Was Gut Long Wok Yu Mekim Bilong Skulim Ol Man
“Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.”—1 TIMOTI 4:16.
1, 2. Bilong wanem i mas i gat planti man i wok strong olsem tisa?
“YUPELA i mas i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.” (Matyu 28:19, 20) Em wanpela wok Krais Jisas i tokim lain bilong em long mekim, olsem na olgeta Kristen i mas wok long kamap tisa. I mas i gat planti man i wok strong olsem tisa bilong helpim ol man i gat gutpela bel long kisim save long God—nogut bihain i no gat rot moa. (Rom 13:11) Aposel Pol i tok: “Maski sapos ol man i redi long harim tok o ol i no redi, oltaim yu mas wok strong long autim tok bilong Krais.” (2 Timoti 4:2) Em nau, i gat wok bilong skulim ol man i stap insait long kongrigesen na long ausait tu. Tru tumas, bilong inapim wok bilong yumi long autim tok i no olsem yumi tokim ol man long tok bilong God na em tasol, nogat. Bilong ol man i laik harim gutnius i ken kamap disaipel, yumi mas skulim gut ol.
2 Yumi stap long taim bilong “planti hevi nogut tru.” (2 Timoti 3:1) Ol tingting bilong dispela graun na ol tok giaman i bin paulim tingting bilong planti man. “Save bilong [planti man] i olsem tudak” na “ol i no save sem moa long pasin ol i save mekim.” (Efesus 4:18, 19) Bel bilong sampela i bagarap stret. Tru tumas, “tingting bilong ol [man] i paul nabaut, na ol i stap nogut tru, olsem ol sipsip i no gat wasman.” (Matyu 9:36) Tasol sapos yumi skulim gut ol man, yumi inap helpim ol man i gat gutpela bel long senisim sampela pasin bilong ol, ol i mas senisim.
Ol Tisa Insait Long Kongrigesen
3. (a) Wanem ol wok i insait long dispela tok bilong Jisas bilong lainim ol man? (b) Husat ol i go pas long skulim ol man insait long kongrigesen?
3 Long rot bilong mekim Baibel-stadi wantaim ol man long haus bilong ol yet, planti milion manmeri ol i wok long kisim save. Tasol taim ol i baptais pinis, yumi mas wok yet long helpim ol na bai ol inap “sanap strong.” (Efesus 3:17) Olsem na taim yumi bihainim tok bilong Jisas long Matyu 28:19, 20 na stiaim ol nupela man i go long oganaisesen bilong Jehova na ol i go long ol miting bilong kongrigesen, ol i kisim sampela save moa. Olsem Efesus 4:11-13 i tok, sampela man i bin kisim ‘wok pasto na wok bilong skulim ol manmeri, na ol i helpim ol manmeri bilong God na bai ol inap long mekim gutpela wok bilong em, na bai bodi bilong Krais i ken kamap strong na i stap gut.’ Bilong mekim wok bilong skulim gut man, sampela taim ol tisa i mas “givim strongpela tok long ol bilong sutim bel bilong ol na bilong kirapim ol long tanim bel na bihainim pasin bilong God. Na oltaim [ol i] mas isi long ol.” (2 Timoti 4:2) Wok tisa em i bikpela wok tru, olsem na long pas Pol i raitim long ol Korin, Pol i kolim wok bilong ol tisa bihain stret long em i kolim wok bilong ol aposel na ol profet.—1 Korin 12:28.
4 Tru, olgeta Kristen i no inap holim wok elda, o wasman. Tasol yumi olgeta i gat wok long “laikim ol arapela na mekim ol gutpela pasin long ol.” (Hibru 10:24, 25) Long ol miting yumi ken mekim olsem long rot bilong givim bel long bekim ol tok yumi bin redim gut—ol dispela kain bekim inap strongim bel bilong ol brata. Na ol pablisa i save gut long pasin bilong autim tok bilong Kingdom ol inap ‘kirapim arapela long mekim gutpela pasin long arapela’ taim ol i wok wantaim ol nupela long autim tok na stori long ol samting ol i bin kisim save long en. Long ol dispela kain taim na long ol narapela taim na ples tu, narapela i ken stori wantaim narapela long ol gutpela samting bilong helpim em. Olsem: Ol meri i strong long ol samting bilong spirit ol i ken “skulim ol arapela long mekim gutpela pasin.”—Taitus 2:3.
Kirapim Ol Long Bilip
5, 6. (a) Olsem wanem lotu Kristen tru i narapela kain long lotu giaman? (b) Ol elda i save mekim wanem bilong helpim ol nupela man long bihainim stretpela tingting?
5 Olsem na lotu Kristen tru em i narapela kain long ol lotu giaman, em planti ol i laik bosim tingting bilong lain bilong ol. Lotu giaman i laik bai lain bilong en i bihainim nating ol tok. Taim Jisas i stap long graun, ol bikman bilong lotu i laik bosim olgeta samting long i stap bilong ol man long rot bilong kain kain tok ol man yet i bin kamapim, em ol tok i save putim bikpela hevi long ol man. (Luk 11:46) Planti taim ol pris pasto bilong ol misin ol tu i bin mekim olsem.
6 Tasol pasin bilong lotu tru long God, em wanpela wok holi yumi save mekim long “stretpela tingting.” (Rom 12:1, NW) Ol tok ol wokboi bilong Jehova i harim, dispela tok i save kirapim ol long “bilip.” (2 Timoti 3:14) Sampela taim, ating ol man i go pas long lukautim wok bilong kongrigesen ol i mas putim sampela lo na pasin bambai ol samting long kongrigesen i ken wok gut. Tasol ol elda i no makim ol samting ol wanwok Kristen i mas mekim, nogat; ol i save skulim ol long pasin bilong “skelim wanem ol pasin i gutpela na wanem ol pasin i nogut.” (Hibru 5:14) Ol elda i mekim olsem long rot bilong helpim kongrigesen long kisim ‘ol gutpela tok na ol gutpela save.’—1 Timoti 4:6.
Was Gut Long Wok Yu Mekim Bilong Skulim Ol Man
7 Orait nau yumi ken tingim gen dispela wok Jisas i givim long yumi bilong lainim ol man. Bilong mekim dispela wok, yu ting yumi mas kisim wanpela kain skul o save? Ating nogat. Planti man i no gat bikpela save ol i mekim dispela wok bilong lainim ol man long olgeta hap. (1 Korin 1:26-29) Pol i tok: “Dispela gutpela samting tru [em wok bilong autim tok] i stap long mipela aposel olsem em i stap insait long ol samting nating i no gat strong [yumi ol man bilong graun i gat sin] . . . Em bilong olgeta man i ken save, dispela bikpela strong ol i lukim em i strong bilong God. Em i no strong bilong mipela.” (2 Korin 4:7) Dispela wok bilong autim tok bilong Kingdom long olgeta hap i bin helpim planti planti manmeri na dispela samting i kamapim klia olsem spirit bilong Jehova i gat bikpela strong!
7, 8. (a) Ol man i no gat bikpela save, olsem wanem ol inap mekim wok tisa? (b) Olsem wanem yumi save yumi yet i mas wok strong bambai yumi inap kamap gutpela tisa?
8 Tasol yu yet i mas wok strong long kamap “wokman tru, na bai God i laikim wok bilong yu. Olsem na bai yu autim stret tok tru bilong God, na bai yu no gat sem long ai bilong en.” (2 Timoti 2:15) Pol i tokim Timoti: “Was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na em bai i kisim bek ol manmeri i save harim tok bilong yu.” (1 Timoti 4:16) Olsem wanem yumi inap was gut long wok yumi mekim bilong skulim narapela, maski em insait o ausait long kongrigesen? Bilong mekim olsem, yu ting yumi mas lain gut long sampela kain pasin bilong skulim man?
9. Wanem samting i bikpela samting moa, winim save long mekim wok?
9 Long bikpela tok Jisas i mekim long maunten, em i kamapim long ples klia olsem em i save gut tru long pasin bilong skulim man. Taim em i autim tok pinis, “ol bikpela lain manmeri ol i kirap nogut tru long skul bilong en.” (Matyu 7:28) Tru, i no gat wanpela bilong yumi i save gut long rot bilong skulim man olsem Jisas. Tasol bilong mekim gutpela wok tisa, i no olsem yumi mas save gut tru long pasin bilong toktok. Jop 12:7 i tok, ‘ol abus na ol pisin’ inap skulim yumi, maski ol i no save mekim wanpela toktok! Sapos yumi save gut long pasin bilong toktok o kain samting olsem, em gutpela, tasol samting i bikpela tru na i winim dispela, em yumi yet i wanem kain man—olsem yumi “bihainim wanem kain pasin” na yumi mekim wanem ol wok bilong spirit ol sumatin i ken bihainim.—2 Pita 3:11; Luk 6:40.
Yumi Mas Stadi Long Tok Bilong God
10. Olsem wanem Jisas i stap gutpela piksa tru long pasin bilong stadi long Tok Bilong God?
10 Gutpela tisa bilong ol tok i tru bilong Baibel, em yet i mas stadi long Baibel. (Rom 2:21) Krais Jisas i makim gutpela rot yumi ken bihainim long dispela samting. Taim Jisas i mekim wok bilong em long graun, em i kamapim ol tok i stap long planti buk bilong Ol Skripsa Hibru.a Em i save gut long ol tok i stap long buk bilong God na dispela samting i kamap ples klia taim em i gat 12-pela krismas—papamama i lukim em i “sindaun i stap namel long ol tisa. Em i wok long harim tok bilong ol, na long askim ol tu.” (Luk 2:46) Taim em i bikpela pinis, em pasin bilong Jisas long go long haus lotu na harim ol man i kaunim Tok Bilong God.—Luk 4:16.
11. Tisa i mas kisim wanem pasin bilong stadi gut?
11 Olsem wanem? Yu save givim bel long kaunim Tok Bilong God? Sapos yu wok strong long painim insait tru bilong ol tok bilong en, dispela bai helpim yu long “save tru long pasin bilong stap aninit long Bikpela, na bai yu save gut long God.” (Sindaun 2:4, 5) Olsem na wok long kisim pasin bilong stadi gut. Wok long kaunim wanpela hap bilong Baibel long olgeta de. (Song 1:2) Kaunim olgeta wan wan Wastaua na Kirap! taim yu kisim nupela. Putim gut yau long ol tok bilong miting bilong kongrigesen. Lain long mekim wok long ol buk na nius samting bilong kisim gut as bilong ol tok. Sapos yu lain long kisim stretpela save long ‘as bilong olgeta samting,’ orait taim yu wok long skulim narapela, bai yu abrusim pasin bilong kolim nating sampela tok i no stret.—Luk 1:3.
Laikim na Tingim Man Yu Skulim Em
12. Jisas i gat wanem tingting long ol disaipel bilong em?
12 Narapela bikpela samting yu mas kisim, em stretpela tingting long man yu skulim em. Ol man i putim yau long tok bilong Jisas, ol Farisi i tingim ol olsem samting nating tasol. Ol i tok: “Ol lain i bilip long em, em ol dispela lain manmeri ol i no save long lo. God i tok pinis long ol bai i bagarap.” (Jon 7:49) Tasol Jisas i laikim tru ol disaipel bilong em na em i tingim gut ol. Em i tok: “Wokboi i no save long ol samting bikman bilong en i save mekim. Olsem na mi no kolim yupela ‘wokboi’ moa. Nogat. Olgeta tok mi harim long Papa bilong mi, em mi tokim yupela pinis. Olsem na mi kolim yupela ‘pren.’ ” (Jon 15:15) Dispela i makim pasin ol disaipel bilong Jisas i mas bihainim taim ol i skulim ol man.
13. Pol i gat wanem tingting long ol man em i skulim ol?
13 Olsem: Pol i no stap longwe liklik long ol sumatin bilong em—em i laikim tru ol. Em i tokim ol Korin: “Maski sapos yupela i gat 10,000 man bilong lukautim yupela long pasin bilong Krais, yupela i no gat planti papa. Nogat. Long pasin bilong Krais Jisas mi wanpela mi stap papa bilong yupela. Yupela i bin kamap pikinini bilong mi long taim mi bin autim gutnius long yupela.” (1 Korin 4:15) Sampela taim Pol i krai taim em i givim strongpela tok long ol man em i skulim ol! (Aposel 20:31) Na em i no les kwik long ol; em i stap isi na mekim gutpela pasin long ol. Olsem na em inap tokim ol Tesalonaika: “Taim mipela i stap wantaim yupela, mipela i stap isi tru olsem ol liklik pikinini. Mipela i bin stap olsem meri i givim susu long ol pikinini bilong en.”—1 Tesalonaika 2:7.
14. Bilong wanem yumi mas laikim tru ol man yumi stadi wantaim ol long Baibel? Stori long dispela samting.
14 Olsem wanem? Yu save bihainim pasin bilong Jisas na Pol? Sapos yumi laikim tru ol sumatin bilong yumi, dispela bai mekim bikpela wok bilong helpim ol, maski yumi sot long sampela save. Olsem wanem? Ol sumatin i pilim olsem yumi laikim tru ol? Yumi lusim hap taim bilong kisim save long ol? Wanpela meri Kristen i bin hatwok long helpim sumatin long kamap strong long ol samting bilong spirit, olsem na long gutpela pasin sori em i askim sumatin: “Yu gat wanpela hevi?” Orait nau dispela meri i kamapim bel bilong em—em i kolim ol hevi em i tingting planti long en. Tupela i toktok gut na nau meri i kirap na i wok long kamap strong. Long kain taim olsem, i stret long yumi ken kamapim sampela tok bilong Baibel bilong mekim gut na strongim bel bilong sumatin. (Rom 15:4) Tasol yumi mas was gut: Maski sumatin i wok long kamap strong hariap, ating i gat sampela pasin i no stret em i mas wok yet long rausim. Olsem na nogut yumi pren tumas wantaim em. Yumi mas bihainim ol lo Kristen i gat wok long stiaim yumi.—1 Korin 15:33.
15. Yumi ken mekim wanem bilong soim olsem yumi tingim gut ol sumatin bilong yumi?
15 Sapos yumi tingim gut ol sumatin, bai yumi no wok long bosim i stap bilong ol. (1 Tesalonaika 4:11) Olsem: Ating yumi stadi wantaim wanpela meri em i sindaun wantaim wanpela man em i no marit long em. Ating tupela i kamapim sampela pikinini. Tasol nau meri i kisim stretpela save long God na em i laik stretim ol samting na bai sindaun bilong em i stret wantaim ol lo bilong Jehova. (Hibru 13:4) Olsem wanem? Em i mas maritim dispela man o em i mas lusim em? Ating yumi tingting strong olsem sapos em i maritim wanpela man i no tingim tumas ol samting bilong spirit, dispela inap pasim meri long kamap strong. O ating yumi tingim i stap bilong ol pikinini bilong em na yumi ting mobeta em i maritim dispela man. Tasol maski yumi gat wanem tingting, sapos yumi strong long em i mas bihainim tingting bilong yumi, dispela i no pasin sori na pasin bilong tingim gut em. Long wanem, em yet i mas karim hevi bilong ol samting em i mekim. Olsem na i gutpela sapos yumi skulim kain sumatin olsem long mekim wok long “tingting” bilong em yet na bai em yet i ken tingim wanem samting em i mas mekim, a?—Hibru 5:14.
16. Ol elda i ken mekim wanem bilong soim olsem ol i laikim na tingim gut lain bilong God?
16 Em i bikpela samting tru long ol elda bilong kongrigesen ol i mas mekim pasin sori long lain bilong God na mekim gut long ol. Taim Pol i raitim pas long Filemon, em i tok: “Inap mi tokim yu long nem bilong Krais long yu mas mekim dispela samting. Tasol mi save long ol gutpela pasin bilong yu, na mi ting mi no ken givim strongpela tok long yu. Pasin bilong laikim tru ol arapela i save pasim mitupela wantaim, olsem na mi laik mekim tok isi long yu.” (Filemon 8, 9) Sampela taim ol hevi i kamap insait long kongrigesen. Ating ol elda i mas mekim sampela strongpela tok. Pol i tokim Taitus long em i mas “givim strongpela tok long [ol man i mekim rong], bilong stretim gut pasin bilong ol, bai ol i bilip tru long God.” (Taitus 1:13) Tasol ol elda i mas was gut; nogut ol i mekim hatpela tok long ol brata sista long kongrigesen. Pol i tok: “Wokman bilong Bikpela i no ken tok pait na tok kros. Nogat. Em i mas mekim gutpela pasin long olgeta man. Sapos ol man i bikhet long em, em i mas daunim belhat na painim ol gutpela rot bilong skulim ol manmeri long ol pasin God i laikim.”—2 Timoti 2:24; Song 141:3.
17. Moses i popaia olsem wanem? Dispela inap givim wanem save long ol elda?
17 Ol wasman i no ken lusim tingting olsem ol i mekim wok bilong lukautim “ol manmeri bilong God.” (1 Pita 5:2) Tasol maski Moses i man bilong mekim pasin daun, wanpela taim em i lusim tingting long dispela samting. Ol Israel “i mekim Moses i bel nogut tru na em i mekim tok i no stret.” (Song 106:33) God i no amamas long dispela pasin Moses i mekim long lain bilong Em, maski ol yet i gat asua. (Namba 20:2-12) Taim kain samting olsem i painim ol elda long nau, ol i mas tingting gut na wok long lainim na skulim ol brata long pasin sori. Ol brata bilong yumi bai harim gut tok sapos ol elda i mekim pasin sori long ol na tingim ol i olsem man i mas kisim helpim—ol i no ken tingim ol olsem ol i man i no inap tru long stretim pasin bilong ol. Ol elda i mas holim wankain tingting olsem Pol, em i tok: “Bikpela i mekim mipela i save gut olsem, yupela i mekim olgeta pasin mipela i tok long yupela i mas mekim. Na bihain tu yupela bai i mekim olsem tasol.”—2 Tesalonaika 3:4.
Tingim Ol Samting Bilong Helpim Ol
18, 19. (a) Sapos ol sumatin i hatwok long rit gut o kisim kwik tok, yumi ken mekim wanem? (b) Yumi ken mekim wanem bilong helpim ol sumatin ol i hatwok long kisim gut sampela tok?
18 Gutpela tisa i save tingim pasin na strong bilong ol sumatin bilong em na em i redi long senisim rot bilong lainim ol. (Skelim wantaim Jon 16:12.) Long tok piksa bilong Jisas long ol wokboi i kisim mani, bikman i “tingim pasin na strong bilong ol wokboi wan wan” na em i kolim wok ol i mas mekim. (Matyu 25:15) Yumi ken bihainim wankain pasin taim yumi mekim ol Baibel-stadi. Ating yumi laik pinisim wanpela buk i kamapim ol tok bilong Baibel insait long sampela mun tasol. Tasol sampela sumatin i no save rit gut na sampela i no save kisim kwik ol nupela tok. Olsem na sapos sumatin i givim bel long stadi, tasol em i hatwok long kisim kwik tok, orait yumi mas skelim gut—yumi ken lusim kwik wanpela paragraf na go long narapela o nogat. Yumi mas helpim sumatin long kisim gut tok; dispela em i bikpela samting na i winim pasin bilong mekim planti paragraf hariap.—Matyu 13:51.
19 Na i wankain tu long ol sumatin i hatwok long kisim gut sampela tok ol i stadi long en, olsem tok bilong God Triwan o ol bikpela de bilong lotu. Ating i no gat wok long skruim sampela tok bilong ol narapela buk em Baibel i as bilong en i kam insait long stadi, tasol ating sampela taim yumi ken mekim olsem sapos yumi ting dispela bai helpim gut sumatin. Yumi mas skelim gut dispela samting; nogut yumi pasim nating sumatin long pinisim kwik buk.
Givim Bel!
20. Pol i makim wanem gutpela rot yumi ken bihainim long pasin bilong bilip na givim bel taim em i skulim man?
20 Pol i tok: “Larim Holi Spirit i kirapim yupela.” (Rom 12:11) Olsem na maski yumi stadi wantaim man long Baibel o mekim wanpela tok long miting bilong kongrigesen, yumi mas givim bel long mekim. Pol i tokim ol Tesalonaika: “Dispela gutnius mipela i bin bringim i kam long yupela, em i no bin kamap long yupela olsem toktok tasol. Nogat. Em i kamap wantaim strong na wantaim Holi Spirit, na yupela i bin lukim klia strongpela bilip bilong mipela.” (1 Tesalonaika 1:5) Em nau, Pol na ol poroman bilong em ‘ol i givim gutnius bilong God long ol, na ol i redi tu long givim laip bilong ol bilong helpim ol.’—1 Tesalonaika 2:8.
21. Wanem samting inap helpim yumi long holim pasin bilong givim bel long mekim ol wok bilong skulim man?
21 Sapos yumi bilip tru olsem ol sumatin bilong yumi i mas harim ol tok yumi laik givim long ol, dispela bai kirapim yumi long givim bel long mekim gutpela wok tisa. Ol wok yumi kisim bilong skulim ol man, yumi no ken ting yumi ken mekim nating. Esra, em man bilong raitim raitim ol tok bilong Baibel, em i was gut long wok em i mekim bilong skulim ol man. Em i “man bilong wok strong long kisim save long lo bilong Bikpela na long bihainim gut dispela lo. Na tu em i wok long skulim gut ol Israel.” (Esra 7:10) Yumi tu i mas mekim olsem—yumi mas redim gut stadi na tingim ol tok bilong stadi em i bikpela samting olsem wanem. Yumi mas beten askim Jehova long helpim yumi long strongim bilip bilong yumi. (Luk 17:5) Sapos yumi givim bel long mekim stadi, dispela inap helpim sumatin long laikim tru tok i tru. Tasol bilong helpim yumi long was gut long pasin yumi mekim bilong skulim man, i gat sampela kain pasin bilong skulim man yumi ken mekim wok long en. Stori i kam bihain long dispela bai toktok long sampela.
[Futnot]
a Lukim Insight on the Scriptures, Volyum 2, pes 1071, em Sosaiti Wastaua Bilong Nu Yok i wokim.
Yu Inap Tingim?
◻ Bilong wanem i mas i gat ol Kristen i save gut long mekim wok tisa?
◻ Wanem sampela pasin bilong stadi gut yumi ken wok long kisim?
◻ Bilong wanem em i bikpela samting long yumi mas laikim tru na tingim gut ol man yumi lainim?
◻ Yumi ken mekim wanem bilong helpim ol sumatin long ol samting ol i hatwok long en?
◻ Bilong wanem yumi mas givim bel na bilip tru olsem ol man i mas harim ol tok yumi laik skulim ol long en?
4. Olsem wanem pasin bilong skulim gut man inap helpim yumi long bihainim tok bilong Pol long Hibru 10:24, 25?
[Piksa long pes 10]
Ol gutpela tisa, ol yet i save stadi long Tok Bilong God
[Piksa long pes 13]
Tingim gut ol sumatin