Mi Kisim Save Long Tok i Tru Bilong Baibel Long Romenia

EM STORI BILONG GOLDIE ROMOCEAN

MAMA i karim mi long Mas 3, 1903, long liklik ples Ortelek long hap not-wes bilong Romenia, klostu long taun Salau. Mipela i stap long naispela ples tru. I gat klinpela wara na win. Mipela i gat gaden kaikai na mipela i no sot long wanpela samting bilong skin. Taim mi yangpela yet, gutaim i stap long dispela kantri.

Ol manmeri i save givim bel tru long lotu. Famili bilong mi i insait long 3-pela kain lotu. Bubu meri bilong mi em i Otodoks Katolik, na narapela bubu meri em i Adventis, na papamama bilong mi ol i Baptis. Mi no wanbel long ol dispela lotu, olsem na famili bilong mi i tok mi bai kamap wanpela meri i bilip olsem i no gat God i stap. Mi save ting olsem, ‘Sapos i gat wanpela God tasol, orait i mas i gat wanpela lotu tasol​—⁠tripela insait long wanpela famili, nogat.’

I gat sampela samting insait long ol lotu mi no amamas long en. Olsem: Pris i save go long ol haus bilong kisim takis bilong misin. Taim man i no gat mani bilong givim, pris i save kisim nating nambawan gutpela blanket bilong em ol i bin wokim long gras bilong sipsip. Insait long haus lotu Katolik, mi lukim bubu meri i brukim skru na beten long ai bilong wanpela piksa bilong Maria. Mi ting, ‘Bilong wanem em i beten long wanpela piksa?’

Taim Bilong Hevi

Long 1912, Papa i go long Yunaitet Stets bilong kisim wok mani bambai em i ken bekim wanpela dinau. I no longtaim na pait i kirap, na ol man i lusim ples bilong mipela na kamap soldia​—⁠ol meri pikinini na lapun man tasol ol i stap. Kantri Hangari i kirap bosim ples bilong mipela inap sotpela taim, tasol bihain ol soldia bilong Romenia i kam bek na kisim bek dispela ples. Ol i tokim mipela long lusim kwik dispela ples na i go. Famili bilong mi i hariap bungim kago na ol liklik pikinini i go insait long wanpela karis em bulmakau i save pulim​—⁠ol i mekim hariap hariap na ol i lusim tingting long mi, na mi stap. Yu mas save olsem, mi namba wan bilong 5-pela pikinini.

Mi ran i go long haus bilong wanpela lapun, em tu em i stap, na em i tok: “Go bek long haus. Lokim ol dua, na yu no ken larim wanpela man i kam insait.” Mi hariap bihainim tok bilong em. Mi kaikai kabis na sup kakaruk em famili i bin lusim i stap, na mi brukim skru klostu long bet na mi beten. Bihain liklik mi slip i dai.

Taim mi kirap long slip, san i kamap pinis, na mi tok: “Tenkyu God! Mi stap laip!” Long nait ol man i bin wok long sut long gan na ol banis bilong haus i gat planti liklik hul long en, em ol katres i bin mekim. Taim mama i kamap long narapela ples na em i save olsem mi no stap, em i salim wanpela yangpela man, em George Romocean, i kam painim mi na em i kisim mi i go bek long ol. I no longtaim na mipela inap go bek na sindaun gen long as ples bilong mipela.

Mi Gat Laik Long Kisim Tok i Tru Bilong Baibel

Mama bilong mi i laik bai mi kisim baptais olsem wanpela Baptis, tasol mi no laik mekim olsem, long wanem, mi no inap bilip olsem gutpela God bai kukim ol man long bikpaia inap oltaim oltaim. Mama i laik stretim tingting bilong mi, na em i tok: “Sapos ol i man nogut.” Tasol mi bekim tok: “Sapos ol i man nogut, orait, kilim ol i dai, tasol no ken givim pen long ol. Maski em dok o pusi, i no gat wanpela samting mi inap givim pen long en.”

Mi tingim bek wanpela de mi gat 14 krismas, na Mama i tokim mi long kisim ol bulmakau i go kaikai long wanpela hap. Taim mi slip i stap long gras klostu long wara i gat planti diwai i stap klostu, mi lukluk i go antap, na mi tok: “God, mi save yu stap; tasol mi no laikim ol dispela lotu. Yu mas i gat wanpela gutpela lotu.”

Mi bilip olsem God i bin harim beten bilong mi, long wanem, sampela mun bihain, long taim bilong san long 1917, tupela Sumatin Bilong Baibel (em nem bilong ol Witnes Bilong Jehova long bipo) ol i kam long ples bilong mipela. Ol i kolpota, olsem man bilong autim tok oltaim, na ol i kam long haus lotu bilong ol Baptis taim ol i mekim lotu.

Planti Man Long Romenia i Kisim Tok i Tru Bilong Baibel

Sampela yia paslain long dispela, olsem long 1911, Carol Szabo na Josif Kiss, em ol i bin kamap ol Sumatin Bilong Baibel long Yunaitet Stets, ol i lusim dispela kantri na i go bek long Romenia bilong ol i ken autim ol tok i tru bilong Baibel. Ol i sindaun long Tirgu-Mures, longwe long ples bilong mipela inap olsem 160 kilomita, long hap saut-is. Insait long sampela yia tasol, planti handet manmeri ol i kirap long bilipim tok bilong Kingdom na kisim wok Kristen.​—⁠Matyu 24:⁠14.

Taim tupela yangpela Sumatin Bilong Baibel i kam long haus lotu Baptis long ples Ortelek, George Romocean, maski em i gat 18 krismas tasol, em i mekim lotu na i wok long kamapim insait bilong ol tok bilong Rom 12:⁠1. Nau wanpela kolpota i kirap sanap na i tok: “Ol brata na ol pren, aposel Pol i laik tokim yumi long wanem samting?”

Man! Mi amamas tru long harim em i tok olsem. Mi ting, ‘Tupela man hia i gat save long kamapim insait bilong ol tok bilong Baibel.’ Tasol klostu olgeta man i singaut strong olsem: “Ol profet giaman! Mipela i save yupela husat!” Nau bikpela kros i kamap. Orait nau papa bilong George i kirap sanap na i tok: ‘Yupela olgeta, sarap! Yupela i wanem kain man? Sapos tupela man hia i gat samting bilong tokim yumi long en na yupela i no laik harim, orait, ol i ken kam long haus bilong mi. Husat i laik kam, ol i ken kam.’

Mi amamas na ran i go bek long haus na tokim Mama long samting i bin kamap. Mi wanpela bilong ol dispela man i bin go long haus bilong famili Romocean. Long nait mi amamas tru long kisim save olsem Baibel i no tok hel em i wanpela ples paia, na long Baibel Romenia bilong mi yet mi lukim nem bilong God, Jehova! Ol kolpota i stretim rot bilong wanpela Sumatin Bilong Baibel i ken kam long haus bilong ol Romocean long olgeta Sande na lainim mipela. Long yia bihain, taim mi gat 15 krismas, mi kisim baptais bilong makim olsem mi dediket pinis long Jehova.

Bihain, klostu olgeta bilong famili Prodan, wantaim famili Romocean, i kisim tok i tru bilong Baibel na dediketim laip bilong ol long Jehova. Planti narapela long ples, ol tu i mekim olsem, wantaim tupela yangpela marit em haus bilong ol i bin stap olsem haus lotu bilong ol Baptis. Bihain, ol i wokim dispela haus i kamap wanpela ples bilong ol Sumatin Bilong Baibel i ken bung long en na stadi. Kwiktaim tok i tru bilong Baibel i go kamap long ol ples i stap klostu, na long 1920 i gat 1,800 pablisa bilong Kingdom long Romenia!

Mi Go Long Yunaitet Stets

Mipela i gat bikpela laik long helpim papa bilong mi, Peter Prodan, long kisim save long ol samting mipela i lainim pinis. Tasol taim mipela i no kirap yet long raitim pas, mipela i kisim pas long em i tokaut olsem em i kamap wanpela wokman bilong Jehova i baptais pinis. Em i bin stadi wantaim ol Sumatin Bilong Baibel long Akron, Ohaio, na em i laik bai mipela olgeta i kam stap wantaim em long Yunaitet Stets. Tasol Mama i no laik tru long lusim Romenia. Olsem na long 1921, mi mekim wok long mani Papa i bin salim i kam long mi, na mi go stap wantaim em long Akron. George Romocean na bikbrata bilong em ol i bin kamap long Yunaitet Stets long yia i go pinis.

Taim sip i kamap long ailan Elis, Nu Yok, bikman bilong imigresen em i no save long pasin bilong kolim nem bilong mi, Aurelia, long tok Inglis, olsem na em i tok: “Nem bilong yu, Goldie.” Na mi holim yet dispela nem. Bihain liklik, long Me 1, 1921, mi wantaim George Romocean i marit. Wanpela yia samting bihain long dispela, Papa i go bek long Romenia na long 1925 em i bringim liklik susa bilong mi, Mary, i kam bek long Akron. Bihain Papa i go bek gen long Romenia bambai em i ken i stap wantaim Mama na ol narapela bilong famili.

Wok Bilong Mipela Long Amerika

George em i wanpela gutpela wokman bilong Jehova i givim bel tru long em. Namel long yia 1922 i go inap 1932, mipela i kamapim 4-pela naispela pikinini meri​—⁠Esther, Anne, Goldie Elizabeth, na Irene. Wanpela kongrigesen Romenia i kamap long Akron, na pastaim ol i mekim ol miting long haus bilong mipela. Bihain, long olgeta 6-pela 6-pela mun, nambawan ofis bilong ol Sumatin Bilong Baibel long Bruklin, Nu Yok, ol i salim wanpela brata i kam lukim kongrigesen na em i stap long haus bilong mipela.

Long planti Sande, mipela i save autim tok long de olgeta. Mipela i pulimapim Baibel na ol buk long paus, redim kaikai, putim ol pikinini long ka ol i kolim Model T Fot, na autim tok long hap bilong bus. Long nait, mipela i save go long Stadi Wastaua. Ol pikinini bilong mipela ol i kirap long laikim tru wok bilong autim tok. Long 1931, mi stap long Kolambas, Ohaio, taim ol Sumatin Bilong Baibel i kisim nupela nem, ol Witnes Bilong Jehova.

Ol i Stretim Mi

Sampela yia bihain, mi kros long Joseph F. Rutherford, em presiden bilong Was Taua Sosaiti long dispela taim. Wanpela nupela Witnes i pilim olsem Brata Rutherford i no bin mekim stretpela kot long em, olsem em i no bin harim gut hevi bilong em. Mi pilim olsem dispela samting Brata Rutherford i mekim em i no stret. Olsem na long wanpela Sande, sista bilong mi, Mary, wantaim man bilong em, Dan Pestrui, ol i kam lukim mipela. Taim mipela i kaikai pinis, Dan i tok: “Orait, yumi mas redi nau long go long miting.”

Mi tok: “Mipela i no save go moa long ol miting. Mipela i kros long Brata Rutherford.”

Long baksait bilong em Dan i pasim tupela han na em i wokabaut i go i kam, na nau em i tok: “Taim yu no baptais yet, yu save long Brata Rutherford?”

Mi bekim tok: “Nogat. Yu save pinis olsem mi bin kisim baptais long Romenia.”

Em i askim mi: “Bilong wanem yu kisim baptais?”

Mi bekim tok: “Long wanem, mi bin kisim save olsem Jehova em i trupela God, na mi laik dediketim laip bilong mi long em.”

Em i tok: “No ken lusim tingting long dispela samting! Sapos Brata Rutherford i lusim tok i tru, yu tu bai lusim?”

Mi tok: “Nogat, Nogat!” Tok bilong em i mekim na mi kisim bek stretpela tingting, na mi tok: “Orait, yupela olgeta, kirap na redi long go long miting.” Na mipela i save go yet long ol miting. Mi tenkyu tru long Jehova olsem tambu bilong mi i bin mekim pasin sori na stretim mi.

Long Taim Bilong Bikpela Hevi Bilong Mani

Long Taim Bilong Bikpela Hevi Bilong Mani na Ol Wok Bisnis long yia 1930 samting, mipela i gat hevi. Wanpela de George i kam bek long haus na em i bel hevi; em i tokim mi olsem ol i bin pinisim em long wok long faktori raba. Mi tok: “No ken wari, Papa bilong yumi long heven em i gat planti samting, na em i no ken lusim yumi.”

Long dispela de stret, George i bungim wanpela pren i holim wanpela bikpela basket em ol talinga i pulap long en. Taim George i kisim save olsem pren bilong em i bin kisim we, em i kam bek long haus wantaim planti talinga. Orait nau em i lusim laspela 3-pela dola bilong mipela long baim ol liklik basket bilong putim ol talinga insait long en. Mi tokim em: “Watpo yu mekim kain wok olsem long dispela mani​—⁠ol liklik pikinini bilong yumi i mas i gat susu.”

Em i bekim tok olsem: “Yu no ken tingting planti. Mekim olsem mi tokim yu.” Inap long sampela wik bihain, i gat wanpela liklik faktori long haus bilong mipela​—⁠mipela i wok long klinim ol talinga na putim ol i go long ol basket. Mipela i save bringim ol i go long ol nambawan gutpela haus kaikai na ol i baim, na winmani mipela i kisim i olsem 30 i go inap 40 dola long wanpela wanpela de​—⁠dispela em i bikpela mani tru long mipela long dispela taim bipo. Dispela fama i bin orait long mipela i ken kisim ol talinga long hap graun bilong em, em i tok, insait long 25 yia em i bin i stap long dispela hap, em nambawan taim em i bin lukim planti talinga olsem. I no longtaim na faktori raba i singautim George i go bek long wok.

Holimpas Bilip Bilong Mipela

Long 1943, mipela i go sindaun long Los Enjeles, Kalifonia, na 4-pela yia bihain mipela i go sindaun long Elsino. Mipela i kamapim wanpela stua long dispela hap, na olgeta long famili i wok long en, narapela i senisim narapela na mekim wok. Long dispela taim, Elsino em i wanpela liklik taun i gat 2,000 manmeri long en, na mipela i mas raun inap 30 kilomita long i go long ol miting Kristen long narapela taun. Mi amamas tru taim wanpela liklik kongrigesen i kamap long Elsino long 1950! Nau i gat 13 kongrigesen long dispela hap.

Long 1950, pikinini meri bilong mipela, Goldie Elizabeth (planti man i save long narapela nem bilong em, Beth) em i winim Wastaua Baibel Skul Bilong Gileat long Saut Lansing, Nu Yok, na em i kisim wok misineri long Veneswela. Long 1955, laspela pikinini meri bilong mipela, Irene, em i amamas ol i bin singautim man bilong em long mekim wok olsem wasman bilong raun long wok sekit. Long 1961, bihain long taim tupela i go long Skul Bilong Wok Kingdom long Saut Lansing, Nu Yok, ol i salim tupela i go long Tailan. Sampela taim mi krai, long wanem, mi sori mi no lukim ol pikinini meri bilong mi, tasol bihain mi ting, ‘Samting ol i mekim, em samting mi gat laik pinis long ol i mekim.’ Olsem na mi kirap kwik na kisim paus i gat ol buk na Baibel long en na mi go autim tok. Olgeta taim mi kam bek long haus, mi amamas.

Long 1966, gutpela man bilong mi, George, em i kisim sik strok. Beth i bin lusim Veneswela na i kam bek long mipela, long wanem, em i sik liklik, olsem na em i helpim mi long lukautim em. Long yia bihain, George i dai, na samting i bin mekim gut bel bilong mi i olsem: em i bin stap gut long Jehova na kisim pinis prais bilong em long heven. Bihain Beth i go long Spen, long wanem, ol i sot long man bilong autim tok bilong Kingdom long dispela hap. Namba wan pikinini meri bilong mi, Esther, em i kisim sik kensa na em i dai long 1977, na long 1984, sik lukimia i kilim Anne i dai. Tupela i bin stap gut long Jehova kirap long taim ol i yangpela yet inap long taim tupela i dai.

Taim Anne i dai, Beth tupela Irene i stap pinis​—⁠ol i bin lusim longwe kantri ol i bin autim tok long en na ol i kam bek. Ol i bin helpim mi long lukautim tupela susa bilong ol, na mipela olgeta i krai sori moa yet long ol. Bihain liklik, mi tokim tupela pikinini bilong mi: “Orait, em inap! Yumi bin mekim gut bel bilong ol narapela long rot bilong ol gutpela tok promis bilong Baibel. Orait nau bel bilong yumi i mas i stap gut. Satan i laik tekewe amamas bilong yumi long mekim wok bilong Jehova, tasol yumi no ken larim em i mekim olsem.”

Famili Long Romenia i Stap Gut Long God

Long 1970, mi wantaim liklik susa bilong mi, Mary, mipela i go long Romenia bilong lukim famili bilong mipela. Wanpela susa i dai pinis, tasol mipela inap go lukim brata bilong mipela, em John, na susa bilong mipela, em Lodovica, ol i stap yet long ples Ortelek. Taim mipela i kamap long Romenia, Papa na Mama i no stap moa, ol i dai pinis. Ol i bin stap gut long Jehova inap long taim ol i dai. Planti man i tokim mipela olsem Papa i bin stap olsem wanpela strongpela pos insait long kongrigesen. Sampela pikinini bilong ol tumbuna pikinini bilong em long Romenia, ol tu ol i Witnes. Na tu, mipela i bin go lukim planti wanblut bilong man bilong mi, em ol i bin stap gut long tok i tru bilong Baibel.

Long 1970, Romenia i stap aninit long hatpela gavman Komyunis em Nicolae Ceauşescu i bosim, na ol Witnes Bilong Jehova i kisim nogut tru. Flore, pikinini man bilong brata bilong mi John, wantaim sampela narapela wanblut bilong mi, ol i bin stap planti yia long ol banis kalabus nogut, long wanem, ol i Kristen, na wankain hevi i bin painim Gabor Romocean, kasen brata bilong man bilong mi. Olsem na taim ol i givim sampela pas long mipela bilong kisim i go long hetkota bilong ol Witnes Bilong Jehova long Nu Yok, ol Witnes Romenia ol i tok ol i no inap i stap isi inap long taim ol i harim tok olsem mipela i lusim kantri na i stap gut!

Taim mipela i kisim save olsem ol visa bilong mipela i no gat strong moa, mipela i go long ofis bilong gavman long Ortelek. Em Fraide long apinun, na i gat wanpela man tasol i stap mekim wok. Taim em i kisim save olsem mipela i bin go lukim husat, na pikinini man bilong brata bilong mi i bin stap long banis kalabus nogut, em i tok: “Yupela ol meri, hariap lusim dispela ples!”

Susa i tok: “Tasol nau tren i no ran.”

Em i tok strong: “Maski tren i no ran. Kisim bas. Kisim tren. Kisim teksi. Wokabaut long lek. Hariap lusim dispela ples​—⁠no ken lusim taim!”

Taim mipela i laik lusim ofis, em i singautim mipela i kam bek na em i toksave olsem wanpela tren bilong ami bai lusim dispela ples long 6 klok apinun. Man! Em gutpela samting tru! Long ol narapela kain tren, ol i save skelim paspot samting planti planti taim, tasol long dispela tren, i gat ol soldia tasol na mitupela i stap, olsem na i no gat wanpela man i kam lukim paspot bilong mipela. Ating ol i tingim olsem mipela i bubu bilong sampela soldia hia.

Mipela i kamap long Timiswara long moningtaim, na wanpela pren bilong wanpela wanblut i helpim mipela long kisim ol visa. Long de bihain mipela i lusim kantri. Taim mipela i kamap pinis long Amerika, mipela i wok long tingim ol gutpela brata sista Kristen bilong mipela long Romenia em ol i stap gut long God.

Long ol yia i kamap bihain long mipela i bin go long Romenia, mipela i no harim planti stori long wok bilong autim tok long dispela kantri. Tasol mipela i bilip strong olsem ol brata sista Kristen bilong mipela ol bai stap gut long God, maski wanem wanem samting bai painim ol. Na tru tumas, ol i bin mekim olsem! Mipela i amamas tru long kisim save olsem, long Epril 1990, gavman i orait long ol Witnes Bilong Jehova i stap olsem wanpela oganaisesen lotu long Romenia. Long yia bihain, mipela i amamas long harim stori bilong ol kibung ol i bin mekim long Romenia. Winim 34,000 manmeri i bin go long ol kibung long 8-pela biktaun, na 2,260 i kisim baptais! Long nau, winim 35,000 i save autim tok long Romenia, na long yia i go pinis, inap 86,034 i bung long Memorial bilong tingim i dai bilong Krais.

Tok i Tru i Stap Yet Olsem Wanpela Gutpela Samting Tru Long Mi

Inap long sampela yia, mi lusim pasin bilong kisim bret na wain long taim bilong Memorial. Mi lukim sampela strongpela brata ol i no kisim, na mi ting olsem: ‘Ol dispela man ol i save gut long pasin bilong toktok, olsem na watpo Jehova i givim gutpela wok long mi long kamap wanlain bilong Pikinini bilong em long heven?’ Tasol taim mi no kisim bret na wain, mi save tingting planti. I olsem mi sakim wanpela gutpela samting. Mi stadi gut na beten, na mi kirap long kisim gen bret na wain. Mi belgut gen na amamas, na mi stap yet olsem.

Long nau mi no inap lukim gut rait, olsem na olgeta de mi save harim ol tok bilong Baibel na nius Wastaua na Kirap! long kaset. Na mi save insait yet long wok autim tok. Long olgeta wan wan mun mi save tilim 60 i go inap 100 nius, tasol long Epril i go pinis, taim mipela i mekim bikpela wok bilong tilim Kirap!, mi tilim 323. Tupela pikinini meri bilong mi i helpim mi na mi inap insait long Skul Bilong Wok Autim Tok. Mi amamas olsem mi inap wok yet long strongim bel bilong ol narapela. Klostu olgeta brata sista long Haus Kingdom ol i save kolim mi Bubu.

Mi tingting bek long ol 79 yia mi bin mekim wok bilong Jehova, na mi tok tenkyu long em long olgeta wan wan de em i bin larim mi long save long gutpela tok i tru bilong em na long mekim wok long laip bilong mi bilong mekim wok bilong em. Mi amamas tru olsem mi bin lukim truim bilong ol gutpela tok profet bilong Baibel i tok olsem long dispela taim bilong las de, God bai wok long bungim ol man i gat pasin olsem sipsip.​—⁠Aisaia 60:22; Sekaraia 8:​23.

[Piksa long pes 23]

Susa bilong mi, Mary, na Papa, ol i sanap, na mi, George, na tupela pikinini bilong mipela, Esther na Anne

[Piksa long pes 24]

Mi wantaim tupela pikinini bilong mi, Beth na Irene, na man bilong Irene, na tupela pikinini man bilong ol, em ol i stap gut long mekim wok bilong Jehova