Wanpela Bung Bilong Kisim Kaikai Bilong Spirit na Amamas
1 Jehova i save lukautim gut ol wokman bilong em long ol samting bilong lotu ol i mas kisim. Ol manmeri long nau i hangre tru long kaikai bilong spirit, tasol yumi gat planti kaikai bilong spirit. (Ais. 65:13) Wanpela rot Jehova i save yusim bilong givim planti gutpela kaikai bilong spirit long yumi em long rot bilong ol kibung distrik. Olsem wanem? Yu redim ol samting bilong i go long olgeta tripela de bilong “Holi Spirit i Stiaim Yumi” Kibung Distrik? Ol i bin redim pinis planti gutpela kaikai bilong spirit yumi ken kisim.
2 Redi Gut Pastaim: “Ol man bilong wok ol i save tingting gut na mekim wok, olsem na wok bilong ol i kamap gutpela na ol i gat planti samting.” (Snd. 21:5) Olsem na taim yu wok long redim ol samting bilong i stap long olgeta tripela de bilong kibung, no ken lusim tingting long toktok wantaim bos bilong yu sapos yu mas lusim wok bilong i go long kibung. Sapos yu mas kisim ples slip, yu bin stretim pinis ol samting? Yu ken tingting tu long wanem kaikai bilong belo yu bai kisim na yu ken sindaun long ples kibung wantaim ol bratasista na kaikai. Stretim rot bambai olgeta wan wan de yu ken kamap long ples kibung paslain long program i kirap, na yu ken kisim ples sindaun na insait long singsing na beten bilong kirapim program.
3 Yumi mas tingting long pasim klos i stret na i gutpela. (1 Ti. 2:9, 10) Ol kibung distrik i opim rot long yumi ken autim tok long ol man i sindaun klostu. Taim klos na bilas bilong yumi i soim pasin rispek long taim yumi stap long taun em kibung i kamap long en, na yumi pasim kat bilong kibung, ol man i luksave long yumi na dispela i mekim ol i amamas long yumi.
4 Putim Gut Yau: Yumi no laik tru long lusim wanpela tok i kamap long dispela bikpela kaikai bilong spirit! (Snd. 22:17, 18) Taim brata i ritim ol skripsa, i gutpela yumi bihainim long Baibel bilong yumi yet na raitim ol bikpela tok long notbuk, dispela bai mekim na yumi no larim ol samting i pulim nabaut tingting bilong yumi. Long apinun, yumi ken stori wantaim ol narapela long ol bikpela tok bilong kibung yumi bin raitim. Long sampela yia i go pinis, mipela i luksave olsem sampela yangpela i save sindaun wantaim na ol i toktok long taim bilong kibung o salim teks mesis i go i kam long ol mobail fon bilong ol. Sapos yumi gat ol pikinini, na ol tineja, em i gutpela sapos yumi olgeta i sindaun wantaim olsem famili na yumi no larim ol i sindaun wantaim ol narapela yangpela long taim bilong kibung.
5 Amamas Wantaim Ol Bratasista: Gutpela kaikai i save swit moa taim yumi sindaun na kaikai wantaim ol pren bilong yumi. (Snd. 15:17) Olsem tasol, pasin bilong bung wantaim ol brata na sista bilong yumi i save mekim amamas bilong kibung i go bikpela moa. Olsem na taim program i no kirap yet, em i gutpela samting tru long go bungim ol narapela i kam long kibung na amamas wantaim ol! (Sng. 133:1) Taim siaman i askim yumi long kisim ples sindaun paslain long musik i kirap, yumi mas katim tok bilong yumi na go sindaun na wetim program i kirap.
6 Oltaim Redi Long Autim Tok: Ol kibung i save opim gutpela rot tru bilong autim tok. Planti manmeri husat i kam long kibung na ol i save go long stua na maket samting bihain long kibung, ol man i save askim ol long tok i stap long kat bilong kibung. Dispela i bin opim rot bilong toktok na em i gutpela rot bilong autim tok i tru. Sampela em ol i bin kamapim kain askim olsem, ol Witness i singautim ol long kibung na ol i bin kam long kibung.
7 Ol brata i bin lusim planti tausen aua bilong redim program bilong kibung, painim na stretim ol haus kibung, na stretim ol dipatmen bilong kibung, na redim ol tok bilong kibung. Long pasin laikim ol i bin mekim olgeta dispela hatwok bilong redim bikpela kaikai bilong spirit, dispela i kamapim klia olsem Jehova i save tingim tru lain bilong em. Yumi olgeta i laik i stap long dispela kibung na kisim gut ol tok bai kamap! Taim yumi mekim olsem, bel bilong yumi bai ‘pulap long amamas na bai yumi singim ol song bilong amamas,’ em ol samting ol man bilong graun i no inap pilim.—Ais. 65:14.
[Askim Bilong Stadi]
1. Olsem wanem Jehova i lukautim ol wokman bilong em long ol samting bilong lotu ol i mas kisim?
2. Yumi mas mekim wanem ol samting bilong redi long kibung?
3. Yumi mas tingting long pasim wanem kain klos?
4. Wanem samting bai helpim yumi na famili bilong yumi long kisim gut ol tok i kamap long kibung?
5. Olsem wanem yumi ken mekim amamas bilong kibung i go bikpela moa?
6. Stori long wanpela ekspiriens bilong yu yet long olsem wanem yumi inap autim tok long ol manmeri long hap em kibung i kamap long en.
7. Bilong wanem yumi mas i go long dispela kibung distrik bai kamap
[Blok long pes 4]
Ol Samting Bilong Kibung Distrik Yumi Mas Tingim
◼ Ol Taim: Program bai kirap long 9:superscription0 a.m. long olgeta tripela de bilong kibung. Taim ol i pilaim musik bilong kirapim program, yumi olgeta i mas sindaun long sia bilong yumi na bai program i kirap long pasin i stret. Program bai pinis long 4:superscription5 p.m. long Fraide, 4:20 p.m. long Sarere, na 3:45 p.m. long Sande.
◼ Ples Bilong Putim Ka: Long olgeta ples em kibung bai kamap long en, bai i gat ples bilong putim ol ka. Ol brata i gat ka i mas pasim kat bilong kibung bambai ol i ken kisim ples bilong putim ka. Ating ples bilong putim ka i no planti olsem na bihainim gut tok bilong atendan.
◼ Ples Sindaun: Yu ken kisim sia bilong ol lain i kam wantaim yu long ka o ol i stap long haus bilong yu.
◼ Kaikai: I gutpela yu bringim kaikai na bai yu no lusim ples kibung long belo bilong i go baim kaikai. Yu ken putim kaikai insait long liklik eski em yu inap putim aninit long sia. No ken bringim ol bikpela eski, glas kontena, na bia samting i go long ples kibung.
◼ Ol Kontribiusen: Ol i tromoi bikpela mani bilong redim kibung distrik. Yumi ken soim amamas bilong yumi long rot bilong givim kontribiusen long Haus Kingdom bilong yumi o long ples kibung bilong helpim ol wok long olgeta hap. Ol kontribiusen yu givim long rot bilong sek long kibung distrik, yu mas raitim “International Bible Students Association” o “IBSA” long en.
◼ Bikpela Bagarap: Sapos wanpela bikpela bagarap samting i kamap insait long ples kibung, toksave long atendan i stap klostu na em bai toksave hariap long Dipatmen Bilong Fest Eid na bai ol lain long dispela dipatmen i ken helpim man i kisim bagarap.
◼ Ples Slip: (1) Taim kongrigesen bilong yu i kisim ol fom bilong Dipatmen Bilong Rum Slip, kwiktaim toksave long kuskus sapos yu laik kisim ples slip. (2) No ken makim sampela ples slip moa em yu no gat wok long en, na no ken kalapim mak bilong haus slip long hamas man i ken slip long wanpela rum. (3) Sapos yu mas rausim nem bilong yu long ples slip, orait kwiktaim yu mas toksave long Dipatmen Bilong Rum Slip. (4) No ken kukim kaikai long ol rum i gat tambu long mekim olsem. (5) Sapos yu stap wantaim ol brata long haus bilong ol, tingim gut ol samting bilong ol, na no ken stap yet bihain long kibung i pinis sapos yu no bin pasim tok wantaim ol paslain long kibung long mekim olsem. Taim yu stap long haus bilong ol brata, em i gutpela pasin long helpim na baim kaikai bilong haus, kukim kaikai, na mekim ol narapela wok bilong haus. (6) Taim yu kamap long ples kibung bilong stretim ples slip bilong yu, na long taim yu stap long ples slip bilong yu, na long taim yu laik lusim ples slip bilong yu bihain long kibung, kamapim ol pasin em spirit bilong God i save kamapim.