Lain i Go Bikpela Tru
LONG ol kantri i gat ol Witnes Bilong Jehova i stap long en, nau ol gavman i luksave olsem ol Witnes i no laik daunim wok politik bilong ol. Wanpela nius bilong Rasia (Krasnoyarskiy Komsomolets) em i stori long ol kibung i bin kamap long mun Julai samting long 1991, na em i tok: “Nau planti man i save tru, ol lain bilong Jehova ol i no save bagarapim sindaun bilong ol manmeri.”
Narapela nius bilong Rasia tu (Vostochno-Sibirskaya Pravda) i mekim wankain tok olsem: “Lain bilong ol Witnes Bilong Jehova i givim bel tru long lotu tasol, olsem na ol i no insait long wanpela lain politik na ol i no save kirapim lain bilong ol long insait long wanpela lain politik samting, tasol ol i givim bel tru long bihainim ol tok bilong Baibel na ol i givim bel long Man i as bilong ol tok bilong en, em God Jehova.”
Wok i Kirap Long Bipo Yet
Inap planti yia bipo ol Witnes Bilong Jehova i wok strong long autim tok bilong Baibel long ol hap bilong Isten Yurop. Long 1938 samting, i gat inap olsem 2 tausen Witnes i stap long Romenia, na wan tausen long Polan, na inap olsem planti handet long Sekoslovakia na Hangari. Long hap bilong Yugoslavia i gat wan wan tasol. Maski i gat liklik lain ol Witnes long dispela traipela hap bilong Rasia, ol dispela samting i senis wantu tasol.
Wanpela saveman i save long pasin bilong ol Rasia (Walter Kolarz), long buk bilong em (Religion in the Soviet Union) em i tok, ol narapela Witnes i kam insait long Rasia taim “Rasia i kisim sampela kantri moa long yia 1939 i go inap 1940. Long ol dispela kantri i gat liklik lain Witnes Bilong Jehova, tasol ol i wok strong.” Olsem na wantu ol Witnes i stap long ol hap is bilong Polan na Sekoslovakia na Romenia, ol i insait long hap bilong Rasia, long wanem, Rasia i kisim kantri bilong ol!
Ol Witnes Bilong Jehova i kamap long Rasia long narapela kain rot taim ol i stap long ol banis kalabus nogut bilong Jemani. Wanem samting i kamap na ol i stap long ol dispela banis kalabus nogut? Taim Namba 2 Pait i kamap, sampela Rasia i bin stap long ol banis kalabus nogut long Jemani wantaim planti tausen ol Witnes bilong Jemani. Ol dispela Witnes i kalabus long wanem, ol i no laik insait long ami. (Jon 17:16; 18:36) Ol i save sapos ol i insait long ami bilong Hitler na kilim i dai ol man, ol i brukim lo bilong God na bai ol i gat asua long blut bilong ol narapela Kristen long narapela kantri o long blut bilong ol narapela man, olsem na ol i ting mobeta ol i stap gut long God, maski ol i lusim laip bilong ol.—1 Jon 3:10-12.
Dispela man Kolarz i tok moa: ‘Long rot bilong ol banis kalabus nogut bilong Jemani, sampela Rasia i bin harim tok bilong ol Witnes Bilong Jehova na ol i amamas long pasin na strongpela bilip bilong ol Witnes, olsem na taim ol dispela man i lusim kalabus na go bek long Rasia ol i karim dispela tok bilong ol Witnes i go wantaim ol.’ Long banis kalabus nogut bilong ol meri (Ravensbrück), planti ol yangpela Rasia ol i bilip long tok bilong Baibel ol Witnes Bilong Jehova i autim long ol.
Taim pait i pinis, ol kalabusman bilong ol kantri long Isten Yurop ol i bin kamap Witnes Bilong Jehova ol i go bek long as ples bilong ol. Na long ples ol i autim strong tok olsem Kingdom bilong God tasol i rot bilong kisim gutpela sindaun. Olsem na namba bilong ol Witnes long Isten Yurop i go bikpela wantu tasol. Long Epril 1946, i gat olsem 4 tausen manmeri i autim tok long hap bilong Rasia, na kwiktaim dispela namba i go bikpela olsem 8 tausen samting. Long mun Septemba 1946, ol Witnes long Romenia i mekim wanpela kibung long Bukares na inap olsem 15,000 manmeri i bin kam long dispela kibung.
Bihain long dispela, pasin birua i kirap namel long Is na Wes, na dispela i pasim rot bilong ol long raun na long toktok samting, olsem na ol Witnes tu i no gat rot bilong bung wantaim. I no dispela tasol, ol nupela gavman bilong Isten Yurop i kirap birua long ol Witnes Bilong Jehova. Ol i ting wok bilong ol Witnes bai bagarapim wok bilong gavman bilong ol, olsem na ol i putim planti Witnes long kalabus. Maski dispela samting i kamap, long 1951 i gat 3,705 strongpela Witnes long Sekoslovakia, na 2,583 long Hangari, na 617 long Yugoslavia, na winim 15,000 long Polan.
Pasin Birua i Kamap, Tasol Wok i Go Bikpela Yet
Long 1967, wanpela man, em Maurice Hindus, i raitim wanpela buk (The Kremlin’s Human Dilemma) i stori long ol Witnes Bilong Jehova. Tok em i bin kamapim long dispela buk i makim stret ol samting i kamap long ol Witnes long hap bilong Rasia na long ol narapela hap bilong Isten Yurop. Em i tok: “Ol i mekim wok bilong ol long pasin hait, tasol gavman i wok long painim painim ol na kalabusim ol. Tasol dispela samting i no pasim wok bilong ol. Maski ol i kalabus long wanpela hap, wok bilong ol i kirap long narapela hap . . . i luk olsem i no gat wanpela samting inap pasim wok bilong ol.”
Bikpela hevi tru i bin painim ol Witnes Bilong Jehova long Rasia long yia 1951. Winim 7 tausen bilong ol Witnes long Rasia na ol narapela hap bilong en i go kalabus long ol banis kalabus long ol longwe hap. Sampela i go long Saibiria na sampela long Vorkuta long hap not bilong Rasia. I gat wanem samting i kamap long dispela?
Dispela man Kolarz i tok moa olsem: “Dispela samting i no pasim wok bilong ol ‘Witnes’ long Rasia, bikpela wok moa bilong autim tok i kirap nau. Ol i autim bilip bilong ol taim ol i go i stap long ol banis kalabus. Gavman i salim ol i go kalabus na dispela i opim rot bilong ol long kamapim bilip bilong ol long ol narapela hap.”
Insait na Ausait Long Ol Ples Kalabus
Long taim bilong ol aposel ol man i bin mekim pasin nogut tru long ol Kristen, tasol ol i no lusim wok bilong ol long autim tok, na ol Witnes Bilong Jehova long Rasia i gat wankain tingting. (Aposel 5:42) Wanpela meri Latvia (Helene Celmina), gavman i tok em i bin mekim sampela rong na ol i kalabusim em long banis kalabus Potma. Em i bin i stap long en long 1962 i go inap long 1966, na i gat 350 kalabusmeri i stap. Dispela meri i tok: ‘Sampela bilong ol dispela 350 meri em ol Witnes Bilong Jehova.’ Long buk bilong em (Women in Soviet Prisons), em i raitim stori bilong ol samting em i lukim i kamap insait long dispela banis kalabus, olsem:
“Oltaim ol i kisim ol nius na buk samting i kam long Bruklin . . . I no gat wanpela man i ken save, olsem wanem na ol dispela nius em gavman i bin tambuim ol i kam long Amerika, long wanem dispela banis kalabus i gat ol strongpela banis i gat waia na ol narapela manmeri i no save kam raun long dispela hap. Planti Witnes Bilong Jehova i kisim kalabus inap 10-pela yia, long wanem, ol i bin holim sampela nius Wastaua long haus bilong ol, olsem na lain i bosim ples kalabus i tingting planti taim ol i save dispela ol nius samting i kam insait long banis kalabus.”
Jehova i helpim ol na i no gat wanpela samting inap pasim ol long kisim dispela kaikai bilong spirit! Dispela meri (Celmina) i tok moa: ‘I no gat wanpela man i save, olsem wanem dispela nius [Wastaua] i kamap insait long banis kalabus nogut. Long wanem, taim polis i mekim kot long ol, polis i rausim laplap bilong ol kalabusman na sekim ol, nogut ol i holim sampela samting i tambu. Na tu, taim ol i bringim ol i go long banis kalabus bilong ol, wankain samting i kamap gen—polis i sekim ol. Na tu, polis i sekim gut switkes bilong ol. I no gat wanpela man ol i no save long em, em inap i kam nating long banis kalabus—i mas i gat gutpela as na bai ol i larim em i kam insait. Taim ol kalabus i wok long gaden samting, i gat planti polis ol i holim gan na i was long ol na bai narapela man i no ken kam klostu long kalabusman. Long apinun taim ol i kam bek long banis kalabus ol polis i sekim ol gen. Maski polis i mekim ol dispela samting, ol nius i kam long Bruklin i kamap long ol kalabus Witnes.’
Long dispela taim ol strongpela Kristen em ol i stap ausait long ol dispela banis kalabus bilong Rasia ol i wok strong long autim tok na skulim ol man. Yumi save ol i mekim olsem, long wanem, ol narapela man i bin wokim ol nius na piksa wokabaut samting bilong bagarapim wok bilong ol. Olsem: Long 1978, ol i wokim wanpela buk (The Truths About Jehovah’s Witnesses) na long ol tok i go pas long dispela buk ol i tok, wok bilong dispela buk em bilong ‘lainim ol man i bihainim dispela lotu long kisim tingting olsem i no gat God.’
Man i raitim dispela buk (V. V. Konik) em i tok, ol Witnes Bilong Jehova i save mekim ol pablik-tok long taim wanpela bilong ol i dai na long taim tupela Witnes i marit. Em i tok, ‘Long Ogas 1973, long wanpela liklik ples (Krasnaya Polyana) marit bilong tupela Witnes i kamap na 500 samting manmeri i bin go long en. I gat 6-pela pasto bilong ol Witnes i givim tok long tupela na ol tok bilong ol i kamap long tupela bikmaus. Bihain wanpela pilai bilong Baibel i kamap na dispela i lainim ol Witnes Bilong Jehova long olsem wanem ol i ken toktok wantaim ol man bilong narapela lotu na toktok wantaim ol man i no bilip long God.’
Tru tumas, maski gavman i tambuim wok bilong ol Witnes Bilong Jehova long ol hap bilong Isten Yurop, ol i bihainim tok bilong Jisas na ol i wok strong long autim gutnius bilong Kingdom bilong God. (Matyu 24:14) Long Me na Jun 1989, gavman i larim ol Witnes Bilong Jehova bilong Polan na Hangari i mekim wok bilong ol long ples klia. Gavman bilong Romenia i mekim olsem tu long Epril 1990 na long Rasia long Mas 1991 na long Balgeria long Julai 1991. Na wok bilong ol long Sekoslovakia ol inap mekim long ples klia, no gat tambu moa.
Ol Manmeri i Amamas Long Mekim Kibung
Yumi stori pinis long ol dispela samting na nau ating yu save bilong wanem ol manmeri i go long ol kibung long Isten Yurop i amamas nogut tru—ol i krai na narapela i holimpas narapela na ol i paitim han na tromoi han long narapela narapela long stediam ol i kibung long en.
Ol i makim ol kibung long Budapes na Prak na Sagreb olsem “kibung intenesenel” na ol i mekim bikpela wok bilong stretim ples slip bilong planti tausen tausen manmeri ol bai kam long ol narapela narapela kantri. Long Rasia ol i mekim kibung long 7-pela biktaun na inap olsem 74,252 manmeri i bung; long Polan i gat 131,554 manmeri i bung long 12-pela kibung bilong ol; na long Romenia i gat 34,808 i bung long 8-pela kibung bilong ol. Ol Witnes long Balgeria i no inap mekim kibung long hap bilong ol, tasol 3 handet samting manmeri i brukim boda na ol i kam long kibung long hap bilong Tesalonaika, long kantri Grik. Ol i amamas long harim ol tok long tok ples bilong ol yet.
Bilong redim ol dispela bikpela kibung long Isten Yurop, i gat bikpela wok tru ol Witnes i mas mekim. Bilong wanem em i bikpela wok? Long wanem, bipo ol i no bin mekim tru wanpela bikpela kibung kain olsem dispela long hap bilong Rasia! Long Budapes na Sagreb ol i mas redim ples slip samting bilong planti tausen tausen manmeri, olsem na dispela i bikpela wok tru. Na tu, pait i laik kamap long Sagreb na long sampela hap ol bom samting i pairap, tasol ol Witnes i no tingim dispela samting, ol i redim ol samting bilong kibung!
Ating bai yu amamas tru long kaunim stori bilong ol dispela kibung i bin kamap long stori i kamap bihain.
[Ol Mep long pes 7]
(Bilong save ol dispela rait i stap we long pes, lukim buk o magasin)
OL HAP EM 3-PELA KIBUNG INTENESENEL I BIN KAMAP LONG EN NA 7-PELA BIKTAUN OL I MEKIM KIBUNG LONG EN LONG HAP BILONG RASIA
RASIA
TALIN
KIEV
LEVOV
SERNAFSI
ODESA
POLAN
JEMANI
SEKOSLOVAKIA
PRAK
OSTRIA
HANGARI
BUDAPES
ROMENIA
YUGOSLAVIA
SAGREB
BALGERIA
ALBENIA
ITALI
GRIK
TURKI
[Mep]
RASIA
ALMA-ATA
USOLI-SIBIRSKOI