‘Jehova i Mekim Pes Bilong Em i Lait Long Ol’

I GAT olsem 30 masol long pes bilong yumi ol man. Na 14 bilong ol dispela masol i save wok bung wantaim bilong mekim yu i smail! Yu ting tok yu mekim bai klia sapos i no gat ol dispela masol? Ating nogat, a? Tasol long ol yaupas, ol masol bilong pes i save mekim bikpela samting moa, na i no mekim tasol ol tok i klia. Taim ol i wokim han na wokim pes wantaim, dispela em i bikpela samting bilong kamapim tingting bilong ol. Planti man i kirap nogut long olsem wanem tok ples Sain bilong ol yaupas inap kamapim gut mining bilong ol strongpela tok na ol liklik liklik samting tu.

Long nau, ol yaupas i lukim wanpela pes i gutpela na i lait moa, winim pes bilong ol man. I olsem ol i “lukim pes bilong [God].” (Sng. 11:7) Dispela i no wanpela samting i kamap nating tasol, nogat. Long bipo yet Jehova i bin soim bikpela pasin laikim long ol yaupas. Em i bin mekim olsem tu long taim bilong lain Israel bilong bipo. (Wkp. 19:14) Long nau, pasin bilong Jehova long laikim ol yaupas, dispela i stap ples klia long planti samting. “[God] i laik kisim bek olgeta manmeri, bai ol i ken save long as bilong tok tru.” (1 Ti. 2:4) Planti yaupas i kisim save long tok i tru bilong God, na dispela i olsem ol i lukim pes bilong em. Olsem wanem ol i mekim olsem taim ol yet i no inap harim toktok? Paslain long bekim dispela askim, yumi laik skelim as na tok ples Sain em i bikpela samting long ol yaupas.

Ol i Kisim Save Long Rot Bilong Lukim Ol Samting

Planti man i gat tingting kranki long ol yaupas na long tok ples Sain bilong ol yaupas. Mipela i laik helpim yu long save long sampela samting i save painim ol yaupas. Ol yaupas inap draivim ka. Ol yaupas i save hatwok long kisim tok taim ol i lukluk long maus bilong man i mekim tok. Long olgeta hap bilong graun i gat planti narapela narapela tok ples Sain. Na tu, ol yaupas i save mekim narapela narapela tok ples Sain, maski ol i stap insait long wanpela kantri.

Yu ting ol yaupas inap ritim samting? Tru sampela inap ritim gut ol tok, tasol tru tru ol yaupas i gat hatwok long ritim samting. Bilong wanem i olsem? Long wanem, rait i stap long pepa i kam long tok ples em ol man i save kolim long maus. Tingim olsem wanem wanpela pikinini husat inap harim toktok em i lain long wanpela tok ples. Kirap long taim pikinini i bon, em i stap namel long ol manmeri i save mekim tok ples. I no longtaim, em i kisim ol tok na bungim ol wantaim na kamapim ol sentens. Em i mekim olsem long rot bilong harim tasol ol tok ol man i kolim. Olsem na taim pikinini husat inap harim toktok i kirap ritim samting, em i lain olsem ol blakpela mak antap long pepa i stret wantaim krai bilong ol tok em i save pinis long en.

Orait nau, tingim olsem yu stap long narapela kantri, na yu stap insait long wanpela rum ol i wokim long glas na i no gat nois inap i go insait long en. Na i no gat wanpela taim yu bin harim tok ples bilong dispela kantri. Long olgeta wan wan de, ol asples i kam sanap ausait long glas na i toktok long yu. Yu no inap harim wanpela tok ol i mekim. Yu lukim maus bilong ol i meknais na i olsem ol i kolim tok. Taim ol i luksave olsem yu no harim wanpela tok bilong ol, ol i raitim dispela wankain tok long pepa na soim long yu. Ol i ting olsem yu bai klia long en. Yu ting yu inap klia long ol tok ol i raitim? Yu bai pilim hatwok tru long toktok long ol o harim toktok bilong ol. Bilong wanem i olsem? Long wanem, ol i raitim tok long tok ples we i no gat wanpela taim yu bin harim ol man i kolim. Dispela tok piksa i makim samting i save painim planti yaupas.

Tok ples Sain em i gutpela rot bilong ol yaupas long kamapim tingting bilong ol na kisim tok bilong ol narapela. Man i save wokim ol sain bilong makim ol samting em i laik kamapim long ol man. Taim em i mekim olsem na wokim pes wantaim, dispela i bihainim ol lo bilong tok ples Sain. Long dispela rot wanpela tok ples i kamap, em tok ples we ol man inap lukim long ai na kisim save long samting yu laik toktok long en.

Klostu olgeta muv em wanpela man i mekim wantaim han, bodi, o pes bilong em taim em i mekim tok ples Sain, dispela i gat mining bilong en. Taim man i wokim pes, dispela i no bilong amamasim ol narapela tasol, nogat. Dispela em i bikpela samting long ol lo i bosim tok ples Sain. Olsem: Sapos yaupas i kamapim wanpela askim na em i apim aibro bilong em, dispela inap makim olsem em i kamapim wanpela askim bilong man i ken wokim tingting long en o em i bekim yes o nogat. Sapos em i daunim aibro bilong em, dispela inap makim ol kain askim olsem husat, wanem, we, wanem taim, bilong wanem, o olsem wanem. Sampela pasin bilong muvim maus inap makim sais bilong wanpela samting o wanpela samting i kamap em i bikpela o liklik samting. Pasin em yaupas i bihainim bilong muvim het, apim sol, wokim pes, o opim na pasim ai bilong em, dispela olgeta samting i putim mining long tok na tingting em i laik kamapim.

Dispela pasin bilong wokim pes na wokim han samting i mekim na man husat i lukim dispela samting em i kisimgut ol tok. Dispela i mekim na ol yaupas husat i save gut long tok ples Sain, ol i save gut tru long kamapim tingting bilong ol long ol samting yumi inap lukim na harim, na tu, long ol samting yumi no inap lukim na harim.

Ol Buk Samting Long Tok Ples Sain

Taim man i kamapim save bilong Jehova long rot bilong tok ples Sain, i olsem ol yaupas i harim tok na ol inap “bilip” long Man husat i As bilong dispela tok. Olsem na ol Witnes Bilong Jehova i wok strong long autim tok long ol yaupas long olgeta hap bilong graun na i wokim ol samting bilong helpim ol yaupas. (Ro. 10:14) Long nau i gat 58 grup long olgeta hap bilong graun, em ol i tanim tok long tok ples Sain, na ol buk samting bilong tok ples Sain i stap long ol DVD long 40 tok ples. Wanem gutpela samting i kamap long ol dispela wok?

Jeremy, em papamama bilong em i yaupas, em i tok: “Mi ken tingim papa bilong mi. Em i bin sindaun long rum bilong em na lusim planti aua long ritim sampela paragraf bilong Wastaua na traim long kisimgut insait bilong en. Bihain, wantu tasol em i lusim rum na i kam ausait na wokim han i olsem em i tok: ‘Mi kisim mining bilong en! Mi kisim mining bilong en!’ Orait nau em i traim long eksplenim long mi mining bilong dispela tok em i ritim. Mi gat 12 krismas long dispela taim. Hariap tasol mi save ritim dispela hap tok na mekim sain long em olsem: ‘Papa, mi no ting dispela em mining bilong dispela tok. Mining bilong en . . . ’ Em i muvim bodi bilong em bilong tokim mi long stop na em i go bek long rum long traim painimaut mining bilong tok em i ritim long pepa. Mi no inap lusim tingting long pes bilong em, em i soim olsem em i bel hevi, na mi amamas long lukim em i go bek insait long rum bilong em. Tasol nau i gat ol buk samting bilong tok ples Sain long DVD na dispela i mekim na i isi long em i kliagut long ol tok. Taim mi lukim pes bilong em i lait na em i kamapim tingting em i gat long Jehova, dispela em wanpela bikpela samting tru long mi.”

Tingim tu stori bilong tupela marit Witnes em ol i bin toktok wantaim Jessenia, em yangpela yaupas meri long Sili. Bihain long mama bilong Jessenia i givim tok orait long tupela marit i ken soim Jessenia My Book of Bible Stories​​—On DVD long Tok Ples Sain Bilong Sili, ol i tok: “Taim Jessenia i kirap lukim piksa, em i stat long lap na bihain aiwara i pundaun. Taim mama bilong em i askim em long as na em i krai, em i tok em i laikim piksa em i lukim. Bihain mama bilong em i luksave olsem Jessenia i kliagut long olgeta samting em i lukim long DVD.”

Wanpela yaupas meri i save sindaun long ples kanaka bilong Veneswela, em i gat wanpela pikinini na bihain em i gat bel long namba tu pikinini. Em na man bilong em, ol i pilim olsem ol i no laik kamapim namba tu pikinini, long wanem, ol i sot long mani samting, olsem na ol i tingting long rausim bel. Ol Witnes Bilong Jehova i kam lukim tupela, na ol i no save long samting em tupela i tingting long mekim, ol i soim tupela long stadi 12 bilong buklet God i Laik Yumi Mas Mekim Wanem? i stap long vidio long Tok Ples Sain Bilong Veneswela. Dispela stadi i stori long tingting bilong God long pasin bilong rausim bel na kilim man. Bihain, meri i tokim ol Witnes olsem em i amamas tru long em i bin mekim dispela stadi. Em i tok dispela stadi i mekim na ol i bin pasim tok olsem ol i no inap rausim bel. Wanpela laip i no lus, long wanem, buklet long tok ples Sain i stap long DVD i bin helpim ol!

Lorraine, wanpela yaupas Witnes, i tok: “Pasin bilong lainim ol tok bilong Baibel, dispela i olsem mi traim long bungim na joinim ol piksa i bruk bruk. Mi no kliagut, i olsem sampela hap bilong piksa i lus. Tasol taim ol i wokim planti samting moa long tok ples Sain i stori long tok i tru bilong Baibel, mi kliagut long en, i olsem mi kisim na bungim ol hap bilong piksa i bin lus na mi putim ol wantaim.” George, em yaupas na em i stap wanpela Witnes inap 38 yia, em i tok: “Mi ken tok tru tumas olsem, sapos yu yet i kliagut long wanpela samting, dispela bai mekim yu amamas long yu yet na i strongim yu. Mi pilim olsem ol DVD bilong tok ples Sain i helpim mi tru na i mekim pasin bilong mi long pas gut wantaim God i kamap gutpela moa.”

“Wanpela Miting Long Tok Ples Bilong Mi!”

Ol Witnes i gat ol buk samting long tok ples Sain na i no em tasol, ol i gat tu ol kongrigesen we ol i mekim ol miting olgeta long tok ples Sain. Long nau, i gat olsem 1,100 kongrigesen long olgeta hap bilong graun em ol i mekim wok long tok ples Sain. Ol i toktok long ol yaupas long tok ples bilong ol, na ol i skulim ol long ol tok i tru bilong Baibel long tok ples em yaupas i save gut long en. Ol i kamapim ol tok long pasin i soim rispek long sindaun bilong em na ol samting i painim em.

Wanem gutpela samting i kamap long ol dispela kongrigesen bilong ol yaupas ol i bin kamapim? Tingim stori bilong Cyril, em i baptais olsem wanpela Witnes Bilong Jehova long 1955. Inap planti yia em i bin wok strong long stadi long ol buk na nius na i go long olgeta miting Kristen. Sampela taim i gat ol man bilong tanim tok long tok ples Sain na sampela taim i no gat. Taim i no gat man bilong tanim tok, em i kisim helpim long ol Witnes em ol i save raitim long pepa ol tok brata i mekim long pletfom. Long 1989, bihain long em i bin stap olsem wanpela Witnes inap 34 yia, ol i kamapim namba wan tok ples Sain kongrigesen long New York City long Yunaitet Stets. Cyril i pilim olsem wanem taim em i stap long dispela kongrigesen? Em i tok: “I olsem mi kam ausait long wanpela bikbus, i olsem wanpela tanel i tudak, na nau mi lukim lait. Wanpela miting long tok ples bilong mi!”

Ol kongrigesen bilong ol Witnes Bilong Jehova em ol i save mekim tok ples Sain long en, em ples we ol yaupas i ken kam bung long olgeta taim na lain long God na lotuim em. Em ples we ol manmeri bilong God i kisim ol gutpela poroman na kisim tok bilong strongim bilip. Ol yaupas i stap namel long ol manmeri i save toktok na harim tok, na dispela i mekim na ol i pilim olsem ol i stap wanpis, tasol ol dispela kongrigesen i gutpela ples tru bilong ol i ken pren gut wantaim ol narapela na toktok wantaim ol long rot bilong tok ples Sain. Long ol dispela kongrigesen, ol yaupas i ken lain, kisim strong, na mekim gut moa wok bilong Jehova. Planti yaupas Witnes i insait long mekim wok autim tok fultaim. Sampela i bin i go sindaun long ol narapela kantri bilong helpim ol yaupas long kisim save long Jehova. Ol man Kristen em ol i yaupas, ol i lain long mekim wok tisa, go pas long mekim ol samting, mekim wok wasman, na planti i lain gut long lukautim ol wok insait long kongrigesen.

Long Amerika, i gat winim 100 tok ples Sain kongrigesen na 80 grup. Long Brasil, i gat olsem 300 tok ples Sain kongrigesen na i gat winim 400 grup. Na i gat olsem 300 tok ples Sain kongrigesen long Meksiko. Rasia i gat winim 30 tok ples Sain kongrigesen na 113 grup. Dispela em sampela tasol bilong ol gutpela samting i kamap long olgeta hap bilong graun.

Ol Witnes Bilong Jehova i save mekim tu ol kibung long tok ples Sain. Las yia, ol i mekim 120 kibung long olgeta hap bilong graun long planti narapela narapela tok ples Sain. Ol dispela bung i helpim ol yaupas Witnes long lukim olsem ol i insait long wanpela lain brata i stap wanbel long olgeta hap bilong graun em ol i kisim ol kaikai bilong spirit long taim stret bilong en.

Leonard em wanpela yaupas na em i stap wanpela Witnes Bilong Jehova inap 25 yia. Em i tok: “Oltaim mi save olsem Jehova em i God tru. Tasol maski i olsem, mi no kliagut long as na em i larim pen na hevi i stap. Sampela taim, dispela i mekim na mi no amamas long em. Tasol wanpela tok long kibung distrik long tok ples Sain i helpim mi long kliagut long as bilong dispela samting. Taim tok i pinis, meri bilong mi i tatsim mi long sait na i askim, ‘Dispela i bekim askim bilong yu?’ Na mi tok yes! Bihain long 25 yia, mi tenkyu olsem mi no bin lusim Jehova. Long olgeta taim mi save laikim em tru, tasol mi no bin kliagut long sampela pasin bilong em. Nau mi kliagut tru!”

Ol i Tenkyu Tru

Ol yaupas i lukim wanem samting long pes bilong Jehova taim ol i kisim save long em? Pasin laikim, pasin sori, stretpela pasin, pasin bilong stap gut long narapela, na pasin marimari​​—na planti narapela pasin tu.

Ol yaupas Witnes long olgeta hap bilong graun, i olsem ol i lukim pes bilong Jehova na ol bai wok long lukim gut moa. Jehova i laikim tru ol yaupas na em i ‘mekim pes bilong em i lait long ol.’ (Nam. 6:​25, NW) Ol dispela yaupas i amamas tru olsem ol i bin kisim save long Jehova!

[Ol Piksa long pes 24, 25]

I gat olsem 1,100 tok ples Sain kongrigesen long olgeta hap bilong graun

[Ol Piksa long pes 26]

Pes bilong Jehova i lait tru long ol yaupas