Askim

Olsem wanem saveman i lukim “wanpela gutpela man” tasol i stap “namel long planti tausen manmeri,” tasol em i no lukim “wanpela gutpela meri i stap” namel long ol?​—Saveman 7:28.

Bilong kisim stretpela tingting long ol dispela tok em spirit bilong God i bin kamapim, pastaim yumi mas save God i gat wanem tingting long ol meri. Baibel i stori long Rut, em tambu bilong Naomi, man bilong em i dai pinis, na Baibel kolim Rut olsem “gutpela meri.” (Rut 3:11) Sindaun 31:10 i tok, gutpela meri marit “i winim olkain ston i dia tumas.” Olsem na wanem insait bilong tok bilong King Solomon bilong Israel bilong bipo, em i tok: “Mi bin painim . . . wanpela stretpela man namel long wan tausen, tasol mi no bin painim wanpela stretpela meri”?​—Baibel Moffatt.

Ol tok i stap klostu long dispela ves i soim yumi olsem planti meri long taim bilong King Solomon ol i no bin bihainim stretpela pasin. (Saveman 7:26) Ating ol i bin lukim na bihainim pasin bilong ol meri bilong ol narapela lain i stap namel long ol em ol i save lotuim Bal. King Solomon i bin maritim planti meri bilong ol narapela lain na ol i bin pulim em tu. Baibel i tok: “Solomon i gat 700 meri na 300 namba 2 lain meri. Na . . . ol dispela meri bilong en i pulim tingting bilong en i go” long lotuim ol god giaman. (1 King 11:​1-4) Pasin bilong ol man tu i nogut​—wanpela stretpela man namel long wan tausen i no planti. Solomon i tok: “God i bin makim rot bilong ol manmeri, . . . tasol ol yet i kamapim planti kain tingting na pasin, na dispela i mekim wokabaut bilong ol i hat tumas.” (Saveman 7:29) Solomon i stori long ol manmeri bilong graun​—em i no skelim pasin bilong man wantaim pasin bilong meri, nogat. Olsem na yumi mas tingim tok i stap long Saveman 7:28 i olsem wanpela tok i stori long pasin bilong ol manmeri long taim bilong Solomon.

Tasol yumi ken ting i gat narapela mining bilong dispela ves. Ating em i wanpela tok profet, long wanem, i no gat wanpela meri i bin bihainim stret olgeta tok bilong Jehova na i no abrus liklik, nogat. Tasol i gat wanpela man i bin mekim olsem​—em Jisas Krais.​—Rom 5:​15-​17.

[Piksa long pes 31]

‘Wanpela gutpela man namel long planti tausen manmeri’