Lainim Ol Man Long Tok Em Tru Tru Baibel i Kamapim

“Yupela i mas i go mekim olgeta lain manmeri i kamap disaipel . . . na yupela lainim ol.”​—MATYU 28:​19, 20.

1. Husat inap ritim Baibel?

TOK BILONG JEHOVA, em Baibel Holi, em i olpela buk tru na ol i bin tilim long planti hap bilong graun, winim tru olgeta narapela buk. Ol i bin tanim sampela hap bilong en i go long winim 2,300 tok ples. Winim 90 pesen bilong ol man i stap long graun, ol inap ritim Baibel long tok ples bilong ol yet.

2, 3. (a) Bilong wanem ol man i paul long ol tok Baibel i lainim yumi long en? (b) Bai yumi skelim wanem ol askim?

² Planti milion manmeri i save ritim Baibel long olgeta de. Sampela i bin ritim Baibel olgeta inap planti taim. Planti tausen lotu i tok Baibel i as bilong ol tok ol i lainim ol man long en, tasol ol i no wanbel long tok Baibel i mekim. Na tu, sampela memba insait long wanpela lotu yet i no gat pasin bilong stap wanbel. Sampela i gat tupela tingting long Baibel, long rot em i kamap long en, na olsem wanem em inap helpim ol man. Planti i ting em i wanpela buk holi tasol bilong yusim long taim ol i mekim wanpela tok promis o bilong mekim tok tru antap long kot olsem ol bai i no giaman.

³ Baibel i gat strongpela tok bilong God long ol manmeri. (Hibru 4:12) Olsem na yumi ol Witnes Bilong Jehova i laik bai ol manmeri i kisim save long tok bilong Baibel. Yumi amamas long mekim wok Jisas Krais i bin givim long lain bilong em, taim em i tok: “Yupela i mas i go mekim olgeta lain manmeri i kamap disaipel . . . na yupela lainim ol.” (Matyu 28:​19, 20) Taim yumi autim tok, yumi painim ol man i gat gutpela bel husat i tingting planti long pasin bilong ol lotu long paulim ol man long olgeta hap. Ol i laik save long Man Bilong Wokim yumi em i husat tru, na ol i laik save Baibel i tok wanem long as na yumi stap laip. Nau bai yumi skelim tripela askim planti man i tingting long en. Long dispela tripela askim, bai yumi kamapim ol tingting kranki bilong ol hetman bilong lotu, na bihain bai yumi stori long ol tok em tru tru Baibel i lainim yumi long en. Ol askim i olsem: (1) God i save tingim yumi? (2) Yumi stap bilong mekim wanem? (3) Wanem samting i painim yumi taim yumi dai?

God i Save Tingim Yumi?

4, 5. Bilong wanem ol man i tok God i no save tingim yumi?

⁴ Pastaim yumi ken skelim dispela askim, God i save tingim yumi? Sori tru, planti man i ting bekim bilong dispela askim em nogat. Bilong wanem ol i ting olsem? Wanpela samting em ol i lukim ol woa, pasin birua, na pen na hevi i pulap long graun. Ol i ting ‘Sapos tru tru God i tingim yumi, em bai i no larim ol samting nogut olsem i kamap.’

⁵ Narapela as na ol manmeri i ting God i no save tingim yumi, em ol hetman bilong lotu i givim dispela tingting long ol. Planti hetman bilong lotu i save tok wanem taim bikpela bagarap i kamap? Taim tupela liklik pikinini bilong wanpela meri i dai long ka eksiden, pris i tok: “Dispela em i laik bilong God. God i laik kisim tupela ensel moa long heven.” Taim ol hetman bilong lotu i mekim kain tok olsem, ol i sutim asua bilong ol hevi i go long God. Tasol disaipel Jems i tok: “Sapos samting i kirapim bel bilong wanpela man na i pulim em long mekim sin, em i no ken tok, ‘God i pulim mi long mekim dispela pasin.’ Nogat. Sin i no inap pulim God, na God i no save pulim man long mekim sin.” (Jems 1:13) I no gat wanpela taim God Jehova i as bilong wanpela samting nogut. Tru tumas, “God I Gat Olgeta Strong i no inap mekim pasin nogut. Nogat tru.”​—Jop 34:10.

6. Husat i as bilong pasin nogut na pen na hevi bilong dispela graun?

⁶ Orait, bilong wanem i gat planti tumas pen na hevi? Wanpela samting, em klostu olgeta man i bin givim baksait long God olsem King bilong ol, na ol i no laik bihainim ol stretpela lo na stiatok bilong em. Ol man i no save ol i stap aninit long birua bilong God, em Satan, long wanem, ol i no save “dispela graun olgeta em i stap aninit long strong bilong Satan.” (1 Jon 5:19) Taim yumi save long dispela, yumi inap kliagut long as na pasin bilong dispela graun i nogut tru. Satan em i man bilong giaman na man nogut i save amamas long mekim nogut tru long ol narapela. Na yumi mas save olsem pasin bilong ol man bilong dispela graun i kamapim stret pasin bilong dispela man i stap bos bilong ol. Olsem na yumi no kirap nogut long i gat planti pen na hevi long nau!

7. Wanem sampela as bilong ol pen na hevi yumi karim?

⁷ Narapela as bilong ol pen na hevi, em ol man i no gutpela olgeta. Ol sinman i save pait bilong kisim namba long bosim ol narapela, na planti taim dispela i save kamapim ol woa, pasin bilong daunim narapela, na pen na hevi. Saveman 8:9 i tok: “Sampela bikman i wok long daunim ol arapela manmeri na mekim nogut long ol.” Narapela as na i gat pen na hevi, em “taim nogut i save painim yumi olgeta.” (Saveman 9:11) Planti taim ol man i bungim birua, long wanem, ol i stap long wanpela hap we trabel i kamap.

8, 9. Olsem wanem yumi save Jehova i save tingim tru yumi?

⁸ Yumi amamas long save olsem Jehova i no as bilong ol pen na hevi. Tasol yu ting God i save tingim ol samting i kamap long laip bilong yumi? Bekim bilong dispela askim em yes! Yumi save God i tingim yumi, long wanem, long Baibel em i kamapim as na em i bin larim ol man i bihainim rot nogut. Em i mekim olsem bilong stretim tupela bikpela tok: wok bos bilong em na pasin bilong ol man long stap gut long em. Jehova em i Man Bilong Wokim yumi na em i gat olgeta strong, olsem na i no olsem em i mas tokim yumi long as na em i larim pen na hevi i stap. Tasol em i tokaut long dispela samting, long wanem, em i tingim yumi.

⁹ Tingim narapela samting i soim olsem God i tingim yumi. Em i bin “bel hevi tru” taim pasin nogut i pulap long graun long taim bilong Noa. (Stat 6:​5, 6) Yu ting God i gat narapela kain tingting long nau? Nogat, long wanem, em i no save senis. (Malakai 3:6) Em i nolaik tru long pasin i no stret, na em i nolaik tru long lukim ol man i karim ol pen na hevi. Baibel i tok klostu nau God bai stretim olgeta hevi em wok bos bilong ol man na pasin nogut bilong Satan i bin kamapim. Dispela i kamapim klia olsem God i save tingim yumi, laka?

10. Jehova i ting olsem wanem long ol man i karim pen na hevi?

¹⁰ Ol hetman bilong lotu i bagarapim tru nem bilong God taim ol i tok ol samting nogut i kamap long laip bilong yumi, em i laik bilong God. Tasol Jehova i gat laik long pinisim ol pen na hevi. Namba 1 Pita 5:7 i tok, “God i save wari long yupela.” Dispela em tok tru tru Baibel i kamapim!

Yumi Stap Bilong Mekim Wanem?

11. Planti lotu i save tok wanem long laip bilong yumi hia long graun?

¹¹ Nau yumi ken skelim narapela askim planti man i laik save long en, Yumi stap bilong mekim wanem? Ol lotu i save tok ol man i bilong stap long graun inap sotpela taim tasol. Ol i ting graun em i wanpela hap ol man i stap liklik taim tasol long en paslain long ol i go long narapela hap. Sampela pris pasto i lainim ol man olsem God bai bagarapim dispela graun, tasol dispela tok i no tru. Kain tok olsem i mekim na planti man i ting i gutpela sapos ol i kisim olgeta amamas ol i gat rot long kisim, long wanem, bihain ol bai dai tasol. Tru tru Baibel i tok wanem long as na yumi stap laip?

12-14. Baibel i tok wanem long samting God i tingting pinis long mekim long dispela graun na long ol man?

¹² God i makim pinis gutpela wok tru bilong graun na bilong ol man. Em “i no wokim graun bilong i stap nating. Nogat. Em i bin wokim bilong olgeta samting i ken i stap long en.” (Aisaia 45:18) Na tu, Jehova i “bin putim dispela graun i stap long ples bilong en, na graun i stap strong olgeta. Em i no inap surik liklik. Nogat tru.” (Song 104:5) Taim yumi kisim save long samting God i tingting pinis long mekim long dispela graun na long ol man, dispela inap helpim yumi long kliagut long as bilong i stap bilong yumi.

¹³ Buk Stat sapta 1 na 2 i soim olsem Jehova i bin redim graun gut tru bilong ol man i ken i stap long en. Taim em i wokim graun pinis, olgeta samting i gutpela tru. (Stat 1:31) God i putim namba wan man na meri, Adam tupela Iv, long naispela gaden Iden na i givim planti gutpela kaikai long ol. God i tokim namba wan man na meri olsem: “Yupela i mas kamap planti na i go sindaun long olgeta hap bilong graun na bosim olgeta samting i stap long en.” Ol bai kamapim ol pikinini i gutpela olgeta, na ol i gat wok long surikim gaden i go long olgeta hap bilong graun, na ol i mas bosim ol animal long gutpela pasin.​—Stat 1:​26-​28.

¹⁴ Jehova i laik bai ol man i gutpela olgeta i stap oltaim long graun. Baibel i tok: “Ol stretpela man bai i kisim graun God i givim ol, na bai ol i stap oltaim long en.” (Song 37:29) Em nau, ol man i bilong stap amamas oltaim long Paradais long graun. Em laik bilong God, na tru tru, dispela em i tok Baibel i lainim yumi long en!

Wanem Samting i Painim Yumi Taim Yumi Dai?

15. Klostu olgeta lotu i tok wanem samting i painim yumi taim yumi dai?

¹⁵ Nau yumi ken skelim namba tri askim em planti man i tingting long en: Wanem samting i painim yumi taim yumi dai? Klostu olgeta lotu bilong dispela graun i tok olsem i gat samting i stap insait long man, na dispela samting i save stap laip yet taim bodi bilong man i dai pinis. Sampela lotu i bilip yet olsem God i givim strafe long ol man nogut long helpaia inap oltaim oltaim. Yu ting dispela tok i stret? Tru tru Baibel i tok wanem long dai?

16, 17. Baibel i tok wanem samting i painim ol man i dai pinis?

¹⁶ Baibel i tok: “Ol man i gat laip i winim ol man i dai pinis. Long wanem, ol i save wanpela samting bai i kamap long ol. Ol i save bai ol i dai. Tasol ol man i dai pinis, ol i no inap save long wanpela samting.” Ol man i dai pinis “ol i no inap save long wanpela samting,” olsem na ol i no inap harim toktok, lukim wanpela samting, pilim samting, o wokim tingting. Ol i no kisim gutpela samting moa. Ol i no inap tru long kisim, long wanem, ol i no inap wok o mekim wanpela samting! Na tu, “taim ol manmeri i dai, laik na kros na mangal bilong ol i pinis olgeta,” long wanem, ol i no inap pilim moa ol samting long bel.​—Saveman 9:​5, 6, 10.

¹⁷ Tok Baibel i mekim long dispela samting em i klia tru​—ol daiman i no stap laip long wanpela narapela hap. Taim yumi dai, i no gat wanpela samting i lusim bodi bilong yumi na i stap laip yet na kamap nupela gen long narapela bodi, olsem sampela man husat i bilip long dispela ol i save tok. Yumi ken tok piksa long dispela olsem: Laip bilong yumi i olsem liklik lait bilong kandel. Taim wanpela i kilim lait bilong kandel, dispela lait i no go long wanpela hap, em i pinis tasol.

18. Taim Baibel sumatin i kisim save olsem ol man i dai pinis i no save long wanpela samting, em inap luksave long wanem ol samting?

¹⁸ Tingim samting dispela bikpela tok i tru i save mekim. Taim wanpela Baibel sumatin i kisim save olsem ol man i dai pinis ol i no save long wanpela samting, ating em bai luksave olsem maski ol tumbuna bilong em i dai pinis i bin bel nogut long em taim ol i stap laip, ol i no inap mekim wanpela samting long em long nau. Kwiktaim em bai kliagut olsem ol famili bilong em i dai pinis, ol i no inap harim, lukim, pilim, toktok, o wokim tingting. Olsem na ol i no inap karim hevi bilong stap wanpis long klinpaia o karim bikpela pen long wanpela ples paia. Tasol Baibel i tok ol man i dai pinis na God i tingim yet ol, ol bai kirap bek. Em i wanpela gutpela samting tru bilong wetim!​—Jon 5:​28, 29.

Nupela Buk Bilong Yumi Ken Yusim

19, 20. Yumi ol Kristen i gat wanem wok? I gat wanem buk bilong stadi long Baibel ol i bin wokim bilong yumi ken yusim long wok autim tok?

¹⁹ Yumi bin skelim tripela askim tasol em planti man i tingting long en. Long ol dispela tripela askim yumi lukim olsem tok Baibel i lainim yumi long en i klia tru. Yumi amamas tru long autim ol dispela tok i tru long ol man husat i laik save long ol tok Baibel i lainim yumi long en! Tasol i gat planti narapela bikpela askim ol manmeri i gat gutpela bel i mas save long en. Yumi ol Kristen i gat wok long helpim ol long painim bekim bilong ol dispela askim.

²⁰ Yumi mas wok strong long mekim ol tok i klia taim yumi skulim ol man long tok i tru bilong Baibel, na long mekim ol tok ol man inap pilim tru long bel. Bilong helpim yumi long mekim dispela wok, “wokboi i gat gutpela tingting” i bin redim wanpela buk bilong yumi ken yusim long wok autim tok bilong yumi. (Matyu 24:​45-​47) Dispela buk i gat 224 pes long en, nem bilong en Tru Tru Baibel i Tok Wanem?

21, 22. Wanem sampela gutpela samting bilong buk Tru Tru Baibel i Tok Wanem?

²¹ Ol i bin kamapim dispela buk long 2005/06 long ol “Bihainim Tok Bilong God” Kibung Distrik bilong ol Witnes Bilong Jehova, na dispela buk i gat ol gutpela samting bilong en. Olsem: Tok i go pas i gat 5-pela pes na i helpim planti long kirapim ol Baibel stadi. Ating bai yu no hatwok long stori long ol piksa na skripsa i stap long ol dispela pes. Yu ken yusim blok i stap long dispela hap bilong helpim sumatin long save long olsem wanem em i ken painim ol sapta na ves bilong Baibel.

²² Ol i raitim ol tok bilong dispela buk long rot i no hatwok long kliagut long en. Ol i bin wok strong long kamapim ol tok sumatin bai pilim tru long bel, ol i mekim olsem long rot bilong kirapim em long insait long toktok. Olgeta sapta i gat sampela askim long kirap bilong en na long pinis bilong olgeta sapta i gat wanpela blok i gat het tok olsem: “Ol Tok Baibel i Lainim Yumi Long En.” Insait long blok i gat ol tok bilong Baibel i bekim ol askim i stap long kirap bilong sapta. Ol gutpela piksa na ol tok bilong en, na ol tok piksa bilong dispela buk bai helpim sumatin long kliagut long ol tok i nupela long em. Ol tok bilong buk i no hatwok long kisim, tasol i gat apendiks we yu ken skelim gut 14 bikpela tok, sapos sumatin i gat laik long kisim sampela save moa.

23. Olsem wanem yumi ken mekim wok long buk Baibel i Tok taim yumi mekim ol Baibel stadi?

²³ Ol i wokim buk Baibel i Tok bilong helpim yumi long skulim ol man i bin kisim kain kain skul na ol i bilong kain kain lotu. Sapos sumatin i no save liklik long tok bilong Baibel, ating yu no inap pinisim wanpela sapta long wanpela stadi. No ken hariap long pinisim ol paragraf, tasol wok strong long putim tok i go daun long bel bilong sumatin. Sapos sumatin i no kliagut long wanpela tok piksa bilong buk, stori gut long en o kamapim narapela tok piksa. Redi gut, wok strong long mekim gutpela wok long dispela buk, na beten askim God long helpim yu bambai yu ken “autim stret tok tru bilong God.”​—2 Timoti 2:15.

Amamas Long Ol Gutpela Wok Yu Inap Mekim

24, 25. Jehova i bin givim wanem ol gutpela samting long lain bilong em?

²⁴ Jehova i bin givim ol gutpela presen tru long lain bilong em. Em i bin helpim yumi long kisim stretpela save long em. Yumi no ken ting dispela em i samting nating! Tingim, God i mekim na ol samting em i tingting pinis long kamapim i stap ples klia long ol man i gat pasin daun, na i stap hait long ol man i gat pasin antap. Jisas i tok long dispela olsem: “Papa, yu Bikpela bilong heven na bilong graun, mi tenkyu long yu, long wanem, yu bin haitim ol dispela samting long ol man i gat gutpela tingting na save, na yu bin soim long ol man i stap olsem ol liklik pikinini tasol.” (Matyu 11:25) Em i wanpela gutpela samting tru long yumi insait long lain man i gat pasin daun na i mekim wok bilong King Bilong Heven na Graun, em Jehova.

²⁵ Na tu, God i bin givim gutpela wok long yumi long lainim ol narapela man long em. Tingim, ol man i bin mekim ol tok giaman taim ol i stori long God. Olsem na planti man i no gat stretpela tingting liklik long Jehova, ol i ting em i no save tingim man na em i gat hatpela pasin. Olsem wanem? Yu redi na amamas long helpim ol man long kisim stretpela tingting? Yu laik bai ol man long olgeta hap husat i gat gutpela bel ol i mas kisim stretpela save long God? Sapos olsem, kamapim pasin bilong yu long harim tok bilong God, long rot bilong insait tru long wok bilong autim tok na skulim ol man long tok Baibel i mekim long ol bikpela tok. Ol man i wok long painim tok i tru i mas save long tru tru Baibel i tok wanem.

Wanem Bekim Bilong Yu?

• Olsem wanem yumi save God i save tingim yumi?

• Yumi stap bilong mekim wanem?

• Wanem samting i painim yumi taim yumi dai?

• Yu laikim wanem samting bilong buk Baibel i Tok?

[Ol Piksa long pes 22]

Baibel i tok pen na hevi bai pinis

[Ol Kredit Lain]

Top right, girl: © Bruno Morandi/age fotostock; left, woman: AP Photo/Gemunu Amarasinghe; bottom right, refugees: © Sven Torfinn/Panos Pictures

[Piksa long pes 23]

Ol stretpela man bai i stap oltaim long Paradais