Wok Strong na Bai ‘God i Kisim Bek Yu na Ol Man i Harim Tok Bilong Yu’
“Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, . . . God bai i kisim bek yu yet, na em bai i kisim bek ol manmeri i save harim tok bilong yu.”—1 TIMOTI 4:16.
1, 2. Wanem samting i save kirapim ol Kristen tru long wok yet long helpim ol man bambai God i ken kisim bek ol?
LONG wanpela longwe ples long hap bilong not long Tailan, tupela marit em ol i Witnes Bilong Jehova ol i traim nupela tok ples ol i lainim na ol i autim tok long wanpela lain i save sindaun long ples maunten. I no longtaim i go pinis na tupela marit hia i kirap lainim tok ples Lahu bambai ol i ken autim gutnius bilong Kingdom long ol dispela lain.
2 Man marit i tok: “Mipela i kisim bikpela amamas tru long mekim wok namel long dispela lain. Mipela i pilim olsem mipela i insait long truim bilong Kamapim Tok Hait 14:6, 7, i tok long autim gutnius ‘long ol manmeri bilong olgeta lain na olgeta kantri na olgeta tok ples.’ I no gat planti nupela hap i stap em ol i no bin autim yet gutnius long en, na dispela em i wanpela hap olsem. Mipela i gat planti Baibel-stadi tru na i hatwok long lukautim planti stadi olsem.” Em nau, yumi save long tingting bilong dispela tupela marit—ol i laik bai God i kisim bek ol yet wantaim ol man i save harim tok bilong tupela. Yumi olgeta Kristen i gat laik long mekim olsem, a?
“Was Gut Long Ol Pasin Bilong Yu Yet”
3. Bilong helpim ol man na bai God i ken kisim bek ol, pastaim yumi mas mekim wanem?
3 Aposel Pol i bin givim tok long Timoti olsem, “Yu mas was gut long ol pasin bilong yu yet na long wok yu mekim bilong skulim ol manmeri,” na dispela tok i stret long olgeta Kristen i mas mekim. (1 Timoti 4:16) Tru tumas, bilong helpim ol man na bai God i ken kisim bek ol, pastaim yumi mas was gut long yumi yet. Yumi ken mekim olsem wanem? Wanpela samting i olsem: Yumi mas was i stap na tingim dispela taim yumi stap long en. Jisas i bin kolim sampela mak na bai ol disaipel bilong em i ken save long taim “pasin bilong dispela graun i laik pinis.” Tasol Jisas i tok tu olsem yumi no save wanem taim stret pinis bai kamap. (Matyu 24:3, 36, NW ) Yumi mas ting olsem wanem long dispela samting?
4. (a) Yumi mas kisim wanem kain tingting long dispela liklik hap taim i stap yet? (b) Yumi mas abrusim wanem kain tingting?
4 Yumi ken askim skin bilong yumi, ‘Mi save mekim wok long dispela liklik hap taim i stap yet bambai God i ken kisim bek mi wantaim ol man i harim tok bilong mi? O mi save tingting olsem, “Yumi no save wanem taim stret pinis bai kamap, olsem na mi no ken tingting tumas long en”?’ Dispela namba tu tingting em inap bagarapim yumi. Em i pait wantaim tok bilong Jisas, em i tok: “Yupela tu i mas redi. Pikinini Bilong Man bai i kam long wanpela taim yupela i no ting em bai i kam.” (Matyu 24:44) Em nau, dispela i no taim bilong slek long mekim wok bilong Jehova o tingting long painim gutpela sindaun o amamas samting.—Luk 21:34-36.
5. Ol witnes i bin stap paslain long taim bilong ol Kristen, ol i bin mekim wanem na ol i stap olsem gutpela piksa?
5 I gat narapela rot tu yumi ken kamapim olsem yumi was gut long yumi yet—yumi mas wok long sanap strong olsem Kristen na no ken les. Ol wokboi bilong God long bipo ol i bin sanap strong, maski ol i ting God bai kisim bek ol hariap o nogat. Pol i stori long pasin bilong ol witnes i bin stap paslain long taim bilong ol Kristen, olsem Abel, Enok, Noa, Abraham, na Sara, na bihain Pol i tok: “Ol i no kisim ol dispela gutpela samting God i bin promis long givim ol. Nogat. I olsem ol i sanap na lukluk i go long ol dispela samting i stap longwe tru long ol, na ol i amamas long lukim ol. Na ol i no sem long tokaut olsem, ‘Mipela i stap long dispela graun olsem ol manmeri bilong narapela kantri. Mipela i kam i stap liklik taim tasol long dispela graun.’ ” Ol i no les na bihainim laik bilong skin long kisim gutpela sindaun na malolo i stap, nogat; na maski ol i stap namel long ol lain i mekim pasin pamuk, ol i no larim dispela pasin i pulim ol. Ol i amamas long wetim taim bilong “kisim ol dispela gutpela samting God i bin promis long givim ol.”—Hibru 11:13; 12:1.
6. Tingting bilong ol Kristen bilong pastaim long God bai kisim bek ol man, dispela tingting i mekim wanem long i stap bilong ol?
6 Na ol Kristen bilong pastaim tu, i tingting olsem ol i stap long dispela graun olsem “ol man bilong narapela ples.” (1 Pita 2:11) Taim God i kisim bek ol long bikpela bagarap i bin painim Jerusalem long yia 70 C.E., ol Kristen tru i no lusim wok bilong autim tok o kirap gen long painim ol samting bilong dispela graun, nogat. Ol i save pinis olsem i gat gutpela samting tru i wetim ol man i stap gut long God, olsem ol bai kisim laip i stap oltaim oltaim. Olsem na long yia 98 C.E., aposel Jon i tok: “Dispela graun bai i pinis, na olgeta pasin bilong dispela graun, em ol pasin bilong bel i kirap na aigris, ol tu bai i pinis wantaim. Tasol man i bihainim tok bilong God, em bai i stap oltaim.”—1 Jon 2:17, 28.
7. Long taim bilong yumi, ol Witnes Bilong Jehova i bin mekim wanem na yumi save ol i stap strong na ol i no les?
7 Long taim bilong yumi, ol Witnes Bilong Jehova tu i stap strong long mekim wok Kristen, maski ol man i mekim nogut tru long ol. Orait olsem wanem? Dispela pasin bilong ol long i stap strong na no ken les, em i lus nating tasol? Nogat tru. Jisas i tok: “Ol manmeri i stap strong inap long las de, God bai i kisim bek ol,” maski dispela las de em i pinis bilong dispela pasin i stap long graun o em i pinis bilong laip bilong ol bilong nau. Long taim bilong kirapim bek ol man i dai pinis, Jehova bai tingim na praisim olgeta wokboi bilong em ol i bin i stap gut long em na ol i dai pinis.—Matyu 24:13; Hibru 6:10.
8. Olsem wanem yumi ken soim olsem yumi amamas long pasin bilong ol Kristen bilong bipo long i stap strong na i no les?
8 Na tu, yumi amamas long ol gutpela Kristen bilong bipo i no bin tingting long God i mas kisim bek ol yet tasol. Yumi ol man i bin kisim save long tok bilong Kingdom long rot bilong ol dispela Kristen, yumi amamas long ol i bin stap strong long mekim wok Jisas i givim long yumi, olsem: “Yupela i mas i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.” (Matyu 28:19, 20) Rot i op yet long yumi ken mekim dispela wok, olsem na bilong kamapim olsem yumi amamas long dispela samting ol i bin mekim, yumi ken autim tok long ol man i no bin harim yet tok bilong gutnius. Tasol wok bilong autim tok em i namba wan hap tasol bilong dispela wok bilong kamapim ol disaipel.
‘Wok Yu Mekim Bilong Skulim Ol Man’
9. Olsem wanem stretpela tingting inap helpim yumi long kirapim sampela Baibel-stadi?
9 Wok bilong yumi i no bilong autim tok tasol—yumi gat wok tu long skulim ol man. Jisas i givim wok long yumi long skulim ol man long bihainim olgeta tok em i bin givim long yumi. Tru, long sampela hap i olsem i no gat planti man i laik kisim save long Jehova. Tasol sapos yumi ting long hap yumi autim tok long en i no gat wanpela man bai harim tok, dispela bai pasim yumi na yumi no wok strong long kirapim ol Baibel-stadi. Wanpela painia nem bilong em Yvette, em i save autim tok long wanpela hap em sampela i tok i no inap karim kaikai, tasol em i lukim olsem taim sampela i bin kam limlimbur long dispela hap na ol i go autim tok, ol i bin kirapim sampela Baibel-stadi. Orait bihain Yvette i kisim stretpela tingting long dispela wok na em tu i painim sampela man i laik stadi long Baibel.
10. Wanem bikpela wok bilong ol tisa bilong Baibel?
10 Sampela i save surik long tokim ol man olsem ol i laik stadi wantaim ol long Baibel, long wanem, ol i pilim olsem ol i no inap mekim Baibel-stadi. Tru, sampela i gat bikpela save liklik long mekim, na sampela i no tumas. Tasol i no olsem yumi mas i gat bikpela save na bai yumi inap mekim wok olsem tisa bilong Baibel, nogat. Ol tok bilong Baibel i gat strong, na Jisas i tok ol man i kain olsem sipsip ol i save long nek bilong Wasman tru bilong sipsip. Olsem na wok bilong yumi em i bilong givim tok bilong Gutpela Wasman, Jisas, long ol na kamapim klia ol dispela tok inap long save bilong yumi.—Jon 10:4, 14.
11. Olsem wanem yu inap mekim gutpela wok long helpim Baibel-stadi?
11 Orait olsem wanem yu inap givim tok bilong Jisas long ol na ol inap kisim gut? Pastaim yu mas lukim sampela tok bilong Baibel i stori long samting yu bai skulim Baibel-stadi long en. Ol tok yu laik skulim ol narapela long en, pastaim yu yet yu mas save gut long en. Na taim yu stadi wantaim man, yu mas mekim stret ol samting, tasol yu mas mekim gutpela pasin pren tu. Ol sumatin, na ol pikinini tu, ol inap lain gut sapos bel bilong ol i stap isi na tisa i mekim gutpela pasin na i no daunim ol.—Sindaun 16:21.
12. Olsem wanem yu inap save gut olsem sumatin i kisim gut ol tok yu skulim em long en?
12 Yu olsem tisa, olsem na yu no laik kamapim ol tok na nau sumatin i kolim nating long maus. Helpim em long kisim gut as bilong ol tok. Save em i bin kisim long skul, na ol samting i bin painim em, na em i gat sampela save long Baibel o nogat, dispela i mekim na sumatin inap kisim kwik ol tok bilong yu o em i no inap kisim kwik. Askim skin bilong yu, ‘Em i kisim gut insait bilong ol skripsa i stap long ol paragraf?’ Sapos yu givim sampela askim long em na em i mas mekim bikpela hap tok liklik bilong bekim ol dispela askim, na em i no ken tok yes o nogat tasol, dispela bai helpim em long kamapim tingting i stap long bel bilong em. (Luk 9:18-20) Tasol sampela sumatin i save sem long givim askim long tisa. Olsem na ol bai stadi i go na ol i no kisim gut as bilong ol tok ol i lainim. Olsem na kirapim sumatin long kamapim sampela askim na tokim yu long ol samting em i no klia gut long en.—Mak 4:10; 9:32, 33.
13. Olsem wanem yu inap helpim sumatin long kamap tisa?
13 Wanpela bikpela as na yumi mekim Baibel-stadi, em yumi laik helpim sumatin long kamap tisa. (Galesia 6:6) Olsem na taim yu mekim stadi pinis na yu laik kamapim gen sampela tok bilong en, askim em long stori long wanpela samting bilong stadi na mekim olsem em i laik kamapim long wanpela man bipo em i no bin harim dispela tok. Bihain, taim em i winim mak bilong mekim wok autim tok, yu inap singautim em i go wantaim yu long autim tok. Sapos em i wok wantaim yu, bel bilong em bai stap isi liklik, na save em i kisim long wok wantaim yu bai helpim em long kamap strong long autim tok na nau em bai pilim olsem em yet inap mekim.
Helpim Sumatin Long Kamap Pren Bilong Jehova
14. Wanem nambawan bikpela mak yu laik winim long wok bilong yu olsem tisa? Wanem samting bai helpim yu long winim dispela mak?
14 Nambawan bikpela mak olgeta tisa Kristen i laik winim, em bilong helpim sumatin long kamap pren bilong Jehova. Yu inap helpim em long mekim olsem long rot bilong ol tok na pasin bilong yu. Taim yu larim pasin bilong yu i skulim sumatin, dispela kain skul i gat bikpela strong long kirapim bel bilong em na em bai pilim tru. Sampela taim pasin bilong yumi i gat bikpela strong long skulim man, winim ol tok yumi mekim, na em i gat bikpela strong moa taim yumi laik skulim sumatin long stretpela pasin na yumi laik putim gut long bel bilong em, na yumi laik kirapim em long givim bel long Jehova. Sapos em i lukim olsem yu stap pren bilong Jehova na dispela i as bilong ol tok na pasin bilong yu, dispela bai kirapim em long mekim ol samting na bai em yet inap kamap pren bilong Jehova.
15. (a) Bilong wanem em i bikpela samting long sumatin i mas kisim stretpela tingting long mekim wok bilong Jehova? (b) Olsem wanem yu inap helpim sumatin long wok yet long kamap strong long ol samting bilong spirit?
15 Yu laik bai sumatin i mekim wok bilong Jehova, long wanem, em i laikim tru Jehova, na i no olsem em i no laik bagarap long Armagedon na long dispela as tasol em i mekim dispela wok. Taim yu helpim em long kisim pasin bilong laikim tru Jehova na long dispela as em i mekim wok bilong Em, i olsem yu wokim haus long ol samting i no save paia, olsem ol samting bai helpim em long winim ol traim i kamap bilong traim bilip bilong em. (1 Korin 3:10-15) Sapos sampela tingting kranki i kirapim em, olsem em i laik kamap wankain olsem yu o narapela man, o winim yupela, dispela i no inap strongim em long sakim ol pasin nogut o strongim em na bai em i no pret long mekim ol pasin i stret. Yu save pinis, bai yu no i stap tisa bilong em inap oltaim. Orait taim yu gat rot yet long mekim, wok long kirapim em long kaunim Baibel long olgeta de na tingting long en, na long dispela rot em bai go klostu moa long Jehova. Sapos em i mekim olsem, orait taim yu pinis long stadi wantaim em, bai em i wok yet long tingim gut “ol dispela gutpela tok” i stap long Baibel na ol buk i kamapim ol tok bilong Baibel.—2 Timoti 1:13.
16. Olsem wanem yu inap skulim sumatin long mekim ol beten i kamap long bel bilong em?
16 Na sapos yu skulim sumatin long mekim ol beten i kamap long bel bilong em, bai yu helpim em long go klostu moa long Jehova. Orait yu ken mekim olsem wanem? Yu ken soim em long beten Jisas i bin skulim ol disaipel long mekim, na planti ol narapela beten i stap long Baibel, olsem ol beten i stap long Buk Song. (Song 17, 86, 143; Matyu 6:9, 10) Na tu, taim sumatin i harim beten yu mekim bilong kirapim na pinisim stadi, em bai pilim tingting bilong yu, olsem yu gat wanem tingting long Jehova. Olsem na beten bilong yu i mas kamapim olsem yu bilip tru long tok yu mekim long beten na yu no haitim tingting bilong yu, na yu gat stretpela tingting long ol samting bilong spirit na ol samting yu pilim long bel.
Wok Long Helpim Ol Pikinini Bilong Yu
17. Olsem wanem papamama inap helpim ol pikinini long i stap gut long rot i go long laip i stap oltaim?
17 I gat sampela moa yumi laik helpim ol na bai God i ken kisim bek ol—em famili bilong yumi. Planti pikinini bilong ol papamama Kristen ol i gat gutpela bel na ol i “stap strong long bilip.” Tasol sampela pikinini, ating tok i tru i no go daun tumas long bel bilong ol. (1 Pita 5:9; Efesus 3:17; Kolosi 2:7) Planti bilong ol dispela yangpela ol i save lusim rot bilong ol Kristen klostu long taim ol i bikpela pinis. Sapos yu wanpela papa o mama, yu inap mekim wanem na bai dispela samting i no ken kamap? Namba wan samting, em yu ken wok strong long kamapim pasin bilong pas gut wantaim insait long famili. Sapos i stap bilong famili i gutpela, olsem ol i sindaun gut wantaim, dispela bai helpim ol pikinini long kisim stretpela tingting long ol lain i gat wok long bosim ol, na ol bai tingim ol samting i bikpela samting, na ol bai stap amamas wantaim ol narapela. (Hibru 12:9) Olsem na taim famili i pas gut wantaim, dispela inap mekim na pikinini bai wok long kamap pren bilong Jehova na dispela pasin bai kamap strong long em, olsem gutpela graun em kaikai i save kru na kamap gut long en. (Song 22:10) Ol famili i save mekim ol samting wantaim, maski papamama inap mekim narapela wok long dispela hap taim bilong helpim ol yet. Long dispela pasin bilong yupela, yupela inap skulim ol pikinini long skelim stret ol samting ol i mas mekim long i stap bilong ol. Yupela ol papamama, nambawan samting yupela i mas givim long ol pikinini bilong yupela, i no ol samting bilong skin, nogat; yupela i mas givim yupela yet long ol, olsem taim na strong na pasin sori bilong yupela. Olsem wanem? Yupela i wok long givim ol dispela samting long ol pikinini bilong yupela?
18. Papamama i mas helpim ol pikinini long painim bekim bilong wanem ol kain askim?
18 Ol papamama Kristen i no ken ting ol pikinini bai bihainim nating papamama na kamap Kristen. Daniel, em wanpela elda i gat 9-pela pikinini, em i tok: “Papamama i mas lusim hap taim bilong helpim ol pikinini long rausim ol kain kain tingting ol i save kisim long skul na long ol narapela hap na i mekim tingting bilong ol i bruk nabaut. Ol i mas helpim ol pikinini long painim bekim bilong ol askim olsem: ‘Tru yumi stap long taim bilong las de, o nogat? I gat wanpela trupela lotu tasol i stap? Bilong wanem i no gutpela long poroman wantaim wanpela wanskul i olsem em i gat gutpela pasin? Long olgeta taim i gat rong long yangpela man na meri i slip wantaim na ol i no marit yet?’ ” Jehova bai mekim gut long dispela wok bilong yupela, long wanem, em tu i laik bai ol pikinini bilong yupela i stap gutpela.
19. Bilong wanem i gutpela moa sapos papamama yet i stadi wantaim ol pikinini bilong ol?
19 Sampela papamama i pilim olsem ol i no inap stadi gut wantaim ol pikinini bilong ol yet. Tasol yupela i no ken ting olsem, long wanem, i no gat narapela inap skulim gut ol pikinini bilong yupela olsem yupela yet inap mekim. (Efesus 6:4) Taim yu stadi wantaim ol pikinini, bai yu gat rot long save wanem kain tingting i stap long bel bilong ol. Taim ol i mekim tok long stadi, dispela tok i kamap long bel bilong ol o ol i kolim nating long maus tasol? Ol i bilip tru long ol tok ol i lainim? Ol i tingim Jehova olsem wanpela man i stap tru? Bilong painim bekim bilong ol dispela bikpela askim na sampela askim moa, yu yet yu mas stadi wantaim ol pikinini bilong yu.—2 Timoti 1:5.
20. Papamama i ken mekim wanem na bai ol pikinini i amamas long famili-stadi na em inap helpim gut ol?
20 Orait taim yu kirapim pinis famili-stadi bilong yu, olsem wanem yu ken wok yet long mekim long olgeta wik? Joseph, em wanpela elda i gat wanpela pikinini man na wanpela pikinini meri, em i tok: “Famili-stadi em samting famili i mas amamas long mekim. Tasol bilong kamapim dispela pasin insait long famili bilong mipela, mipela i no ken strong tumas long mekim stadi i go inap wanpela aua stret. Sampela taim mipela bai stadi inap wanpela aua, tasol sapos sampela taim mipela i gat 10-pela minit tasol bilong mekim stadi, mipela i save mekim. Wanpela samting i mekim na ol pikinini i amamas long wetim stadi bilong mipela long olgeta wik—em mipela i save mekim pilai bilong makim ol stori i stap long buk Baibel Stori Buk Bilong Mi.a Ol i save pilim tru na kisim gut as bilong ol dispela stori, na dispela i bikpela samting moa, winim pasin bilong pinisim planti paragraf insait long stadi.”
21. Papamama i ken skulim ol pikinini long wanem taim?
21 Tasol bilong skulim ol pikinini bilong yu, i no olsem yu mas mekim long taim bilong stadi tasol, nogat. (Lo 6:5-7) Dispela Witnes long Tailan i tok: “Mi tingim yet pasin bilong papa, em i save kisim mi i go wantaim em long autim tok, na mipela i kikim wilwil i go long ol longwe hap bilong ples em kongrigesen bilong mipela i save autim tok long en. Papamama i stap olsem gutpela piksa tru, na ol i save skulim gut mipela maski wanem samting i kamap, na dispela i helpim mipela long pasim tok long bel olsem mipela bai go insait long wok painia. Na mi save, ol dispela samting ol i bin lainim mipela long en ol i bin pas gut long bel bilong mi, long wanem, mi save mekim wok yet long ol longwe hap bilong graun!”
22. Sapos yu “was gut long ol pasin bilong yu yet na long wok yu mekim bilong skulim ol manmeri,” wanem samting bai kamap long dispela?
22 Liklik taim nau, long taim stret bilong en, Jisas bai kam bilong pinisim dispela pasin i stap long graun. Dispela bikpela taim bai kamap na i go pinis, tasol ol wokboi bilong Jehova i stap gut long em ol bai wok yet long mekim wok bilong em na tingting long kisim laip i stap oltaim. Yu laik i stap insait long dispela lain wantaim ol pikinini na ol Baibel-stadi bilong yu? Sapos olsem, orait tingim dispela: “Yu mas was gut long ol pasin bilong yu yet na long wok yu mekim bilong skulim ol manmeri. Na sapos yu strong long mekim olsem, orait long wok bilong yu God bai i kisim bek yu yet, na . . . ol manmeri i save harim tok bilong yu.”—1 Timoti 4:16.
[Futnot]
a Sosaiti Wastaua Bilong Nu Yok i wokim.
Yu Inap Stori Long Dispela?
• Yumi no save wanem taim stret God bai kirap skelim ol man long kot, olsem na yumi mas i gat wanem kain tingting?
• Long wanem ol rot yumi inap ‘was gut long wok yumi mekim bilong skulim ol man’?
• Olsem wanem yu inap helpim sumatin long kamap pren bilong Jehova?
• Bilong wanem em i bikpela samting long papamama i mas lusim hap taim bilong skulim ol pikinini bilong ol?
[Piksa long pes 15]
Sumatin bai lain gut sapos yu mekim stret ol samting tasol yu mekim gutpela pasin pren tu
[Piksa long pes 18]
Taim famili i mekim sampela pilai long ol stori bilong Baibel, olsem Solomon i skelim tupela pamukmeri long kot, ol pikinini bai kisim amamas long mekim famili-stadi