Winim 100 Krismas na Laip i Gat As Bilong En
ELIN, em wanpela bilong ol 60 manmeri long Swiden husat i gat 105 krismas o moa. Em yet i gat 105 krismas. Maski em i stap long wanpela haus bilong ol lapun, skin bilong em i stap strong yet inap long em i ken mekim wok olsem wanpela Witnes Bilong Jehova, em rot em i bin makim bilong bihainim winim 60 yia i go pinis.
Bilong autim tok long ol narapela, em i bihainim pasin bilong aposel Pol taim em bin i stap kalabus long wanpela haus. Pol i autim tok long olgeta man i kam lukim em. (Aposel 28:16, 30, 31) Long wankain pasin, Elin i save toktok long gutnius i stap long Baibel wantaim ol lain i save klinim haus, ol dentis, ol dokta, ol lain bilong katim na stailim gras, ol nes, na ol narapela man em i save bungim insait long haus. Na long sampela taim, ol bratasista long kongrigesen bilong em i save singautim ol Baibel sumatin bilong ol long i go lukim Elin na bai save bilong em long ol samting inap helpim ol.
Ol bratasista long kongrigesen bilong Elin, ol i laikim pasin bilong em long amamas na laik bilong em long kisim save long ol samting. Wanpela brata wanbilip i tok: “Elin i save gut long ol samting i kamap long kongrigesen. Em i save tingim nem bilong olgeta liklik pikinini na ol man i kam nupela long kongrigesen.” Elin i gat nem olsem meri bilong mekim gut long ol narapela, mekim tok pani na lap, na tingting long ol gutpela samting tasol bai kamap.
Wanem samting i helpim Elin long i stap amamas na tingim as bilong laip bilong em? Em i save skelim wanpela skripsa bilong Baibel long olgeta de long rot bilong buklet Skelim Sampela Tok Bilong Baibel Long Olgeta De, em ol Witnes Bilong Jehova i wokim. Na tu, em i save ritim wanpela hap bilong Baibel long olgeta de long rot bilong yusim wanpela glas bilong mekim rait i go bikpela. Elin i save redim ol samting bilong ol miting bilong ol Witnes Bilong Jehova i save kamap long olgeta wik, na maski em i no inap go long ol dispela miting, em i save harim tok bilong ol dispela miting long kaset. Maski yumi gat hamas krismas, pasin bilong ritim Baibel na ol buk na nius bilong Baibel long olgeta de na pasin bilong go oltaim long ol miting, bai helpim yumi long stap belgut na pilim olsem laip bilong yumi i gat as tru bilong en.—Song 1:2; Hibru 10:24, 25.