Gutpela Tok Bilong Stiaim Ol Marit
“Yupela meri, yupela i mas aninit long ol man bilong yupela, olsem yupela i save aninit long Bikpela. Yupela man, yupela i mas laikim tumas ol meri bilong yupela.”—EFESUS 5:22, 25.
1. Wanem tingting long marit i stret?
JISAS i tok marit i olsem God i pasim man na meri wantaim na mekim ol i kamap “wanpela bodi.” (Matyu 19:5, 6) Taim ol i marit i olsem man na meri i gat narapela narapela pasin ol i lain long laikim wankain samting na wok wantaim long winim ol mak tupela i laik winim. Marit em i olsem tupela i tok promis long i stap gut long poroman inap olgeta yia tupela i stap laip, i no olsem tupela i pasim tok long mekim wanpela samting inap sotpela taim tasol na bihain ol i lusim nating. Long planti kantri, i no hatwok long katim marit, tasol long tingting bilong ol Kristen, marit em i holi. Ol i katim marit long wanpela bikpela as tasol.—Matyu 19:9.
2. (a) I gat wanem helpim i stap bilong ol man na meri i marit? (b) Bilong wanem em i bikpela samting long wok strong long mekim marit i stap gutpela?
2 Wanpela meri i save helpim ol marit i tok: “Man na meri i gat gutpela marit, ol i redi long senis taim ol nupela samting i kamap, na ol i wok long stretim ol hevi, na ol i save mekim wok long ol gutpela helpim ol inap long kisim.” Long ol marit Kristen, ol dispela helpim em ol savetingting bilong Baibel, ol helpim i kam long ol wanbilip Kristen, na pasin bilong beten na stap klostu long Jehova. Gutpela marit i no save bagarap maski hevi i kamap, na insait long ol yia ol i marit em i save mekim man na meri marit i stap amamas na bel isi. Bikpela samting moa, em i save litimapim nem bilong God Jehova, em i As bilong marit.—Stat 2:18, 21-24; 1 Korin 10:31; Efesus 3:15; 1 Tesalonaika 5:17.
Bihainim Pasin Bilong Jisas na Kongrigesen Bilong Em
3. (a) Stori long ol tok Pol i givim long ol marit. (b) Jisas i mekim wanem na dispela i olsem gutpela piksa?
3 Inap tu tausen yia i go pinis, aposel Pol i givim gutpela tok long ol marit Kristen, em i tok: “Sios em i stap aninit long Krais. Olsem tasol yupela meri tu, oltaim yupela i mas aninit long ol man bilong yupela. Yupela man, yupela i mas laikim tumas ol meri bilong yupela, olsem Krais i laikim tumas sios na i givim laip bilong em yet bilong helpim sios.” (Efesus 5:24, 25) Tok hia i gutpela tru, a? Ol meri Kristen husat i mekim pasin daun na stap aninit long man bilong ol, ol i bihainim pasin bilong kongrigesen long i stap daun long wok bos. Ol man Kristen husat i save laikim tru meri bilong ol, maski tupela i stap gutpela o ol stap wantaim hevi, ol i kamapim olsem ol i bihainim tru pasin bilong Krais long laikim tru na lukautim gut kongrigesen.
4. Olsem wanem ol man marit i ken bihainim pasin bilong Jisas?
4 Ol maritman Kristen, ol i stap olsem het bilong famili bilong ol, tasol ol tu i gat het, em Jisas. (1 Korin 11:3) Olsem Jisas i bin lukautim kongrigesen bilong em, long gutpela pasin ol maritman i mas lukautim famili bilong ol long samting bilong spirit na long skin, na ol i mekim olsem maski ol i mas lusim sampela samting bilong ol yet. Ol i tingim samting bilong helpim famili bilong ol i bikpela moa, winim sampela laik bilong ol yet. Jisas i tok: “Olgeta pasin yupela i laik bai ol arapela manmeri i mas mekim long yupela, ol dispela pasin tasol yupela i mas mekim long ol.” (Matyu 7:12) Dispela stiatok i stret tru long ol marit. Pol i kamapim dispela long taim em i tok: “Yupela man, yupela i mas laikim tru ol meri bilong yupela, olsem yupela i save laikim bodi bilong yupela yet. . . . I no gat wanpela man i save birua long bodi bilong em yet. Nogat. Em i save givim kaikai long en na lukautim gut.” (Efesus 5:28, 29) Man i mas givim kaikai na tingim tru meri bilong em wankain olsem em i save givim kaikai na tingim tru em yet.
5. Olsem wanem ol meri marit i ken bihainim wankain pasin olsem kongrigesen Kristen?
5 Ol maritmeri i lotuim God ol i tingim kongrigesen Kristen olsem gutpela piksa ol i ken bihainim. Taim Jisas i stap long graun, lain bilong em i amamas long lusim ol samting ol yet i mekim na bihainim em. Bihain long em i dai, ol i daun yet long em, na insait long 2,000 yia i kam inap long nau, kongrigesen Kristen tru i daun yet long Jisas na bihainim wok bos bilong em long olgeta samting. Long wankain pasin ol meri Kristen i marit ol i no save les long man bilong ol o tingim wok bos insait long marit olsem Baibel i makim i olsem samting nating, nogat. Ol i save helpim man bilong ol na stap aninit long ol, na wok gut wantaim ol, na long dispela rot ol i strongim bel bilong ol. Taim man na meri marit i bihainim gutpela pasin olsem, marit bilong ol bai stap gut na givim amamas long tupela wantaim.
Stap Yet Wantaim Ol
6. Pita i givim wanem tok long ol maritman? Bilong wanem dispela tok em i bikpela samting?
6 Aposel Pita tu i givim gutpela tok long ol marit, na tok em i mekim long ol maritman i strong tru. Em i tok: “Yupela i mas bihainim gutpela tingting na sindaun gut wantaim ol meri bilong yupela. Bodi bilong ol meri i no strong tumas, olsem na yupela i mas mekim gutpela pasin [“givim ona,” NW ] long ol. Yupela i mas save olsem, ol meri tu bai i kisim laip bilong i stap oltaim. Sapos yupela i bihainim dispela pasin, orait i no gat wanpela samting bai i pasim ol prea bilong yupela.” (1 Pita 3:7) Laspela hap bilong dispela ves i kamapim klia tok bilong Pita em i bikpela samting tru. Sapos maritman i no soim ona long meri bilong em, bai em i no stap wanbel wantaim Jehova. Pasin em i mekim i pasim rot bilong ol prea bilong em.
7. Olsem wanem man marit i givim ona long meri bilong em?
7 Olsem wanem ol man marit inap givim ona long meri bilong ol? Man i givim ona long meri bilong em i save mekim ol pasin long meri i soim olsem em i laikim em, rispek long em, na tingim em i gat biknem. Ating planti i bin ting dispela pasin bilong mekim gut long meri marit i narapela kain. Wanpela saveman Grik i tok: “Aninit long lo bilong ol Rom ol meri i no gat raits bilong ol. Lo i tok meri i wankain olsem pikinini. . . . Em i stap aninit olgeta long man bilong em, na man i ken mekim wanem wanem samting long meri em i laikim.” Dispela i narapela kain tru long bilip Kristen! Man Kristen i save givim ona long meri bilong em. Ol stiatok Kristen i stiaim ol pasin em i mekim long meri, i no laik i kamap nating long bel, nogat. Na tu, man i tingim meri na “bihainim gutpela tingting,” em i save olsem bodi bilong meri i no strong tumas.
Olsem Wanem “Bodi Bilong Ol Meri i No Strong Tumas”?
8, 9. Long wanem ol rot ol meri i wankain olsem ol man?
8 Taim Pita i tok “bodi bilong ol meri i no strong tumas,” em i no ting olsem man i gat gutpela save moa o strong moa long ol samting bilong spirit, winim meri. Tru, planti man Kristen i gat ol gutpela wok insait long kongrigesen, em ol meri i no gat tingting long mekim, na insait long famili ol meri i mas daun long man bilong ol. (1 Korin 14:35; 1 Timoti 2:12) Tasol ol man na meri wantaim i mas kamapim wankain pasin bilong stap strong long bilip, sanap strong na karim hevi, na bihainim ol stretpela lo. Na olsem Pita i tok, man na meri marit tupela wantaim “bai i kisim laip bilong i stap oltaim.” Ol man na meri i stap wankain long ai bilong Jehova, em i laik kisim bek tupela wantaim. (Galesia 3:28) Pita i bin raitim dispela pas long ol Kristen God i makim long holi spirit em ol i stap long taim bilong ol aposel. Olsem na tok bilong em i kirapim tingting bilong ol man Kristen olsem ol i insait long wanpela lain em ol ‘bai kisim ol gutpela samting God i promis long givim, em ol samting bilong Krais,’ olsem ol yet wantaim ol meri bilong ol bai go long heven. (Rom 8:17) Bihain, ol man na meri wantaim bai mekim wok olsem ol pris na king long Kingdom Bilong God long heven!—KTH 5:10.
9 Ol maritmeri Kristen em God i makim, ol i gat wankain namba olsem man bilong ol em God i makim. Na i wankain long ol lain bilong kisim laip oltaim long graun. Ol man na meri wantaim bilong lain “planti manmeri tru,” ol i wasim ol klos bilong ol long blut bilong Pikinini Sipsip, na klos i kamap waitpela. Ol man na meri wantaim i insait long wok bilong givim biknem long Jehova long “san na long nait” long olgeta hap. (KTH 7:9, 10, 14, 15) Ol man na meri wantaim i wetim taim ol i “kamap fri bilong kisim glori bilong ol pikinini bilong God,” na amamas long dispela laip em “laip tru.” (Rom 8:21, King Jems Nupela Testamen; 1 Timoti 6:19) Maski ol i bilong liklik lain o bikpela lain sipsip, olgeta Kristen wantaim i mekim wok bilong Jehova na stap olsem “wanpela lain sipsip” aninit long “wanpela wasman.” (Jon 10:16) Dispela em i bikpela samting tru i mas kirapim man na meri Kristen i marit long givim ona long poroman bilong ol!
10. Olsem wanem “bodi bilong ol meri i no strong tumas”?
10 Orait, olsem wanem “bodi bilong ol meri i no strong tumas”? Ating Pita i tingim sais bilong ol meri. Planti taim ol man i bikpela moa long meri na ol meri i no gat bikpela strong olsem ol man. Na tu, skin bilong yumi i no gutpela olgeta, olsem na gutpela wok tru bilong karim pikinini i mekim bikpela samting long helt bilong meri. Ol meri husat inap long karim yet pikinini, i gat haptaim long olgeta mun we ol i save pilim sik liklik. Ol narapela i mas lukautim ol gut na tingim ol long dispela taim na long taim ol i karim hevi na lusim bikpela strong long taim ol i gat bel na long taim ol i karim pikinini. Man marit i givim ona long meri bilong em, em i luksave olsem em i mas strongim bel bilong meri, na dispela i bikpela samting tru bilong helpim marit i stap gut.
Taim Famili i No Wanbel Long Lotu
11. Olsem wanem marit inap stap gut, maski man na meri marit i bilong narapela narapela lotu?
11 Olsem wanem sapos tupela marit i no wanbel long lotu, long wanem, tupela i marit pinis na bihain wanpela tasol i kisim tok i tru bilong Baibel? Yu ting kain marit olsem inap stap gut? Yes, planti marit olsem i stap gut. Sapos man na meri marit i no wanbel long lotu, marit bilong inap i stap gut, olsem marit i ken stap strong na givim amamas long tupela wantaim. Na long ai bilong Jehova tupela i stap marit yet; ol i stap yet olsem “wanpela bodi.” Olsem na ol Kristen i marit ol i mas i stap wantaim poroman bilong ol i no bilip, sapos poroman i orait long dispela. Sapos ol pikinini i stap, ol i ken kisim gutpela helpim long rot bilong papa o mama Kristen bilong ol.—1 Korin 7:12-14.
12, 13. Olsem Pita i tok, olsem wanem ol meri Kristen inap helpim man bilong ol i no bilip?
12 Pita i givim gutpela tok long ol maritmeri Kristen em ol i gat poroman i no bilip. Tok bilong Pita i stret tu long ol man Kristen i gat wankain sindaun. Pita i tok: “Yupela maritmeri, yupela i mas aninit long ol man bilong yupela. Na sapos sampela bilong ol dispela man i no save bihainim tok bilong God, orait ol i ken lukim gutpela pasin bilong yupela meri bilong ol. Na maski yupela i no mekim wanpela tok long ol, bai ol i inap tanim bel, long wanem, ol i lukim yupela meri i save wokabaut stret na aninit tru long ol.”—1 Pita 3:1, 2.
13 Sapos meri inap toktok wantaim man bilong em long bilip bilong em, dispela em i gutpela. Tasol olsem wanem sapos man i no laik putim yau long tok bilong em? Dispela em i samting bilong man yet long makim. Tasol i no olsem i no gat rot, long wanem, gutpela pasin bilong wanpela Kristen i stap olsem strongpela witnes long ol narapela. Planti maritman, ating pastaim ol i no laik harim tok o ol i bin birua long bilip bilong meri bilong ol, tasol bihain ‘ol i bilip’ taim ol i lukim gutpela pasin meri bilong ol i mekim. (Aposel 13:48) Na sapos man i no kisim tok i tru, ating em i amamas yet long pasin bilong meri bilong em, na dispela inap helpim marit bilong ol. Wanpela man em meri bilong em i wanpela Witnes Bilong Jehova, em i tok em yet i no inap bihainim ol stretpela lo ol Witnes i save bihainim. Tasol em i tok em i “amamas long i stap marit long wanpela gutpela meri olsem” na long wanpela pas em i salim i go long wanpela niuspepa em i litimapim nem bilong meri bilong em na bilong ol Witnes.
14. Olsem wanem ol man marit i ken helpim meri bilong ol i no bilip?
14 Ol man marit husat i bihainim ol stiatok bilong tok bilong Pita, ol tu i bin kamapim ol gutpela pasin na dispela i helpim meri bilong ol long tanim bel na bilip. Ol meri i no bilip, ol i bin lukim man bilong ol i kirap mekim ol wok bilong em, lusim pasin bilong tromoi nating mani long smok, dring, na pilai laki, na ol i no mekim moa ol tok nogut. Sampela i bin bungim sampela arapela Witnes bilong kongrigesen Kristen. Ol i pilim tru gutpela pasin i stap insait long lain brata Kristen, na dispela i kirapim ol long go klostu long Jehova.—Jon 13:34, 35.
“Bilasim Insait”
15, 16. Wanem kain pasin bilong meri Kristen inap helpim man bilong em long tanim bel na kisim bilip?
15 Wanem kain pasin inap kirapim man marit long tanim bel na bilip? Yumi ken tok em pasin olgeta meri Kristen i wok strong long kamapim. Pita i tok: “No ken bilasim skin ausait tasol, long pasin bilong bilasim gras na putim bilas gol na kain kain naispela klos. Nogat. Mobeta yupela i bilasim insait bilong yupela tu long olkain bilas i no inap long bagarap. Dispela kain bilas em pasin bilong i stap belgut na i stap bel isi. Dispela kain pasin em i gutpela moa yet long ai bilong God. Ol meri bilong bipo olsem Sara i bin givim laip bilong ol yet long God na wetim em i mekim ol samting em i bin promis long mekim, ol i save bilasim ol yet long dispela kain pasin, na ol i stap aninit long man bilong ol. Sara i bin bihainim tok bilong Abraham na i kolim em ‘bikman.’ Sapos yupela i save mekim gutpela pasin, na yupela i no pret long wanpela samting, orait yupela i olsem ol pikinini bilong Sara.”—1 Pita 3:3-6.
16 Pita i tokim ol meri Kristen long ol i no ken bilip tumas long samting ai inap lukim. Mobeta meri i helpim man bilong em long luksave long olsem wanem ol tok bilong Baibel i bilasim insait bilong em. Meri i laik bai man i lukim nupela pasin bilong em. Ating man bai skelim nupela pasin wantaim olpela pasin meri i bin kamapim long bipo. (Efesus 4:22-24) Bai em i amamas na kisim nupela strong long pasin bilong meri long ‘stap belgut na bel isi.’ Dispela pasin i amamasim man bilong em, tasol tu, em i “gutpela moa yet long ai bilong God.”—Kolosi 3:12.
17. Olsem wanem Sara i stap olsem gutpela piksa long ol meri Kristen i ken bihainim?
17 Baibel i makim Sara olsem gutpela piksa long bihainim, olsem na i gutpela long ol meri Kristen i bihainim pasin bilong em maski man bilong ol i wanbilip o nogat. Tru tumas, Sara i tingim Abraham olsem het bilong em. Long bel bilong em, em i save kolim Abraham olsem “bikman” bilong em. (Stat 18:12) Tasol dispela i no daunim Sara. Em i wanpela meri i strong long ol samting bilong spirit na em i bilip strong long Jehova. Tru tumas, em i wanpela bilong “ol dispela manmeri bilong bipo ol i sanap na raunim yumi i stap olsem bikpela klaut.” Bilip bilong ol i mas kirapim yumi long “ran strong long dispela resis God i bin makim bilong yumi ran long en.” (Hibru 11:11; 12:1) Sapos meri Kristen i bihainim pasin bilong Sara, dispela i no daunim em.
18. Wanem ol stiatok i stret long ol famili i no stap wanbel long bilip?
18 Taim famili i no wanbel long lotu, man i stap yet olsem het bilong famili. Sapos man em i wanpela bilipman, em i mas rispek long lotu bilong meri bilong em, tasol bai em i no mekim ol samting i no stret wantaim bilip bilong em yet. Sapos meri em wanpela bilipmeri, orait, em tu bai i no mekim samting i no stret wantaim bilip bilong em. (Aposel 5:29) Tasol bai em i no sakim wok bos bilong man bilong em. Bai em i rispek long namba man i holim na stap aninit long “lo i bin pasim em wantaim man.”—Rom 7:2.
Gutpela Tok Bilong Baibel
19. Wanem sampela samting i save putim hevi long marit? Olsem wanem ol marit i ken sakim ol dispela hevi?
19 Long nau planti samting inap putim hevi long marit. Sampela man i no save mekim wok bilong ol. Sampela meri i no laik daun long wok bos bilong man bilong ol. Pasin bilong mekim nogut long poroman i stap insait long sampela marit. Hevi bilong mani, sin i stap long yumi, na spirit bilong dispela graun wantaim ol pasin nogut na tingting kranki long ol stretpela lo, ol dispela samting inap traim tru pasin bilong wanpela Kristen long stap gut long narapela. Tasol ol man na meri Kristen husat i bihainim ol stiatok bilong Baibel, maski ol i gat wanem kain sindaun, Jehova bai mekim gut long ol. Na sapos wanpela poroman tasol i bihainim ol stiatok bilong Baibel, orait dispela bai helpim marit; tasol sapos tupela wantaim i sakim ol dispela stiatok hevi bai bikpela moa. Na tu, Jehova i laikim tru na helpim ol wokboi bilong em husat i stap gut long tok promis bilong marit bilong ol, maski ol i gat hevi long mekim olsem. Bai em i no lusim tingting long pasin bilong ol long stap gut long poroman.—Song 18:25; Hibru 6:10; 1 Pita 3:12.
20. Pita i tok wanem long olgeta Kristen?
20 Bihain long em i givim dispela tok long ol man na meri marit, aposel Pita i mekim tok i strongim bel. Em i tok: “Nau mi laik pinisim dispela tok olsem, yupela olgeta i mas i stap wanbel na sori long olgeta man. Yupela i mas laikim tru ol arapela manmeri bilong God na marimari long ol, na lusim pasin bilong bikhet. Sapos ol man i mekim nogut long yupela, orait yupela i no ken bekim. Sapos ol i tok nogut long yupela, orait yupela i no ken bekim tok nogut bilong ol. Nogat. Yupela i mas bekim long dispela pasin. Yupela i mas beten long God i ken mekim gut long ol. God i bin singautim yupela long mekim olsem, bai yupela yet i ken kisim blesing bilong en.” (1 Pita 3:8, 9) Dispela em i gutpela tok long bihainim, na moa yet long ol marit!
Yu Inap Tingim?
• Olsem wanem ol man Kristen i bihainim pasin bilong Jisas?
• Olsem wanem ol meri Kristen i bihainim pasin bilong kongrigesen?
• Long wanem rot ol man marit inap givim ona long meri bilong ol?
• I gutpela sapos meri Kristen i bihainim wanem kain pasin sapos man bilong em i no gat wankain bilip?
[Piksa long pes 16]
Man Kristen i save laikim tru na lukautim gut meri bilong em
Meri Kristen i save givim rispek na ona long man bilong em
[Piksa long pes 17]
Bilip Kristen i tok man i mas givim ona long meri bilong em, lo bilong ol Rom i no tok olsem
[Piksa long pes 18]
Ol man na meri bilong bikpela lain, tupela wantaim i tingting long kisim laip oltaim long Paradais
[Piksa long pes 20]
Sara i tingim Abraham olsem bikman bilong em