Kamapim Ol Disaipel Long Rot Bilong Buk Save
1 Olgeta Kristen i gat wok long lainim ol man long tok i tru na helpim ol man long kamap disaipel, em ‘bel bilong ol i gutpela tru bilong kisim laip oltaim.’ (Ap 13:48; Mt 28:19, 20) Bilong helpim yumi long mekim dispela wok, oganaisesen bilong Jehova i bin givim wanpela gutpela buk long yumi—buk Save i Bringim Man Long Laip Oltaim. Nem bilong buk i helpim yumi long tingim wok bilong mekim Baibel-stadi em i bikpela samting tru. Yumi save, bilong man i ken kisim laip oltaim, em i mas kisim save long Jehova, em wanpela tasol em i God tru, na long Pikinini bilong em, Krais Jisas.—Jo 17:3.
2 Buk Save em i nambawan buk bilong Sosaiti long nau long mekim Baibel-stadi long en. Dispela buk bai helpim yumi long kamapim klia tok i tru na lainim ol man insait long liklik hap taim tasol. Dispela bai helpim yumi long putim tok i tru i go daun long bel bilong man. (Lu 24:32) Tasol tisa tu i mas mekim gutpela wok bilong skulim man. Bilong helpim yu long mekim olsem, Sosaiti i bin redim dispela pepa i kamapim sampela tok yu ken mekim wok long en, na i kamapim sampela pasin bilong skulim ol man, em ol brata i traim pinis na i bin kamapim gutpela wok. Sapos yu tingting gut, na tingim ol stadi wan wan, ating isi isi bai yu inap bihainim sampela o olgeta tok em pepa hia i kamapim. No ken tromoi dispela pepa; holim i stap na lukim gen planti taim. Ating ol tok bilong en inap helpim yu long mekim gutpela wok moa bilong kamapim ol disaipel, long rot bilong buk Save.
3 Helpim Baibel-Stadi Long Kamap Strong: Tingim sumatin olsem em inap kamap wanpela disaipel Kristen na wanpela brata o sista spirit bilong yumi. Mekim gutpela pasin pren long em, na amamas long kamapim ol tok bilong stadi. Putim gut yau long ol tok em i kamapim na bai yu inap save gut long em—em i bin go bikpela long wanem kain pasin na olsem wanem long i stap bilong em long nau—dispela bai helpim yu long save long gutpela rot bilong helpim em long ol samting bilong spirit. Redi long givim yu yet bilong helpim sumatin.—1 Te 2:8.
4 Taim yu kamapim stadi pinis, gutpela sapos yu bihainim stret ol sapta long buk Save, olsem sapta 1, sapta 2, olsem. Dispela inap helpim sumatin na bai em i wok long kisim save long tok i tru na kisim gut ol dispela tok, long wanem, buk i kamapim ol tok bilong Baibel olsem narapela tok i bihainim gut narapela tok. Mekim stadi long pasin i no hatwok long em i ken kisim gut, na long pasin i kirapim tingting bilong em na em i laik putim yau—long dispela rot bai yu inap mekim planti paragraf insait long liklik hap taim. (Ro 12:11) Tingim save bilong sumatin na i stap bilong em, na sapos inap, ating klostu olgeta taim yu mekim stadi, bai yu inap pinisim wanpela sapta olgeta insait long wanpela aua, tasol no ken mekim hariap tumas. Sapos long olgeta wan wan wik, tisa na sumatin i mekim stadi long taim stret tupela i bin makim, dispela bai helpim sumatin long kamap strong kwiktaim. Long dispela rot ating bai yu inap pinisim ol 19-pela sapta bilong buk insait long 6-pela mun samting.
5 Taim yu kirapim stadi long ol wan wan wik, mekim liklik tok bilong kirapim tingting bilong sumatin long ol tok bilong stadi. Het-tok bilong olgeta wan wan sapta em as tok bilong sapta, na yu mas stori gut long en. Olgeta wan wan liklik het-tok i kamapim wanpela bikpela tok i helpim yu long tingim as tok bilong sapta. Was gut, nogut yu mekim planti toktok. Kirapim sumatin long toktok. Tingim ol samting sumatin i save pinis long en, na kamapim sampela askim bilong helpim sumatin long wokim gut tingting na bai em inap kisim stretpela tingting long samting yu laik lainim em long en. (Mt 17:24-26; Lu 10:25-37; lukim School Guidebook, p. 51, par. 10.) Bihainim stret ol tok i stap long buk Save. No ken kamapim planti narapela tok—nogut dispela i tekewe o karamapim ol bikpela tok bilong stadi na pulim ol minit bilong stadi. (Jo 16:12) Sapos sumatin i kamapim askim bilong samting i no insait long stadi, ating taim stadi i pinis yu ken bekim dispela askim. Long dispela rot bai yu inap stadi long olgeta paragraf, na dispela askim i no pulim yu long toktok long sampela narapela samting. Tokim sumatin, ol narapela sapta long buk bai bekim klostu olgeta askim bilong em.—Lukim School Guidebook, p. 94, par. 14.
6 Sapos sumatin i bilip strong long God Triwan, man i gat tewel i no inap i dai, bikpaia, o sampela narapela tok giaman, na em i pilim olsem ol tok bilong buk Save i no inap, orait, givim buk Toktok Gut long em o sampela narapela buk i toktok long dispela samting. Tokim em, taim em i tingting pinis long ol tok em i kaunim, bai yu toktok wantaim em long dispela samting.
7 Sapos yu kirapim na pinisim stadi long beten na askim Jehova long stiaim tingting bilong yupela na blesim stadi, dispela bai litimapim stadi, na kirapim sumatin long tingim gut stadi, na tingim Jehova em i Tisa tru bilong em. (Jo 6:45) Sapos sumatin i no lusim yet pasin bilong smok, ating bihain liklik yu ken tokim em long lusim smok long taim bilong stadi.—Ap 24:16; Je 4:3.
8 Mekim Gutpela Wok Tisa Long Rot Bilong Baibel, Ol Piksa, na Long Ol Askim Bilong Tingim Gen Tok: Maski tisa i bin stadi long wanpela tok planti taim bipo, gutpela tisa bai lukim gen ol tok bilong stadi na tingim sumatin. Dispela bai helpim em long tingim sampela askim em i ting sumatin bai kamapim. Bilong mekim gut wok tisa, yu mas save gut long olgeta bikpela tok bilong sapta. Opim Baibel na lukim ol skripsa na tingim olsem wanem ol i helpim ol tok bilong stadi, na tingim wanem ol skripsa i gutpela long kaunim long taim bilong stadi. Lukim ol piksa na ol askim i stap long pinis bilong sapta na tingim olsem wanem yu ken mekim wok tisa long en.
9 Sapos yu kamapim gut ol skripsa, sumatin bai pilim olsem em i stadi tru long Baibel. (Ap 17:11) Mekim wok long blok “Save Gut Long Baibel Bilong Yu,” long pes 14 bilong buk Save, na lainim em long pasin bilong painim ol skripsa. Lainim em long painim ol skripsa em buk i kamapim ol tok bilong en. Sapos i gat taim, opim Baibel na kaunim ol skripsa em buk i kolim sapta na ves tasol. Tokim sumatin long stori olsem wanem ol dispela skripsa i helpim o i kamapim klia ol tok bilong paragraf. Stori gut long ol bikpela tok bilong ol skripsa na bai em inap save long as na ol i kamapim ol bikpela tok bilong stadi. (Neh 8:8) Ating tisa i no gat wok long kamapim sampela skripsa moa i no stap long buk. Tokim sumatin long olsem wanem i gutpela sapos em i save long nem bilong olgeta buk bilong Baibel, na wanem buk i kam pastaim na wanem buk i kam bihain. Sapos sumatin i kaunim Wastaua (tok Inglis), Jun 15, 1991, pes 27-30, ating dispela bai helpim em.
10 Stadi 34 bilong Theocratic Ministry School Guidebook i tok olsem ol tok piksa i gat wok long kirapim tingting bilong man na i helpim em long kisim ol nupela tok. Ol tok piksa i helpim tingting na bel long wok wantaim long kisim gut tok, winim pasin bilong tokaut stret long dispela tok. (Mt 13:34) I gat planti tok piksa long buk Save bilong skulim ol man long en—i no hatwok long kisim insait bilong ol dispela tok piksa na ol i gat strong. Olsem: Long sapta 17 i gat wanpela tok piksa i helpim man long save, long rot bilong lain Kristen, Jehova i save givim planti samting bilong spirit long yumi i olsem kaikai, klos, na haus. Yu ken mekim gutpela wok long ol naispela piksa long buk Save bilong kirapim bel bilong man long pilim tru ol tok. Bilong strongim tok bilong paragraf 18, pes 185, aninit long liklik het-tok “Amamas Bilong Taim Bilong Kirap Bek,” tokim sumatin long lukim piksa long pes 86. Ating dispela inap kirapim em long tingim kirap bek bai i olsem wanpela samting tru taim Kingdom bilong God i bosim graun.
11 Ol Baibel-stadi i mas wok long kamap strong long olgeta wan wan stadi. Bilong helpim sumatin olsem, kolim ol askim i stap long blok “Traim Save Bilong Yu”—dispela blok i stap long pinis bilong olgeta wan wan sapta. Putim gut yau long tok sumatin i kamapim; tok i makim olsem em i kisim gut tok em i bin stadi long en, o em i kolim nating tasol? Sampela askim i bilong kirapim sumatin long kamapim bel bilong em. Wanpela askim olsem i stap long pes 31: “Yu laikim tru wanem ol pasin bilong God Jehova?”—2 Ko 13:5.
12 Skulim Sumatin Long Pasin Bilong Redim Stadi: Sumatin bai kamap strong kwiktaim sapos em i redim stadi pastaim, na katim ol bekim, na tingim olsem wanem em inap kamapim ol dispela tok long toktok bilong em yet. Sapos yu stap gutpela piksa na yu strongim em, bai yu inap skulim em long pasin bilong redim stadi. Soim buk bilong yu yet long em, em yu bin katim long pen ol bikpela tok. Stori long rot bilong painim ol tok i bekim stret ol askim i stap daunbilo long pes. Sapos yutupela wantaim i redim wanpela sapta, ating dispela bai helpim em. Kirapim em long bekim tok long toktok bilong em yet. Long dispela rot tasol bai yu inap save, em i bin kisim gut ol tok bilong stadi o nogat. Sapos em i kaunim tasol ol bekim, orait, bilong kirapim tingting bilong em, askim em long kamapim dispela tok long toktok bilong em yet olsem em i laik tokim narapela man long en.
13 Kirapim sumatin olsem taim em i redim stadi long olgeta wan wan wik, gutpela sapos em i opim Baibel na lukim ol skripsa em buk i kolim sapta na ves tasol, long wanem, long taim bilong stadi ating bai i no gat taim long kaunim olgeta dispela skripsa. Mekim sampela tok amamas long ol gutpela wok sumatin i mekim long stadi. (2 Pi 1:5; Ogas 15, 1993, Wastaua, p. 13-14, i stori long sampela samting moa tisa na sumatin i ken mekim bilong helpim sumatin long kisim sampela save moa long taim bilong stadi.) Long dispela rot tisa i wok long skulim sumatin long pasin bilong redim ol tok bilong miting na long bekim sampela tok. Sumatin bai lain gut long pasin bilong mekim stadi em yet i mas mekim, na taim stadi bilong em long buk Save i pinis, bai em i wok yet long kamap strong long tok i tru.—1 Ti 4:15; 1 Pi 2:2.
14 Helpim Sumatin Long Save Long Oganaisesen Bilong Jehova: Tisa i gat wok long helpim sumatin long save long oganaisesen bilong Jehova. Sapos sumatin i laikim tru dispela oganaisesen na em i save em i mas insait long en, kwiktaim bai em i kamap strong long ol samting bilong spirit. Yumi laik bai em i amamas long bung wantaim lain bilong God long Haus Kingdom—dispela bai helpim em long ol samting bilong spirit na strongim bel bilong em.—1 Ti 3:15.
15 Buklet Ol Witnes Bilong Jehova Ol i Wanbel na Mekim Wok Bilong God Long Olgeta Hap Bilong Graun i bilong helpim ol man long save long dispela wanpela oganaisesen tasol long graun em Jehova i mekim wok long en long nau bilong kamapim laik bilong em. Taim yu kamapim stadi pinis, gutpela sapos yu givim dispela buklet long em. Kirap long namba wan stadi, wok long singautim sumatin long kam long ol miting. Tokim em long pasin bilong yumi long wokim ol miting. Yu ken tokim em long nem bilong wanpela pablik-tok i laik kamap o soim em stori bilong Stadi Wastaua yumi bai stadi long en. Long taim i no gat miting, kisim em i go lukim Haus Kingdom na bai em i no pret long kam namba wan taim long wanpela nupela ples em i no save long en. Ating bai yu inap kisim em i kam long miting long ka bilong yu. Taim em i kam, tok amamas long em na lukautim em. (Mt 7:12) Bringim em long sampela narapela Witnes, na ol elda tu, na bai ol i ken toktok wantaim em. Mipela i laik bai em i tingim ol brata sista i olsem famili spirit bilong em. (Mt 12:49, 50; Mk 10:29, 30) Putim wanpela mak bilong em i ken winim, olsem kam long wanpela miting long olgeta wik, na isi isi yu ken putim sampela mak moa.—Hi 10:24, 25.
16 Taim em i wok long stadi long buk Save, stori gut long ol paragraf i makim olsem oltaim yumi mas bung wantaim long ol miting bilong kongrigesen. Lukim pes 52, 115, 137-139, 159, na sapta 17 tu. Kamapim bel bilong yu yet, olsem yu laikim tru oganaisesen bilong Jehova. (Mt 24:45-47) Stori long ol gutpela samting bilong kongrigesen na ol gutpela samting yu lainim long miting. (Sng 84:10; 133:1-3) Gutpela sapos em i lukim olgeta wan wan video bilong Sosaiti, kirap long video Jehovah’s Witnesses—The Organization Behind the Name. Sapos yu laik save moa long ol samting yu ken mekim bilong bringim ol nupela man i kam long oganaisesen, lukim Jun 1, 1985, Wastaua, pes 15-20, na insert bilong Epril 1993 Wok Kingdom Bilong Yumi (USA).
17 Kirapim Sumatin Long Autim Tok: Yumi stadi wantaim ol man bilong helpim ol long kamap disaipel na autim tok long Jehova. (Ais 43:10-12) Olsem na tisa i mas kirapim sumatin long autim ol tok bilong Baibel em i lainim. Bilong mekim olsem, yu ken askim em: “Sapos yu laik helpim ol famili bilong yu long save long wanpela tok i tru, bai yu tok wanem?” o “Wanem skripsa bai yu kamapim bilong helpim wantok bilong yu long save long dispela tok i tru?” Stori gut long ol hap bilong buk i stori long wok autim tok, olsem pes 22, 93-95, 105-106, na sapta 18 tu. Long taim yu ting i orait long mekim, givim sampela liklik nius long sumatin bilong tilim long kain kain taim na ples. Tokim em long singautim ol famili bilong em i kam sindaun long stadi bilong em. Olsem wanem? Em i gat sampela wantok ol tu i laik stadi? Sapos em i save long sampela man i laik harim tok, askim em long toksave long yu.
18 Sapos sumatin i kam long Skul Bilong Wok Autim Tok na Miting Bilong Wok, bai em i skul moa na i gat laik long kamap pablisa i autim gutnius. Taim em i kamapim laik bilong em olsem em i laik insait long skul o kamap pablisa i no baptais yet, i gat sampela lo em i mas bihainim olsem i stap long pes 97-99 bilong buk Lo. Sapos em i no stretim yet sampela pasin bilong em, painim sampela tok long ol buk bilong Sosaiti i stori long dispela, na soim em. Olsem: Ating sumatin i hatwok long lusim smok o ol narapela drak. Buk Toktok Gut i kamapim sampela as na ol Kristen i mas lusim ol pasin em inap bagarapim man, na pes 95 i stori long ol samting i bin helpim sampela long lusim smok na ol narapela drak. Beten wantaim sumatin long dispela samting, na strongim em long bilip olsem Jehova bai helpim em.—Je 4:8.
19 Sapos yu laik save sumatin inap insait long wok autim tok o nogat, lukim Wastaua bilong Janueri 15, 1996, pes 16, paragraf 6. Taim sumatin inap insait long wok autim tok, gutpela sapos yu helpim em long redim sampela tok na mekim traim na bai em i redi long autim tok long namba wan taim. Tokim em long sampela tingting na askim ol man long teritori i save kamapim, tasol mekim long pasin bilong strongim em. Pastaim lainim em long pasin bilong autim tok long ol haus, na isi isi lainim em long sampela narapela wok bilong autim tok. Sapos yu mekim liklik tok tasol long pasin i no hatwok long save long en, bai em i no hatwok long bihainim. Strongim bel bilong em na amamas long mekim dispela wok bambai sumatin i ken pilim tru na em tu i ken amamas olsem. (Ap 18:25) Nupela disaipel i mas tingting long kamap pablisa i givim bel oltaim long autim gutnius. Ating yu ken helpim em long wokim sedyul bilong autim tok em inap bihainim. Bilong helpim em long mekim gut wok bilong autim tok, tokim em long kaunim Wastaua bilong Janueri 1, 1994, pes 20-25, na ol Wastaua (tok Inglis) bilong Ogas 15, 1984, pes 15-25; Julai 15, 1988, pes 9-20; Janueri 15, 1991, pes 15-20.
20 Kirapim Sumatin na Bai Em i Laik Dediket na Baptais: Ating sumatin i gat gutpela bel em inap lain long ol samting long rot bilong buk Save na bai em i ken dediket long God na winim mak bilong kisim baptais. (Skelim wantaim Aposel 8:27-39; 16:25-34.) Tasol taim sumatin i no dediket yet, helpim em long kisim pasin bilong givim bel long Jehova. (Sng 73:25-28) Taim yu stadi wantaim em, wok long painim rot bilong helpim em long pilim tru ol gutpela pasin bilong Jehova. Kamapim bel bilong yu olsem yu yet yu gat wanem tingting long God. Helpim sumatin long go klostu long Jehova olsem gutpela pren bilong em. Sapos em i save tru long God na laikim em tumas, em bai stap gut long mekim wok bilong Em, long wanem, man i givim bel tru long Jehova, em i mas laikim tumas ol pasin bilong em.—1 Ti 4:7, 8; lukim School Guidebook, p. 76, par. 11.
21 Wok long putim tok long bel bilong sumatin. (Sng 119:11; Ap 16:14; Ro 10:10) Em i mas save olsem wanem tok i tru inap helpim em yet na ol samting em i mas mekim bilong bihainim ol dispela tok. (Ro 12:2) Olsem wanem? Em i bilipim ol tok i tru em i lainim long olgeta wik? (1 Te 2:13) Bilong yu ken save olsem, askim sumatin long kamapim tingting bilong em, olsem: Wanem tingting bilong yu long dispela samting? Yu ken mekim wanem bilong bihainim dispela tok? Tok em i kamapim inap helpim yu long save long sampela samting moa yu mas mekim bilong putim tok i go daun long bel bilong em. (Lu 8:15; lukim School Guidebook, p. 52, par. 11.) Piksa long pes 172 na 174 bilong buk Save, i gat rait i kamapim askim: “Yu dediket pinis long God long rot bilong beten?” na “Wanem samting i pasim rot na yu no kisim baptais?” Ol dispela askim inap kirapim sumatin long mekim wok.
22 Taim pablisa i no baptais yet i kamapim laik bilong em long kisim baptais, bihainim ol tok i stap long Wastaua bilong Janueri 15, 1996, pes 17, paragraf 9. Ol i raitim buk Save bambai man i stadi long en inap bekim ol askim ol elda bai stori long en wantaim em, em “Ol Askim Bilong Givim Long Man o Meri i Laik Kisim Baptais,” pes 175-218, long buk Lo. Sapos yu bin kamapim gut bekim bilong ol dispela askim taim yu stadi wantaim man long buk Save, ating sumatin inap bekim ol askim ol elda bai kamapim long em taim em i laik kisim baptais.
23 Helpim Ol Man i Stadi Pinis Long Buk: Taim man i stadi pinis long buk Save, ating bai yu save pinis, em i laik tru long mekim wok bilong God o nogat. (Mt 13:23) Olsem na laspela liklik het-tok long buk i kamapim askim, “Bai Yu Mekim Wanem?” Ol laspela paragraf i kirapim sumatin long tingim olsem em i mas stap pren bilong God, na em i mas bihainim ol save em i bin skul long en, na em i mas hariap mekim wok bilong kamapim klia olsem em i laikim tumas Jehova. Taim em i stadi pinis long buk Save, yumi no gat wok long stadi wantaim em long ol narapela buk. Sapos sumatin i no mekim wok long save bilong God em i kisim, orait long pasin sori, kamapim klia ol samting em i mas mekim bambai em i ken kamap strong long spirit. Ating sampela taim yu ken go lukim em na bai rot i op long em i ken mekim ol samting i bringim man long laip oltaim.—Sav 12:13.
24 Nupela disaipel i laikim tok i tru na kisim baptais, em i mas wok long lain moa na bai em inap stap strong long bilip. (Kl 2:6, 7) Taim yu stadi pinis wantaim em long buk Save, yu no ken mekim Baibel-stadi moa wantaim em, tasol yu ken mekim sampela wok bilong helpim em long kamap strong long spirit, sapos i gat wok long yu mekim olsem. (Ga 6:10; Hi 6:1) Em yet i ken wok long kisim sampela save moa; em i ken kaunim Baibel long olgeta de, stadi long Wastaua na ol narapela buk em ‘gutpela wokboi’ i bin redim, redim ol tok bilong miting na go long ol miting, na toktok long ol tok i tru wantaim ol wanbilip. (Mt 24:45-47; Sng 1:2; Ap 2:41, 42; Kl 1:9, 10) Sapos em i kaunim buk Lo na bihainim, dispela bai helpim em long bihainim pasin God i laikim long mekim ol wok na bai em inap mekim tru wok bilong autim tok.—2 Ti 2:2; 4:5.
25 Wok Long Kamap Gutpela Tisa: Yumi gat wok bilong “mekim olgeta lain manmeri i kamap disaipel . . . [na] lainim ol.” (Mt 28:19, 20) Yumi mas mekim wok tisa bilong kamapim ol disaipel, olsem na yumi mas wok long kamap gutpela tisa. (1 Ti 4:16; 2 Ti 4:2) Bilong helpim yu long mekim gutpela wok tisa, kaunim: “Wok Long Kamap Gutpela Tisa,” Buk Bilong Skul, stadi 7; “Reaching the Heart of Your Listeners,” School Guidebook, stadi 15; “Teacher, Teaching,” buk Insight, Volyum 2; na ol stori bilong Wastaua “Wokim Long Samting i No Save Paia” na “Taim Yu Lainim Man, Putim Tok i Go Daun Long Bel,” Me 1, 1985; “Rot Bilong Toktok Gut Wantaim Ol Man Long Baibel,” Novemba 1, 1986; na “Rot Bilong Painim Amamas Long Kamapim Disaipel,” Februeri 15, 1996.
26 Taim yu wok long kamapim ol disaipel na mekim wok long buk Save, beten oltaim long Jehova, em “i save mekim kaikai i kamap,” na bai em i ken blesim ol wok yu mekim bilong putim gutpela tok bilong Kingdom i go daun long bel bilong man. (1 Ko 3:5-7) Mipela i laik bai yu kisim amamas long helpim ol narapela long kisim save, pilim tru ol tok, na bihainim dispela save i bringim man long laip oltaim!
This article is repeated in km 7/01