Ol Pasin i Givim Biknem Long God
1. Olsem wanem ol man inap luksave long ol Witnes Bilong Jehova?
1 Taim yumi go long kibung distrik, ol man inap luksave long yumi. Long planti taun em kibung i kamap long en, long rot bilong redio o nius ol man inap save olsem yumi mekim kibung bilong yumi. Ol man bilong dispela hap i luksave long yumi pasim ol kat bilong kibung. Ol tok i stap daunbilo bai helpim yumi long bihainim gutpela pasin taim yumi stap long ples em kibung i kamap long en na dispela bai givim biknem long God.—1 Pita 2:12.
2. Olsem wanem yumi inap givim biknem long God long rot bilong bilas bilong yumi?
2 Pasim Klos i Stret: Taim yumi pasim klos i stret long taim bilong kibung, planti taim ol man i lukim yumi ol i amamas long pasin bilong yumi long bilas. Tasol bilas bilong yumi bihain long program i pinis, dispela inap mekim bikpela samting moa long ol man i lukim yumi. Yumi no pasim ol klos olsem yumi pasim long kibung, tasol klos yumi pasim i mas stret, na i soim pasin rispek, na yumi bilas gut. Gutpela sapos ol man i lukim yumi, ol i ken luksave olsem bilas bilong yumi i narapela kain long ol man i no wanbilip bilong yumi. (Rom 12:2) Na tu, yumi mas pasim ol kat bilong kibung, na long dispela rot ol man bai luksave olsem yumi gat kibung, rot i op long yumi inap autim tok, na tu, ol narapela bratasista inap luksave long yumi.
3. Olsem wanem yumi inap kamapim pasin bilong i no les kwik na tingim ol narapela?
3 No Ken Les Kwik na Tingim Ol Narapela: Long nau ol man bilong dispela graun i save tingim ol yet na i no save tok tenkyu, tasol taim ol man i lukim pasin bilong yumi long i no les kwik na tingim ol narapela, olsem long ol stua na long ol haus kaikai, dispela i save mekim ol i amamas. (2 Tim. 3:1-5) Taim yumi laik kisim ol ples sindaun, o sanap long lain long kisim ol nupela buk samting, yumi no ken tingim yumi yet, yumi mas tingim ol narapela. (1 Kor. 10:23, 24) Long namba 1 taim wanpela man i bin go long kibung, em i tok: “Mi no inap tingim ol tok i kamap long dispela de, tasol mi inap tingim yet gutpela pasin bilong ol Witnes.”
4. Bilong wanem yumi mas redi long mekim wok volantia long taim bilong kibung?
4 Wok Volantia: Ol Kristen tru i gat nem olsem ol man bilong redi long mekim wok. (Sng. 110:3) Olsem wanem? Yu inap mekim wok volantia long taim bilong kibung? Long wanpela kibung, inap 600 bratasista i bin volantia long klinim ples paslain long kibung. Wanpela wokman bilong dispela hap i tok: “Dispela em narakain samting tru mi no bin lukim bipo! Mi hatwok long bilip olsem olgeta dispela man i wok volantia tasol.” Yumi amamas long wetim dispela kibung distrik bilong 2013 na bai yumi inap putim gut yau na kisim skul i kam long God na givim biknem long em.
[Askim Bilong Stadi]
[Blok long pes 3-6]
Ol Samting Bilong Kibung Distrik Bilong 2013 Yumi Mas Tingim
◼ Ol Taim: Program bai kirap long 9:20 long moning long olgeta tripela de bilong kibung. Taim musik bilong program i kirap, yumi olgeta i mas kisim ples sindaun na bai program i kirap long taim stret. Long ol kibung i kamap long tripela de, program bilong Fraide na Sarere bai pinis long 4:50 long apinun, na long Sande, program bai pinis long 3:35 long apinun. Long ol kibung i kamap long tupela de, program bilong Sarere bai pinis long 5:30 long apinun na long Sande program bai pinis long 4:05 long apinun.
◼ Ples Bilong Putim Kar: Long ol ples em kibung bai kamap long en, bai i gat ples bilong putim kar. Ol brata i gat kar ol i mas pasim kat bilong kibung na bai ol i ken kisim ples bilong putim kar. Ples bilong putim kar i no planti, olsem na bihainim gut tok bilong ol atendan.
◼ Ples Sindaun: Kisim tasol sia bilong ol lain i kam wantaim yu long kar, o lain i stap wantaim yu, o ol Baibel sumatin bilong yu.
◼ Kaikai Long Belo: I gutpela yu bringim kaikai na bai yu no lusim ples kibung long belo bilong i go baim kaikai. Putim kaikai long liklik eski em yu inap putim aninit long sia.
◼ Ol Kontribiusen: Yumi ken soim amamas bilong yumi long bikpela wok ol i mekim bilong redim ol kibung, long rot bilong givim kontribiusen long ples kibung bilong helpim wok long olgeta hap. Ol kontribiusen yu givim long rot bilong sek long kibung distrik, yu mas raitim “International Bible Students Association” o “IBSA” long en.
◼ Marasin: Sapos dokta i makim sampela marasin bilong yu long kisim, orait yu mas kisim i kam wantaim yu long ples kibung, long wanem, ol kain marasin olsem bai i no stap long Dipatmen Bilong Fest Eid.
◼ Ol Su: Long olgeta yia i gat ol hevi i save kamap long ol su samting, moa yet em ol high-heeled su. I gutpela long yumi putim su i stret bilong wokabaut long ples kibung.
◼ Fom Plis Go Lukim (S-43-MP): Yusim fom Plis Go Lukim bilong raitim nem na atres bilong man yu autim tok long en long taim bilong kibung. Fom yu raitim pinis nem na atres bilong man long en, em yu mas givim long ol brata long Bukrum o long kuskus bilong kongrigesen bilong yu taim yu go bek.
◼ Ples Slip:
(1) Taim kongrigesen bilong yu i kisim ol fom bilong Dipatmen Bilong Rum Slip, kwiktaim toksave long kuskus sapos yu laik kisim ples slip.
(2) No ken makim sampela ples slip moa em yu no gat wok long en, na no ken kalapim mak bilong haus slip long hamas man i ken slip long wanpela rum.
(3) Sapos yu rausim nem bilong kisim ples slip, orait kwiktaim toksave long Dipatmen Bilong Rum Slip.—Mat. 5:37.
(4) No ken kukim kaikai long ol rum o hap i gat tambu long mekim paia long en.
(5) Sapos yu stap wantaim ol brata long haus bilong ol, tingim gut ol samting bilong ol, no ken stap yet bihain long kibung i pinis sapos yu no bin pasim tok wantaim ol paslain long kibung long mekim olsem.—Snd. 25:17.
(6) Taim yu stap long haus bilong ol brata, em i gutpela pasin long helpim ol long baim kaikai bilong haus, kukim kaikai, na mekim ol narapela wok bilong haus.
(7) Kamapim ol pasin bilong holi spirit taim yu kamap long ples kibung bilong stretim ples slip bilong yu, taim yu stap long ples slip, na long taim yu laik lusim ples slip bihain long kibung. Taim yumi mekim gutpela pasin, pasin isi na bihainim stretpela pasin, olgeta man bai amamas long yumi.
(8) Sapos wanpela hevi i kamap long ples slip, orait toksave long Dipatmen Bilong Rum Slip na ol bai helpim yu.
(9) Ol papamama i mas lukautim gut ol pikinini bilong ol.
◼ Wok Volantia: Ol man husat i laik mekim wok volantia, ol i mas toksave long Dipatmen Bilong Wok Volantia long kibung. Ol pikinini i no winim 16 krismas, ol tu inap helpim wok taim ol i wok aninit long lukaut bilong papa o mama o narapela bikpela man em papamama i orait long em.