Litimapim Nem Bilong Jehova Namel Long Bikpela Lain Manmeri
1 Ol kibung distrik bilong yumi i save kamap long olgeta wan wan yia i opim rot bilong yumi long litimapim nem bilong Jehova. Yumi gat wankain tingting olsem Devit, em i tok: “Bai mi tenkyu long yu namel long planti lain manmeri i bung wantaim. Tru tumas, bai mi litimapim nem bilong yu namel long bikpela lain manmeri.” (Sng. 35:18) Olsem wanpela lain i stap wanbel wantaim, olsem wanem yumi inap litimapim nem bilong Jehova long “Bihainim Tok Bilong God” Kibung Distrik bai kamap long dispela yia?
2 Wanpela rot yumi inap mekim olsem, em pasin bilong yumi. Ol man i bosim wanpela ples ol brata i mekim kibung long en, ol i tok: “Mipela i tokim ol narapela lotu i laik rentim dispela ples long kam na lukim pasin bilong yupela ol Witnes Bilong Jehova long redim wanpela kibung, long wanem, yupela i save stretim gut ol samting.” Long pasin bilong yumi, klos na bilas, na pasin bilong yumi long wok gut wantaim, yumi wan wan i helpim wok bilong litimapim nem bilong God.—1 Pi. 2:12.
3 Klos na Bilas: Yumi mas bihainim pasin i stret long bilas na pasin bilong yumi long mekim gut skin na dispela bai litimapim nem bilong Jehova. (1 Ti. 2:9) Long pes 132 bilong buk Skul Bilong Autim Tok i tok: “Man o meri i gat pasin daun i no laik mekim samting i bagarapim bel bilong ol narapela, na em i no laik pulim ai bilong ol man.” Long planti hap, planti manmeri i save werim ol klos i no stret. Tasol Jehova i amamas long yumi wok strong long werim klos i stret. (Ap. 15:14) Maski kibung i kamap long ples bilong pilai spot samting, dispela bung i kamap olsem wanpela bikpela kongrigesen taim “bikpela lain manmeri” i bung long dispela 3-pela de. Olsem na taim yumi bung olsem long ai bilong Jehova, yumi mas bilas long pasin i litimapim nem bilong Jehova, em Nambawan Bikpela Man bilong heven na graun.—1 Sto. 29:11.
4 Yumi mas tingim tu bilas yumi pasim bihain long ol wan wan de bilong kibung. Long taim yumi raun long stua o haus kaikai samting em i bikpela samting olsem ol klos na bilas yumi putim i mas makim olsem yumi man bilong “bihainim tok bilong God.” (1 Ti. 2:10) Yumi no ken bihainim pasin bilong ol man bilong graun long bilas. (1 Jo. 2:16, 17) Ol buk na nius bilong yumi i gat ol piksa bilong ol man na meri i pasim ol gutpela klos i stret long wanem wanem samting ol i mekim. Taim yumi pasim kat bilong kibung long taim yumi raun long taun em kibung i kamap long en, dispela bai kirapim yumi long tingim olsem yumi stap Kristen long olgeta taim.—2 Ko. 6:3, 4.
5 Tingim Gut Kaikai Bilong Spirit Jehova i Redim: Bikpela King bilong heven na graun i redim bikpela kaikai bilong yumi. (Ais. 25:6; 1 Ko. 10:21) Sapos yumi tingim gut kaikai bilong spirit Jehova i redim, bai yumi putim mak long i go long ol 3-pela de bilong kibung. Olsem wanem? Yu stretim rot pinis bilong painim ples slip, trenspot, na long kisim sampela de malolo long wok skin bilong yu? Yu makim haptaim pinis bilong redim ol samting bambai yu ken kamap long ples kibung paslain long program i kirap na bai yu inap kisim ples sindaun, na toktok wantaim ol bratasista, na insait long singsing na beten bilong litimapim nem bilong Jehova?—Sng. 147:1.
6 Pasin bilong tingim gut kaikai bilong spirit Jehova i redim bai kirapim yumi long putim gut yau long taim bilong kibung na abrusim pasin bilong toktok nating wantaim ol narapela, o kaikai, o wokabaut raun nating long ples kibung. Long rot bilong wokboi i gat gutpela tingting, Jehova i redim ol kaikai bilong spirit em yumi mas kisim long nau. (Mt. 24:45) Yumi laik kisim olgeta kaikai bilong spirit ol i redim. Ol papamama i mas sindaun wantaim ol pikinini bilong ol na helpim ol long kisim gut ol tok i kamap long kibung.—Lo 31:12.
7 I gutpela yu bringim kaikai na bai yu no lusim ples kibung long belo bilong i go baim kaikai. Mipela i amamas long lukim olsem long kibung long las yia ol bratasista i bihainim gut dispela tok. Em bai i gutpela sapos long dispela yia olgeta i mekim olsem tu! (Hi. 13:17) Dispela bai opim rot bilong yumi long bung na toktok wantaim ol bratasista bilong yumi na bai yumi olgeta i stap wanbel na dispela bai litimapim nem bilong Jehova.—Sng. 133:1.
8 Autim Tok Long Kain Kain Taim na Ples: Taim yumi go kam long kibung long PMV samting, o yumi stap long haus kaikai, o yumi toktok wantaim ol wanblut, yumi gat rot bilong autim tok na litimapim nem bilong Jehova. (Hi. 13:15) Bel na tingting bilong yumi bai i pulap tru long planti gutpela tok em yumi kisim long kibung. I gutpela yumi tokim ol man yumi bungim long ol dispela gutpela tok.—1 Pi. 3:15.
9 Yumi amamas long wetim dispela taim bai yumi litimapim nem bilong Jehova “namel long ol manmeri i bung bilong lotu.” (Sng. 26:12) Yumi i ken wanbel wantaim long litimapim nem bilong Jehova long “Bihainim Tok Bilong God” Kibung Distrik.
[Askim Bilong Stadi]
1, 2. Kibung distrik i opim rot bilong yumi long mekim wanem? Long wanem rot yumi ken mekim olsem?
3, 4. Olsem wanem pasin daun bai helpim yumi long bilas long pasin i stret long Kristen long taim bilong kibung na bihain long kibung?
5, 6. Olsem wanem yumi ken soim olsem yumi tingim ol kaikai bilong spirit em Jehova i redim?
7. Long samting bilong kaikai, ol i kirapim yumi long mekim wanem? Bilong wanem yumi mas mekim olsem?
8, 9. I gat wanem narapela rot yumi ken litimapim nem bilong Jehova long taim bilong kibung?
[Blok long pes 8]
Sampela Samting Bilong Kibung Distrik Yumi Mas Tingim
◼ Ol Taim: Program bai kirap long 9:00 a.m. long ol tripela de bilong kibung. Yupela i ken kam long ples bilong kibung long 8:00 a.m. Sampela minit paslain long program i kirap, siaman bai sindaun long pletfom long taim ol i pilaim musik bilong kirapim program. Long dispela taim yumi olgeta i mas sindaun long sia bilong yumi na bai program i kirap long pasin i stret. Program bai pinis long 4:25 p.m. long Fraide, 4:40 p.m. long Sarere, na 3:40 p.m. long Sande.
◼ Ples Bilong Putim Ka: Long olgeta ples em kibung bai kamap long en, bai i gat ples bilong putim ol ka. I no gat wok long baim. Ol brata i gat ka i mas pasim kat bilong kibung bambai ol i ken kisim ples bilong putim ka. Ating ples bilong putim ka bai i no planti, olsem na i no gutpela long wanpela o tupela man tasol i kam long wan wan ka.
◼ Ples Sindaun: Yu ken kisim sia bilong ol lain i kam wantaim yu long ka o ol i stap long wankain haus olsem yu.
◼ Ol Kontribiusen: Ol i tromoi bikpela mani bilong redim kibung distrik. Yumi ken soim amamas bilong yumi long rot bilong givim kontribiusen long Haus Kingdom bilong yumi o long ples kibung bilong helpim wok long olgeta hap. Ol kontribiusen yu givim long rot bilong sek long kibung distrik, yu mas raitim “International Bible Students Association” o “I.B.S.A.” long en.
◼ Kaikai: I gutpela yu bringim kaikai na bai yu no ken lusim ples kibung long belo bilong i go baim kaikai. Yu ken putim kaikai insait long liklik eski na bai yu inap putim aninit long sia. No ken bringim ol bikpela eski o ol kontena ol i wokim long glas na bia samting i go long ples kibung.
◼ Redio Kaset Samting: No ken skruim redio kaset samting long pawa bilong ples kibung o masin bilong saun. Taim yu mas mekim wok long ol dispela samting, yu mas mekim tasol long pasin i no pulim ai o tingting bilong ol narapela.
◼ Kamera: Sapos yu laik kisim piksa, no ken mekim wok long lait bilong kamera long taim ol tok bilong program i kamap.
◼ Mobail Fon: Yu mas stretim ol mobail fon samting pastaim na bai yu no pulim ai na tingting bilong ol narapela.
◼ Bikpela Bagarap: Sapos wanpela bikpela bagarap samting i kamap insait long ples kibung, toksave long ol atendan na kwiktaim ol i ken toksave long Dipatmen Bilong Fest Eid na bai ol lain long dispela dipatmen i ken helpim ol brata i kisim bagarap. Ol bai singautim ambiulens, sapos i stret long mekim olsem.
◼ Ples Slip: (1) Taim kongrigesen bilong yu i kisim ol fom long Dipatmen Bilong Rum Slip, kwiktaim yu mas toksave long kuskus sapos yu laik kisim ples slip. (2) Yu no ken makim sampela rum moa em yu no gat wok long en, na no ken kalapim mak bilong haus slip long hamas man i ken slip long wanpela rum. (3) Sapos yu mas rausim nem bilong yu long ples slip, orait kwiktaim yu mas toksave long Dipatmen Bilong Rum Slip. (4) Yu no ken kukim kaikai long ol rum i gat tambu long mekim. (5) Sapos yu stap wantaim ol brata, no ken mekim nabaut long ol samting. (6) Taim yu toktok wantaim ol wokman long ples slip bilong yu, bihainim ol gutpela pasin em spirit bilong God i save kamapim, na mekim moa yet long taim ol i wok long stretim ol samting bilong ol lain i kam bilong kisim rum na long taim bilong lusim dispela ples.