Ol Kibung Distrik—Taim Bilong Amamas Long Lotuim Jehova
1 Josep, Maria, ol pikinini bilong tupela, na ol narapela i go oltaim long Jerusalem long ol bikpela bung bilong lotu. Long taim bilong ol dispela bung, famili bilong Jisas na ol narapela wanbilip i no tingim ol wok bilong ol long wan wan de, nogat, ol i tingim ol bikpela samting bilong spirit. Long rot bilong ol dispela bung, ol i gat taim long tingim gut na toktok long ol gutpela pasin bilong Jehova na Lo bilong em. Ol kibung distrik bilong yumi bai opim rot long yumi tu long amamas long lotu long Jehova.
2 Yumi Mas Redim Ol Samting: Bilong i go na kam bek long Nasaret, famili bilong Jisas i mas wokabaut inap 200 kilomita. Tru, yumi no save Jisas i gat hamas bratasusa, tasol yumi ken tingim olsem Josep na Maria i mas plenim na redim gut ol samting. Olsem wanem? Yu mekim pinis ol samting yu mas mekim bambai yu inap i go long olgeta 3-pela de bilong kibung distrik? Bilong mekim olsem, ating yu mas kisim holide long wok, o toktok wantaim bos o tisa bilong pikinini bilong yu bilong kisim de malolo. Olsem wanem? Yu stretim pinis ples slip, sapos yu gat wok long mekim olsem? Yu inap go pas long helpim wanpela insait long kongrigesen husat i gat bagarap long skin samting na i nidim helpim bilong i go lo kibung?—1 Jo. 3:17, 18.
3 Bung Wantaim Ol Wanbilip: Ol bikpela bung bilong ol Juda i opim rot long ol i ken bung wantaim ol wanbilip husat inap strongim ol! Famili bilong Jisas i amamas long bung gen wantaim ol pren em ol i no bin lukim inap longtaim. Ol i amamas tu long kisim ol nupela pren namel long ol Juda na ol man i bihainim lotu Juda, em ol i stap long Jerusalem o ol i raun long rot bilong i go na kam long Jerusalem.
4 Wanpela as na wokboi i gat gutpela tingting i stretim rot bilong yumi long bung wantaim long harim ol tok long ol kibung distrik na i no kamapim ol dispela tok long rot bilong ol buk na nius, em bilong yumi ken strongim narapela narapela. (Hi. 10:24, 25) Olsem na wokim plen bilong kam hariap long kibung long olgeta wan wan de, bilong bung wantaim ol wanbilip paslain long siaman i tokaut long musik bai kirap, em dispela i makim olsem em taim bilong sindaun. Maski long lusim ples kibung long belo bilong painim kaikai, mobeta yumi bringim i kam liklik kaikai na stap long ples kibung bambai yumi ken bung na toktok wantaim ol narapela. Lain brata Kristen bilong yumi i stap wanbel, em i presen i kam long Jehova na yumi mas amamas tru long en.—Mai. 2:12.
5 Taim Bilong Kisim Save: Kirap long taim Jisas i yangpela yet, em i kisim save long Papa bilong em long heven long ol bung bilong lotu. (Lu. 2:41-49) Wanem samting bai helpim yumi yet na famili bilong yumi long kisim gutpela helpim long ol tok i kamap? Long taim bilong program, sindaun long sia bilong yu na abrusim pasin bilong toktok nating wantaim ol narapela. No ken larim mobail fon o kain samting olsem i distebim yu o ol narapela. Lukluk long brata i mekim tok, na raitim ol sotpela tok long notbuk. Sindaun wantaim famili bilong yu bambai yu inap helpim ol pikinini long putim gut yau. Long apinun, lusim sampela hap taim bilong toktok wantaim long ol bikpela tok yupela i bin amamas long en.
6 Klos na Bilas: Ol bisnisman bilong narapela ples husat i wokabaut long rot, ol inap luksave long famili bilong Jisas na ol narapela wanlotu Juda husat i go na kam long ol bikpela bung, long wanem, ol i werim ol klos i gat ol sotpela hap string long arere bilong klos na blupela string antap long en. (Nam. 15:37-41) Tru, ol Kristen i no werim sampela kain spesel klos, tasol yumi gat nem olsem yumi save pasim ol klos i stret na i klin. Yumi mas tingim gut moa yet klos na bilas bilong yumi taim yumi go i kam long kibung, long taim yumi stap long kibung, na taim yumi raun bihain long kibung i pinis long wan wan de. Maski yumi senisim klos bihain long program, yumi mas pasim yet ol klos i stret na werim kat bilong kibung. Long dispela rot, yumi stap narapela kain long ol man i no Witnes na ol man i lukim yumi bai kisim stretpela tingting long yumi.
7 I Mas i Gat Ol Volantia: I mas i gat planti volantia bambai kibung inap ron gut. Yu inap volantia long helpim wok? (Sng. 110:3) Wok yumi mekim long ol kibung em hap bilong wok bilong God yumi mekim na i givim biknem long God. Wanpela maneja bilong ples we ol i mekim kibung i amamas tru long ol volantia husat i klinim dispela ples bung, olsem na em i tok: “Mi laik tok tenkyu long yupela long nambawan gutpela bung i bin kamap long dispela ples bung. Mi bin harim olsem ol Witnes Bilong Jehova i narapela kain, na ol i gat nem olsem taim ol i lusim ples ol i wokim bung long en, ples i klin tru winim taim ol i no wokim bung yet. Yupela na oganaisesen bilong yupela i mekim dispela ples bung i kamap gutpela ples moa bilong komiuniti i ken yusim, na yupela i mekim olsem long rot bilong ol manmeri i gat gutpela pasin tru, winim ol narapela lain mipela i save long ol.”
8 Rot i Op Long Autim Tok: Long hap ol i wokim kibung long en, planti man husat i no Witnes ol bai lukim ol manmeri i werim ol klos na bilas i stret na kat bilong kibung, na dispela inap kirapim tingting bilong ol na i opim rot long yumi long tokim ol long kibung. Wanpela pikinini i gat 4-pela krismas i bringim long haus kaikai kopi bilong em long nupela buk ol i kisim long kibung, na i soim buk long wanpela wokmeri long haus kaikai. Dispela i opim rot long papamama bilong mangi long singautim meri long i kam long kibung.
9 Ol bikpela bung bilong lotu long bipo ol i taim bilong amamas na ol Juda husat i tingim ol samting bilong spirit, ol i wetim taim bilong ol dispela bung i kamap. (Lo 16:15) Famili bilong Jisas i amamas long daunim sampela laik bilong ol yet bilong ol i ken i go long ol dispela bung na kisim helpim. Yumi tu i save tingim tru ol kibung distrik bilong yumi, na yumi tingim ol i olsem presen i kam long gutpela Papa bilong yumi long heven. (Jem. 1:17) Nau em taim bilong redi long dispela bung bilong amamas long lotuim Jehova!
[Askim Bilong Stadi]
1. Olsem wanem ol bikpela bung bilong lotu long Israel i wankain olsem ol kibung distrik bilong yumi?
2. Yumi mas mekim wanem bilong redim ol samting bilong i go long kibung distrik?
3. Olsem wanem ol bikpela bung bilong ol Israel i opim rot long bung wantaim ol wanbilip?
4. Olsem wanem yumi inap soim olsem yumi amamas tru long lain brata Kristen bilong yumi i stap wanbel?
5. Wanem samting bai helpim yumi long kisim gutpela helpim long program?
6. Yumi mas tingim wanem samting long klos na bilas bilong yumi?
7. Bilong wanem yumi mas tingting long volantia long helpim wok bilong kibung?
8. Wanem ol rot i op long autim tok long hap kibung i kamap long en?
9. Olsem wanem yumi inap bihainim pasin bilong famili bilong Jisas long tingim tru ol bung Jehova i redim?