Tingim Gut Ol Yaupas Bratasista Bilong Yu!

LAIN bilong God long nau ol i insait long wanpela bikpela famili. Long bipo sampela i insait long dispela famili em Samuel, Devit, Samson, Rahap, Moses, Abraham, Sera, Noa, na Abel. Namel long lain bilong Jehova em ol i stap gut long em, i gat planti yaupas. Namba wan man na meri i kamap Witnes Bilong Jehova long Mongolia em tupela yaupas marit. Na pasin bilong ol yaupas bratasista bilong yumi long Rasia long i stap gut long God, dispela i mekim na yumi winim kot bilong Yuropian Kot ov Human Raits.

Long nau, lain “wokboi i gat gutpela tingting” i wokim ol buk na nius samting bilong ol yaupas na stretim rot bambai i gat ol kongrigesen, na tu, i gat ol bikpela na liklik kibung long tok ples Sain bilong ol yaupas. (Mt. 24:45) Ol dispela samting i helpim tru ol yaupas.a Tasol ating yu laik save olsem wanem yaupas bin kisim save long trupela God na kamap strong long tok i tru, maski i no bin i gat ol dispela samting bilong helpim em? Olsem wanem? Yu tingim sampela samting yu inap mekim bilong helpim ol yaupas i stap long komiuniti bilong yu?

Taim Ol i No Wokim Yet Ol Buk Samting Bilong Ol Yaupas

Olsem wanem sapos yu askim sampela lapun yaupas long stori bilong ol long taim ol i bin kirap long kisim save long God? Ating ol bai tokim yu ol i bin pilim olsem wanem long namba wan taim ol i bin kisim save olsem God i gat nem. Na olsem wanem dispela tok i tru tasol i bin senisim sindaun bilong ol na i strongim ol insait long planti yia, paslain long oganaisesen i kamapim ol program bilong tok ples Sain long ol vidio na DVD bilong helpim ol yaupas long kisimgut ol strongpela tok bilong Baibel. Ating ol bai stori long ol i bin pilim olsem wanem long bipo taim i no gat man bilong tanim ol tok bilong ol miting Kristen i go long tok ples Sain. Na wanpela man i save sindaun klostu long ol na raitim ol tok long wanpela pepa bilong helpim ol long kliagut long tok brata i mekim. Inap sevenpela yia wanpela yaupas brata i bin lainim tok i tru long dispela rot, paslain long wanpela man bilong tanim tok i kam.

Ol lapun yaupas Witnes inap tingim yet taim ol i bin wok wantaim ol narapela brata na autim tok long ol man em ol i no yaupas. Long wanpela han ol i holim hap strongpela pepa i gat sotpela tok bilong autim tok i stap long en bilong soim long man bilong haus. Long narapela han ol i holim ol nupela nius Wastaua na Kirap! I hatwok tru long yaupas i mekim Baibel stadi wantaim narapela yaupas long ol buk samting em tupela i no kliagut long tok bilong en. Ating ol lapun bratasista yaupas inap tingim yet bel hevi ol i bin pilim taim ol narapela i no kliagut long tok bilong ol, na dispela i mekim na ol i no inap stori i go moa wantaim ol narapela long ol tok i tru bilong Baibel. Na tu, ol i save ol i pilim olsem wanem taim ol i laikim tru Jehova, tasol ol i pret liklik long bihainim kwik tok ol i lainim. Bilong wanem ol i pilim olsem? Long wanem, ol i no save ol i kisimgut astingting bilong wanpela tok bilong Baibel o nogat.

Maski i gat ol dispela hevi, ol yaupas brata na sista bilong yumi ol i bin holimpas pasin bilong ol long i stap gut long God. (Jop 2:3) Inap longpela taim ol i bin wet long Jehova i helpim ol. (Sng. 37:7) Na nau em i givim planti samting em ol i no bin ting ol bai kisim.

Tingim bikpela wok wanpela yaupas brata i bin mekim, dispela brata em i wanpela man marit na papa. Paslain long ol i wokim ol vidio long tok ples Sain bilong ol yaupas, em i save givim bel tru long stadi wantaim famili bilong em. Pikinini man bilong em i tok: “Papa i gat hatwok tru long mekim famili stadi, long wanem, em i mas lainim mipela long ol buk em ol i no raitim long tok ples Sain. Na planti taim em i no kliagut long ol tok bilong ol buk samting. Mipela ol pikinini tu i save mekim na em i gat hatwok moa long mekim stadi. Taim em i no kamapim gut insait bilong ol tok, wantu mipela ol pikinini i save tokim em long dispela. Tasol maski i olsem, em i save mekim famili stadi long olgeta taim. Em i pilim olsem em i bikpela samting moa long mipela i mas kisim save long Jehova, winim sem em i kisim sampela taim, long wanem, em i no save gut long tok Inglis.”

Narapela man i stap gutpela piksa, em Richard, em wanpela brata i gat 70 krismas samting em i yaupas na aipas wantaim, na em i stap long Brookyn, New York, long Amerika. Richard em man bilong go olgeta taim long ol miting Kristen. Bilong i go long miting em yet i save go kalap long tren, na em i kaunim olgeta hap em tren i save stop long en, olsem na em i save long wanem hap em bai go daun long en. Long wanpela taim bilong kol, i gat bikpela sno tru i bin pundaun na ol i no inap mekim miting. Olgeta bratasista long kongrigesen i bin kisim save long dispela, tasol ol i no tokim Richard. Taim ol brata i luksave olsem ol i no bin toksave long Richard, ol i go painim em na ol i lukim em i sanap isi ausait long Haus Kingdom na wet long ol i opim dua. Taim ol i askim em, bilong wanem em i go long taim i gat bikpela sno, em i tok, “Mi laikim tru Jehova.”

Yu Ken Mekim Wanem?

Olsem wanem? I gat ol yaupas long hap bilong yu? Yu ting yu inap lainim sampela tok ples Sain bambai yu ken toktok wantaim ol? Ol yaupas i save mekim pasin isi taim ol i lainim man long tok ples bilong ol. Ating bai yu bungim wanpela yaupas long taim yu autim tok o long narapela taim. Yu ken mekim wanem? Traim long toktok wantaim em. Mekim wok long han, raitim tok long pepa, droim piksa samting, o traim olgeta dispela pasin bilong toktok wantaim em. Sapos yaupas yu bungim i kamapim olsem em i no laikim tok i tru, orait tokim wanpela yaupas Witnes o narapela husat i save long tok ples Sain, long dispela man yu bin bungim. Ating em bai pilim tru dispela tok sapos wanpela i mekim tok ples Sain long em.

Ating yu lainim tok ples Sain bilong ol yaupas na yu save go long kongrigesen bilong ol yaupas. Orait, olsem wanem yu inap kamap gutpela moa long mekim ol sain na kliagut long dispela tok ples? Maski sapos i gat sampela pablisa long kongrigesen ol i no yaupas, i gutpela yu yusim tok ples Sain taim yu toktok wantaim ol. Dispela bai helpim yu long kisim tingting olsem ol yaupas. Sampela taim ating bai yu pilim olsem em i isi moa long toktok long maus, long wanem, pasin bilong wokim sain long han em i hatwok. Tasol tingim: Taim yu lainim wanpela nupela tok ples, yu mas taitim bun na no ken givap kwik na bai yu inap mekim gut dispela tokples.

Pasin bilong strong long mekim tok ples Sain i soim olsem yumi laikim ol yaupas bratasista bilong yumi na rispek long ol. Tingim bel hevi em ol i save pilim long olgeta de, long wanem, ol i no kliagut long toktok bilong ol man long ples wok o long skul. Wanpela yaupas brata i tok: “Long olgeta de taim ol man klostu long mi ol i toktok long narapela narapela, planti taim insait long bel mi pilim olsem mi stap wanpis tru, na mi pilim olsem ol i no laik mi insait long samting ol i mekim. Dispela i mekim na mi save bel hevi, na kros tu. I hatwok long kamapim stret tingting mi pilim long bel sampela taim.” Ol miting bilong yumi i mas i stap olsem ol gutpela bung we ol yaupas bratasista bilong yumi i kisim ol kaikai bilong spirit na amamas long toktok gut wantaim ol narapela.​—Jo. 13:​34, 35.

Yumi mas tingim gut ol liklik grup bilong ol yaupas em ol i save bung wantaim ol kongrigesen. I gat ol man i save tanim tok i go long tok ples Sain bilong ol yaupas. Bilong ol i ken kisimgut ol tok i kamap, ol yaupas long kongrigesen i save sindaun long ol fom long fran insait long Haus Kingdom. Dispela bai helpim ol long lukim gut man i tanim tok na man i givim tok long wankain taim, na i no gat ol samting i pasim ai bilong ol. I no longtaim na olgeta long kongrigesen i lain long lukim ol, na ol i no pulim ai bilong kongrigesen. Ol i save bihainim dispela pasin tu long ol liklik na bikpela kibung em ol i save tanim tu tok long tok ples Sain bilong ol yaupas. Mekim tok amamas long ol bratasista em ol i wok strong long tanim tok long tok ples Sain wankain olsem wanpela yaupas bai mekim bilong kamapim gut insait bilong tok.

Ating yu stap long wanpela kongrigesen i gat liklik grup bilong ol yaupas o kongrigesen i save lukautim wanpela grup bilong ol yaupas na ol i save tanim ol tok bilong ol miting long tok ples Sain. Bai yu mekim wanem bilong soim ol yaupas bratasista olsem yu tingim tru ol? Singautim ol i kam long haus bilong yu. I gutpela long lainim sampela tok ples Sain. No ken larim pasin bilong pret i pasim yu long toktok wantaim ol. Yu bai painim rot bilong toktok wantaim ol, na taim yu soim kain pasin laikim olsem, ol gutpela samting inap kamap em yu bai amamas long tingim. (1 Jon 4:8) Ol yaupas bratasista bilong yumi ol i gat ol gutpela pasin inap strongim yumi. Ol i save toktok gut wantaim narapela, ol i gat gutpela tingting, na ol i gat pasin bilong lap na amamas. Wanpela brata em tupela papamama bilong em i yaupas, em i tok: “Long laip olgeta bilong mi, mi stap wantaim ol yaupas, na ol i lainim mi long planti samting tru em mi no inap long bekim. Yumi inap kisim planti skul long ol yaupas bratasista bilong yumi.”

Jehova i laikim tru ol gutpela wokman bilong em, na ol yaupas tu. Gutpela pasin bilong ol long bilip na long sanap strong na karim hevi, dispela i mekim na oganaisesen bilong Jehova i pulap tru long planti gutpela samting. Olsem na yumi mas tingim gut ol yaupas bratasista bilong yumi!

[Futnot]

[Piksa long pes 31]

Ating wanpela yaupas bai pilim tru tok bilong Kingdom sapos wanpela i mekim tok ples Sain long em

[Ol Piksa long pes 32]

Ol miting bilong yumi i mas i stap olsem ol naispela bung we ol yaupas bratasista bilong yumi i kisim tok bilong strongim ol