Stori Bilong Wanpela Man

I No Gat Wanpela Samting i Winim Dispela Amamas!

Em Stori Bilong Reginald Wallwork

“I no gat wanpela samting bilong dispela graun i winim ol amamas mipela i bin kisim long mekim wok bilong Jehova olsem ol misineri fultaim!” Dispela liklik rait mi painim long wanpela hap pepa namel long ol buk, na pas samting bilong meri bilong mi bihain liklik long taim em i dai long Me 1994.

TAIM mi tingim tok bilong Irene, mi tingim bek dispela 37 gutpela yia bilong amamas mipela i bin kisim taim mipela i mekim wok misineri long Peru. Mipela i bin amamas long mekim wok Kristen wantaim, kirap long taim mipela i marit long Disemba 1942​—⁠na em i gutpela hap bilong kirapim stori bilong mi.

Irene i go bikpela olsem wanpela Witnes Bilong Jehova long Liverpool, Inglan. Em i gat 2-pela susa, na papa bilong em i dai long taim bilong Namba Wan Pait. Mama bilong em i maritim Winton Fraser, na ol i gat wanpela pikinini man, Sidney. Paslain liklik long taim bilong Namba Tu Pait, famili i go sindaun long Bangor, long North Wales, em ples we Irene i bin kisim baptais long 1939. Long yia paslain, Sidney i bin kisim baptais, olsem na em na Irene i mekim wok painia wantaim​—⁠ol man bilong autim tok fultaim​—⁠long not kos bilong Wales, kirap long Bangor i go long Caernarvon, na ailan Anglesey tu.

Long dispela taim, mi stap long Kongrigesen Runcorn, em olsem 20 kilomita long saut-is bilong Liverpool, na mi mekim wok nau ol i kolim wasman siaman. Long wanpela kibung sekit Irene i kam askim mi sapos em inap kisim sampela teritori bilong autim tok, long wanem em bai go i stap wantaim susa bilong em Vera, husat i marit na stap long Runcorn. Mitupela i amamas long save long narapela narapela long dispela 2-pela wik em i bin stap wantaim mipela, na bihain mi go lukim em planti taim liklik long Bangor. Long wanpela wiken mi bin askim Irene long maritim mi na mi bin amamas tru taim em i tok yes!

Long Sande taim mi go bek long Runcorn, kwiktaim mi kirap long redim ol samting bilong marit, tasol long Tunde mi kisim wanpela telegram. Em i tok: “Mi laik tok sori olsem dispela telegram bai mekim yu bel hevi. Mi senisim tingting long marit. Pas bai kam bihain.” Mi kirap nogut. Wanem hevi i kamap?

Long de bihain mi kisim pas bilong Irene. Em i tokim mi olsem em bai go long Horsforth long Yorkshire bilong mekim wok painia wantaim Hilda Padgett.a Em i tok olsem long 12-pela mun paslain em i bin tok orait long i go mekim wok autim tok long wanem hap i sot long ol man bilong autim tok sapos ol i askim em long mekim olsem. Em i tok: “Dispela i olsem tok promis bilong mi long Jehova, na mi pilim olsem mi mas truim dispela promis, long wanem, mi bin tok promis long Jehova paslain long mi save long yu.” Tru, mi bel hevi tasol mi amamas long pasin bilong em long bihainim promis em i mekim na mi salim bekim bilong mi: “Yu go. Bai mi wetim yu.”

Taim em i stap long Yorkshire, kot i makim Irene long kalabus 3-pela mun, long wanem, em i no laik sapotim woa. Tasol 18 mun bihain, long Disemba 1942, mitupela i marit.

I Stap Bilong Mi Long Bipo

Long 1919 mama bilong mi i baim ol buk Studies in the Scriptures.b Mama i no bin ritim wanpela buk bipo olsem papa bilong mi i bin tok stret long dispela taim, tasol em i strong long stadim ol dispela buk wantaim Baibel bilong em. Em i mekim olsem na em i bin kisim baptais long 1920.

Papa bilong mi i no hatpela man na em i no pasim mama long ol samting em i laik mekim, olsem mekim bikpela long 4-pela pikinini bilong ol​—⁠tupela susa bilong mi, Gwen na Ivy; brata bilong mi Alec; na mi​—⁠long rot bilong tok i tru. Stanley Rogers na sampela ol narapela gutpela Witnes long Liverpool i kam long Runcorn bilong mekim ol tok bilong Baibel, na i no longtaim wanpela nupela kongrigesen i kamap. Famili bilong mipela na kongrigesen i kamap strong long ol samting bilong spirit.

Gwen i bin skul long konfemesen bilong Sios Bilong Inglan, tasol em i bin lusim taim em wantaim mama i kirap stadi long Baibel. Taim pris i kam lukim mipela bilong save watpo Gwen i no go moa long klas bilong em, Gwen i tromoi planti askim long em na em i no inap bekim. Gwen i askim em long mining bilong Beten Bilong Bikpela tasol em i no inap kamapim, olsem na Gwen i kirap kamapim insait bilong en! Em i kolim tok bilong 1 Korin 10:​21, na em i kamapim klia olsem em i no inap ‘kaikai long tupela tebol.’ Taim pris i lusim haus bilong mipela em i tok olsem em bai beten long Gwen na kam bek bilong bekim ol askim bilong em, tasol em i no bin mekim olsem. Kwiktaim bihain long Gwen i kisim baptais, em i mekim wok autim tok fultaim.

Kongrigesen bilong mipela i bin stap gutpela piksa long tingim tru ol yangpela. Mi tingim taim mi gat 7-pela krismas na mi harim tok wanpela elda i kam mekim long kongrigesen bilong mipela. Bihain em i kam toktok long mi. Mi tokim em olsem mi bin ritim stori bilong Abraham na em i mekim wanem bilong traim givim pikinini bilong em Aisak olsem ofa. Em i tok: “Go long kona bilong pletfom na stori long mi.” Mi bin amamas tru long sanap na mekim nambawan “pablik-tok” bilong mi!

Mi bin kisim baptais taim mi gat 15 krismas long 1931, mama bilong mi i bin dai long dispela yia na mi lusim skul na mekim wok olsem aprentis elektrisen. Long 1936 ol i save pilaim ol tok bilong Baibel long pikap na ol man i save harim, na wanpela lapun sista i kirapim mi na brata bilong mi long insait long dispela wok bilong autim tok. Olsem na mitupela Alec i go long Liverpool bilong baim wanpela baiskol na mipela i askim ol long wokim wanpela kain bokis i gat wil long en bilong karim masin pikap bilong mipela na baiskol inap pulim. Ol i putim spika antap long wanpela kain paip, longpela bilong en 2-pela mita, em yu inap mekim i go longpela o sotpela na ol i pasim long bokis. Mekenik i tokim mipela olsem em i no bin wokim kain samting olsem bipo, tasol samting i wok gut! Mipela givim bel long autim tok long teritori bilong mipela, na mipela amamas long tok sista i bin mekim bilong kirapim mipela long mekim dispela wok na mipela amamas long dispela gutpela wok mipela i mekim.

Namba Tu Pait​​—⁠Taim Bilong Traim

Long taim Namba Tu Pait i wok long kam klostu, mi na Stanley Rogers i wok long tokaut long dispela pablik-tok “Face the Facts,” bai kamap long Royal Albert Hall long London, long Septemba 11, 1938. Bihain mi insait long tilim buklet i gat ol tok bilong dispela pablik-tok na buklet Fascism or Freedom, ol i bin wokim long yia bihain. Tupela buklet wantaim i kamapim ples klia laik bilong gavman bilong Hitler long bosim Jemani long hatpela pasin. Planti man long Runcorn nau i save long mi, long wanem, mi save autim tok na ol i rispektim mi long dispela as. Mi bin go pas long ol wok tiokratik long olgeta taim na dispela i mekim na mi redi long mekim ol narapela wok long bihain.

Dispela kampani mi wok long en i kisim kontrak long putim pawa long wanpela nupela haus faktori i stap ausait long taun. Taim mi kisim save olsem em faktori bilong ol samting bilong pait, mi tokaut klia olsem mi no inap wok long hap. Tru, lain mi wok long en i no amamas, tasol bos bilong mi i mekim tok bilong helpim mi, na ol i givim mi narapela wok. Bihain mi kisim save olsem anti bilong bos em wanpela Witnes Bilong Jehova tu.

Wanpela wanwok i bin strongim mi tru taim em i tok: “Reg, mipela i save long as na yu no laik wok long hap, inap planti yia yu bin insait long mekim wok bilong Baibel.” Tasol mi mas was gut, long wanem, planti wanwok bilong mi i laik givim hevi long mi.

Long Jun 1940 kot bilong Liverpool i bin tok orait long mi bihainim maus bilong bel na tokaut olsem mi no laik insait long ami tasol mi mas stap yet long wok bilong mi. Dispela i opim rot bilong mi long mekim yet wok Kristen bilong mi.

Insait Long Fultaim Sevis

Long taim woa i wok long pinis, mi lusim wok mani na joinim Irene long wok autim tok fultaim. Long 1946, mi wokim wanpela haus ka longpela bilong en 5-pela mita, na em i kamap olsem haus bilong mipela. Wanpela yia bihain ol i askim mipela long i go long Alveston, em wanpela liklik ples long Gloucestershire. Mipela i mekim wok long Cirencester, wanpela taun bilong bipo, na long Bath Siti. Long 1951, ol i singautim mi long go lukim ol kongrigesen long hap saut bilong Wales olsem wanpela wasman raun, tasol i no winim tupela yia yet na mipela i go long skul bilong kamap misineri long Wastaua Baibel Skul Bilong Gileat.

Klas namba 21 bilong dispela skul ol i mekim long South Lansing, long New York, na mipela i winim skul long 1953 long kibung New World Society long New York City. Mitupela Irene i no save bai mipela i mekim wok long wanem kantri inap long de bilong gretiuesen bilong mipela. Mipela i bin amamas tru taim mipela i save bai mipela i go long Peru. Bilong wanem mipela i amamas? Long wanem, liklik brata bilong Irene, Sidney Fraser na meri bilong em Margaret i bin mekim wok long brens-ofis long Lima winim wanpela yia bihain long taim ol i winim namba 19 klas bilong Gileat!

Mipela i wok long Brooklyn Betel inap sotpela taim liklik taim mipela i wok long wetim visa bilong mipela, na i no longtaim mipela i go long Lima. Callao em namba wan bilong ol 10-pela misineri asainmen bilong mipela, em taun we planti sip i save kam sua long en long Peru, long hap wes bilong Lima. Maski mipela i bin lainim sampela tok long tok ples Spen, mitupela Irene i no inap stori wantaim ol man long dispela tok ples. Bai mipela mekim wok bilong mipela olsem wanem?

Ol Hevi na Blesing Bilong Wok Autim Tok

Long Gileat ol i skulim mipela olsem, mama i no save lainim pikinini bilong em long wanpela tok ples. Nogat. Pikinini i save lainim tok ples taim mama i toktok long em. Olsem na tok ol i givim long mipela em: “No ken lusim taim, kirap na go autim tok long ol man na bai yupela lainim tok ples bilong ol. Ol bai helpim yupela.” Taim mi wok strong long winim dispela hevi bilong kisim save long dispela tok ples, mi kirap nogut olsem insait long tupela wik bihain long mipela i kamap long dispela kantri ol i makim mi long mekim wok wasman siaman bilong kongrigesen Callao! Mi go lukim Sidney Fraser, tasol em i mekim wankain tok olsem ol i mekim long Gileat​—⁠bung wantaim kongrigesen na ol manmeri long teritori bilong yu. Na mi strong long bihainim dispela tok.

Long wanpela Sarere long moningtaim, mi bungim wanpela kamda long woksop bilong em. Em i tok: “Mi mas pinisim wok bilong mi tasol plis sindaun na stori long mi.” Mi tokim em olsem mi bai mekim, tasol i gat wanpela samting mi laik em i mekim: “Taim mi popaia, plis stretim mi. Bai mi no inap belhevi.” Em i lap na tok em bai mekim olsem. Mi go lukim em tupela taim long olgeta wik na mi kisim save olsem dispela em i gutpela rot bilong kisim save long nupela tok ples bilong mi, olsem ol i bin tokim mi long en.

Long Ica, em namba tu misineri asainmen bilong mipela, wankain samting i kamap, mi bungim narapela kamda na mi stori long em long pasin mi bihainim long Callao. Em amamas long helpim mi, olsem na tok Spen bilong mi i wok long kamap gutpela, tasol 3-pela yia i lus paslain long mi save gut long dispela tok ples. Planti taim dispela man i save bisi, tasol mi stadi long em long rot bilong ritim ol tok bilong Baibel na kamapim ol mining bilong en long em. Long wanpela wik taim mi go long lukim em, bos bilong em i tokim mi olsem em i painim nupela wok long Lima na em i go. Sampela taim bihain taim mitupela Irene i go long wanpela kibung long Lima, mi bungim gen dispela man. Mi amamas tru long save olsem em i painim sampela Witnes long Lima bilong mekim yet stadi bilong em, na em wantaim famili bilong em ol i kamap wokman bilong Jehova i dediket pinis!

Long wanpela kongrigesen, mipela i kisim save olsem wanpela yangpela man na meri i bin kisim baptais maski tupela i stap wantaim na ol i no marit. Taim mipela i stori wantaim ol long ol stiatok bilong Baibel long dispela samting, ol i laik stretim marit bilong tupela, bambai ol inap winim mak bilong kamap ol Witnes i baptais pinis. Olsem na mi stretim rot long kisim ol i go long haus kaunsil bilong rejistaim marit bilong ol. Tasol wanpela hevi i kamap, ol i gat 4-pela pikinini em ol i no rejistaim, na dispela em wanpela lo bilong gavman. Mipela i tingting bai Bikman bilong taun i mekim wanem samting? Bikman i tok: “Dispela gutpela lain, ol pren bilong yutupela, ol Witnes Bilong Jehova i kirapim yutupela long stretim marit bilong yutupela long lo bilong gavman, olsem na bai mi no ken givim ol kot pepa long yutupela long wanem yutupela i no bin rejistaim ol pikinini bilong yutupela, na bai mi rejistaim ol long lo bilong gavman, no gat pe.” Mipela i tenkyu tru, long wanem dispela famili i stap rabis na sapos ol i askim ol long baim kot, dispela bai putim bikpela hevi long ol!

Bihain, Albert D. Schroeder bilong hetkota bilong ol Witnes Bilong Jehova long Brooklyn i kam lukim mipela na em i tok olsem ol bai wokim wanpela nupela haus misineri long narapela hap bilong Lima. Olsem na mitupela Irene wantaim tupela sista, Frances na Elizabeth Good bilong Amerika, na tupela marit bilong Kanada mipela i go long distrik bilong San Borja. Tupela o tripela yia bihain mipela kisim narapela blesing​—⁠nupela kongrigesen i kamap.

Mipela i bung wantaim kongrigesen bilong Huancayo i gat 80 Witnes long en na mipela i mekim wok long hap. Huancayo i stap antap olsem 3,000 mita long sentral hailans. Long dispela hap mi bin insait long wok bilong sanapim namba tu Haus Kingdom long dispela kantri. Ol i makim mi olsem mausman bilong ol Witnes Bilong Jehova long kot, long wanem 3-pela taim mipela i mas kot bilong stretim tok bilong graun mipela i bin baim pinis olsem dispela em graun bilong mipela. Kain samting olsem mipela i bin mekim long kot na dispela bikpela wok bilong autim tok, em planti gutpela misineri long ol dispela taim bipo i bin mekim, i mekim na yumi lukim namba bilong ol Witnes i go antap long Peru​—⁠long 1953 i gat 283 Witnes, long nau i go antap winim 83,000.

Mipela i Sori Long Lusim Ol

Mipela i bin amamas long poroman wantaim ol wanwok misineri long ol haus misineri, na planti taim mi bin stap olsem wasman bilong lukautim haus misineri. Long olgeta Mande long moningtaim, mipela i save toktok long ol wok bai mipela i mekim long wik i kam, na bilong makim wanem wok mipela wan wan bai mekim bilong lukautim haus misineri. Nambawan samting mipela olgeta i tingim em wok bilong autim tok, na mipela olgeta i bin wok gut wantaim. Mi amamas long tok olsem mi no tingim wanpela taim mipela i gat bikpela hevi i kamap long ol haus misineri mipela i bin stap long en.

Laspela asainmen bilong mipela em long Breña, narapela hap ausait liklik long Lima. I gat 70 Witnes long kongrigesen Breña, em kongrigesen i gat pasin bilong laikim ol narapela, em i go bikpela winim 100, na narapela kongrigesen i kamap long Palominia. Em long dispela taim sik i painim Irene. Pastaim mi luksave olsem long sampela taim em i no inap tingim ol samting em i toktok long en, na long sampela taim em i hatwok long tingim rot bilong i go bek long haus. Maski em i go lukim ol gutpela dokta, isi isi sik i wok long daunim em.

Sori tru, long 1990 mi stretim rot bilong mitupela long i go bek long Inglan, susa bilong mi Ivy i amamas long larim mipela i stap wantaim em long haus bilong em. Fopela yia bihain taim Irene i gat 81 krismas em i dai. Mi mekim yet fultaim sevis, mi mekim wok elda long wanpela bilong ol 3-pela kongrigesen i stap long taun mi bin i go bikpela long en. Long wan wan taim, mi go long Manchester long strongim wanpela grup i stap long hap i mekim tok ples Spen.

I no longtaim i go pinis mi kisim wanpela gutpela ekspiriens i bin kirap planti yia i go pinis taim mi pilaim masin pikap i mekim tok bilong Baibel inap 5-pela minit. Mi inap tingim yet wanpela yangpela skul meri i sanap baksait long mama bilong em klostu long dua, na i wok long harim tok.

Bihain dispela yangpela meri i go sindaun long Kanada, na wanpela poroman bilong em husat i stap yet long Runcorn na i kamap wanpela Witnes, i save raitim pas long meri ya. I no longtaim i go pinis dispela meri i raitim pas i tok olsem tupela Witnes i bin autim tok long em na ol i mekim sampela tok i kirapim em long tingim ol tok em i bin harim long masin pikap. Em i kisim save olsem dispela em tok i tru, na nau em i kamap wanpela wokmeri bilong Jehova i dediket pinis na em i tokim Witnes long Runcorn long tok tenkyu long dispela yangpela man i bin kam long haus bilong mama bilong em winim 60 yia i go pinis! Tru tumas, yumi no save olsem wanem pikinini kaikai bilong tok tru bai kru na kamap bikpela.​—⁠Saveman 11:⁠6.

Yes, taim mi lukluk i go bek long laip bilong mi, mi amamas tru olsem mi bin mekim gutpela wok bilong Jehova long ol dispela yia bilong laip bilong mi. Long dispela taim mi dediket long Jehova long 1931, mi no bin lusim wanpela kibung bilong lain bilong Jehova. Tru, mitupela Irene i no gat ol pikinini bilong mitupela yet, tasol mi amamas mi gat winim 150 ol pikinini man na pikinini meri bilong spirit, na olgeta i mekim wok bilong Papa bilong yumi long heven, Jehova. Olsem gutpela meri bilong mi i tok, i no gat wanpela samting i winim amamas mipela i kisim long ol gutpela wok bilong Jehova mipela i mekim.

[Ol Futnot]

[Piksa long pes 24]

Mama, long kirap bilong 1900 samting

[Piksa long pes 24, 25]

Han kais: Hilda Padgett, mi, Irene, na Joyce Rowley long Leeds, England, 1940

[Piksa long pes 25]

Antap: Irene na mi long ai bilong haus ka bilong mipela

[Piksa long pes 27]

Tokaut long wanpela pablik-tok long ai bilong ol man long Cardiff, Wales, 1952