Helpim Ol Narapela Long Bihainim Tok Bilong Baibel
“Ol dispela pikinini wit i pundaun long gutpela graun, ol i olsem ol man i harim tok na ol i holimpas. Bel bilong ol em i stretpela na i gutpela, na ol i save stap strong na ol i karim kaikai i stap.”—LUK 8:15.
1, 2. (a) Ol i wokim buk Tru Tru Baibel i Tok Wanem? bilong mekim wanem? (b) Olsem wanem Jehova i bin blesim hatwok bilong lain bilong em long kamapim ol disaipel long taim bilong yumi?
“DISPELA buk em i nambawan tru. Ol sumatin bilong mi i laikim tru dispela buk, na mi tu mi laikim. Long rot bilong dispela buk yumi inap kirapim ol Baibel stadi wantaim ol man long dua bilong ol.” Em tok wanpela Witnes Bilong Jehova bilong autim tok fultaim i mekim long buk Tru Tru Baibel i Tok Wanem?a Wanpela lapun brata bilong autim tok bilong Kingdom em i tok long dispela buk olsem: “Mi bin helpim planti man long save long Jehova insait long 50 yia mi bin mekim wok autim tok. Tasol mi mas tok olsem, dispela buk i nambawan tru. Ol gutpela tok piksa na ol piksa i stap long buk i gutpela tru.” Olsem wanem? Yu gat wankain tingting long buk Baibel i Tok? Dispela buk bilong stadi long Baibel i bilong helpim yu long bihainim tok bilong Jisas: “Yupela i mas i go mekim olgeta lain manmeri i kamap disaipel bilong mi. . . . Na yupela lainim ol long bihainim olgeta tok mi bin givim long yupela.”—Matyu 28:19, 20.
2 Bel bilong Jehova i amamas tru taim em i lukim 6.6 milion Witnes bilong em i amamas long bihainim tok bilong Jisas long kamapim ol disaipel. (Sindaun 27:11) Em i klia tru olsem Jehova i wok long blesim hatwok bilong ol. Olsem: Long 2005, ol i autim gutnius long 235 kantri, na mekim 6,061,500 Baibel stadi. Olsem na planti manmeri i ‘kisim tok bilong God na ol i no kisim olsem tok bilong man, nogat, ol i kisim olsem tok tru bilong God.’ (1 Tesalonaika 2:13) Insait long tupela yia i go pinis, winim 500,000 nupela disaipel i bin stretim wokabaut bilong ol na kirap bihainim ol lo bilong Jehova na dediketim ol yet long God.
3. Long dispela stadi bai yumi skelim wanem ol askim long pasin bilong yusim buk Baibel i Tok?
3 Olsem wanem? Yu kisim amamas long stadi long Baibel wantaim wanpela? Long olgeta hap bilong graun, i gat ol manmeri em “bel bilong ol em i stretpela na i gutpela,” na taim ol i harim tok bilong God “ol i save stap strong na ol i karim kaikai i stap.” (Luk 8:11-15) Nau yumi ken skelim olsem wanem yu ken yusim buk Baibel i Tok long wok bilong kamapim ol disaipel. Bai yumi skelim tripela askim: (1) Olsem wanem yu ken kirapim wanpela Baibel stadi? (2) Wanem ol pasin bilong skulim man i wok gut? (3) Olsem wanem yu ken helpim man long kamap sumatin na tisa bilong Tok Bilong God, em Baibel?
Rot Bilong Kirapim Baibel Stadi
4. Bilong wanem sampela inap kisim tupela tingting long stadi long Baibel? Olsem wanem yu ken helpim ol long winim dispela?
4 Sapos wanpela i askim yu long kalapim tasol wanpela baret wara i bikpela liklik, ating bai yu no laik mekim olsem. Tasol sapos ol man i bin lainim ol ston bilong wokabaut long en, ating bai yu tok yu inap brukim dispela wara. Na olsem tasol, wanpela man i bisi tru inap kisim tupela tingting long stadi long Baibel. Man bilong haus inap ting em i mas lusim bikpela haptaim tumas long stadi na em i hatwok tumas. Yu ken mekim wanem bilong helpim em? Taim yu mekim ol sotpela toktok i givim save long man, yu ken yusim buk Baibel i Tok bilong kirapim man long stadi long Baibel long olgeta wik. Sapos yu redi gut, olgeta wan wan taim yu go bek lukim man, dispela inap kamap olsem ston em man bilong haus i ken wokabaut long en bilong i go klostu moa long Jehova.
5. Bilong wanem yu mas ritim buk Baibel i Tok?
5 Tasol paslain long yu ken helpim narapela man long kisim helpim long buk Baibel i Tok, yu yet i mas save gut long en. Olsem wanem? Yu bin ritim pinis dispela buk olgeta? Tupela marit i kisim buk i go wantaim ol long holide na ol i kirap ritim buk taim ol i malolo long nambis. Wanpela meri i salim ol samting long ol turis i kam long ol, na em i lukim nem bilong buk Tru Tru Baibel i Tok Wanem? Em i tokim tupela olsem inap sampela aua tasol i go pinis, em i bin beten askim God long bekim dispela askim. Tupela marit hia i amamas long givim buk long meri. Olsem wanem? Yu bin makim taim bilong ritim dispela buk, o ritim namba 2 taim, long taim yu wet long wanpela ofis samting o taim yu gat lans brek long ples wok o skul? (Efesus 5:15, 16) Sapos yu mekim olsem, bai yu save gut long dispela buk bilong stadi long Baibel, na tu, dispela inap opim rot long yu ken toktok wantaim ol narapela long ol samting i stap long buk.
6, 7. Olsem wanem yu ken yusim buk Baibel i Tok bilong kirapim ol man long stadi long Baibel?
6 Taim yu tilim dispela buk long wok autim tok, mekim gutpela wok long ol piksa, ol skripsa, na ol askim i stap long pes 4, 5, na 6. Olsem: Yu inap kirapim tok long rot bilong dispela askim, “Planti hevi i save painim ol man long nau, olsem na yu ting ol man inap kisim we ol gutpela tok bilong stiaim ol?” Putim gut yau long tok man i mekim na bihain ritim 2 Timoti 3:16, 17, na tokim man olsem Baibel i stori long rot tru bilong stretim ol hevi bilong ol man. Nau soim pes 4 na 5 long man bilong haus, na askim em: “Long ol hevi yu lukim long ol dispela pes, wanem samting yu save bel hevi tru long en?” Taim man bilong haus i makim wanpela, putim buk long han bilong em taim yu ritim ol skripsa long Baibel bilong yu. Bihain, ritim pes 6, na askim man bilong haus, “Long ol sikspela askim i stap daunbilo long dispela pes, yu laik kisim bekim bilong wanem askim?” Taim man i makim wanpela, soim long em sapta i bekim dispela askim, lusim buk wantaim em, na makim gut taim bilong kam bek na toktok wantaim em long dispela askim.
7 Bai yu lusim 5-pela minit tasol bilong mekim dispela tok. Tasol insait long dispela 5-pela minit, bai yu kisim save long ol samting man bilong haus i tingting planti long en, ritim na kamapim mining bilong tupela skripsa, na stretim rot bilong go bek lukim em. Sotpela toktok yu mekim wantaim man bilong haus inap strongim na mekim gut bel bilong em, winim ol tok em i bin harim inap longpela taim. Dispela inap mekim na maski man i bisi tru, em i amamas long wetim yu i kam bilong toktok moa wantaim em na helpim em long wokabaut long ‘rot i go long laip.’ (Matyu 7:14) Bihain, taim laik bilong man bilong haus long kisim save i go bikpela, yu ken stadi longpela taim moa wantaim em. Bilong mekim olsem yu ken tokim man, sapos em i laik yutupela i ken makim wanpela taim we yutupela i ken sindaun na lusim liklik haptaim moa long stadi.
Ol Gutpela Rot Bilong Mekim Wok Tisa
8, 9. (a) Yu ken mekim wanem bilong redim Baibel sumatin long winim ol hevi na traim inap painim em? (b) Yu inap kisim we ol gutpela tok bilong kamapim strongpela bilip?
8 Taim man i kirap bihainim tok bilong Baibel, ating ol traim bai painim em na dispela inap pasim em long kamap strong hariap. Aposel Pol i tok: “Olgeta man i laik pas wantaim Krais Jisas na i bihainim pasin bilong God, ol man bai i mekim nogut long ol.” (2 Timoti 3:12) Pol i tok ol dispela traim i olsem paia i bagarapim haus man i wokim long kunai samting, tasol i no save bagarapim haus man i wokim long gol, silva, o ol ston i dia tumas. (1 Korin 3:10-13; 1 Pita 1:6, 7) Bilong helpim Baibel sumatin long kisim ol pasin i helpim em long sanap strong taim traim i kamap, yu mas helpim em long kamapim ol pasin em paia i no inap kukim.
9 Man bilong raitim song i tok olsem “tok bilong God” i olsem “silva ol i bin kukim 7-pela taim long paia na i klin olgeta.” (Song 12:6) Tru tumas, Baibel i gat olgeta gutpela tok yumi ken mekim wok long en bilong kamapim strongpela bilip. (Song 19:7-11; Sindaun 2:1-6) Na buk Baibel i Tok i soim yu long olsem wanem yu ken mekim gutpela wok long Baibel.
10. Yu ken mekim wanem bilong kirapim sumatin long tingim tok bilong Baibel?
10 Long taim bilong stadi, kirapim sumatin long tingim ol skripsa i stap long sapta yupela i stadi long en. Mekim ol askim bilong helpim sumatin long kliagut long ol bikpela tok bilong Baibel na pasin bilong bihainim ol. Yu no ken tokim em long ol samting em i mas mekim. Nogat. Bihainim pasin bilong Jisas. Taim wanpela saveman bilong Lo i kamapim askim long Jisas, Jisas i tok: “Wanem tok i stap long lo? Yu ritim olsem wanem?” Man i kolim ol skripsa bilong bekim tok, na Jisas i helpim em long luksave long olsem wanem dispela stiatok i stret long em. Long rot bilong tok piksa, Jisas i helpim dispela man long luksave long ol samting dispela tok i mas mekim long em. (Luk 10:25-37) Buk Baibel i Tok i gat planti tok piksa yu ken mekim wok long en bilong helpim sumatin long bihainim ol stiatok bilong Baibel long wokabaut bilong em yet.
11. Hamas paragraf yu mas skelim long wan wan stadi?
11 Buk Baibel i Tok i kamapim ol tok bilong Baibel long pasin i no hatwok long kisimgut, wankain olsem Jisas i bin kamapim klia ol tok i hatwok long kisimgut. (Matyu 7:28, 29) Bihainim pasin bilong Jisas. Kamapim klia na stret ol tok bilong buk, mekim ol tok man i no hatwok long kisim. No ken hariap long pinisim ol paragraf. Larim sindaun na save bilong sumatin i makim hamas paragraf yu bai skelim long wan wan stadi. Jisas i save long skel bilong ol disaipel bilong em na em i no tokim ol long ol samting ol i no inap kisim long dispela taim.—Jon 16:12.
12. Olsem wanem yumi ken mekim wok long apendiks?
12 Buk Baibel i Tok i gat apendiks i skelim 14 bikpela tok. Yu tisa bilong sumatin, olsem na yu save long ol samting sumatin i mas save gut long en, na yu ken skelim olsem wanem yu bai mekim wok long apendiks. Olsem: Sapos sumatin i hatwok long kisimgut wanpela tok o em i gat sampela askim long wanpela samting em bilip bilong em long bipo i as bilong en, ating yu inap soim long em hap bilong apendiks i stori long dispela samting na larim em yet i skelim. Tasol sampela taim sumatin i hatwok long kliagut long sampela tok. Long kain taim olsem ating yu mas skelim tok bilong apendiks wantaim em. Apendiks i skelim ol bikpela tok bilong Baibel, olsem “Tru Tru Wanpela Samting Bilong Man i Stap Laip Yet Taim Bodi i Dai?” na “Luksave Long ‘Bikpela Babilon.’ ” Gutpela sapos yu skelim ol dispela tok wantaim sumatin. Apendiks i no gat ol askim, olsem na yu mas save gut long ol tok bilong en bambai yu inap kamapim ol gutpela askim.
13. Olsem wanem beten i helpim bilip long kamap strong?
13 Song 127:1 i tok: “Sapos Bikpela i no wokim haus, ol kamda i wok nating.” Olsem na taim yu redi long mekim wanpela Baibel stadi, beten askim Jehova long helpim yu long mekim gut stadi. Gutpela sapos ol beten yu mekim long kirap na long pinis bilong wan wan stadi i kamapim pasin bilong yu long pas gut wantaim Jehova. Strongim sumatin long beten askim Jehova long givim gutpela tingting long em bambai em i ken kliagut long Tok Bilong Em na long givim strong long em bilong bihainim ol dispela tok. (Jems 1:5) Sapos em i mekim olsem, dispela bai strongim sumatin long sanap strong long taim bilong hevi na bilip bilong em bai wok long kamap strong.
Helpim Ol Baibel Sumatin Long Kamap Tisa
14. Ol Baibel sumatin i mas winim wanem mak?
14 Bilong ol Baibel sumatin bilong yumi i ken bihainim “olgeta tok” Jisas i givim long ol disaipel, ol i no ken stap tasol olsem ol sumatin bilong Baibel, ol i mas kamap tisa bilong en tu. (Matyu 28:19, 20; Aposel 1:6-8) Yu ken mekim wanem bilong helpim sumatin long kamap strong olsem?
15. Bilong wanem yu mas kirapim Baibel sumatin bilong yu long kam long ol miting Kristen?
15 Kirap long namba 1 stadi, singautim sumatin long kam long ol miting bilong kongrigesen wantaim yu. Tokim em olsem ol miting em hap we yu save kisim skul bilong mekim wok tisa bilong Baibel. Insait long sampela wik, lusim sampela minit long pinis bilong Baibel stadi long stori long skul yu save kisim long ol tok bilong Baibel long ol narapela narapela miting na ol kibung. Amamas long toktok long ol helpim yu save kisim long ol dispela bung. (Hibru 10:24, 25) Taim sumatin i kirap long kam oltaim long ol miting, em inap kamap tisa bilong Tok Bilong God.
16, 17. Baibel sumatin i ken putim na winim wanem ol mak?
16 Helpim Baibel sumatin long putim ol mak em inap winim. Olsem: Strongim em long tokim ol pren na wanblut long ol samting em i kisim save long en. Tokim em long putim mak long ritim Baibel olgeta. Sapos yu helpim em long wokim na bihainim sediul bilong ritim Baibel long olgeta de, dispela pasin bai helpim em longtaim bihain long em i baptais pinis. Na tu, yu ken tokim sumatin long putim mak long tingim wanpela skripsa i bekim wanpela bikpela askim bilong wan wan sapta bilong buk Baibel i Tok. Long dispela rot, em bai kamap wokman i ‘autim stret tok tru bilong God, na bai em i no gat sem long ai bilong en.’—2 Timoti 2:15.
17 No ken lainim sumatin long kolim nating tasol ol skripsa o long kamapim ol bikpela tok bilong en, nogat, kirapim em long kamapim mining bilong ol bikpela ves bilong Baibel taim em i bekim tok long ol man i laik save long as bilong bilip bilong em. Pasin bilong mekim traim inap helpim sumatin, olsem yu kamap wanpela wanblut o wanwok husat i askim em long stori long ol bilip bilong em. Taim sumatin i bekim tok, soim em long pasin bilong bekim tok “long tok isi na long gutpela pasin.”—1 Pita 3:16.
18. Taim Baibel sumatin i winim mak bilong kamap pablisa i no baptais, wanem narapela samting yu ken mekim bilong helpim em?
18 Bihain, ating sumatin bai winim mak bilong autim tok wantaim kongrigesen. Kamapim klia olsem em i wanpela gutpela samting tru long em i ken insait long dispela wok. (2 Korin 4:1, 7) Taim ol elda i pasim tok olsem sumatin i winim mak bilong kamap pablisa i no baptais, helpim em long lainim wanpela sotpela tok em i ken mekim na autim tok wantaim em. Wok wantaim em long ol narapela narapela rot bilong autim tok, na lainim em long pasin bilong redim na mekim gut ol gobek. Gutpela pasin bilong yu yet bai kirapim sumatin.—Luk 6:40.
‘Kisim Bek Yu Yet na Ol Man i Harim Tok Bilong Yu’
19, 20. Yumi mas putim wanem mak? Bilong wanem yumi mas mekim olsem?
19 Tru tumas, em i bikpela hatwok long helpim wanpela man long “save long as bilong tok tru.” (1 Timoti 2:4) Tasol i no gat planti samting i ken givim bikpela amamas long yumi i wankain olsem wok bilong helpim wanpela long bihainim tok bilong Baibel. (1 Tesalonaika 2:19, 20) Tru tumas, em i wanpela gutpela samting tru long yumi stap “wanwok bilong God” long dispela wok bilong skulim ol man long olgeta hap!—1 Korin 3:9.
20 Long rot bilong Jisas Krais na ol strongpela ensel, klostu nau Jehova bai givim strafe long “ol man i no laik save long God na i no bihainim gutnius bilong Jisas, Bikpela bilong yumi.” (2 Tesalonaika 1:6-8) Laip bilong planti man inap lus. Olsem wanem? Yu inap putim mak long mekim Baibel stadi wantaim wanpela man long buk Tru Tru Baibel i Tok Wanem? Taim yu mekim dispela wok, yu gat rot long ‘kisim bek yu yet na ol man i harim tok bilong yu.’ (1 Timoti 4:16) Long nau, winim olgeta taim bipo, em i bikpela samting long yumi helpim ol man long bihainim tok bilong Baibel.
[Futnot]
a Ol Witnes Bilong Jehova i wokim.
Yu Lainim Wanem Samting?
• Ol i wokim buk Baibel i Tok bilong mekim wanem wok?
• Olsem wanem yu ken kirapim ol man long stadi long Baibel long rot bilong buk Baibel i Tok?
• Yumi ken bihainim wanem ol pasin bilong mekim gut wok tisa?
• Olsem wanem yu ken helpim sumatin long kamap tisa bilong Baibel?
[Piksa long pes 26]
Yu save mekim gutpela wok long dispela buk?
[Piksa long pes 27]
Sotpela toktok inap kirapim laik bilong man long kisim save long Baibel
[Piksa long pes 29]
Yu ken mekim wanem bilong kirapim sumatin long tingim tok bilong Baibel?
[Piksa long pes 30]
Helpim Baibel sumatin long kamap strong