Hau God i Save Tingim Ol Yaupas
Long nau, i gat klostu 70 milion yaupas man na meri long olgeta hap bilong graun, na planti bilong ol i save toktok wantaim ol narapela long rot bilong yusim wanpela bilong winim 200 tokples sain. Tasol sori tru olsem, planti taim ol man i no save mekim pasin fea long ol yaupas, olsem ol dispela ripot i soim:
“Long graun olgeta, planti taim ol man i no save tingim raits bilong ol yaupas na bilong ol man em ol i hatwok long harim.”—National Association of the Deaf (U.S.).
“Ol yaupas manmeri i stap long ol kantri i no gat planti mani kago samting, ol i hatwok long kisim gutpela ediukesen, wok mani, na infomesen.”—World Federation of the Deaf.
God i pilim olsem wanem long ol yaupas man na meri? Baibel i tok wanem long ol yaupas? Na hau ol Witnes Bilong Jehova i helpim ol long nau?
Tingting God i Gat Long Ol Yaupas
Baibel i kamapim klia olsem Jehovaa God i save tingim ol yaupas. Em i laik bai ol man i mekim pasin fea long ol na em i laik bai ol i kisim helpim long skul i kam long em.
Skripsa: “Yupela i no ken mekim tok bilong bagarapim man i yaupas.”—Wok Pris 19:14.
Mining: Lo Bilong Jehova long lain Israel bilong bipo i lukautim raits bilong ol yaupas.
Skripsa: “God i save mekim wankain pasin long olgeta man.”—Aposel 10:34.
Mining: Jehova i save tingim tru ol manmeri bilong olgeta kalsa, bekgraun, na tokples, na dispela i makim tu ol yaupas man na meri.
Skripsa: “Jisas i go raun . . . . na autim gutnius bilong Kingdom.”—Matyu 9:35.
Mining: Jisas i kam long graun bilong skulim ol manmeri long Kingdom Bilong God na samting em bai mekim long olgeta manmeri, dispela i makim tu ol yaupas.—Matyu 6:10.
Skripsa: Jisas i mekim “ol yaupas i harim tok na ol mauspas i toktok.”—Mak 7:37.
Mining: Jisas i kamapim klia samting Kingdom Bilong God bai mekim long taim ol yaupas inap harim na toktok. Long dispela taim bipo, long gutpela pasin Jisas i wokim sain long han bilong toktok wantaim wanpela yaupas man paslain long em i oraitim em na bai em inap harim na toktok.—Mak 7:31-35.
Skripsa: “Yau bilong ol yaupas bai harim toktok.”—Aisaia 35:5.
Mining: Jehova i tok profet olsem ol yaupas bai harim.—Aisaia 29:18.
Hau Ol Witnes Bilong Jehova i Helpim Ol Yaupas Long Nau
Ol Witnes Bilong Jehova i autim tok bilong God long gutpela samting bai painim ol yaupas man na meri long olgeta hap bilong graun. Mipela i mekim wanem bilong inapim dispela wok? Mipela i wokim Baibel na ol vidio bilong mekim Baibel stadi long winim 100 tokples sain. Na tu, mipela i save skulim ol man long Baibel na mekim ol miting Kristen long tokples sain. Olgeta dispela samting mipela i mekim i fri long ol man husat i laik kisim helpim i kam long God. Bilong wanem? Bikos Jisas i tok: “Yupela i kisim fri, olsem na yupela i mas givim fri.”—Matyu 10:8.
Yu ken lukim ol dispela samting onlain o daunlodim long fon o teblet bilong yu long ol dispela rot:
JW.ORG. Makim piksa bilong tokples long antap long pes bilong dispela websait bilong lukim ol pablikesen na ol vidio samting long wanpela tokples sain yu laikim.
JW Library Sign Language app. Instolim dispela fri aplikesen long fon o teblet bilong yu, na bai yu inap daunlodim o watsim ol onlain vidio bilong tokples sain.
Mipela i Wokim Wanem Ol Samting Bilong Helpim Ol Man Long Kisim Save Long Baibel?
Baibel long tokples sain. Baibel New World Translation of the Holy Scriptures long tokples sain bilong Amerika em fes Baibel long graun we olgeta hap bilong en i stap long tokples sain. Baibel New World Translation olgeta o sampela hap bilong en i stap nau long planti tokples sain, na long olgeta yia mipela i tanim dispela Baibel i go long planti moa tokples sain. (Bilong lukim lista bilong ol tokples o watsim vidio bilong onlain Baibel, lukim blok “Baibel New World Translation Long Tokples Sain.”)
Watsim vidio The Complete New World Translation Is Available in ASL bilong save long wok mipela i mekim bilong wokim Baibel long tokples sain.
Bilong mekim Baibel ritim bilong yu i kamap gutpela moa, instolim JW Library Sign Language app. Dispela aplikesen bai helpim yu long makim stret ol ves bilong Baibel long wanpela tokples sain.
Dmytro na Vita em tupela yaupas papamama, tasol ol pikinini bilong ol i ken harim. Lukim hau famili bilong ol i kisim helpim long rot bilong watsim vidio bilong Baibel long tokples sain long olgeta de.
Ol vidio i skulim ol man long Baibel. Ol Witnes Bilong Jehova i wokim ol vidio long tokples sain we i helpim ol manmeri long kliagut na bihainim tok bilong Baibel long sait bilong . . .
Baibel stadi kos. Kisim save long ol tok bilong Baibel long tokples sain long taim yu yet i makim wantaim helpim bilong wanpela tisa. Yu yet i ken askim wanpela long soim yu hau mipela i save mekim dispela fri Baibel stadi kos.
Jeson Senajonon i stap long Filipins. Lukim hau Baibel stadi kos bilong mipela i helpim em long kisim pasin bilong pas gut wantaim God.
Mario Antúnez i bin stap pasto bilong wanpela lotu long Honduras. Lukim hau em i kisim bekim bilong ol askim bilong em long Baibel, taim em i eksplenim long stori bilong em “I Had More Questions Than Answers.”
Ol miting na ol bung. Mipela i gat ol kongrigesen na ol grup bilong tokples sain long graun olgeta we ol yaupas man na meri i save bung wantaim bilong kisim save na mekim lotu long olgeta wik. Na tu, long olgeta yia mipela i save oganaisim ol bikpela bung long tokples sain bilong skulim ol man long tok bilong Baibel. Long ol miting na ol bung bilong mipela, mipela i save holim han bilong ol lain i aipas na yaupas na mekim ol sain long han. Na tu, mipela i wokim ol litresa long rait brel bilong ol aipas we i no gat pe bilong en.
Painim wanpela kongrigesen i stap klostu long yu.
Kisim save long ol kibung bilong mipela i save kamap long olgeta yia.
Kam long Memorial bilong tingim dai bilong Jisas, em nambawan bikpela bung mipela i save mekim long olgeta yia.
José Luis Ayala i stap long Meksiko. Em i bon olsem yaupas na bihain em i kamap aipas. Kisim save long hau em i kisim helpim long kamap wanpela gutpela tisa bilong Baibel.
a Jehova em i nem bilong God. (Buk Song 83:18) Lukim atikol “Jehova Em i Husat?”