Redi Long Painim Ol Yaupas Manmeri Long Teritori Bilong Yu
1 Jehova i wok long singaut: “ ‘Yu kam.’ . . . Man i laik dring, em i mas kam na kisim wara bilong givim laip, em i olsem presen bilong God.” (KTH 22:17) Long olgeta hap bilong graun planti manmeri i yaupas ol i wok long harim dispela singaut na ol i kam. Dispela i mekim na insait long 13 yia i go pinis, long Amerika, ol i kamapim 27 kongrigesen na 43 grup long tok ples ol i save mekim long han. Hia long Papua Niugini yumi gat wanpela liklik grup long tok ples ol i save mekim long han i bung wantaim wanpela kongrigesen long Pot Mosbi.
2 I gat planti manmeri i stap long teritori bilong yumi ol i yaupas na yau i bagarap na ol i no inap harim gut tok. Yumi laik bai ol i lain long Jehova na Kingdom bilong em.
3 Olsem Wanem Yu Inap Helpim Ol? Taim yu raun long hap planti man i raun long en, yu bin lukim ol manmeri i mekim han bilong toktok? Yu save long wanpela man long ples wok o skul em i gat wanpela long famili em i yaupas? Stap redi long painim ol yaupas taim yu raun mekim ol wok bilong yu long olgeta de. Tasol olsem wanem yu ken save ol bai harim tok bilong Kingdom yumi autim?
4 Autim Tok Long Ol: Mekim wok long ol piksa i stap long buklet Stap Amamas Oltaim Long Graun! bilong helpim ol yaupas long kisim sampela save long ol samting Jehova bai mekim long ol manmeri. Na tu, yu ken singautim ol i kam long ol miting bilong kongrigesen. Ating ol i no inap harim ol tok, tasol ol inap lukim pasin Kristen tru na dispela inap helpim ol. Planti yaupas ol inap kisim helpim sapos ol i bung wantaim ol manmeri i save tingim ol. Na tu, kuskus bilong kongrigesen bilong yupela i ken toksave long brens-ofis sapos i gat sampela yaupas manmeri i stap long teritori bilong yupela o ol i bung wantaim kongrigesen bilong yupela.
5 Olsem wanem sapos i no gat wanpela pablisa i stap klostu long hap bilong yupela i save long mekim han samting bilong toktok na helpim ol yaupas man long ol samting bilong spirit? Yu ken mekim wanem? Yu ken mekim gobek na toktok wantaim wanpela gutpela famili bilong em i stap long haus em i no yaupas. Bilong kirapim tingting bilong dispela yaupas man, tokim em olsem yu laik soim wanpela video long tok ples ol i mekim long han. Sampela pablisa i bin lainim tok Auslan (pasin bilong mekim han bilong toktok wantaim ol yaupas) na bai ol i ken helpim gut ol yaupas. (Ap. 16:9, 10) I gat video ol i wokim bilong ol yaupas i ken stadi long Baibel. Ol pablisa i yusim ol dispela tul long mekim Baibel stadi na planti gutpela samting i kamap.
6 Sapos yu redi long helpim ol yaupas manmeri yu painim long hap bilong yu, rot inap op long ol long kisim wara bilong givim laip em i no gat pe bilong en.—Mt. 10:11.