Ol Gavman Long Graun Olgeta i Spendim Winim 2 Trilion Dola Long Militeri—Baibel i Tok Wanem?

Long 2022, ol gavman long graun olgeta i spendim 2.24 trilion dola bilong Amerika long militeri, em bikpela mani tru ol i spendim winim ol narapela taim bipo. Bikpela risen ol i mekim olsem em bikos Rasia i pait long Yukren. Stockholm International Peace Research Institute (SIPRI) i rilisim wanpela ripot long Epril 2023 na ol i tok, long 2022:

• Ol gavman long Yurop i spendim bikpela mani tru long militeri inap “olsem 13 pesen moa long dispela yia. Kirap long 1991 na i kam, ol gavman long Yurop i no bin spendim kain bikpela mani olsem insait long wanpela yia tasol.”

• “Rasia…i spendim bikpela mani tru inap olsem 9.2 pesen moa, dispela i mekim na long graun olgeta em i gat nem olsem namba 3 kantri i spendim planti mani tru long militeri; pastaim em i bin stap namba 5.”

• Amerika i gat nem yet olsem namba 1 kantri winim olgeta narapela kantri long spendim planti mani tru long militeri, bikos “em i bin spendim 39 pesen bilong olgeta mani em ol gavman long graun olgeta i spendim long militeri.”

Dr. Nan Tian em i wanpela raita bilong SIPRI ripot, em i tok: “Long ol yia i go pinis, ol gavman i wok long spendim planti mani long ol militeri na dispela i soim olsem yumi stap long haptaim we ol man i tingting planti long wanem samting bai kamap long bihain.”

Baibel i tok profet olsem ol strongpela gavman bai wok long pait long narapela narapela, na em i stori tu long wanpela gavman em bai bringim bel isi tru long olgeta hap, em samting yumi ken bilip na wet long en.

Baibel i tok profet olsem ol militeri bilong ol kantri bai pait long narapela narapela

• Baibel i tok haptaim nau yumi stap long en em i “taim bilong pinis.”—Daniel 8:19.

• Buk Daniel i tok profet olsem long taim bilong pinis, ol strongpela gavman bai pait long narapela narapela. Ol dispela strongpela gavman bai “subim,” o pait long narapela narapela, bilong stap olsem nambawan strongpela gavman long graun olgeta. Dispela bai mekim na ol bai yusim “ol gutpela gutpela samting,” o spendim planti mani tru, long redim militeri bilong ol.​—Daniel 11:40, 42, 43.

Bilong kisim sampela save moa long dispela narakain tok profet bilong Baibel, watsim dispela vidio Tok Profet i Kamap Tru—Daniel Sapta 11.

Hau bel isi tru bai kamap

• Baibel i tok olsem God bai senisim ol gavman bilong ol man long graun. Em “bai kamapim wanpela kingdom we i no inap bagarap. Na dispela kingdom i no inap go long han bilong ol narapela manmeri. Em bai brukbrukim i go liklik liklik na pinisim olgeta dispela kingdom, na em wanpela tasol bai stap oltaim oltaim.”​—Daniel 2:44.

• Klostu nau God Jehovaa bai mekim samting em ol man long graun i no inap mekim—Em bai kamapim bel isi tru we bai stap oltaim oltaim. Long wanem rot em bai mekim olsem? Long rot bilong Kingdom gavman bilong em long heven, dispela gavman bai bagarapim na pinisim olgeta wepen bilong pait na em bai pinisim tu vailens.​—Buk Song 46:8, 9.

Bilong kisim save moa long samting Kingdom Bilong God bai mekim, ritim dispela atikol “Aninit Long Kingdom Bilong God ‘Bel Isi Bai i Pulap.’”