‘Bihainim Pasin Bilong Em’
1 Jisas i no bin go long ol skul bilong ol saveman Juda, tasol em i nambawan gutpela Witnes i bin stap long graun. Gutpela tru na ol stori long wok bilong Jisas i stap yet long Baibel na yumi inap kisim helpim long en. Bilong mekim gut wok witnes, yumi mas ‘bihainim pasin bilong em.’—1 Pi. 2:21.
2 Laikim Tru Ol Man: Pasin bilong tingim tru ol man i kirapim Jisas long mekim wok. (Mk. 6:30-34) Planti manmeri long teritori bilong yumi i “pilim pen” long ol hevi ol i karim, olsem na ol i mas kisim save long tok i tru. (Ro. 8:22) Taim yumi tingim hevi ol i karim na pasin bilong Jehova long tingim ol tru, dispela bai kirapim yumi long mekim yet wok autim tok. (2 Pi. 3:9) Na tu, ol man bai amamas moa long harim tok yumi autim sapos ol i luksave olsem yumi tingim ol tru.
3 Autim Tok Taim Rot i Op: Jisas i autim gutnius long ol man long olgeta taim rot i op. (Mt. 4:23; 9:9; Jo. 4:7-10) Na olsem tasol, yumi laik redi long toktok long tok i tru taim yumi mekim ol wok bilong yumi bilong wan wan de. Sampela i save karim Baibel na ol buk na nius bilong Baibel na bai ol i ken autim tok long ples wok, long skul, long stua, o taim ol i raun.
4 Toktok Long Kingdom: Gutnius bilong Kingdom em bikpela tok Jisas i autim. (Lu. 4:43) Maski yumi no toktok stret long Kingdom o kamapim dispela tok long kirap bilong tok yumi autim, yumi laik helpim man bilong haus long luksave olsem yumi nidim Kingdom. Yumi inap stori long ol samting nogut i kamap long graun em dispela samting i soim olsem yumi stap long taim bilong las de, tasol bikpela tok bilong yumi em yumi “autim gutnius bilong ol gutpela samting.”—Ro. 10:15, NW.
5 Mekim Wok Long Baibel: Taim Jisas i autim tok, oltaim em i mekim wok long buk bilong God. Ol samting em lainim ol man long en i no kam long tingting bilong em yet. (Jo. 7:16, 18) Em i ritim Tok Bilong God na bihainim tok bilong en taim Satan i traim em. (Mt. 4:1-4) Bilong yumi ken skulim gut ol narapela man, yumi mas ritim Baibel long olgeta de na bihainim ol tok bilong en. (Ro. 2:21) Taim yumi bekim askim bilong ol man long wok autim tok, yumi mas kamapim skripsa i sapotim tok yumi mekim na ritim skripsa stret long Baibel taim yumi mekim olsem. Yumi laik bai man bilong haus i lukim olsem yumi no kamapim ol tingting bilong yumi yet, nogat, yumi kamapim ol tingting bilong God.
6 Putim Tok i Go Daun Long Bel: “Bipo i no gat wanpela man i mekim toktok olsem dispela man i mekim.” (Jo. 7:46) Em tok ol plisman i mekim long Jisas taim ol bikpris na ol Farisi i askim ol long as na ol i no bin arestim em. Jisas i kamapim ol trupela tok, na tu, em i skulim ol man long pasin ol i pilim tru long bel. (Lu. 24:32) Em i kamapim ol tok piksa long ol samting i save kamap long olgeta de, na dispela i helpim ol man long kliagut long tok em i autim. (Mt. 13:34) Jisas i no kamapim planti tok tumas. (Jo. 16:12) Em i kirapim ol man long tingim Jehova, na em yet, nogat. Olsem Jisas, yumi ken kamap gutpela tisa long rot bilong ‘was gut long pasin bilong yumi long skulim ol manmeri.’—1 Ti. 4:16.
7 Wok Yet Long Autim Tok Maski Ol Man i Birua o Ol i No Laik Harim: Maski Jisas i mekim planti strongpela wok, planti man i no harim tok em i autim. (Lu. 10:13) Sampela long famili bilong Jisas yet i ting “em i longlong pinis.” (Mk. 3:21) Tasol Jisas i strong long autim tok yet. Em i holimpas gutpela tingting, long wanem, em i bilip tru olsem em i gat tok i tru bilong mekim ol man i kamap fri. (Jo. 8:32) Long rot bilong helpim yumi kisim long Jehova, yumi tu i strong long yumi no ken givap.—2 Ko. 4:1.
8 Daunim Sampela Laik Bilong Yumi Yet: Jisas i daunim sampela laik bilong skin bambai em i ken mekim wok autim tok. (Mt. 8:20) Em i no les long autim tok, sampela taim em i autim tok i go inap long san i go daun. (Mk. 6:35, 36) Jisas i save em i no gat bikpela hap taim bilong mekim wok bilong em. “Taim i sotpela nau,” olsem na yumi tu i mas daunim sampela laik bilong yumi yet na givim taim, strong, na mani samting bilong yumi olsem Jisas i bin mekim.—1 Ko. 7:29-31.
9 Ol Kristen long taim bilong ol aposel i autim gut tok, long wanem, ol i kisim skul long Jisas. (Ap. 4:13) Yumi tu inap mekim gut wok bilong yumi sapos yumi bihainim pasin bilong nambawan gutpela Witnes.—2 Ti. 4:5.
[Askim Bilong Stadi]
1. Olsem wanem yumi ken mekim gut wok witnes?
2. Wanem samting bai helpim yumi long kisim pasin bilong laikim tru ol man olsem Jisas i bin mekim?
3. Long wanem taim Jisas i autim tok long ol man?
4. Yumi ken mekim wanem na bai Kingdom i stap olsem bikpela tok yumi autim?
5. Yumi mas mekim wanem kain wok long Baibel na bai wok autim tok bilong yumi i karim kaikai?
6. Jisas i mekim wanem na ol man i pilim long bel ol tok bilong em?
7. Bilong wanem Jisas i strong long autim tok yet?
8, 9. Olsem wanem yumi ken bihainim pasin bilong Jisas na daunim sampela laik bilong yumi bambai yumi ken autim gutnius?