Stori Bilong Wanpela Meri

Liklik Pepa i Kamapim Bikpela Senis Long Laip Bilong Mi

Em stori bilong Irene Hochstenbach

Dispela samting i kamap long wanpela Tunde apinun long 1972. Mi gat 16 krismas na mi go wantaim papamama bilong mi long wanpela bung bilong lotu long Eindhoven, em wanpela biktaun long provins bilong Brabant, long Netelan. Mi no stap bel isi na mi ting i gutpela mi stap long narapela hap. Long dispela taim tupela yangpela meri i givim wanpela liklik pepa long mi i gat dispela tok: “Yes Irene, mipela i laik helpim yu.” Mi no save olsem dispela tok bai kamapim bikpela senis long laip bilong mi. Tasol paslain long mi stori long wanem samting i kamap bihain, mi laik stori long ol samting bilong mi wantaim famili bilong mi.

MAMA i karim mi long ailan Belitung, long Indonisia. Mi tingim krai bilong sampela ol samting i stap long dispela ailan​—⁠krai bilong diwai pam i meknais long win, liklik pairap bilong wara i stap klostu, lap bilong ol pikinini i pilai arere long haus, na krai bilong musik i stap insait long haus. Long 1960, taim mi gat 4-pela krismas, famili bilong mipela i lusim Indonisia na i go long Netelan. Mipela go long dispela longwe ples long sip, na krai bilong wanpela samting mi save tingim moa yet em bilong wanpela doli i gat kundu em mi laikim tru na mi bin kisim i go wantaim mi. Taim mi gat 7-pela krismas, mi bin i gat wanpela sik na dispela i mekim na mi kamap yaupas na kirap long dispela taim mi no inap harim krai bilong wanpela samting. Ol samting mi bin harim bipo, em ol dispela samting tasol mi inap tingim yet.

Stap Yaupas na i Go Bikpela

Papamama i mekim gut tru long mi, olsem na pastaim mi no tingim tumas ol hevi bilong mi long i stap olsem wanpela yaupas. Mi liklik pikinini, olsem na mi ting samting bilong helpim mi long harim gut tok i olsem samting bilong pilai long en, na mi ting em i no helpim mi tumas. Bilong toktok wantaim mi, ol pikinini i save stap klostu long mi i save mekim wok long sok na raitim ol stori long ol hap simen, na mi bekim tok bilong ol, maski mi no inap harim nek bilong mi yet.

Taim mi wok long kamap bikpela, mi kisim save olsem mi narapela kain long ol manmeri i stap klostu long mi. Mi luksave tu olsem sampela manmeri i tok pilai long mi, long wanem, mi yaupas, na ol narapela i no laik bai mi bung wantaim ol. Mi kirap long pilim olsem mi stap wanpis. Nau mi kirap long tingim i stap bilong ol yaupas, na taim mi wok long go bikpela, mi wok long pret moa long ol samting bilong ol manmeri em ol inap harim toktok.

Bilong stretim rot bilong mi long go long wanpela skul bilong ol yaupas, papamama bilong mi i lusim liklik ples long provins Limburg na i go long biktaun Eindhoven. Long dispela hap, papa bilong mi i painim wok, na brata na ol susa bilong mi ol i go long skul i nupela long ol. Mi amamas long ol i mekim olgeta dispela senis bilong helpim mi tasol. Long skul, ol i lainim mi long apim na daunim nek bilong mi na kolim klia moa ol tok. Na maski ol tisa i no wokim tok ples bilong ol yaupas long han, ol wanklas bilong mi i lainim mi long wokim han.

Stap Bilong Mi Yet

Taim mi kamap bikpela, papamama bilong mi i traim hat long toktok wantaim mi, tasol i gat planti samting mi no klia long en. Olsem: Mi no save olsem papamama bilong mi i wok long stadi long Baibel wantaim ol Witnes Bilong Jehova. Tasol mi tingim wanpela de famili bilong mipela i bin go long wanpela hap em planti manmeri i sindaun long ol sia. Olgeta i lukluk i go long poret, sampela taim ol i paitim han, na bihain ol i sanap​—⁠tasol as na ol i mekim olsem, em mi no save. Bihain tru, mi kisim save olsem mi bin go long wanpela kibung bilong ol Witnes Bilong Jehova. Papamama bilong mi i save kisim mi i go long wanpela liklik haus bung long biktaun bilong Eindhoven. Mi pilim olsem em gutpela, long wanem, olgeta i mekim gutpela pasin na famili bilong mi i luk amamas, tasol as na mipela i stap long dispela hap, em mi no save. Nau mi save olsem dispela haus em wanpela Haus Kingdom bilong ol Witnes Bilong Jehova.

Tasol sori tru, i no gat wanpela i stap long ol dispela miting i ken helpim mi long save long ol tok i kamap long en. Long nau mi save olsem ol lain i bin i stap long dispela miting ol i laik helpim mi tasol mi yaupas na ol i no save ol bai mekim olsem wanem. Long ol dispela miting, mi pilim olsem mi stap wanpis na mi gat tingting olsem, ‘mobeta mi stap long skul.’ Tasol taim mi wok long tingim ol dispela samting, tupela yangpela meri i raitim hariap sampela tok long wanpela liklik pepa na i givim mi. Em dispela liklik pepa mi stori long en long kirap bilong dispela stori. Mi no gat save olsem dispela liklik tok em i kirap bilong wanpela gutpela pasin pren em bai helpim mi na bai mi no stap wanpis moa.

Wok Bilong Kisim Wanpela Gutpela Pren Tru

Colette na Hermine, em tupela i gat 22 krismas samting, ol i bin givim dispela pepa long mi. Bihain mi kisim save olsem tupela i bin kam long dispela kongrigesen bilong ol Witnes Bilong Jehova em mi bin go long en, na tupela i laik mekim wok painia oltaim, em ol i laik mekim wok bilong God fultaim. Maski Colette na Hermine i no save long pasin bilong mekim wok long han bilong toktok wantaim ol yaupas, mi inap lukim maus bilong ol na save long tok ol i mekim long mi, na long dispela rot mipela inap toktok wantaim.

Papamama bilong mi i amamas taim Colette na Hermine i askim long stadi long Baibel wantaim mi, tasol dispela tupela yangpela meri i mekim sampela samting moa antap long wok bilong stadi wantaim mi. Ol i traim hat long helpim mi long save long ol tok bilong ol miting long Haus kingdom, na long poroman gut wantaim ol narapela long kongrigesen. Ol i lainim mi long mekim wok long Baibel long taim bilong autim tok, na ol i helpim mi long redim ol tok bilong Skul Tiokratik Bilong Autim Tok. Tingim, long dispela taim mi gat strongpela bel inap long mi ken mekim tok long ai bilong ol lain i no yaupas!

Na tu, Colette na Hermine i mekim na mi pilim olsem mi inap bilip long ol. Ol i no les kwik na ol i putim gut yau long tok bilong mi. Maski sampela taim mipela i lap long ol popaia bilong mi, ol i no tok bilas long mi na ol i no sem taim mi bung wantaim ol. Ol i wok strong long traim long pilim tingting bilong mi na ol i mekim wankain pasin long mi olsem ol i save mekim long ol narapela. Ol dispela gutpela meri i givim mi wanpela gutpela samting tru​—⁠ol i laikim mi na ol i pren gut wantaim mi.

Na bikpela samting, em Colette na Hermine i skulim mi olsem mi mas kisim save long God bilong yumi Jehova, na tingim em olsem wanpela pren mi inap bilip long en. Ol i stori olsem Jehova i bin lukim mi sindaun long Haus Kingdom na em i save gut long ol hevi na hatwok bilong man i yaupas. Mi amamas olsem pasin bilong laikim Jehova i bungim mipela tripela wantaim olsem pren! Mi pilim tru pasin bilong Jehova long lukautim mi, na pasin bilong laikim em tru i kirapim mi na long Julai 1975 mi kisim baptais long wara bilong makim olsem mi dediket long em.

Raun Wantaim Gutpela Pren Tru

Long ol yia i kam bihain, mi wok long save gut long planti ol brata na sista Kristen. Wanpela brata i kamap wanpela gutpela pren tru bilong mi na mitupela i marit long 1980. Bihain liklik, mi kirap long mekim wok painia, na long 1994 ol i makim mi na man bilong mi Harry long mekim wok painia salim na helpim ol yaupas i mekim tok long han long tok bilong ol yaupas bilong Netelan. Long yia bihain, mi kisim wanpela wok i hatwok tru long mekim. Mi bin poromanim man bilong mi, em man inap long harim tok, taim em i go long lukim ol kongrigesen olsem helpim bilong wasman sekit.

Mi save mekim olsem. Taim mipela i go long wanpela kongrigesen long namba wan taim, kwiktaim mi save go long planti ol brata na sista sapos mi inap na mi sekanim ol. Mi tokim ol olsem mi yaupas na mi askim ol long ol i mas lukluk long mi taim ol i toktok, na ol i mas toktok isi. Na wantu mi traim long bekim tok long ol miting. Na mi save askim wanpela long helpim mi long save long ol tok i kamap long taim bilong ol miting na long autim tok.

Ol dispela pasin i wok gut, olsem na sampela taim ol brata na sista i lusim tingting olsem mi yaupas na dispela i mekim na sampela taim mipela i lap. Olsem: Ol i tokim mi olsem ol i bin lukim mi i wokabaut long taun, na ol i putim hon bilong ka bilong ol bilong tok moning samting long mi, tasol mi no save mekim wanpela samting. Sampela taim mi tu mi save lusim tingting olsem mi yaupas​—⁠olsem taim mi laik tok isi na mekim sampela tok hait long yau bilong man bilong mi. Tasol taim mi lukim pes bilong em i ret, mi save olsem mi bin toktok strong tumas.

Ol pikinini i helpim mi long sampela narapela rot mi kirap nogut long en. Long wanpela kongrigesen em mipela i go lukim long namba wan taim, wanpela mangi i gat 9-pela krismas i luksave olsem sampela long Haus Kingdom i pret liklik long toktok wantaim mi, na em i tingting long mekim wanpela samting. Em i kam na holim han bilong mi na kisim mi go long namel bilong Haus Kingdom, na em i singaut bikmaus olsem, “Mi laik bai yupela i save long Irene​—⁠em i yaupas!” Ol lain i bin stap long dispela taim i kam na sekanim mi.

Taim mi poromanim man bilong mi long wok sekit, mi wok long kisim planti pren moa. I stap bilong mi long nau i narapela kain tru long ol yia bipo, em long taim mi bin pilim olsem ol lain i no laik bung wantaim mi na mi stap wanpis.

Kirap long dispela apinun em Colette na Hermine i putim dispela liklik pepa long han bilong mi, mi bin kisim save olsem pasin bilong poroman gut wantaim ol narapela i gat strong na mi bin bungim ol manmeri em ol i kamap ol gutpela pren tru bilong mi. Na bikpela samting moa, mi kisim save long Jehova, em gutpela Pren tru winim olgeta narapela. (Rom 8:​38, 39) Dispela liklik pepa i kamapim bikpela senis long laip bilong mi!

[Piksa long pes 24]

Mi tingim krai bilong doli mi laikim tumas

[Ol Piksa long pes 25]

Long wok autim tok na mi wantaim man bilong mi, Harry