Askim

◼ I stret ol Witnes Bilong Jehova i givim nabaut ol tok em ol i bin rekodim o raitim long pepa?

Ol tok bilong Baibel ol brata i givim i save strongim yumi. (Ap. 15:32) Olsem na yumi laik serim ol dispela gutpela tok wantaim ol lain i no bin kam long miting. I gat ol masin bilong rekodim tok, olsem na i no hatwok long rekodim tok na givim long ol narapela. Sampela i bin bungim ol tok ol i bin rekodim, olsem ol tok i bin kamap inap planti yia i go pinis, na ol i laik givim ol dispela tok long ol narapela i ken harim o ol i wokim kopi bilong en na givim long ol pren. Sampela i bin putim ol dispela tok long ol Web-sait ol yet i bin wokim na bai ol narapela i ken kisim.

I no gat rong long yumi rekodim ol tok na bai yumi yet o famili bilong yumi i ken harim. Na tu, ol elda i ken stretim rot bilong rekodim ol tok long ol lain bilong kongrigesen em ol i sik na ol i no inap kam long miting. Tasol i gat sampela as na i no stret long yumi givim nabaut ol pepa bilong ol tok na ol tok ol i bin rekodim.

Planti taim tok brata i mekim i go stret long ol bratasista bilong dispela hap we em i mekim tok long en, na yumi no save long sindaun bilong dispela hap we tok i kamap, olsem na yumi inap kisim tingting kranki long sampela hap tok bilong tok ol i bin rekodim. Na tu, em bai hatwok long yumi save long husat tru i bin mekim dispela tok, na wanem taim em i mekim, na bai yumi ken bilip olsem ol tok em i mekim i stret wantaim bilip yumi holim long nau. (Lu. 1:​1-4) Na tu, pasin bilong givim nabaut ol tok ol i bin raitim o rekodim inap kirapim sampela long givim o kisim biknem.​​—⁠1 Ko. 3:​5-7.

Wokboi i gat gutpela tingting i wok strong long “skelim” gut kaikai bilong spirit na givim long “taim bikman i makim.” (Lu. 12:42) Dispela i makim tu ol tok ol i bin redim bilong ol brata i ken givim long ol kongrigesen bilong ol Witnes Bilong Jehova na ol i rekoding yumi ken kisim long Web-sait jw.org. Yumi ken bilip tru olsem wokboi i gat gutpela tingting na Gavening Bodi bilong en bai givim yumi ol samting yumi mas kisim bilong kamap strong moa long bilip.​​—⁠Ap. 16:​4, 5.