Sanap Strong na Bilip Tru

Ol Kibung i Kamapim Klia Olsem Yumi Stap Wanpela Lain Brata

LONG dispela taim, Joseph F. Rutherford i gat 50 krismas na em i gat bikpela sik, long wanem, ol birua i bin kalabusim em klostu wanpela yia olgeta, tasol em i amamas long mekim wok bilong helpim ol wanlain Kristen na karim ol switkes samting bilong ol na kisim ol i go long ol rum bilong ol long hotel. Tupela wankalabus bilong em​​—⁠ol tu i Sumatin Bilong Baibel​​—⁠ol i tokim ol dispela wanlain Kristen long wanem wanem rum ol bai stap long en. Ol i wok yet i go abrusim biknait. Olgeta i kisim bikpela amamas tru. Tasol ol i kam bilong mekim wanem?

Em yia 1919, na ol birua i bin mekim nogut tru long ol Sumatin Bilong Baibel (nau yumi kolim ol Witnes Bilong Jehova) na nau ol i wok long kamap strong gen. Bilong strongim ol lain brata, ol i mekim wanpela kibung long Cedar Point, Ohio, long Amerika, kirap long Septemba 1 i go inap long Septemba 8, 1919. Long laspela de bilong kibung, inap 7,000 manmeri i amamas tru na ol i putim gut yau taim Brata Rutherford i strongim olgeta wan wan i stap long dispela kibung na em i tok: “Yupela wan wan i olsem mausman bilong King bilong olgeta king na Bikman bilong olgeta bikman, na yupela i wok long tokaut long ol man . . . long gutpela kingdom bilong Bikpela bilong yumi.”

Ol kibung bilong lain bilong Jehova i bin kirap pastaim long ol Israel bilong bipo. (Kisim Bek 23:​14-​17; Luk 2:​41-​43) Ol dispela bung i bin helpim ol long tingim gut Tok Bilong God na ol i kisim bikpela amamas tru long taim bilong ol dispela bung. Na nau long taim bilong yumi tu ol kibung bilong ol Witnes Bilong Jehova i save helpim ol man long ol samting bilong spirit. Ol kain gutpela bung olsem i save kirapim ol man i gat gutpela bel long pilim tru olsem ol Witnes i pas gut tru olsem wanpela lain brata Kristen.

Ol i Wok Strong Long i Go Long Kibung

Ol Kristen long nau i save olsem ol kibung bai strongim ol long ol samting bilong spirit na skulim ol long Tok Bilong God. Ol i tingim ol dispela bikpela miting olsem gutpela rot tru bilong helpim ol long “sanap strong na bilip tru long olgeta laik bilong God.” (Kolosi 4:​12, NW ) Olsem na ol Witnes i save givim bel tru long mekim ol dispela kibung i kamap gutpela na ol i save wok strong tru long i go long ol dispela kibung.

Sampela man, bilong ol i ken i go long ol kain kibung olsem, ol i mas i gat strongpela bilip na ol i no ken larim ol hevi samting i pasim ol. Olsem: Tingim wanpela lapun Witnes long Ostria. Dispela meri i gat sik suga, olsem na em i mas kisim marasin bilong sut insulin long olgeta de, tasol em i go long olgeta de bilong kibung i kamap long kantri bilong em. Long India, wanpela bikpela famili Witnes i stap rabis tru na ol i no gat rot bilong i go long kibung. Tasol wanpela bilong ol i helpim ol. Em i tok: “Mipela i no laik tru long abrusim dispela kibung, olsem na mi salim ol yau ring bilong mi em ol i wokim long gol, na mani mi kisim i helpim mipela long baim rot bilong i go long kibung. I gutpela mi bin mekim olsem, long wanem, taim mipela i bung wantaim ol narapela na harim ol ekspiriens bilong ol, dispela i bin strongim bilip bilong mipela.”

Long Papua Niugini, sampela lain em ol i amamas long harim tok na ol i save bung wantaim ol Witnes Bilong Jehova tasol ol i no baptais yet, ol i gat laik tru long i go long wanpela kibung distrik long nambawan biktaun. Ol i go lukim wanpela man long ples em i gat wanpela PMV ka na ol i askim em long hamas pe ol i mas baim bilong em i ken kisim ol i go long kibung. Pe em i makim i bikpela tumas na mani bilong ol i no inap, olsem na ol i pasim tok long mekim sampela wok long haus bilong dispela man na ol i stretim haus kuk bilong em. Olsem na rot i op long ol inap i go long dispela kibung distrik na kibung i bin helpim tru ol.

Ol Witnes Bilong Jehova i save tingim tru ol kibung, olsem na maski kibung i kamap long wanem wanem hap, dispela i no save pasim ol long i go. Long 1978, wanpela yangpela man long Polan i raun long baiskol inap 1,200 kilomita insait long 6-pela de, bilong i go long wanpela kibung long Lille, Frans. Long 1997, tupela Witnes bilong Mongolia i wokabaut inap 1,200 kilomita bilong i go long wanpela kibung Kristen long Irkutsk, Rasia.

Lain Brata Tru

Ol man i gat gutpela bel ol i save pilim tru pasin bilong ol Witnes long i stap wanbel na stap olsem wanpela lain brata long ol kibung bilong ol. Planti man i kirap nogut long lukim ol man bilong narapela narapela lain i stap wanbel na amamas wantaim, maski em i namba wan taim narapela i bungim narapela.

I no longtaim i go pinis long wanpela bikpela kibung long Australia, wanpela man bilong kisim ol man i go raun lukim ol ples, em i raun inap wanpela wik wantaim ol Witnes bilong narapela hap em ol i bin go long dispela kibung, na em i laik i stap liklik moa wantaim ol na amamas wantaim ol. Em i kirap nogut long pasin bilong ol long laikim narapela narapela na i stap wanbel na em i hatwok long ting olsem ol inap stap gut wantaim, long wanem, planti bilong ol i no save long narapela narapela. Long taim em i laik lusim ol, em i tok em i laik mekim wanpela tok long ol. Em i kolim ol olsem “ol brata na sista” na em i kirap long mekim tok bilong tenkyu long ol, tasol em i no inap long pinisim tok bilong em, long wanem, aiwara bilong em i pundaun.

Long 1997, em i namba wan taim ol i mekim kibung distrik long tripela tok ples long wanpela bikpela haus stediam long Sri Lanka. Ol i mekim olgeta program bilong kibung long tok Inglis, tok Sinalis, na tok Tamil. Pasin bilong birua long ol man bilong narapela lain i wok long kamap bikpela, olsem na dispela bung bilong ol man bilong tripela narapela narapela tok ples i bin kirapim tru tingting bilong ol man. Wanpela polisman i askim wanpela brata: “Husat i go pas long lukautim dispela kibung? Ol lain Sinalis, o Tamil, o ol lain bilong Inglan?” Brata i bekim tok olsem: “I no gat wanpela bilong ol dispela lain i go pas long lukautim dispela kibung. Mipela olgeta i wok wantaim long mekim dispela kibung.” Polisman i hatwok long bilipim dispela tok. Orait taim olgeta lain bilong tripela tok ples i bung wantaim bilong mekim laspela beten na ol i wanbel long tok “Amen,” olgeta man i stap long dispela kibung ol i paitim han inap longpela taim. Aiwara i pundaun long ai bilong olgeta man. Yes, ol kibung i save kamapim klia tru olsem yumi stap olsem wanpela lain brata.​​—⁠Song 133:⁠1.a

[Futnot]