Ol Yaupas i Litimapim Nem Bilong Jehova

WANPELA MAN LONG NAIJIRIA I RAITIM DISPELA STORI BILONG KIRAP!

INAP planti yia ol Witnes Bilong Jehova long Naijiria ol i bin hatwok long lainim ol yaupas long tok bilong Baibel. Em i olsem, long wanem, i no gat planti Witnes i save long pasin bilong makim tok long han. Tasol nau dispela samting i wok long senis. Planti Witnes moa i bin lain long makim tok long han na ol i wok long painim ol yaupas bilong helpim ol. Wanpela bikpela samting i bin helpim dispela wok, em wanpela kibung distrik bilong ol Witnes Bilong Jehova long Naijiria long 1995.

Wanpela man i bin go long dispela kibung long Ota, Naijiria, em i tok: “Olgeta manmeri long kibung i amamas, long wanem, ol i save bikpela samting bai kamap.” Narapela i tok: “Olgeta i pilim olsem narakain samting bai kamap.” I gat wanem as na ol i tok olsem? Em namba wan taim long Naijiria, na ol i bin mekim wok long han bilong kamapim olgeta tok bilong program. Long ol 96 kibung i bin kamap long Naijiria long 1995, long dispela kibung tasol long Ota ol i bin makim tok long han bilong kamapim program olgeta.

Planti tausen man i kam long dispela kibung na 43 bilong ol em ol yaupas. Ol i bin sindaun long han kais long poret bilong pletfom. Antap long ol wanpela waitpela plang i bin hangamap na long retpela rait i gat tok olsem: “Sign Language” (“Makim Tok Long Han”). Ol yaupas i amamas tru long stap long dispela kibung. Wanpela i raitim tok olsem: “Mi rait wantaim bikpela amamas na aiwara. I no longtaim i go pinis na mipela i bel hevi liklik, long wanem, mipela i kisim save olsem, long ol narapela kantri ol wanlotu bilong mipela, na ol tu i yaupas, ol inap kisim ol kaikai bilong spirit. Mipela i no save mipela bai kisim ol wankain blesing long hia.”

Husat i Kam?

Long olgeta hap bilong Naijiria ol yaupas i kam long dispela kibung. Wanpela yaupas Witnes i bin bringim 3-pela Baibel-stadi i kam wantaim em, ol tu i yaupas. Na narapela liklik lain yaupas ol i bin kam long kibung, ol i raun long trak 700 kilomita bilong i kam na 700 kilomita bilong i go bek. Inap 7-pela mun ol i bin bungim mani bilong baim rot. Tasol taim ol i laik go long kibung ol i no inap sata long wanpela trak bilong wanpela kampani bilong gavman, long wanem, em taim bilong malolo. Taim gavman i harim stori long hevi bilong ol, gavman i givim 13,000 naira (olsem K203) bilong ol i ken painim narapela rot!

Ol famili i gat pikinini yaupas, ol tu i bin kam long dispela narapela kain kibung. Wanpela meri long wanpela hap bilong bus, em i harim stori long dispela kibung na em i kam wantaim pikinini yaupas bilong em. Em na pikinini man i gat liklik save tasol long makim tok long han. Ol samting ol i bin lukim long kibung i mekim na tupela i krai, na nau ol i laik wok strong long lain long makim tok long han.

Sampela bilong ol planti tausen manmeri i bung, ol i bin kam long ol longwe ples em sampela handet kilomita, inap long ol i ken lukim olsem wanem ol yaupas i “harim” olgeta tok bilong program. Long Sande inap 13,936 ol i bung. Long olgeta 96 kibung distrik long Naijiria, dispela kibung i gat planti man, winim ol narapela kibung. Ol yaupas i amamas ol tu i insait long dispela bikpela namba.

Ol i Kirap Nogut Long Lukim

Em namba wan taim planti yaupas i “harim” gutnius long rot bilong han. Na ol man inap harim tok, em namba wan taim ol i bin lukim ol man i makim tok long han. Wanpela man i bin go long kibung em i tok, em i kirap nogut tru long lukim ol i mekim wok long han bilong kamapim program olgeta​—⁠maski em singsing, beten, toksave, o pilai! Narapela i tok: “Mi bin kirap nogut.”

Amamas bilong ol yaupas long kibung i bin kamap ples klia long singsing bilong ol. Ol i bin givim bel tru long mekim wok long han bilong litimapim nem bilong Jehova. Ol man bilong harim tok i pilim tru ol samting taim ol i lukim ol yaupas i “singsing.” Aiwara i kamap long ai bilong planti bilong ol. Sampela i harim wanpela man long kibung i kamapim amamas bilong em olsem: “O Jehova!” Taim wanpela singsing i pinis, ol manmeri i sindaun klostu long hap bilong ol yaupas, wantu ol i kirap paitim han.

Bihain long tok bilong baptais, ol man i laik kisim baptais ol i bin sanap, na wanpela yangpela man long hap ol yaupas i sindaun long en, em tu i sanap. Taim em i makim long han “yes” bilong bekim tupela askim man bilong givim tok bilong baptais em i bin kamapim, amamas bilong ol manmeri i sindaun harim dispela tok i kamap ples klia.

Ol yaupas i amamas tru long bungim ol brata sista spirit em ol i bin kam long ol narapela hap bilong kantri! Han na pinga bilong ol i wok hariap taim wanpela yaupas i wok long save long narapela yaupas. Planti taim ol i sekan na narapela i kisim atres bilong narapela.

Nainpela man i kam long ol narapela hap bilong kantri bilong makim tok long han na ol yaupas i ken kisim ol tok bilong kibung. Em i wanpela gutpela samting tru bilong lukim han bilong ol i makim gut olgeta tok na singsing. Ol i bin wok strong long mekim olsem, olsem na ol narapela i kam holim ol, sekanim ol, na tok amamas long ol. Na ol i bin givim planti askim long ol tu olsem: Yu bin lain olsem wanem? Olsem wanem mi ken lain? I gat sampela buk i save skulim man long makim tok long han?

Nupela Wok

Wanpela gutpela samting ol yaupas i amamas long en long kibung em wanpela video long buk Save i Bringim Man Long Laip Oltaim. Ol i makim long han ol tok bilong dispela buk long video. Na kibung i kirapim sampela moa long lain long makim tok long han, na long rot bilong dispela video, ol i ken wok long helpim ol yaupas long olgeta hap bilong Naijiria bilong skulim ol. Kibung i bin helpim planti long tingting strong long mekim olsem.

Wanpela sista i tok: “Bipo taim mipela i autim tok na painim wanpela yaupas, mipela i bin lusim em na go long narapela haus. Nau mipela i save wanem samting mipela i mas mekim.” Ol i ting i gat inap olsem 5 milion yaupas long Naijiria, olsem na yumi ken ting planti man moa i ken harim tok. Wanpela brata i tok: “Dispela em i wanpela nupela wok. Nau mipela i mas wok long strongim dispela narapela kain wok.”

Long ol mun bihain long kibung, ol Witnes i bin mekim olsem. Ol i wok strong long skulim ol planti milion yaupas long Naijiria long tok i tru bilong Baibel. Ol tu i mas lain long gutpela tok olsem nupela taim bai kamap na Kingdom bilong God bai bosim, na long dispela taim long rot bilong mirakel “ol yaupas bai ol i harim toktok.”​—⁠Aisaia 35:⁠5.