“Mekim Yet Ol Gutpela Pasin Namel Long Ol Manmeri Bilong Graun”
1. Bilong wanem em i bikpela samting long yumi mas mekim gutpela pasin long taim bilong kibung?
1 Long olgeta yia, ol kibung bilong yumi i save pulim ai bilong ol man, olsem na em i bikpela samting long pasin bilong yumi i mas kamapim klia God yumi lotuim. (Wkp. 20:26) Gutpela pasin bilong yumi, na tu, klos na bilas bilong yumi i mas kamapim klia olsem yumi bihainim tru pasin bilong Krais. Taim yumi go long kibung rijinel na intenesenel, olsem wanem bai yumi “mekim yet ol gutpela pasin namel long ol manmeri bilong graun” na givim glori long Papa bilong yumi long heven?—1 Pita 2:12.
2. Rot i op long yumi kamapim wanem ol pasin Kristen long taim bilong kibung?
2 Mekim Pasin Kristen: Pasin laikim yumi mekim long narapela narapela na pasin yumi mekim long “ol man i no insait long lain brata Kristen” i narapela kain long ol pasin bilong dispela graun. (Kol. 3:10; 4:5, futnot; 2 Tim. 3:1-5) Sapos wanpela hevi i kamap, yumi mas mekim gutpela pasin na no ken les kwik taim yumi toktok wantaim ol wokman bilong hotel o restron samting. Na tu, yumi mas mekim gutpela pasin na givim samting long wokman bilong hotel husat i helpim yumi, sapos em lo bilong hotel long mekim olsem.
3. Ol papamama i mas tingim wanem samting? Bilong wanem ol mas tingim dispela?
3 Ol papamama i mas lukautim gut ol pikinini bilong ol long ples kibung, taim ol i kaikai long restron, raun long stua, na long ples slip o hotel. (Snd. 29:15) Maneja bilong wanpela hotel i tokim tupela marit: “Mipela i laikim yupela. Ol famili na pikinini bilong yupela i gat gutpela pasin tru. Olgeta wokman i toktok long pasin bilong yupela, na mipela bai amamas tru sapos yupela i stap long hotel long olgeta wiken.”
4. Taim yumi stap long hap em kibung i kamap long en, bilong wanem yumi mas tingim lukluk bilong yumi?
4 Klos na Bilas i Mas i Stret: Klos na bilas bilong yumi long taim bilong kibung i mas i stret long pasin Kristen, na i no ken kamapim pasin na stail bilong dispela graun. (1 Tim. 2:9) Sapos yumi stap long ples slip o long taim yumi malolo paslain o bihain long kibung, yumi mas was gut na no ken pasim klos i no stret long pasin Kristen. Long dispela rot, bai yumi amamas long putim kat bilong kibung na yumi no sem long autim tok taim rot i op. Lukluk bilong yumi na gutpela pasin bilong yumi long taim bilong kibung bai pulim ai bilong ol man i gat gutpela bel long kisim save long tok bilong Baibel, em dispela tok i save givim laip long man, na tu, em bai givim amamas long Jehova.—Sef. 3:17.
[Box on pages 3-6]
Ol Samting Bilong Kibung Bilong 2014 Yumi Mas Tingim
◼ Ol Taim: Program bai kirap long 9:20 long moning long olgeta de bilong kibung. Taim musik bilong program i kirap, yumi olgeta i mas kisim ples sindaun na bai program i kirap long taim stret. Long ol kibung i kamap long tripela de, singsing na beten bilong pinisim program bilong Fraide na Sarere em long 4:55 long apinun, na long Sande, program bai pinis long 3:50 long apinun. Long ol kibung bilong tupela de, program bilong Sarere bai pinis long 5:30 long apinun na long Sande, program bai pinis long 4:10 long apinun.
◼ Kibung Intenesenel: Long sampela hap bilong graun bai i gat ol kibung intenesenel. Yumi mas tingim olsem brens ofis i bin skelim namba bilong ol sia, ples bilong putim kar, na ol rum long ol hotel inap long ol man bai kam long kibung, olsem na ol i singautim wan wan kongrigesen tasol na ol bratasista bilong go long ol dispela kibung intenesenel. Sapos ol pablisa i go long ol kibung intenesenel em brens ofis i no bin singautim ol long en, bai i gat planti man tru na i no gat inap spes. Sapos rot i op long yu go kibung long narapela hap we ol i no makim kongrigesen bilong yu long go long en, yu ken i go long kibung rijinel, tasol yu no ken go long kibung intenesenel i kamap long dispela hap.
◼ Ples Bilong Putim Kar: Long ol ples em kibung bai kamap long en, bai i gat ples bilong putim kar. Ples bilong putim kar i no bikpela, olsem na bihainim gut tok bilong ol atendan.
◼ Ples Sindaun: Pasin bilong daunim sampela laik bilong yumi yet bai kirapim yumi long mekim gutpela pasin long ol narapela, na dispela i kamapim klia yumi Kristen tru na i kirapim ol narapela long givim biknem long God. (Jon 13:34, 35; 1 Kor. 13:4, 5; 1 Pita 2:12) Kisim tasol sia bilong ol lain i kam wantaim yu long kar, o lain i stap wantaim yu, o ol Baibel sumatin bilong yu. I gat hap bilong ol bratasista i lapun na ol bratasista i gat sik i ken sindaun long en, na wanpela o tupela tasol i ken sindaun wantaim ol long dispela hap bilong lukautim na helpim ol.
◼ Kaikai Long Belo: I gutpela yu bringim kaikai na bai yu no lusim ples kibung long belo bilong i go baim kaikai. Putim kaikai long liklik eski em yu inap putim aninit long sia. No ken bringim ol bikpela eski o ol kontena ol i wokim long glas samting i go long ples kibung.
◼ Ol Kontribiusen: Yumi ken soim tenkyu bilong yumi long bikpela wok ol i mekim bilong redim ol kibung, long rot bilong givim kontribiusen bilong helpim wok long olgeta hap. Ol kontribiusen yu givim long rot bilong sek long kibung distrik, yu mas raitim “International Bible Students Association” o “IBSA” long en.
◼ Marasin: Sapos dokta i makim sampela marasin bilong yu long kisim, orait yu mas kisim i kam wantaim yu long ples kibung, long wanem, ol kain marasin olsem bai i no stap long Dipatmen Bilong Fest Eid.
◼ Ol Su: Long olgeta yia i gat ol hevi i save kamap long ol su samting, moa yet em ol high-heeled su. I gutpela long yumi putim su i stret bilong wokabaut long ples kibung.
◼ Ol Lain Em Yau i Bagarap o Ol i No Save Harim Gut: Long ol kibung long Pot Mosbi, bai ol i kamapim program bilong kibung long rot bilong redio tu long ples kibung, long wanpela redio stesen olsem (eksampel, FM 88.1). Yu mas yusim yaufon long fon o liklik redio na harim.
◼ Fom Plis Go Lukim (S-43-MP): Yusim fom Plis Go Lukim bilong raitim nem na atres bilong man yu autim tok long en long taim bilong kibung. Fom yu raitim pinis nem na atres bilong man long en, em yu mas givim long ol brata long Bukrum o long kuskus bilong kongrigesen bilong yu taim yu go bek.
◼ Haus Kaikai: Taim yumi kaikai long restron, yumi mas bihainim ol gutpela pasin i givim biknem long Jehova. Klos na bilas bilong yumi i mas i stret long pasin bilong ol Kristen.
◼ Ples Slip:
(1) Taim kongrigesen bilong yu i kisim ol fom bilong Dipatmen Bilong Rum Slip, kwiktaim toksave long kuskus sapos yu laik kisim ples slip.
(2) No ken makim sampela ples slip moa em yu no gat wok long en, na no ken kalapim mak bilong haus slip long hamas man i ken slip long wanpela rum. I gutpela long baim ples slip bilong yu pastaim.
(3) Sapos yu rausim nem bilong kisim ples slip, orait kwiktaim toksave long Dipatmen Bilong Rum Slip.—Mat. 5:37.
(4) No ken kukim kaikai long ol rum o hap i gat tambu long mekim paia long en.
(5) Taim yu stap wantaim ol brata long haus bilong ol, tingim ol na helpim ol long baim kaikai, kukim kaikai, na helpim ol long mekim sampela wok long haus.
(6) Sapos yu stap wantaim ol brata long haus bilong ol, tingim gutpela pasin ol i mekim long singautim yu long stap wantaim ol, no ken stap yet bihain long kibung i pinis sapos yu no bin pasim tok wantaim ol paslain long kibung long mekim olsem.—Snd. 25:17.
(7) Kamapim ol pasin bilong holi spirit taim yu kamap long ples kibung bilong stretim ples slip bilong yu, taim yu stap long ples slip, na long taim yu laik lusim ples slip bihain long kibung. Taim yumi mekim gutpela pasin, pasin isi na bihainim stretpela pasin, olgeta man bai amamas long yumi.
(8) Ol papamama i mas lukautim gut ol pikinini bilong ol.
(9) Sapos wanpela hevi i kamap long ples slip, orait toksave long Dipatmen Bilong Rum Slip na ol bai helpim yu.
◼ Wok Volantia: Ol man husat i laik mekim wok volantia, ol i mas toksave long Dipatmen Bilong Wok Volantia long kibung. Ol pikinini i no winim 16 krismas, ol tu inap helpim wok taim ol i wok aninit long lukaut bilong papa o mama o narapela bikpela man em papamama i orait long em i lukautim ol.