Tripela De Bilong Kisim Ol Tok i Kam Long Jehova
1. Kibung distrik bilong dispela yia bai helpim yumi olsem wanem?
1 Long dispela graun nogut bilong Satan we ol man i sot tru long ol kaikai bilong spirit, Jehova i wok yet long givim planti kaikai bilong spirit long lain bilong em. (Ais. 58:11) Wanpela rot we Jehova i save strongim yumi em long rot bilong ol kibung distrik i save kamap long olgeta yia. Kibung bilong dispela yia i kam klostu pinis, olsem na yumi ken mekim wanem bilong redi long kisim na helpim ol narapela tu long kisim ol gutpela tok i kam long God?—Snd. 21:5.
2. Yumi mas stretim wanem ol samting?
2 Sapos yu no stretim yet ol samting, orait nau yu mas kirap stretim ol samting long sait bilong wok mani na bilong famili bilong yu bambai yupela i ken i stap long 3-pela de bilong kibung. Olsem wanem? Yu skelim pinis hamas taim bai lus bilong i go kamap long ples kibung na kisim ples sindaun paslain long program i kirap? Yumi laik stap long olgeta de bilong kibung na kisim ol kaikai bilong spirit bilong strongim yumi em Jehova i bin redim! (Ais. 65:13, 14) Olsem wanem? Yu stretim pinis ol samting bilong trenspot na ples slip?
3. Wanem sampela samting yumi inap mekim na bai kibung i helpim gut yumi na famili bilong yumi?
3 Wanem samting bai helpim yu na tingting bilong yu i no ken wokabaut long taim bilong kibung? Long olgeta nait bilong kibung yu mas slip gut. Long taim bilong program, lukluk long brata i mekim tok. Opim Baibel bilong yu na lukim olgeta skripsa. Na raitim sampela bikpela poin. Gutpela sapos famili olgeta i sindaun wantaim bambai papamama i ken helpim ol pikinini long putim gut yau. (Snd. 29:15) Bihain long olgeta wan wan de bilong kibung, famili i ken stori wantaim long ol bikpela tok i bin kamap. Bilong ol tok bilong kibung i ken strongim yet famili, yupela i ken makim hap taim long Famili Lotu bilong stori long sampela tok bilong kibung em famili bilong yupela i ken bihainim.
4. Olsem wanem yumi inap helpim ol arapela long kongrigesen long kisim ol tok i kam long God?
4 Helpim Ol Narapela: Yumi laik bai ol tok bilong kibung i strongim ol narapela tu. Olsem wanem? I gat sampela lapun bratasista o ol narapela long kongrigesen em ol i mas kisim helpim bilong i go long kibung? Yu ting yu inap helpim ol? (1 Jon 3:17, 18) Moa yet, ol elda i mas tingim ol dispela kain pablisa husat i nidim helpim.
5. Olsem wanem bai yumi tilim invatesen pepa bilong kibung? (Lukim blok antap.)
5 Olsem yumi bin mekim long pastaim, 3-pela wik paslain long kibung bai yumi insait long wok bilong singautim ol man i kam long kibung. Ol kongrigesen i mas putim mak long tilim invatesen pepa long olgeta hap bilong teritori bilong ol. Sapos famili bilong yu i holim yet sampela invatesen pepa, orait taim yupela i go i kam long kibung yupela i ken tilim long ol man. Bai i gat sampela toksave moa long dispela samting long taim bilong kibung long Fraide. Sapos yupela i no tingting long mekim wok long en long taim bilong kibung, orait yupela i ken bringim i kam long ples kibung na givim long ol atendan. Tasol wan wan i mas holim wanpela invatesen pepa bilong em yet, long wanem, bai yumi skelim long laspela tok bilong Sande.
6. Long wanem ol rot yumi inap bihainim gutpela pasin?
6 Bihainim Gutpela Pasin: Nau long dispela taim we planti man i “laikim ol yet tasol” na ol i no pilim tingting bilong ol narapela, yumi amamas olsem yumi stap wantaim ol wanbilip Kristen em ol i save mekim gutpela pasin. (2 Tim. 3:2) Yumi mas soim gutpela pasin na no ken pairap tumas taim yumi go insait long ples kibung, na kisim tasol sia bilong ol wanhaus bilong yumi, o ol lain i kam wantaim yumi long ka, o bilong ol Baibel sumatin bilong yumi. Taim siaman i toksave long yumi mas sindaun na harim musik bilong kirapim program, yumi mas bihainim tok bilong em. Yumi bihainim gutpela pasin taim yumi pasim mobail fon na bai em i no ken krai long taim bilong program na pulim ai bilong ol narapela. Na tu, yumi bihainim gutpela pasin taim yumi no toktok, salim teks, kaikai, o raun nating nating long taim bilong program.
7. Olsem wanem narapela i ken strongim narapela taim yumi bung wantaim?
7 Narapela i Strongim Narapela: Ol kibung i opim rot long yumi amamas wantaim ol brata Kristen bilong yumi na stap wanbel wantaim. (Sng. 133:1-3) I gutpela yumi ‘mekim pasin laikim bilong yumi i go bikpela moa’ long rot bilong toktok wantaim ol bratasista i kam long ol narapela kongrigesen. (2 Kor. 6:13) Putim mak olsem long 3-pela de bilong kibung, yu laik bungim wanpela brata o sista o wanpela famili na kisim save long ol. Long taim bilong malolo long belo em i gutpela taim bilong mekim olsem. Olsem na bringim liklik kaikai na bai yu ken amamas long kaikai wantaim ol bratasista na yu no gat wok long go baim kaikai. Dispela bai opim rot long yu bungim ol nupela pren na pasin pren bilong yupela bai stap oltaim.
8. Bilong wanem yumi mas volantia long helpim sampela wok bilong kibung? Olsem wanem yumi ken mekim olsem?
8 Em i gutpela samting tru long wok wantaim ol wanbilip long mekim wok bilong God! Olsem wanem? Yu inap volantia long helpim wanpela dipatmen bilong kibung o helpim kongrigesen bilong yu long klinim ples kibung? (Sng. 110:3) Sapos yu laik mekim wok volantia, orait go lukim Dipatmen Bilong Volantia long ples kibung. Sapos planti i insait long dispela wok, wok bai pinis hariap na ol bai kisim amamas long en.
9. Bilong wanem yumi mas tingim gut pasin na bilas bilong yumi long taim bilong kibung?
9 Pasin Bilong Yumi Inap Helpim Ol Narapela: Long 3-pela de yumi go kam long kibung, em i bikpela samting long tingim gut ol samting yumi mekim, na i no long taim bilong program tasol. Ol man bai lukluk long pasin bilong yumi na ol inap luksave olsem yumi narapela kain long ol narapela lotu. (1 Pita 2:12) Bilas bilong yumi long ples kibung, long ples slip, na long taim yumi raun long ol stua, haus kaikai na maket i mas givim biknem long Jehova. (1 Tim. 2:9, 10) Sapos yumi pasim kat bilong kibung ol man bai luksave olsem yumi Witnes Bilong Jehova. Dispela inap opim rot long yumi tokim ol long kibung na yumi inap autim tok long ol.
10. Wanem ol ekspiriens i soim olsem gutpela samting i save kamap taim yumi bihainim pasin Kristen?
10 Gutpela pasin bilong yumi long taim bilong kibung i mekim wanem long ol narapela? Wanpela niuspepa i kamapim tok bilong wanpela maneja bilong wanpela ples bung we ol Witnes i mekim kibung long en, em i tok: “Ol i gat gutpela pasin. Mipela i amamas olsem long olgeta yia ol i save yusim dispela ples bung bilong mipela.” Long yia i go pinis, wanpela man em i no wanpela Witnes em i lusim paus bilong em long hotel em ol Witnes i stap long en. Taim ol i givim maneja bilong hotel dispela paus wantaim olgeta samting i stap insait long en, em i tokim papa bilong paus: “Gutpela tru olsem ol Witnes Bilong Jehova i kam long kibung bilong ol na ol i stap long dispela hotel. Sapos nogat, bai yu no inap kisim bek paus bilong yu.”
11. Ol kibung i kam klostu pinis, olsem na yumi mas putim wanem mak? Na bilong wanem yumi mas mekim olsem?
11 Ol kibung bilong dispela yia i kam klostu pinis. Ol brata i lusim bikpela hap taim bilong redim program na bai ol samting bilong kibung i strongim yumi. Putim mak olsem yu bai stap long 3-pela de bilong kibung, na redi long kisim ol samting em Jehova na oganaisesen bilong em i redim bilong yu. Yu mas tingting long strongim ol narapela long rot bilong bihainim ol gutpela pasin, na amamas long bung wantaim ol. Taim yu na ol narapela i mekim olsem, bai yupela i pilim wankain olsem wanpela meri husat i go long kibung long las yia, em i tok: “Mi no bin pilim kain amamas olsem long bipo!”
[Rait long pes 1]
Olsem yumi bin mekim long pastaim, 3-pela wik paslain long kibung bai yumi insait long wok bilong singautim ol man i kam long kibung
[Rait long pes 3]
Bilas bilong yumi long ples kibung, long ples slip, na long ol haus kaikai i mas givim biknem long Jehova
[Rait long pes 4]
Yumi mas tingting long strongim ol narapela long rot bilong bihainim ol gutpela pasin, na amamas long bung wantaim ol
[Blok long pes 2-4]
Ol Samting Bilong Kibung Distrik Bilong 2011 Yumi Mas Tingim
◼ Ol Taim: Program bai kirap long 8:20 long moning long olgeta tripela de bilong kibung. Taim ol i pilaim musik bilong kirapim program, yumi olgeta i mas sindaun long sia bilong yumi na bai program i kirap long pasin i stret. Long ol kibung i kamap long tripela de, program bilong Fraide na Sarere bai pinis long 3:55 long apinun, na long Sande program bai pinis long 2:40 long apinun. Long ol kibung i kamap long tupela de, program bilong Sarere bai pinis long 4:10 long apinun na long Sande program bai pinis long 3:30 long apinun.
◼ Ples Bilong Putim Ka: Long ol ples em kibung bai kamap long en, bai i gat ples bilong putim ka. Ol brata i gat ka ol i mas pasim kat bilong kibung bambai ol i ken kisim ples bilong putim ka. Ating ples bilong putim ka i no planti, olsem na bihainim gut tok bilong ol atendan.
◼ Ples Sindaun: Yu ken kisim tasol sia bilong ol lain i kam wantaim yu long ka, o ol i stap long haus bilong yu, o ol Baibel sumatin bilong yu.—1 Kor. 13:5.
◼ Kaikai Long Belo: I gutpela yu bringim kaikai na bai yu no lusim ples kibung long belo bilong i go baim kaikai. Yu ken putim kaikai insait long liklik eski em yu inap putim aninit long sia. No ken bringim ol bikpela eski, glas kontena, na bia samting i go long ples kibung.
◼ Ol Kontribiusen: Yumi ken soim amamas bilong yumi long bikpela wok ol i mekim bilong redim ol kibung, long rot bilong givim kontribiusen long ples kibung bilong helpim wok long olgeta hap. Ol kontribiusen yu givim long rot bilong sek long kibung distrik, yu mas raitim “International Bible Students Association” o “IBSA” long en.
◼ Bikpela Bagarap: Sapos wanpela bikpela bagarap samting i kamap insait long ples kibung, toksave hariap long atendan, na em bai toksave long Dipatmen Bilong Fest Eid na bai ol lain long dispela dipatmen i ken helpim man i kisim bagarap.
◼ Marasin: Sapos dokta i makim sampela marasin bilong yu long kisim, orait yu mas kisim i kam wantaim yu long ples kibung, long wanem, ol kain marasin olsem bai i no stap long Dipatmen Bilong Fest Eid.
◼ Fom Please Follow Up (S-43-E): Yusim fom Please Follow Up bilong raitim nem na atres bilong man yu autim tok long en long taim bilong kibung. Ol pablisa i mas kisim wanpela o tupela fom i kam long kibung. Fom yu raitim pinis nem na atres bilong man long en, em yu mas givim long ol brata long Buk Rum o long kuskus bilong kongrigesen bilong yu taim yu go bek.—Lukim Wok Kingdom bilong Septemba 2011, pes 4.
◼ Haus Kaikai: Taim yu stap long haus kaikai bihainim gutpela pasin na dispela bai litimapim nem bilong Jehova.
◼ Ples Slip:
(1) Taim kongrigesen bilong yu i kisim ol fom bilong Dipatmen Bilong Rum Slip, kwiktaim toksave long kuskus sapos yu laik kisim ples slip.
(2) No ken makim sampela ples slip moa em yu no gat wok long en, na no ken kalapim mak bilong haus slip long hamas man i ken slip long wanpela rum.
(3) Sapos yu mas rausim nem bilong kisim ples slip, orait kwiktaim toksave long Dipatmen Bilong Rum Slip.—Mat. 5:37.
(4) No ken kukim kaikai long ol rum i gat tambu long mekim paia long en.
(5) Sapos yu stap wantaim ol brata long haus bilong ol, tingim gut ol samting bilong ol, no ken stap yet bihain long kibung i pinis sapos yu no bin pasim tok wantaim ol paslain long kibung long mekim olsem.—Snd. 25:17.
(6) Taim yu stap long haus bilong ol brata, em i gutpela pasin long helpim ol long baim kaikai bilong haus, kukim kaikai, na mekim ol narapela wok bilong haus.
(7) Kamapim ol pasin bilong holi spirit taim yu kamap long ples kibung bilong stretim ples slip bilong yu, taim yu stap long ples slip, na long taim yu laik lusim ples slip bihain long kibung. Taim yumi mekim gutpela pasin, pasin isi na bihainim stretpela pasin, olgeta man bai amamas long yumi.
(8) Sapos wanpela hevi i kamap long ples slip, orait toksave long Dipatmen Bilong Rum Slip na ol bai helpim yu.
◼ Wok Volantia: Bai yumi kisim bikpela amamas moa long kibung sapos yumi volantia long helpim ol wok bilong kibung. (Apo. 20:35) Ol lain husat i laik volantia, ol i mas toksave long Dipatmen Bilong Wok Volantia long kibung. Ol pikinini i no winim 16 krismas, ol tu inap helpim gut wok taim ol i wok aninit long lukaut bilong papa o mama o narapela bikpela man em papamama i orait long em.
[Blok long pes 2]
Rot Bilong Tilim Invatesen Pepa
Bilong inapim olgeta hap bilong teritori bilong yumi, yumi mas mekim sotpela tok tasol. Yumi ken tok olsem: “Gut de. Nau long olgeta hap bilong graun, mipela i tilim dispela invatesen pepa long ol man. Em hia invatesen pepa bilong yu. Yu ken lukim ol narapela tok i stap long pepa.” Tok i stap long fran pes bilong invatesen pepa bai kirapim tingting bilong man, olsem na taim yu laik givim invatesen pepa, yu mas holim stret bambai em i ken lukim, na givim bel long mekim olsem. Taim yupela i tilim invatesen pepa long ol wiken, yupela i mas tilim tu ol magasin wantaim sapos i stret long mekim olsem.