Yu Redi Long Kisim Bikpela Kaikai Bilong Spirit?
1. Ol i save mekim wanem ol samting bilong redim bikpela kaikai?
1 I gat planti wok em ol man i mas mekim bilong redim bikpela kaikai. Ol i baim ol kaikai, redim gut kaikai, na putim long ol dis. Na ol i mas makim ol man bilong skelim kaikai long ol narapela. Na tu, ol i mas redim ples we ol man bai sindaun na kaikai long en. Ol man ol i bin singautim i kam, ol tu i mas redi, na moa yet sapos ol i kam long wanpela longwe ples. Maski i gat planti wok ol i mas mekim, pasin bilong sindaun wantaim ol pren na famili na kisim gutpela kaikai, dispela em i gutpela samting tru. Klostu nau, yumi bai bung wantaim long ol bikpela bung na ol liklik bung bilong kisim gutpela kaikai bilong spirit yumi bin wetim—em “Was i Stap!” Kibung Distrik. Ol i bin mekim bikpela wok pinis bilong redim program na ol samting bilong kibung. Ol i singautim yumi olgeta long i go long en. Bilong i stap long kibung na kisim ol gutpela helpim, yumi tu i mas redim yumi yet.—Snd. 21:5.
2. Yumi mas mekim wanem na bai yumi ken i stap long olgeta de bilong kibung distrik?
2 Kisim Gutpela Helpim: Yu bin redim pinis ol samting bilong yu ken i stap long olgeta de bilong dispela kibung? Sapos yu mas mekim, orait toktok wantaim bos bilong yu olsem yu bai go long kibung na stap long en kirap long namba wan de. Yu stretim pinis ol samting bilong trenspot na ples slip? Ol elda i mas painimaut sapos ol lapun, ol bratasista i gat bikpela sik o bagarap long skin, na ol narapela husat i mas kisim helpim, i gat lain bilong helpim ol.—Jer. 23:4; Ga. 6:10.
3. Yumi mas mekim wanem na bai yumi redi taim program i kirap long olgeta wan wan de?
3 Long olgeta wan wan de, redi long kamap hariap long ples kibung na kisim ples sindaun paslain long program i kirap. Sampela minit paslain long program i kirap, lukim het tok bilong ol tok long program pepa. Dispela bai helpim yu long redim bel bilong yu long ol tok bai kamap. (Esr. 7:10) Taim siaman bilong program i toksave olsem ol bai pilaim musik, orait sindaun na harim gut musik na redi long insait long namba wan singsing na beten.
4. Olsem wanem famili bilong yumi inap kisim gutpela helpim long program?
4 Sapos ol famili i sindaun wantaim long taim bilong kibung, orait ol papamama inap helpim ol pikinini long putim gut yau long ol tok i kamap. (Lo 31:12) I gutpela long olgeta i opim Baibel bilong ol na bihainim taim brata i ritim ol skripsa. Pasin bilong raitim ol sotpela tok inap helpim yu long putim gut yau. Bihain, ol tok yu raitim bai helpim yu long tingim ol bikpela poin bilong ol tok. Sakim pasin bilong toktok nating nating long taim bilong program na pasin bilong lusim nating sia na i go wokabaut. Sapos yu gat mobail fon, no ken larim dispela i pulim tingting bilong yu o bilong ol narapela long taim bilong program. Bihain long pinis bilong program long olgeta de, i gutpela long yu toktok wantaim ol arapela long ol samting bilong program em yu yet i bin amamas long en.
5. Wanem wanpela gutpela samting tru bilong ol kibung bilong yumi? Olsem wanem yumi inap kisim bikpela amamas tru long en?
5 Long kibung distrik, yumi gat rot long amamas long gutpela pasin pren tru i stap namel long yumi ol bratasista, em kain pasin i no stap long dispela graun. (Sng. 133:1-3; Mk. 10:29, 30) Long taim bilong belo, i gutpela yu sekan na toktok wantaim ol lain i sindaun klostu long yu. Yu inap mekim olsem sapos yu bringim liklik lans i kam na stap long ples kibung long taim bilong belo, na yu no go long stua samting bilong painim kaikai na dring. Taim rot i op bilong strongim narapela narapela, givim bel long mekim olsem.—Ro. 1:11, 12.
6. Long taim bilong kibung, bilong wanem yumi mas pasim ol klos i stret?
6 Klos: Jehova i tokim ol Israel long pasim ol sotpela string long arere bilong klos bilong ol na antap long ol dispela string ol i mas putim wanpela blupela string. (Nam. 15:37-41) Dispela i kirapim ol long tingim olsem ol i lain i save lotuim Jehova. Long nau, taim yumi pasim ol klos i stret long kibung, dispela i mekim na yumi stap narapela kain long ol man bilong dispela graun. Dispela i litimapim nem bilong God taim ol man i lukim yumi maski yumi stap long stua o long maket bihain long program. Olsem na tingim gut ol klos yu bai pasim.
7. Olsem wanem yumi ken autim tok long ol narapela taim yumi stap long taun em kibung i kamap long en?
7 Autim Tok: Sapos yumi tingting gut pastaim, yumi inap autim tok long ol manmeri long taun em kibung i kamap long en. Wanpela brata wantaim meri bilong em ol i go long haus kaikai bihain long kibung na em i askim man bilong bringim kaikai olsem: “Yu lukim planti man i pasim dispela kain kat, a?” Dispela man i tok em i bin luksave planti i pasim dispela kat na em i tingting bilong wanem ol man i werim wankain kat. Dispela i opim rot na tupela i toktok gut wantaim, na brata i singautim dispela man i kam long kibung.
8. Olsem wanem yumi inap kamapim tenkyu bilong yumi long Jehova, em Man i singautim yumi long dispela bikpela kaikai?
8 Maski ol brata i mekim ol tok, ol inteviu, na ol soim, Man i kamapim dispela bikpela kaikai bilong spirit, em Papa bilong yumi long heven, Jehova. (Ais. 65:13, 14) Taim yumi stap long olgeta wan wan de bilong kibung na kisim gut ol tok, yumi kamapim klia olsem yumi tenkyu long Man i singautim yumi long dispela bikpela kaikai. Yu redim pinis ol samting bilong mekim olsem?
[Blok long pes 4]
Ol Samting Bilong Kibung Distrik Yumi Mas Tingim
◼ Ol Taim: Program bai kirap long 9:00 a.m. long olgeta tripela de bilong kibung. Taim ol i toksave long musik bai kirap, yumi olgeta i mas sindaun long sia bilong yumi na bai program i ken kirap long pasin i stret. Program bai pinis long 4:15 p.m. long Friday, 4:40 p.m. long Sarere na 3:40 p.m. long Sande.
◼ Ples Bilong Putim Ka: Long olgeta ples em kibung bai kamap long en, bai i gat ples bilong putim ka. Ol brata i gat ka i mas pasim kat bilong kibung bambai ol i ken kisim ples bilong putim ka. Ating ples bilong putim ka i no planti, olsem na bihainim gut tok bilong ol atendan.
◼ Ples Sindaun: Yu ken kisim sia bilong ol lain i kam wantaim yu long ka o ol i stap long haus bilong yu.
◼ Belo Kaikai: I gutpela yu bringim kaikai na bai yu no lusim ples kibung long belo bilong i go baim kaikai. Yu ken putim kaikai insait long liklik eski em yu inap putim aninit long sia. No ken bringim ol bikpela eski, glas kontena, na bia samting i go long ples kibung.
◼ Ol Kontribiusen: Yumi ken soim amamas bilong yumi long bikpela wok ol i mekim bilong redim kibung, long rot bilong givim kontribiusen long Haus Kingdom bilong yumi o long ples kibung bilong helpim ol wok long olgeta hap. Ol kontribiusen yu givim long rot bilong sek long kibung distrik, yu mas raitim “International Bible Students Association” o “IBSA” long en.
◼ Bikpela Bagarap: Sapos wanpela bikpela bagarap samting i kamap insait long ples kibung, toksave hariap long atendan, na em bai toksave long Dipatmen Bilong Fest Eid na bai ol lain long dispela dipatmen i ken helpim man i kisim bagarap.
◼ Ples Slip: (1) Taim kongrigesen bilong yu i kisim ol fom bilong Dipatmen Bilong Rum Slip, kwiktaim toksave long kuskus sapos yu laik kisim ples slip. (2) No ken makim sampela ples slip moa em yu no gat wok long en, na no ken kalapim mak bilong haus slip long hamas man i ken slip long wanpela rum. (3) Sapos yu mas rausim nem bilong yu long ples slip, orait kwiktaim toksave long Dipatmen Bilong Rum Slip. (4) No ken kukim kaikai long ol rum i gat tambu long mekim olsem. (5) Sapos yu stap wantaim ol brata long haus bilong ol, tingim gut ol samting bilong ol, no ken stap yet bihain long kibung i pinis sapos yu no bin pasim tok wantaim ol paslain long kibung long mekim olsem. Taim yu stap long haus bilong ol brata, em i gutpela pasin long helpim ol long baim kaikai bilong haus, kukim kaikai, na mekim narapela wok bilong haus. (6) Kamapim ol pasin em spirit bilong God i save kamapim taim yu kamap long ples kibung bilong stretim ples slip bilong yu, taim yu stap long ples slip bilong yu, na long taim yu laik lusim ples slip bilong yu bihain long kibung.