Odio Rekoding—Rot Bilong Yusim
1. Yumi kisim helpim long rot bilong ol pablikesen, tasol nau yumi inap kisim helpim long wanem narapela rot?
1 Planti manmeri i amamas long yusim Web-sait bilong yumi long ritim ol trupela tok we i swit long yau bilong ol man. (Sav. 12:10) Olsem wanem? Yu bin yusim ol odio rekoding? Odio rekoding i opim rot long yumi inap harim planti tok moa i stap long Web-sait bilong yumi. Olsem wanem odio rekoding inap helpim yumi?
2. Olsem wanem yumi inap yusim odio rekoding long mekim stadi bilong yumi yet o bilong famili?
2 Stadi Bilong Yumi Yet o Bilong Famili: Sapos yumi harim odio rekoding bilong Baibel, ol magasin, na ol narapela pablikesen taim yumi raun long kar, balus, o sip, o taim yumi mekim ol narapela wok, dispela bai helpim yumi long yusim gut taim bilong yumi. (Efe. 5:15, 16) Long taim bilong famili lotu, yumi ken harim rekoding bilong pablikesen yumi stadi long en. Odio rekoding inap helpim yumi taim yumi yusim long mekim stadi bilong yumi yet, na moa yet sapos yumi laik mekim pasin bilong yumi long rit i kamap gutpela moa o sapos yumi laik lainim nupela tokples.
3. Odio rekoding inap helpim wanem kain lain?
3 Mekim Wok Autim Tok: Sapos ol man long teritori i bisi, ating ol bai amamas long harim odio rekoding bilong tok yumi autim. Yumi inap bungim ol man i mekim narapela tokples na ol i laik tru long harim tok bilong Kingdom long “tokples [ol i] kamap bikpela long en.” (Apo. 2:6-8) Long sampela ples, ol man i gat pasin bilong tingim gut ol tok ol i harim. Long Saina, lain Hmong i save stori long ol yangpela long histori bilong ol, na ol yangpela i save tingim gut olgeta tok ol i harim. Planti lain long Afrika i save amamas long putim gut yau taim ol narapela i stori, na long dispela rot ol i kisim save long sampela samting.
4. Yumi ken givim wanem ol askim long yumi yet long sait bilong helpim ol man long teritori?
4 Yumi ken askim yumi yet olsem: Long teritori, yumi inap pilaim wanpela odio rekoding long tokples bilong man yumi bungim? O, yumi inap salim odio rekoding i go long em long rot bilong e-mail? O, yumi inap daunlodim wanpela odio rekoding na putim long CD na givim long man, na givim tu buk o nius bilong dispela rekoding? Sapos yumi tilim elektronik fail bilong wanpela buk, buklet, magasin, o liklik nius, yumi ken raitim long ripot. Ol i wokim ol odio rekoding bilong yumi ken yusim taim yumi mekim stadi bilong yumi yet, na tu, yumi inap yusim long planim ol sid bilong Kingdom.—1 Kor. 3:6.