Ol Gutpela Samting Pablik-Tok Inap Helpim Yumi Long En
1 Kongrigesen Kristen i wok long kisim yet long taim stret ol save i kamapim gut insait bilong ol tok na ol nupela save bilong ol tok em Baibel i skulim yumi long en. (Mt 24:45-47) Ating yu tu i ken kamapim sampela bilong ol dispela save yu bin kisim long taim yu kirap long kam bung wantaim ol Witnes Bilong Jehova na i kam inap nau. Ol miting bilong kongrigesen wantaim ol pablik-tok i save helpim yumi long kisim gut ol dispela nupela save olsem taim lait bilong tok i tru i wok long i go bikpela.
2 Ol Nupela Autlain: I no longtaim Sosaiti i bin stretim sampela autlain bilong pablik-tok bilong tok Inglis, na mipela wok long redim ol samting bilong tanim ol dispela tok i go long tok Hiri Motu na tok Pisin. Mipela i putim sampela nupela tok long ol nupela autlain na mipela kamapim klia sampela nupela save bilong ol bikpela tok. Bilong helpim kongrigesen long kisim gut ol dispela tok, orait ol brata bilong mekim ol pablik-tok i mas mekim wok long ol nupela autlain. Taim yupela kisim ol nupela autlain, no ken mekim wok moa long ol olpela autlain.
3 Bilong ol pablik-tok i ken helpim yu tru, yu mas tingim gut ol het-tok bilong ol tok em bai kamap. Paslain long go long Miting Bilong Pablik-Tok, traim long tingim gen sampela tok long ol buk samting bilong Sosaiti i no longtaim yu bin lainim na i stori long dispela pablik-tok em bai kamap long miting long dispela de. Na bihain, taim yu wok long harim dispela tok, tingim gut ol tok i kamap. Raitim wanem wanem ol nupela tok i kamap na bai yu ken mekim wok long en long bihain. Dispela bai helpim yu long kisim gut ol tok na bai dispela ol nupela pablik-tok i ken helpim yu tru.
4 Ol Pablik-Tok i Mas Givim Save na Kirapim Ol Man Long Mekim Wok: Taim Jisas i toktok, ol dispela tok i go daun long bel bilong ol man i kam harim tok bilong em. Taim Jisas i pinisim tok bilong em long maunten, em dispela bikpela pablik-tok em planti man tru i save long en, olsem Matyu 7:28 i tok, “Orait ol bikpela lain manmeri ol i kirap nogut tru long skul bilong en.”
5 Ol elda i mas tingim gut pasin bilong Jisas long mekim pablik-tok, na ol i mas bihainim gutpela tingting taim ol i laik givim tok orait long ol nupela brata long mekim pablik-tok; ol elda i mas makim ol brata i olsem gutpela tisa, em ol i ken bihainim gut olgeta tok long ol autlain bilong Sosaiti na kirapim olgeta brata sista long harim gut ol tok. Ol brata em ol elda i makim bilong mekim ol pablik-tok ol i mas wok strong oltaim long kamap gutpela moa long pasin bilong mekim tok, na kisim wanem wanem tok ol elda i givim long ol bilong stretim pasin bilong ol long givim tok, o long mekim i kamap gutpela moa. Long planti hap i no gat kongrigesen long en, planti taim i no gat wanpela i save long mekim pablik-tok. Long ol kain ples olsem, wasman sekit i ken makim sampela autlain na lainim ol long pasin ol i ken mekim bilong kamapim gut tok bilong ol dispela autlain bilong pablik-tok. Wanpela brata i baptais pinis (o sista sapos sampela taim i no gat brata) i ken kaunim tasol ol tok bilong pablik-tok na ol manmeri i ken harim. Long dispela rot, ol man i laikim tok i tru i ken kisim ol gutpela tok bilong helpim ol, em oganaisesen bilong Jehova i bin redim.
6 Olsem Aisaia 65:13, 14 i tok profet long en, ol manmeri bilong God i stap gutpela long ol samting bilong spirit na dispela i wok long kamap ples klia moa. Ol pablik-tok em wanpela bilong ol planti rot bilong ‘Jehova i skulim’ yumi.—Ais 54:13.