Ol Kibung Distrik Bilong Yumi—Kamapim Klia Tok i Tru
1. Ol bung bilong lotu i opim rot long ol Israel long tingim tingim long bel na toktok wantaim long wanem ol bikpela tok i tru bilong God?
1 Lain Israel bilong bipo ol i save bung tripela taim long wanpela yia long ol bikpela bung bilong lotu. Ol man tasol i mas i go long ol dispela bung, tasol planti taim famili olgeta i save go long Jerusalem bilong kisim amamas long ol dispela bung. (Lo 16:15, 16) Ol dispela bung i opim rot long ol long tingim long bel na toktok wantaim long ol bikpela tok i tru bilong God. Wanem ol dispela tok i tru? Wanpela em olsem, Jehova em i Man Bilong Givim planti samting. (Lo 15:4, 5) Narapela, yumi ken trastim em long stiaim yumi na lukautim yumi. (Lo 32:9, 10) Lain Israel inap tingim tu olsem nem bilong Jehova i stap long ol, olsem na ol i mas kamapim klia stretpela pasin bilong em. (Lo 7:6, 11) Long nau tu yumi save kisim wankain helpim long ol kibung distrik bilong yumi.
2. Olsem wanem ol tok bilong kibung distrik bai kamapim klia ol tok i tru?
2 Program i Helpim Yumi Long Kliagut Long Tok i Tru: Long ol kibung distrik bilong yumi, yumi save harim ol tok, lukim drama, ol soim, na ol intaviu we i helpim yumi long kliagut moa na bihainim ol bikpela tok i tru bilong Baibel. (Jon 17:17) Ol i mekim pinis ol bikpela wok bilong redim kibung em bai kamap. Oganaisesen bilong Jehova i redim ol tok bilong kibung we i stret tru long nau bilong helpim ol manmeri long olgeta hap. (Mat. 24:45-47) Olsem wanem? Yu bai amamas long lukim na harim ol tok bilong kibung?
3. Yumi mas mekim wanem na bai program i helpim yumi?
3 Yumi bai kisim gutpela helpim tru sapos yumi stap long kibung na putim gut yau long ol tok i kamap long dispela tripela de. Sapos yu no toksave yet long bos bilong yu, i gutpela long toksave long em olsem yu laik kisim malolo long taim bilong kibung. Yu mas slip gut long nait na bai yu no ken ai slip long taim bilong program. Planti bratasista i pilim olsem taim ol i lukluk long brata i mekim tok na raitim sampela tok, dispela i helpim ol long putim gut yau. No ken larim fon bilong yu i distebim yu o ol narapela. No ken toktok wantaim ol narapela, salim teks, kaikai o dring, long taim bilong program.
4. Olsem wanem ol papamama inap helpim ol pikinini long putim gut yau long ol tok bilong kibung?
4 Long ol yia bilong Sabat, ol famili bilong Israel i bung bilong harim Lo long taim bilong Ol Bikpela De Bilong i Stap Long Haus Win. Taim ol i bung, ol liklik “pikinini” bilong ol tu i stap wantaim ol na ‘bai olgeta i ken harim na bihainim dispela tok.’ (Lo 31:12) Em i gutpela samting long lukim ol famili i sindaun wantaim long taim bilong kibung na ol pikinini i putim gut yau na ol i no slip! Long nait, i gutpela long lukim gen ol tok yu raitim na stori long ol narapela long ol bikpela poin bilong program em yu laikim. “Ol pikinini i save mekim olkain longlong pasin,” olsem na ol papamama i mas lukautim gut ol pikinini bilong ol, na ol tineja pikinini tu, long taim bilong malolo long belo na long hap ol i slip long en, na no ken larim ol pikinini i raun long ‘laik bilong ol yet.’—Snd. 22:15; 29:15.
5. Olsem wanem ol gutpela pasin yumi mekim taim yumi stap long ples slip i litimapim tok i tru?
5 Ol Gutpela Pasin i Litimapim Tok i Tru: Ol gutpela pasin yumi mekim taim yumi stap long ol taun we kibung i kamap long en, dispela i litimapim tok i tru. (Tai. 2:10) Wanpela bosmeri bilong hotel i luksave taim wanpela lain bratasista i bihainim ol lo bilong hotel na ol i isi na mekim gutpela pasin long ol wokman. (Kol. 4:6) Long las yia, taim ol mausman bilong brens i go toktok wantaim bosmeri bilong wanpela hotel, em i tokim ol: “Mipela i save amamas long lain bilong yupela i kam stap long hotel bilong mipela, long wanem, ol i gat gutpela pasin. Ol i save bihainim gut lo na mekim pasin helpim, na ol i save rispek long ol wokman na ol samting bilong hotel.”
6. Taim yumi stap long taun em kibung i kamap long en, olsem wanem pasin bilong yumi long bilas gut inap litimapim tok i tru?
6 Taim yumi putim kat bilong kibung, dispela i tokaut long kibung bilong yumi na ol narapela bratasista i luksave long yumi, na tu, dispela i opim rot long yumi autim tok long ol man. Ol man long ol taun we kibung i kamap long en, ol bai lukim olsem ol man husat i pasim kat bilong kibung ol i bilas gut na pasim klos i stret, na klos bilong ol i no pas long skin na i kirapim bel. (1 Tim. 2:9, 10) Olsem na taim yumi raun long taun we kibung i kamap long en, na tu, long ol ples yumi slip long en, yumi mas werim gutpela klos na bilas gut. Sapos yu pasim sotpela trausis na T-siot long kibung, dispela i no pasin rispek. Maski sapos yumi no mekim kibung insait long wanpela haus, klos bilong yumi i mas soim pasin rispek. Sapos yumi laik senisim klos bihain long program i pinis na go long haus kaikai, yumi mas tingim olsem yumi kam long kibung olsem na yumi mas bilas gut.
7. Wanem wanpela rot bilong amamas wantaim ol bratasista Kristen long taim bilong kibung?
7 Long ol bikpela bung bilong lotu, ol Israel i save amamas long bung wantaim na strongim ol wanbilip bilong ol husat i kam long ol narapela hap bilong kantri na long ol narapela hap bilong graun, na dispela i kamapim pasin wanbel. (Apo. 2:1, 5) Long taim bilong kibung distrik, yumi lukim pasin wanbel tru i stap namel long bikpela lain brata Kristen. Dispela gutpela pasin namel long ol lain bilong God i save kirapim bel bilong ol narapela man husat i lukim pasin bilong yumi. (Sng. 133:1) Olsem na bringim liklik kaikai na bai yu ken amamas long kaikai wantaim ol bratasista na yu no gat wok long go baim kaikai long belo. Dispela bai opim rot long yu bungim ol narapela brata na sista husat i sindaun klostu na stori wantaim ol!
8. Wanem as na yumi laik volantia long kibung?
8 Planti taim ol narapela man husat i lukim pasin bilong yumi long stretim gut ol samting na kibung i ron gut ol i kirap nogut, moa yet taim ol i save olsem lain i mekim wok bilong kibung ol i no kisim pe long dispela wok. Olsem wanem? Yu inap ‘amamas long givim yu yet’ long mekim wok long taim bilong kibung? (Sng. 110:3, NW ) Sampela famili, olgeta i save mekim wok volantia wantaim olsem wanpela rot bilong skulim ol pikinini long pasin bilong helpim ol narapela. Sapos yu man o meri bilong sem, taim yu wok volantia long kibung dispela i gutpela rot bilong bungim ol narapela husat i kam long kibung. Wanpela sista i tok: “Mi save tasol long famili na sampela pren, na mi no save long planti manmeri long kibung. Tasol taim mi helpim wok long klinim ol samting, mi bungim planti brata na sista. Mi amamas tru long wok wantaim ol!” Taim yumi wok wantaim ol narapela long mekim ol wok bilong kibung dispela i givim amamas long yumi. (2 Kor. 6:12, 13) Sapos yu no bin mekim wok volantia bipo, orait askim ol elda long helpim yu.
9. Bai yumi mekim wanem bilong singautim ol man i kam long kibung?
9 Singautim Ol Narapela Long Harim Tok i Tru: Tripela wik paslain long kibung i kirap, bai yumi mekim wankain olsem yumi bin mekim long yia i go pinis, em long insait long wok bilong singautim ol man i kam long kibung. Ating ol kongrigesen bai i gat laik long tilim invatesen pepa long olgeta hap bilong teritori bilong ol. (Lukim blok “Rot Bilong Tilim Invatesen Pepa.”) Sapos sampela invatesen pepa i stap yet, yupela i mas kisim i kam long kibung. Ol manmeri i kam long kibung i ken tilim taim ol i autim tok long kain kain taim na ples taim ol i stap long kibung.
10. Stori long ol ekspiriens i kamapim olsem wok bilong singautim ol man long kibung i bin kamapim gutpela samting.
10 Olsem wanem? Taim yumi singautim ol man long kam long kibung, ol i save kam? Long wanpela kibung, wanpela atendan i helpim tupela marit long painim ples sindaun bilong ol. Ol i tokim em olsem tupela i bin kisim invatesen pepa na “ol i ting em i gutpela samting.” Tupela i draiv inap 320 kilomita bilong kam long kibung! Na narapela sista i autim tok long ol haus na em i givim wanpela invatesen pepa long wanpela husat i laik save long dispela kibung. Olsem na sista i lusim hap taim long stori wantaim em long dispela invatesen. Sampela de bihain taim sista i go long kibung, em i lukim dispela man na wanpela pren bilong em long kibung, na ol i holim wanpela nupela buk ol i kisim long dispela kibung!
11. Bilong wanem em i bikpela samting long yumi go long kibung?
11 Ol dispela bung bilong lotu em rot bilong Jehova long helpim lain Israel long lotu long em na oltaim mekim wok bilong em. (Jos. 24:14) Olsem tasol, taim yumi go long ol kibung distrik i save kamap long olgeta yia, dispela i helpim yumi long “wokabaut yet long tok i tru,” na em i wanpela bikpela hap bilong lotu bilong yumi. (3 Jon 3) Jehova bai blesim hatwok bilong ol man i laikim tok i tru em ol i go long kibung na kisim ol gutpela samting long en!
[Rait long pes 4]
Gutpela pasin bilong yumi long taim bilong kibung i litimapim tok i tru
[Rait long pes 5]
Tripela wik paslain long kibung i kirap, bai yumi insait long wok bilong singautim ol man i kam long kibung
[Blok long pes 3-6]
Ol Samting Bilong Kibung Distrik Bilong 2012 Yumi Mas Tingim
◼ Ol Taim: Program bai kirap long 9:20 long moning long olgeta tripela de bilong kibung. Taim ol i pilaim musik bilong kirapim program, yumi olgeta i mas sindaun long sia bilong yumi na bai program i kirap long pasin i stret. Long ol kibung i kamap long tripela de, program bilong Fraide na Sarere bai pinis long 4:55 long apinun, na long Sande program bai pinis long 3:40 long apinun. Long ol kibung i kamap long tupela de, program bilong Sarere bai pinis long 5:10 long apinun na long Sande program bai pinis long 4:35 long apinun.
◼ Ples Bilong Putim Ka: Long ol ples em kibung bai kamap long en, bai i gat ples bilong putim ka. Ol brata i gat ka ol i mas pasim kat bilong kibung bambai ol i ken kisim ples bilong putim ka. Ating ples bilong putim ka i no planti, olsem na bihainim gut tok bilong ol atendan.
◼ Ples Sindaun: Yu ken kisim tasol sia bilong ol lain i kam wantaim yu long ka, o ol i stap long haus bilong yu, o ol Baibel sumatin bilong yu.—1 Kor. 13:5.
◼ Kaikai Long Belo: I gutpela yu bringim kaikai na bai yu no lusim ples kibung long belo bilong i go baim kaikai. Yu ken putim kaikai insait long liklik eski em yu inap putim aninit long sia. No ken bringim ol bikpela eski, glas kontena, na bia samting i go long ples kibung.
◼ Ol Kontribiusen: Yumi ken soim amamas bilong yumi long bikpela wok ol i mekim bilong redim ol kibung, long rot bilong givim kontribiusen long ples kibung bilong helpim wok long olgeta hap. Ol kontribiusen yu givim long rot bilong sek long kibung distrik, yu mas raitim “International Bible Students Association” o “IBSA” long en.
◼ Bikpela Bagarap: Sapos wanpela bikpela bagarap samting i kamap insait long ples kibung, toksave hariap long atendan, na em bai toksave long Dipatmen Bilong Fest Eid na bai ol lain long dispela dipatmen i ken helpim man i kisim bagarap.
◼ Marasin: Sapos dokta i makim sampela marasin bilong yu long kisim, orait yu mas kisim i kam wantaim yu long ples kibung, long wanem, ol kain marasin olsem bai i no stap long Dipatmen Bilong Fest Eid. Sapos yu gat sik suga na yu mas kisim sut marasin, i gutpela sapos yu putim gut ol dispela pipia sut na tromoi long ples stret bilong en, na no ken tromoi long pipia dram bilong ples kibung o long hap bilong ples slip.
◼ Fom Plis Go Lukim (S-43-MP): Yusim fom Plis Go Lukim bilong raitim nem na atres bilong man yu autim tok long en long taim bilong kibung. Ol pablisa i mas kisim wanpela o tupela fom i kam long kibung. Fom yu raitim pinis nem na atres bilong man long en, em yu mas givim long ol brata long Buk Rum o long kuskus bilong kongrigesen bilong yu taim yu go bek.—Lukim Wok Kingdom bilong Septemba 2011, pes 4.
◼ Haus Kaikai: Taim yu stap long haus kaikai bihainim gutpela pasin na dispela bai litimapim nem bilong Jehova.
◼ Ples Slip:
(1) Taim kongrigesen bilong yu i kisim ol fom bilong Dipatmen Bilong Rum Slip, kwiktaim toksave long kuskus sapos yu laik kisim ples slip.
(2) No ken makim sampela ples slip moa em yu no gat wok long en, na no ken kalapim mak bilong haus slip long hamas man i ken slip long wanpela rum.
(3) Sapos yu mas rausim nem bilong kisim ples slip, orait kwiktaim toksave long Dipatmen Bilong Rum Slip.—Mat. 5:37.
(4) No ken kukim kaikai long ol rum o hap i gat tambu long mekim paia long en.
(5) Sapos yu stap wantaim ol brata long haus bilong ol, tingim gut ol samting bilong ol, no ken stap yet bihain long kibung i pinis sapos yu no bin pasim tok wantaim ol paslain long kibung long mekim olsem.—Snd. 25:17.
(6) Taim yu stap long haus bilong ol brata, em i gutpela pasin long helpim ol long baim kaikai bilong haus, kukim kaikai, na mekim ol narapela wok bilong haus.
(7) Kamapim ol pasin bilong holi spirit taim yu kamap long ples kibung bilong stretim ples slip bilong yu, taim yu stap long ples slip, na long taim yu laik lusim ples slip bihain long kibung. Taim yumi mekim gutpela pasin, pasin isi na bihainim stretpela pasin, olgeta man bai amamas long yumi.
(8) Sapos wanpela hevi i kamap long ples slip, orait toksave long Dipatmen Bilong Rum Slip na ol bai helpim yu.
◼ Wok Volantia: Ol man husat i laik volantia, ol i mas toksave long Dipatmen Bilong Wok Volantia long kibung. Ol pikinini i no winim 16 krismas, ol tu inap helpim gut wok taim ol i wok aninit long lukaut bilong papa o mama o narapela bikpela man em papamama i orait long em.
[Blok long pes 6]
Rot Bilong Tilim Invatesen Pepa
Bilong inapim olgeta hap bilong teritori bilong yumi, yumi mas mekim sotpela tok tasol. Yumi ken tok olsem: “Gut de. Nau long olgeta hap bilong graun, mipela i tilim dispela invatesen pepa long ol man. Em hia invatesen pepa bilong yu. Yu ken lukim ol narapela tok i stap long pepa.” Soim olsem yu amamas long mekim. Taim yupela i tilim invatesen pepa long ol wiken, yupela i mas tilim tu ol magasin wantaim sapos i stret long mekim olsem.