim pasin bilong dok em i gutpela? Tasol Baibel i kamapim wanpela gutpela tok piksa tru long pasin bilong lain remnan long daun long Krais Jisas. Long dispela tok piksa, lain bilong Jisas, olsem lain 144,000, ol i kain olsem wanpela “meri i laik marit na i putim gutpela bilas na i redi long maritim man bilong en.”—KTH 21:2.
16 Ol tok piksa i gutpela taim ol i stret long ol samting man i save long en. Tok piksa bilong Natan long wanpela pikinini sipsip wanpela man i bin kilim, dispela i mekim na bel bilong King Devit i pilim tru, long wanem, em i save laikim tru ol sipsip, na taim em i yangpela em i bin mekim wok olsem wasman bilong ol sipsip. (1 Samuel 16:11-13; 2 Samuel 12:1-7) Sapos dispela tok piksa i bin stori long wanpela bulmakau man, ating Devit i no inap pilim tru, a? Na i wankain tu sapos yumi tok piksa long sampela samting bilong saiens i narapela kain o long samting i bin kamap bipo ol man i no save gut long en; ating ol man i harim kain tok piksa olsem ol i no inap kisim gut. Jisas i bin mekim tok piksa long ol samting ol man i save lukim long olgeta de. Em i stori long ol samting ol man i save long en olsem lam, pisin, na plaua. (Matyu 5:15, 16; 6:26, 28) Ol man i harim tok bilong Jisas ol i save long ol dispela samting.
17. (a) Yumi ken mekim tok piksa long wanem ol samting? (b) Olsem wanem yumi ken senisim ol tok piksa long buk bilong stadi na bai ol i stret long sumatin bilong yumi?
17 Taim yumi mekim wok autim tok, rot i op planti taim long yumi ken kamapim ol gutpela tok piksa. Lukim gut ol samting. (Aposel 17:22, 23) Ating yumi ken mekim tok piksa long pikinini o haus o wok samting bilong man i harim tok. O yumi ken mekim wok long samting bilong sumatin yumi save pinis long en bilong kamapim gut moa ol tok piksa i stap long buk bilong stadi. Olsem: Tingim gutpela tok piksa long paragraf 14 bilong sapta 8 long buk Save i Bringim Man Long Laip Oltaim. Em i stori long wanpela gutpela papa na wanpela man i sindaun klostu em i kirap mekim ol tok giaman olsem em i papa nogut. Orait gutpela sapos yumi tingim dispela tok piksa na olsem wanem yumi inap senisim sampela tok long en na bai i stret long dispela sumatin em yet i wanpela papa.
Kaunim Gut Ol Skripsa
18. Bilong wanem yumi mas wok strong long kisim pasin bilong kolim gut ol tok yumi kaunim?
18 Pol i tokim Timoti: “Yu mas wok yet long ritim buk bilong God long ol manmeri na long autim as bilong tok long ol na long skulim ol gut long pasin God i laikim.” (1 Timoti 4:13) Baibel i as bilong ol tok yumi lainim ol man long en, olsem na taim yumi kaunim tok bilong Baibel long ol man, yumi mas kaunim gut. Ol Livai i bin kisim gutpela wok bilong kaunim Lo Bilong Moses long lain bilong God. Yu ting ol i popaia long kolim sampela tok o kaunim nating tasol? Nogat, ol i no mekim olsem. Long Nehemia 8:8, Baibel i tok: “Esra i ritim lo long tok Hibru, na ol Livai i tanim long tok Aram, bilong ol manmeri i ken save gut. Na tu ol Livai i autim as bilong lo long ol.”
19. Yumi ken mekim wanem na bai pasin bilong yumi long kaunim ol skripsa i ken kamap gutpela?
19 Sampela man Kristen ol i save long pasin bilong kolim gut tok, tasol taim ol i kaunim tok long ol man, ol i no kaunim gut. Olsem wanem pasin bilong ol long kaunim tok i ken kamap gutpela? Ol i mas mekim mekim planti taim. Ol i mas kaunim kaunim long maus inap long ol i ken kolim gut. Olsem na sapos sampela nem i hatwok long kolim, olsem nem Epafroditus, orait brukim long ol liklik hap, olsem E-pa-fro-di-tus, na wok long kolim kolim. (Filipai 2:25) Sapos yu gat ol kaset bilong Baibel long tok ples bilong yu, i gutpela sapos yu putim yau long pasin bilong man long kolim tok—em i kolim strong ol bikpela tok na em i senisim pasin bilong toktok. Na tingim pasin bilong em long kolim stret nem bilong ol samting. Sapos yu gat Baibel New World Translation long tok ples bilong yu, lukim ol rait bilong en—i gat ol liklik mak ol i bin putim long nem bilong ol man na ol ples bambai man i kaunim em inap kolim stret.
20. Olsem wanem yumi inap ‘was gut long ol wok yumi mekim bilong skulim ol man’?
20 Yumi ol lain bilong Jehova na em i gutpela samting tru em i mekim wok long yumi bilong mekim wok tisa! Olsem na yumi wan wan i mas tingim gut dispela wok. Yumi mas ‘was gut long ol pasin bilong yumi na long wok yumi mekim bilong skulim ol man.’ (1 Timoti 4:16) Yumi ken mekim gutpela wok tisa long rot bilong putim gut yau, na mekim ol tok i klia, na kamapim ol gutpela askim, na mekim ol gutpela tok piksa, na kaunim gut ol tok bilong Baibel. Sapos yumi olgeta i larim Jehova i skulim yumi long rot bilong oganaisesen bilong em, dispela bai helpim yumi long kamap olsem man em ‘God i bin skulim em long gutpela pasin bilong toktok.’ (Aisaia 50:4) Sapos yumi mekim gutpela wok long ol tul bilong helpim yumi long mekim wok autim tok, olsem ol buklet, kaset, na video, bai yumi inap lain long pasin bilong tingting gut na mekim gutpela tok taim yumi skulim ol man.
Yu Inap Tingim?
◻ Olsem wanem pasin bilong putim gut yau taim man i toktok inap helpim yumi long skulim gut man?
◻ Olsem wanem yumi inap bihainim pasin bilong Pol na Jisas na kolim klia ol tok taim yumi skulim man?
◻ Taim yumi skulim ol man, wanem sampela kain askim yumi ken kamapim?
◻ Wanem kain tok piksa i gutpela?
◻ Yumi ken mekim wanem na bai pasin bilong yumi long kaunim tok long ol man i ken kamap gutpela moa?
2. (a) Wanem insait bilong dispela tok, kirapim tingting bilong man? (b) Olsem wanem olgeta Kristen inap kamap tisa i save gut long pasin bilong mekim tok bilong pulim tingting bilong narapela?
4. Bilong wanem ol elda Kristen i mas putim gut yau taim man i toktok?
8. Olsem wanem Jisas i bin mekim gutpela wok long ol askim?
[Piksa long pes 16]
Gutpela tisa i save putim yau taim man i toktok bambai em inap kisim save long tingting bilong man
[Ol Piksa long pes 18]
Jisas i bin mekim tok piksa long ol samting ol man i save lukim long olgeta de