Em i No Les Kwik na Em i Kisim Gutpela Blesing

Ol man i gat gutpela bel i laik bai famili bilong ol i kisim save long ol samting God bai mekim na bai ol i stap amamas. Taim wanpela i dediket long God, ating sampela, olsem ol yangpela na ol lapun tu, i bin helpim em long mekim olsem long rot bilong gutpela pasin bilong ol. Kain samting olsem i bin painim Jearim, em wanpela yangpela meri long Meksiko, em i bin givim wanpela liklik pas long ol brata long taim bilong wanpela bikpela de kibung bilong ol Witnes Bilong Jehova. Long pas em i tok olsem:

“Mi laik tokim yupela long amamas mi kisim. Pastaim mi laik stori long wanem as na mi amamas. Inap 18 yia i go pinis, taim mama i no karim mi yet, papamama bilong mi i kisim save long tok i tru. Mama i kamap strong, na bihain mi na liklik brata bilong mi i kamap strong tu. Mipela i save beten long Jehova olsem papa bilong mi tu em i ken kirap bihainim rot bilong laip. Orait 18 yia i lus pinis, na nau em i wanpela bikpela de bilong mipela. Papa bilong mi bai kisim baptais. Mi tenkyu long Jehova olsem em i no pinisim yet pasin bilong dispela graun na dispela taim mipela i bin wet long en i kamap. Tenkyu, Jehova!”

Inap planti yia, famili bilong dispela yangpela meri i bin bihainim stiatok i stap long 1 Pita 3:​1, 2, em i tok: “Yupela maritmeri, yupela i mas aninit long ol man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i inap tanim bel, long wanem, ol i lukim yupela meri i save wokabaut stret na aninit tru long ol.” Na Jearim yet i bin bihainim tok i stap long Lo 5:16: “Yupela i mas aninit long papamama bilong yupela na bihainim tok bilong ol, olsem mi God, Bikpela bilong yupela, mi tokim yupela.” Olsem na taim Jearim na famili bilong em i bihainim ol dispela stiatok na ol i bilip na wetim Jehova, ol i kisim gutpela blesing.