Mi Painim Samting i Gutpela Tru Long Ostrelia

EM EPRIL 1971. Mi bin stap 7-pela yia long Ostrelia na nau mi kam lukim famili bilong mi long kantri Grik. Wanpela apinun mi sindaun isi long wanpela liklik haus kaikai long Kares, long hap ol man bilong ples i save bung long en, na nau pris na nambawan kaunsil bilong ples i kam sindaun klostu long mi. Mi save tupela i kam bilong tok kros wantaim mi.

Tupela i no gude long mi na kwiktaim pris i sutim tok long mi na tok, mi bin go long Ostrelia bilong painim mani tasol. Mi kirap nogut tru long tok bilong em, tasol mi stap bel isi na mi tok, long Ostrelia mi painim wanpela samting i winim tru mani.

Em i kirap nogut tru na em i laik save long as bilong tok bilong mi. Mi tokim em mi bin lain long planti samting, na wanpela samting, em nem bilong God. Mi lukluk stret long ai bilong pris na mi tokim em: ‘Em wanpela samting yu no bin lainim mi long en.’ Em i no opim maus yet na mi tok: ‘Yu inap tokim mi long nem bilong dispela God Jisas i stori long em taim em i lainim yumi long beten na em i tok: “Nem bilong yu i mas i stap holi”?’​—Matyu 6:9.

Kwiktaim planti man i kisim save long dispela tok bilong mipela, olsem na insait long 10-pela minit inap 200 manmeri i kam bung. Pris i no amamas long dispela. Em i no bekim askim bilong mi long nem bilong God, na ol narapela askim mi givim long em long Baibel, em i no givim gutpela bekim. Em i sem pipia, olsem na planti taim em i singautim weta bilong haus kaikai long givim dring long em.

Inap tupela aua mipela toktok. Papa i kam painim mi, tasol taim em i lukim mipela i toktok, em i sindaun isi na wet i stap. Mipela toktok i go inap biknait na nau wanpela spakman i kros na singaut singaut, olsem na mi tokim ol man mobeta mipela olgeta i go slip.

Wanem samting i mekim na dispela pris na nambawan kaunsil i laik tok kros wantaim mi? Mi ken stori long sindaun bilong mi taim mi go bikpela long dispela hap bilong Grik na bai yu save.

Ol Hevi Taim Mi Yangpela

Mama i bin karim mi long liklik ples Kares long Peloponisos, long Disemba 1940. Mipela i rabis stret. Sampela taim mi go long skul, sampela taim nogat. Taim mi no skul, mi save wok wantaim mama long ol gaden rais. Wara long gaden rais i save kam antap inap long skru bilong lek na mitupela i sanap na wok olsem kirap long tulait i go inap long taim san i go daun. Taim mi gat 13 krismas mi pinis long komyuniti skul na papamama i stretim rot bilong mi ken lain long wok plama na wok bilong stretim ol windo. Man i skulim mi long dispela wok i save kisim 500 kilo wit na 20 kilo wel long papamama. Dispela i klostu pe olgeta bilong papamama long wanpela yia.

Taim mi lain long dispela wok mi hatwok tru. Ples wok i stap longwe, na planti taim mi kirap wok long tulait i go inap biknait. Sampela taim mi tingting long go bek long papamama, tasol mi no laik bagarapim bel bilong tupela, long wanem, ol i bin lusim bikpela mani bilong helpim mi. Olsem na mi no kamapim ol hevi bilong mi long tupela. Mi tokim skin bilong mi: ‘No ken les, maski i gat planti hevi.’

Wan wan taim mi inap go lukim papamama. Taim mi gat 18 krismas, mi pinis long lain long wok. Mi laik go long nambawan biktaun Atens, long wanem, i gat planti wok mani long en. Mi kisim wok mani na mi baim wanpela rum. Olgeta de taim wok i pinis mi kukim kaikai na klinim rum, na long liklik hap taim i stap yet mi bin wok long lain long tok Inglis, tok Jeman, tok Itali.

Mi tingting planti long ol tok doti na pasin nogut bilong ol narapela yangpela, olsem na mi no save bung wantaim ol. Tasol dispela i mekim na mi pilim olsem mi stap wanpis. Taim mi gat 21 krismas mi mas bihainim tok bilong gavman na insait long ami, tasol mi stadi yet long ol narapela tok ples. Mi lusim ami, na long Mas 1964 mi lusim ples na go long Melbon, long Ostrelia.

Painim Lotu Long Nupela Kantri

Kwiktaim mi kisim wok mani, na mi bungim wanpela meri Grik, em Alexandra, em tu i bin lusim ples na kam long Ostrelia. Sikspela mun bihain long mi kamap long Ostrelia, mitupela i marit. Long 1969, wanpela lapun meri, em wanpela Witnes Bilong Jehova, em i kam long haus bilong mipela na tilim nius Wastaua na Kirap! Mi laikim tru dispela tupela nius, olsem na mi putim gut na tokim meri bilong mi, em i no ken tromoi. Wanpela yia bihain tupela Witnes i kam long haus na tok ol i laik stadi Baibel wantaim mi, no gat pe. Mi orait long dispela. Man! Samting mi lain long en em samting mi bin wok long painim bilong save i gat as tru bilong i stap bilong mi o nogat.

Taim wanpela meri klostu long mipela i save mi stadi wantaim ol Witnes, em i tokim mi long go long misin Evanjelik, em gutpela lotu. Olsem na mi stadi tu wantaim wanpela elda bilong misin Evanjelik. I no longtaim na mi kirap i go long ol miting bilong ol Evanjelik na ol Witnes. Mi mekim olsem bambai mi ken save long lotu i tru.

Na mi tingting: Mi bin go bikpela olsem wanpela Grik, na i stret sapos mi skelim lotu Otodoks tu. Insait long wanpela de mi bin go long 3-pela haus lotu Grik Otodoks. Long namba wan haus lotu mi tokim pris bilong wanem mi kam. Em i no amamas na em i laik bai mi lusim haus lotu. Taim mi wokabaut i go, em i tok i no stret mipela ol Grik i bung wantaim ol Witnes na ol Evanjelik.

Mi kirap nogut tru long tok na pasin bilong dispela pris, tasol mi tingting: ‘Ating ol narapela pris i no olsem dispela pris.’ Tasol long namba 2 haus lotu, pris i mekim wankain tok na pasin long mi. Tasol em i tokim mi, long olgeta Sarere long apinun long dispela haus lotu, wanpela tisa bilong lotu i save lukautim wanpela Baibel-stadi klas. Mi go long namba 3 haus lotu na mi no amamas long samting i painim mi long dispela haus lotu tu.

Tasol mi go long dispela Baibel-stadi klas long namba 2 haus lotu long Sarere antap. Mi amamas long lukim Baibel taim tisa bilong lotu i kaunim Buk Aposel. Taim mipela kaunim dispela hap i stori long Kornilius i brukim skru long Pita, tisa i tok, taim Pita i tokim Kornilius em i no ken mekim dispela samting long em, i stret, long wanem, Pita i no laik Kornilius i lotu long em. (Aposel 10:​24-26) Nau mi apim han na tokim tisa mi gat wanpela askim.

‘Yes, yu laik save long wanem samting?’

‘Sapos aposel Pita i no laik bai Kornilius i lotu long em, bilong wanem yumi save lotuim piksa bilong Pita?’

Inap sampela sekon i no gat wanpela i toktok. Orait nau bikpela pairap i kamap, olsem wanpela bom​—ol i belhat na singaut olsem: ‘Yu husat?’ Inap tupela aua mipela i tok resis na singaut i go i kam. Taim mi laik lusim ol, ol i givim wanpela buk long mi.

Taim mi opim buk, namba wan tok mi kaunim i olsem: ‘Mipela i Grik na misin bilong mipela i bin kapsaitim blut bilong lukautim lotu bilong mipela.’ Mi save God i no God bilong ol Grik tasol, olsem na mi lusim misin Grik Otodoks. Kirap long dispela taim mi stadi wantaim ol Witnes tasol. Long Epril 1970 mi kisim baptais bilong makim olsem mi dediket long Jehova, na sikspela mun bihain meri bilong mi i baptais.

Pris Bilong Ples i Salim Pas

Klostu long pinis bilong yia 1970, pris bilong ples bilong mi i salim pas na askim mi long salim mani bilong stretim haus lotu long ples. Mi no salim mani, mi salim pas na buk Tok i Tru i Bringim Man Long Laip Oltaim i go long em. Mi tokim pris nau mi wanpela Witnes Bilong Jehova na mi painim pinis tok i tru. Taim em i kisim pas bilong mi, em i tokim ol man i kam lotu olsem, wanpela Grik i go sindaun long Ostrelia i mekim pasin bikhet long lotu Otodoks.

Bihain, ol mama i gat pikinini man long Ostrelia, ol i askim askim pris, em pikinini bilong ol yet o nogat. Mama bilong mi i go long haus bilong pris na askim em, em pikinini bilong em o nogat. Pris i tok: ‘Yes, em pikinini bilong yu.’ Bihain mama i tokim mi, mobeta pris i bin kilim em i dai, long wanem, bel bilong em i bagarap tru taim pris i tokim em, pikinini bilong em i bin bikhet long lotu.

Go Bek Long Grik

Bihain long mitupela meri bilong mi i baptais, mipela i laik go bek long Grik na tokim famili na ol pren long ol gutpela samting mipela i bin lain long en long Baibel. Olsem na long Epril 1971, mitupela wantaim pikinini meri i gat 5-pela krismas, em Dimitria, mipela go malolo long ples. Mipela sindaun long taun Kiparisia, em longwe olsem 30 kilomita long liklik ples bilong mi, Kares. Tiket bilong balus mipela i holim, em bilong i stap olsem 6-pela mun.

Long namba 2 apinun mipela i stap long ples, mama i kirap na krai na tok mi bin bagarapim nem bilong famili na mi popaia taim mi lusim lotu. Mama i krai na askim mi long lusim dispela pasin “kranki.” Bihain em ai raun na pundaun long han bilong mi. Long de bihain mi traim toktok gut wantaim em. Mi tokim em, samting mi mekim em bilong kisim sampela save moa long God, em ol samting mama i bin skulim mi long en taim mi liklik yet. Long apinun bihain, em dispela taim pris na nambawan kaunsil i bin tok kros wantaim mi, olsem mi stori pinis.

Long taim bilong malolo long Ista, tupela liklik brata wanblut bilong mi i lusim Atens na kam lukim mi. Tupela i mekim long mi olsem mi wanpela lepraman. Tasol bihain wanpela brata i wok long harim tok bilong mi. Inap sampela aua mipela toktok long Baibel na em i wanbel long tok bilong mi. Kirap long dispela de stret em i sambai long mi taim ol narapela long famili i kros long mi.

Planti taim mi go lukim dispela brata long Atens. Taim mi go, em i save singautim sampela famili i kam na harim gutpela tok bilong Baibel. Amamas bilong mi i no liklik taim dispela brata na meri bilong em, na 3-pela famili tupela yet i bin stadi Baibel wantaim ol, ol i baptais bilong makim olsem ol i dediket long Jehova!

Ol wik i kamap i go pinis kwiktaim na klostu long pinis bilong 6-pela mun bilong mipela i stap long ples, wanpela Witnes i kam. Em i stap long wanpela kongrigesen inap 70 kilomita longwe long liklik ples bilong mipela. Em i stori olsem i no gat man bilong autim tok long dispela hap na em i askim mi, mi bin tingting long stap olgeta o nogat. Long dispela nait mi stori long dispela samting wantaim meri bilong mi.

Mitupela i save sapos mipela i stap olgeta, mipela bai hatwok. Tasol mipela i save, i gat bikpela wok long helpim ol man long save long tok i tru bilong Baibel. Olsem na mipela pasim tok long stap wanpela o tupela yia. Meri bilong mi bai go bek long Ostrelia bilong baim haus na ka bilong mipela i go long ol man na kisim sampela kago bilong mipela i kam. Long de bihain mitupela i go long taun bilong baim long wik wanpela haus na putim pikinini bilong mipela long komyuniti skul.

Planti Birua

I no longtaim na ol birua i wok strong long daunim mipela. Ol polis na het-tisa na ol tisa​—olgeta i birua. Long skul Dimitria i no laik mekim mak bilong kruse, olsem na ol bikman bilong skul i singautim wanpela polis bilong pretim em long mekim mak bilong kruse, tasol Dimitria i no mekim. Het-tisa i singautim mi na em i soim wanpela pas asbisop i bin raitim. Pas i tok mi mas kisim Dimitria na em i no ken skul moa. Inap longpela taim liklik mi stori wantaim het-tisa, olsem na em i larim Dimitria i skul yet.

Bihain mi kisim save olsem i gat tupela marit i stap long Kiparisia na tupela i bin go long wanpela kibung bilong ol Witnes. Mipela i kirapim tupela long tingim gen tok i tru. Na mitupela i bin singautim sampela Witnes i stap long narapela liklik ples klostu long kam long haus bilong mipela, na mipela olgeta inap stadi wantaim long Baibel. Tasol i no longtaim na polis i kam na kisim mipela olgeta i go long polis-tesin na ol i givim sampela askim long mipela. Ol i kotim mi na tok, i no stret mi mekim wok long haus bilong mi olsem wanpela haus lotu na mi no gat laisens bilong mekim olsem. Ol i no kalabusim mipela, olsem na mipela i mekim yet ol miting.

Mi kisim wok mani, tasol taim bisop i harim, em i mekim strongpela tok long bos olsem em bai pasim stua bilong em sapos em i no rausim mi long wok. Papa bilong wanpela stua plama i laik baim stua i go long ol man, olsem na mipela i baim. Kwiktaim 2-pela pris i kam na tokim mipela ol bai pasim stua, na sampela wik bihain long dispela, asbisop i tok, famili bilong mipela i raus long lotu Otodoks. Long dispela taim, ol wanples i no laik poroman wantaim man i raus long lotu Grik Otodoks. Wanpela polis i sanap long stua bilong mipela, olsem na man i no inap kam na baim sampela samting. Maski i no gat man i kam na baim samting, mipela i no pasim stua. Olgeta man long taun i save stori long hevi bilong mipela.

Polis i Holim na Kotim Mipela

Wanpela Sarere mi na wanpela man i kalap long motabaik bilong em na go autim tok long wanpela taun klostu. Long dispela taun polis i holim mipela na kisim mipela i go long polis-tesin. Ol i pasim mipela inap Sarere na Sande. Long moningtaim long Mande ol i kisim mipela i go bek long Kiparisia long tren. Kwiktaim ol man i save polis i bin holim mipela, olsem na planti man i kam bung long stesin bilong tren bilong lukim mipela na ol polis.

Polis i kisim mak bilong pinga bilong mipela na bihain ol i kisim mipela i go long man bilong wokim kot. Dispela man i tok, em bai kaunim long maus ol tok polis i kisim long ol man bilong ples, em ol man i sutim tok long mipela. Namba wan tok bilong ol i olsem: ‘Ol i tokim mipela olsem long 1914 Krais Jisas i kamap King pinis.’

Man bilong wokim kot i askim mipela olsem: ‘Yupela kisim we dispela narapela kain tingting?’

Wanpela Baibel i stap long tebol bilong em, olsem na mi kisim na opim long Matyu sapta 24. Mi askim em long kaunim. Em i wet liklik, tasol bihain em i kirap na kaunim. Em i kaunim i go inap sampela minit na bihain em i tok: ‘Man! Sapos dispela tok i stret, mobeta mi lusim olgeta samting bilong mi na go insait long wanpela haus bruder!’

Mi tok isi olsem: ‘Nogat. Yu mas lainim tok i tru bilong Baibel na bihain helpim ol narapela man long painim tok i tru.’

Ol loya i kamap na mipela inap autim tok long sampela. Nau ol i kirap na kotim mipela long dispela samting, long wanem, ol i tok mipela i subim man long bihainim narapela lotu!

Long dispela yia mipela i kot 3-pela taim, tasol mipela i winim kot. Dispela i mekim na nau tingting bilong ol man long mipela i wok long senis. Kirap long dispela taim ol i no pret long mipela na ol i harim tok bilong mipela long Kingdom bilong God.

Bihain dispela liklik grup long haus bilong mipela long Kiparisia i kamap wanpela kongrigesen. Wanpela elda Kristen i kam long nupela kongrigesen bilong mipela, na mi kamap wanpela wokman bilong kongrigesen. I no longtaim tumas na 15 Witnes i save kam oltaim long ol miting long haus bilong mipela.

Go Bek Long Ostrelia

Taim 2-pela yia na 3-pela mun i pinis, mipela tingting long go bek long Ostrelia. Ol yia i kam i go kwiktaim. Pikinini meri bilong mi, em Dimitria, em i stap strong long bilip na em i marit long wanpela wokman bilong wanpela kongrigesen long Melbon. Na mi save mekim wok elda long wanpela kongrigesen tok Grik long Melbon. Meri bilong mi na pikinini meri i gat 15 krismas, em Martha, ol tu i save go long dispela kongrigesen.

Nau lain Witnes long Kiparisia i go bikpela moa na planti man i gat gutpela bel ol i save harim tok i tru bilong Baibel. Long 1991, inap sampela wik mi bin go bek long ples. Long Kiparisia mi bin givim wanpela pablik-tok long Baibel na i gat 70 i harim dispela tok. Mi amamas tru nau yangpela susa bilong mi, em Maria, em i wanpela wokmeri bilong Jehova maski famili i birua long em.

Long Ostrelia mi painim pinis wanpela gutpela samting​—em save long Man bilong wokim yumi, God Jehova, na long Kingdom bilong em, olsem na mi amamas tru. Nau i stap bilong mi i gat gutpela as tru. Mi wantaim famili bilong mi, i save wetim ol blesing gavman bilong God long heven klostu nau bai kamapim long olgeta hap graun.​—Em stori bilong George Katsikaronis.

[Piksa long pes 23]

Kiparisia, em ples mi bin sindaun long en taim mi lusim Ostrelia

[Piksa long pes 23]

Mi wantaim meri bilong mi, Alexandra