Bihainim Krais Long Mekim Pasin i Soim Rispek
1 Baibel i stori long King Bilong Heven na Graun, Jehova, olsem em i gat biknem. (Sng. 104:1) Olgeta tok na pasin bilong Jisas i save givim biknem long Papa bilong em na long ol wok bilong Em. (Jo. 17:4) Yumi olgeta wan wan bai i gat rot long bihainim Jisas na litimapim nem bilong Jehova long dispela “Bihainim Krais!” Kibung Distrik bilong yumi.
2 Mekim Lotu Long Pasin i Soim Rispek: Yumi inap givim ona long Jehova long rot bilong stretim ol samting bilong i go na kisim dispela bikpela kaikai bilong spirit em i redim bilong yumi. Olsem wanem? Yu toktok pinis wantaim bos bilong yu na stretim tok bilong yu ken i go long olgeta tripela de bilong kibung, kirap long Fraide? Yu tingting pinis long kamap long ples kibung long wanpela taim i stret bilong yu ken painim ples sindaun na insait long namba wan singsing na beten? Yu tingting pinis long redim belo kaikai na kisim i go wantaim yu na bai yu ken kaikai long ples kibung wantaim ol bratasista? Long kirap bilong olgeta program, taim siaman i askim yumi long kisim ples sindaun paslain long musik i kirap, yumi mas pinisim kwik toktok bilong yumi na sindaun na wetim program long kirap.
3 Pasin bilong putim gut yau long ol tok i kamap long kibung, dispela tu bai i givim ona long Papa bilong yumi long heven. Bihain long wanpela niusman i lukim wanpela kibung distrik long hap bilong em, em i raitim tok olsem ol man bai i kirap nogut long “gutpela pasin bilong ol man i stap long kibung, ol i stap isi tru na putim gut yau long tok i kamap. Dispela i kamapim klia olsem ol i laikim tru ol samting bilong spirit.” Em i tok tu long “planti pikinini . . . , em olgeta i sindaun gut wantaim o ol i bisi long opim Baibel bilong ol na bihainim tok i kamap.” Taim brata i mekim tok, em i no taim bilong toktok, salim teks mesis, kaikai o wokabaut raun long ples kibung. Ol yangpela i mas sindaun wantaim papamama bilong ol na bai papamama i ken helpim ol long kisim gut ol tok i kamap long kibung. (Lo 31:12; Snd. 29:15) Taim yumi mekim ol dispela samting, dispela bai kamapim klia olsem yumi gat rispek long ol narapela na yumi tenkyu tru long ol nambawan kaikai bilong spirit yumi wok long kisim.
4 Bilas i Soim Rispek: Planti ol i amamas long ol gutpela tok bilong kirapim tingting i bin kamap long wanpela tok bilong kibung distrik long las yia, nem bilong en “Oltaim Kamapim Pasin i Soim Rispek.” Dispela tok i bin kamapim klia olsem yumi ol wokman bilong God i mas was gut na bai klos na bilas bilong yumi i kamapim klia pasin i soim rispek. Long dispela yia gen yumi mas tingim gut dispela samting. Klos na bilas bilong yumi i kamapim klia tingting bilong yumi long Jehova na long dispela gutpela samting yumi holim long i stap olsem ol Witnes bilong em. Olgeta taim yumi mas bilas olsem ol man i “bihainim tok bilong God.”—1 Ti. 2:9, 10.
5 Olsem wanem? Bilas bilong yumi i mas soim rispek long taim yumi stap long kibung tasol? Tingim, planti man bai i lukim yumi pasim kat bilong kibung taim yumi i go i kam long ples kibung long olgeta wan wan de. Klos na bilas bilong yumi i no ken wankain long ol man bilong dispela graun. Olsem na maski yumi malolo o mekim narapela samting bihain long kibung, klos na bilas bilong yumi i mas i stret long Kristen i kam long wanpela kibung Kristen. Ol klos bilong yumi bilong malolo o pilai samting i mas i stret, na klin. Dispela bai mekim bikpela wok long autim tok long ol man i stap klostu! Jehova i save amamas taim bilas bilong yumi i kamapim klia wok yumi mekim olsem ol wokman bilong em.
6 Ol Gutpela Samting i Kamap: Taim yumi mekim pasin i soim rispek long ol kibung bilong yumi, dispela bai i opim rot long autim tok long ol man i stap klostu na ol man i lukim yumi ol bai amamas long yumi. Bihain long wanpela kibung, wanpela man i tok: “I no gat wanpela taim bipo mipela i bin lukim ol manmeri i bihainim gutpela pasin olsem yupela. Yupela i bihainim pasin em God i laik yumi mas mekim.” Taim yumi mekim pasin i soim rispek, dispela i soim olsem yumi rispektim na laikim ol narapela, na dispela i litimapim nem bilong Jehova. (1 Pi. 2:12) Dispela bai soim tu olsem yumi gat pasin bilong pret long God na yumi tenkyu long skul yumi kisim long Papa bilong yumi. (Hi. 12:28) Yumi mas wok strong yet long mekim pasin i soim rispek taim yumi wetim “Bihainim Krais!” Kibung Distrik bilong dispela yia.
[Askim Bilong Stadi]
1. Olsem wanem nem bilong kibung i stret long pasin bilong givim biknem?
2. Olsem wanem pasin bilong yumi long stretim ol samting bilong i stap long olgeta tripela de bilong kibung i givim ona long Jehova?
3. Olsem wanem pasin bilong putim gut yau long ol tok i kamap i givim biknem long lotu yumi mekim?
4. Bilong wanem klos na bilas bilong yumi i mas soim rispek taim yumi stap long kibung?
5. Olsem wanem klos na bilas bilong yumi i mas kamapim pasin i soim rispek long taim yumi malolo o mekim narapela samting bihain long kibung?
6. Wanem ol gutpela samting bai kamap taim yumi mekim pasin i soim rispek?
[Blok long pes 6]
Ol Samting Bilong Kibung Distrik Yumi Mas Tingim
◼ Ol Taim: Program bai kirap long 9:superscription0 a.m. long olgeta tripela de bilong kibung. Taim ol i pilaim musik bilong kirapim program, yumi olgeta i mas sindaun long sia bilong yumi na bai program i kirap long pasin i stret. Program bai pinis long 4:superscription5 p.m. long Fraide, 4:20 p.m. long Sarere, na 3:45 p.m. long Sande.
◼ Ples Bilong Putim Ka: Long olgeta ples em kibung bai kamap long en, bai i gat ples bilong putim ol ka. Ol brata i gat ka i mas pasim kat bilong kibung bambai ol i ken kisim ples bilong putim ka. Ating ples bilong putim ka i no planti olsem na bihainim gut tok bilong atendan.
◼ Ples Sindaun: Yu ken kisim sia bilong ol lain i kam wantaim yu long ka o ol i stap long haus bilong yu.
◼ Kaikai: I gutpela yu bringim kaikai na bai yu no lusim ples kibung long belo bilong i go baim kaikai. Yu ken putim kaikai insait long liklik eski em yu inap putim aninit long sia. No ken bringim ol bikpela eski, glas kontena, na bia samting i go long ples kibung.
◼ Ol Kontribiusen: Ol i tromoi bikpela mani bilong redim kibung distrik. Yumi ken soim amamas bilong yumi long rot bilong givim kontribiusen long Haus Kingdom bilong yumi o long ples kibung bilong helpim ol wok long olgeta hap. Ol kontribiusen yu givim long rot bilong sek long kibung distrik, yu mas raitim “International Bible Students Association” o “IBSA” long en.
◼ Bikpela Bagarap: Sapos wanpela bikpela bagarap samting i kamap insait long ples kibung, toksave long atendan i stap klostu na em bai toksave hariap long Dipatmen Bilong Fest Eid na bai ol lain long dispela dipatmen i ken helpim ol brata i kisim bagarap.
◼ Rekodim Ol Tok: No ken skruim rop bilong rekoda long pawa bilong ples kibung o masin bilong saun. Sapos yu laik rekodim ol tok, orait mekim long pasin i no distebim ol narapela.
◼ Ples Slip: (1) Taim kongrigesen bilong yu i kisim ol fom bilong Dipatmen Bilong Rum Slip, kwiktaim toksave long kuskus sapos yu laik kisim ples slip. (2) No ken makim sampela rum moa em yu no gat wok long en, na no ken kalapim mak bilong haus slip long hamas man i ken slip long wanpela rum. (3) Sapos yu mas rausim nem bilong yu long ples slip, orait kwiktaim yu mas toksave long Dipatmen Bilong Rum Slip. (4) No ken kukim kaikai long ol rum i gat tambu long mekim olsem. (5) Sapos yu stap wantaim ol brata long haus bilong ol, tingim gut ol samting bilong ol, na no ken stap yet bihain long kibung i pinis sapos yu no bin pasim tok wantaim ol paslain long kibung long mekim olsem. Taim yu stap long haus bilong ol brata, em i gutpela pasin long helpim na baim kaikai bilong haus, kukim kaikai, na mekim ol narapela wok bilong haus. (6) Taim yu kamap long ples kibung bilong stretim rum slip bilong yu, na long taim yu stap long ples slip bilong yu, na long taim yu laik lusim ples slip bilong yu bihain long kibung, kamapim ol pasin em spirit bilong God i save kamapim.