Mi Mekim Wok Bilong God Yumi Ken Bilip Tru Long Em
Em stori bilong Kimon Progakis
Long 1955, long wanpela nait i kol nogut tru, mi wantaim meri bilong mi, Giannoula, i kirap long tingting planti, long wanem, pikinini man bilong mipela, George, i gat 18-pela krismas, em i no kam yet long ples wok bilong em long haus kaikai. Mipela i stap olsem, na nau wanpela polis i kam paitim dua. Em i tok: “Taim pikinini bilong yu i kikim wilwil i kam bek long haus, wanpela ka i bamim em na em i dai pinis.” Orait nau em i kam klostu liklik na tok isi olsem: “Ol bai tokim yupela olsem birua i bin painim em, tasol mi save pinis, sampela man i bin kilim em i dai.” Pris bilong dispela hap na sampela bos bilong ol paitman ol i bin pasim tok long kilim em i dai.
PAIT na hevi i bin kisim kantri Grik, na insait long ol yia kantri Grik i wok long kamap strong gen, sapos man i wanpela Witnes Bilong Jehova, bagarap inap painim em. Mi save pinis long strong bilong Misin Grik Otodoks na bilong ol lain paitman, long wanem, winim 15 yia pinis mi bin wok strong olsem wanpela memba bilong ol. Mi laik tokim yu long ol samting i bin kamap na dispela hevi i painim mipela famili winim 40 yia i go pinis.
Mi Go Bikpela Long Kantri Grik
Mama i karim mi long wanpela liklik ples klostu long taun Kalkis, long kantri Grik, long yia 1902. Mi bilong wanpela famili i gat planti mani. Papa i insait long ol wok politik bilong ples, na mipela famili i strongpela memba bilong Misin Grik Otodoks. Mi kamap man bilong kaunim planti buk bilong lotu na ol wok politik, tasol klostu olgeta wankantri bilong mi long dispela taim ol i no save long rit rait.
Long yia 1900 samting, planti man i stap rabis, na i no gat stretpela kot long sampela man, na dispela samting i bin kirapim laik long bel bilong mi long wanpela taim i ken kamap na bai ol man i gat gutpela sindaun. Ol wankantri bilong mi ol i stap tarangu, na mi ting lotu inap helpim ol long kisim gutpela sindaun. Mi man bilong lotu, olsem na ol bikman bilong ples ol i laik bai mi kamap pris bilong lotu Grik Otodoks long hap bilong mipela. Tasol maski mi bin go long planti haus bruder na toktok longpela taim wantaim ol bisop na ol bos bilong ol bruder, mi pilim olsem mi no redi, na tu, mi no gat laik long mekim dispela wok.
Ol Lain Bilong Kantri Yet i Pait
Planti yia bihain, long Epril 1941, lain Natsi i kirap long bosim kantri Grik. Dispela i mekim na planti man i dai long han bilong narapela, na kaikai i sot, na ol man i lus long planti samting, na ol i kisim bikpela pen na hevi. Wanpela strongpela lain i kamap na ol i pait long sakim ol Natsi, na mi insait long wanpela grup i pait long ol dispela man i kam kisim kantri bilong mipela. Dispela i mekim na tripela taim samting ol i kirapim paia long haus bilong mi, na sutim mi long gan, na bagarapim kaikai long gaden bilong mi. Olsem na long kirap bilong yia 1943, mi wantaim famili bilong mi i ranawe i go long ples maunten. Mipela i stap long dispela hap inap long taim ol Jemani i lusim Grik long Oktoba 1944.
Taim ol Jemani i go pinis, ol man i kros pait namel long ol yet long ol samting bilong politik na sindaun bilong ol. Dispela grup mi insait long en bilong sakim ol Natsi em i kamap wanpela bikpela lain paitman insait long dispela bikpela pait i kamap namel long ol Grik yet. Mi laikim lo bilong ol Komyunis ol i bilip olsem ol man i mas mekim stretpela pasin long narapela, na mekim wankain pasin long olgeta man, na stap olsem brata brata, tasol taim mi lukim giaman bilong ol, mi no bilip moa long ol. Mi gat bikpela namba insait long dispela grup, olsem na long ai bilong mi yet mi bin lukim olsem, man i kisim namba long mekim wok bos, gutpela pasin bilong em inap bagarap. Maski man i laik kamapim ol gutpela wok na helpim ol man, pasin kranki bilong em na pasin bilong tingim em yet tasol inap bagarapim ol gutpela wok em i laik mekim long rot bilong ol wok politik.
Samting mi kirap nogut long en i olsem: Insait long ol narapela narapela lain bilong pait, ol pris bilong lotu Otodoks ol i go insait long pait na kilim i dai ol wanlotu bilong ol! Mi tingting: ‘Olsem wanem na ol dispela pris inap tok ol i wokman bilong Krais Jisas, em i bin givim strongpela tok lukaut olsem: “Olgeta man i pait long bainat, bainat bai i bagarapim ol”?’—Matyu 26:52.
Long 1946, taim dispela pait i stap yet, mi hait i stap klostu long taun Lamia, namel long kantri Grik. Klos bilong mi i bagarap stret, olsem na mi tingting long putim narapela kain bilas na bai ol man i no inap luksave long mi, na go long taun na lukim wanpela man bilong samapim klos—mi laik bai em i wokim sampela nupela klos bilong mi. Taim mi kamap pinis, i gat bikpela tok pait i stap, na liklik taim mi yet mi kirap long toktok, tasol mi no toktok long ol samting bilong politik, nogat; mi toktok long dispela samting em pastaim mi laikim tumas, em lotu. Ol man i lukim olsem mi gat sampela save long dispela samting, olsem na ol i tok, gutpela sapos mi toktok wantaim wanpela man ol i kolim ‘profesa bilong lotu.’ Wantu ol i go kisim em.
Mi Painim Wanpela Samting Mi Ken Bilip Tru Long En
Mitupela i toktok i go, na “profesa” i askim mi long as bilong ol bilip bilong mi. Mi tok: “Ol Papa Holi na ol Kibung Bilong Lotu.” Em i no kamapim sampela tok i pait long dispela tok mi mekim, nogat; em i opim liklik Baibel bilong em long Matyu 23:9, 10, na tokim mi long kaunim tok bilong Jisas: “Long graun hia yupela i no ken kolim wanpela man em i papa bilong yupela. Wanpela tasol em i Papa bilong yupela, na em i stap long heven. Na ol i no ken kolim yupela ‘Hetman.’ Yupela i gat wanpela hetman tasol, em man God i makim bilong kisim bek ol manmeri bilong en.”
Man! Mi kirap nogut tru! Mi pilim olsem dispela man i tok tru. Taim em i tok em i wanpela Witnes Bilong Jehova, mi askim em long em i gat sampela buk na mi ken kaunim. Em i bringim buk Light i kam em i stori long hap bilong Baibel, Kamapim Tok Hait, na mi kisim i go bek long ples hait bilong mi. Inap longtaim pinis ol dispela animal nogut em Kamapim Tok Hait i stori long en em i bin stap olsem wanpela tok hait long mi, tasol nau mi save pinis ol i makim ol lain politik i stap nau long taim bilong yumi. Mi kirap long kisim save olsem ol tok bilong Baibel inap helpim ol man long nau, na mi mas stadi long en, na senisim pasin bilong mi na bai i stret wantaim ol tok i tru bilong Baibel.
Ol i Holim Mi na Mi Go Kalabus
Bihain liklik, wantu tasol ol soldia i kam insait long ples hait bilong mi na holim mi. Ol i tromoi mi i go insait long wanpela rum kalabus. Inap longtaim pinis ol i bin wok long painim mi, na nau mi ting bai ol i kilim mi i dai. Taim mi stap long rum kalabus, dispela Witnes i bin toktok wantaim mi pastaim, em i kam lukim mi. Em i kirapim mi long bilip tru long Jehova, na mi mekim olsem. Kot i salim mi i go kalabus inap 6-pela mun long ailan Ikaria long solwara Ijien.
Taim mi kamap pinis, wantu tasol mi tokaut olsem mi wanpela Witnes Bilong Jehova—mi no tok mi wanpela Komyunis. Sampela narapela i bin kisim save long ol tok i tru bilong Baibel, ol tu ol i stap, olsem na mi painimaut ol i stap we, na nau mipela wantaim i stadi long Baibel. Ol i helpim mi long kisim sampela save moa long Baibel na long God bilong yumi, Jehova, em God yumi ken bilip tru long en.
Long 1947, taim mi pinisim taim bilong mi long kalabus, ol i singautim mi i go long ofis bilong man bilong wokim kot. Em i tok em i pilim tru gutpela pasin bilong mi na em i orait long mi ken kolim nem bilong em sapos kot i salim mi i go kalabus gen. Taim mi kamap pinis long Atens—famili bilong mi i stap nau long dispela hap—mi kirap long bung wantaim wanpela kongrigesen bilong ol Witnes Bilong Jehova, na bihain liklik mi kisim baptais bilong makim olsem mi dediket pinis long Jehova.
Autim Tok na Kisim Kot
Ol i bin kamapim sampela lo long 1938 na 1939 i tambuim wok bilong autim bilip, na long dispela as, kantri Grik i bin putim ol Witnes long kot inap planti yia pinis. Olsem na kirap long 1938 i go inap 1992 ol i bin holim 19,147 Witnes long Grik, na sapos yumi bungim olgeta yia kot i makim bilong ol i mas kalabus, em inap olsem 753 yia, na ol Witnes i bin lusim 593 yia bilong ol dispela yia kot i bin makim. Ol i holim mi yet inap 40 taim samting, long wanem, mi autim gutnius bilong Kingdom bilong God, na mi lusim 27 mun olgeta insait long ol narapela narapela haus kalabus.
Wanpela taim ol i kotim mi, long wanem, mi bin salim pas i go long wanpela pris bilong lotu Grik Otodoks long Kalkis. Long 1955, lain bilong ol Witnes Bilong Jehova i kirapim ol kongrigesen long salim wanpela liklik buk i go long olgeta pris, nem bilong buk, Christendom or Christianity—Which One Is “the Light of the World”? Wanpela pris i gat bikpela namba, em dispela pris mi bin raitim pas long en, em i kotim mi—em i tok mi bin autim bilip bilong mi bilong kirapim man long kam insait long lotu. Long kot i gat wanpela loya Witnes na wanpela loya bilong ples, na tupela i kamapim gut ol tok—ol i tok olgeta Kristen tru i gat wok long autim gutnius bilong Kingdom bilong God.—Matyu 24:14.
Jas bilong kot i askim pris: “Yu kaunim dispela pas na buk?”
Pris i tok strong na bekim tok olsem: “Nogat tru. Taim mi opim skin pas, wantu tasol mi brukbrukim na rausim!”
Jas i askim em: “Sapos olsem, orait, olsem wanem na yu tok dispela man i bin kirapim yu long kam insait long lotu bilong em?”
Orait nau loya bilong mipela i stori long sampela profesa na sampela narapela ol i bin givim nating planti buk long ol haus buk. Em i kamapim askim olsem: “Yu ting ol dispela man i bin wok long kirapim ol narapela long kam insait long lotu bilong ol?”
Dispela i kamapim klia olsem, kain wok olsem i no wok bilong kirapim man long kam insait long lotu, nogat. Mi tenkyu long Jehova taim mi harim kot i tok: “No gat asua.”
Pikinini Bilong Mi i Dai
Ol i wok tu long mekim nogut long pikinini man bilong mi, George. Planti taim ol i holim em, long wanem, em i yangpela na em i wok strong long autim gutnius bilong Kingdom bilong God. Bihain ol dispela birua i pasim tok long kilim em i dai—ol i ting dispela bai pretim mipela ol narapela long lusim wok autim tok.
Dispela polis i bin kam long haus bilong mipela bilong toksave long i dai bilong George, em i tok, pris bilong lotu Grik Otodoks long hap bilong mipela na sampela bos bilong ol paitman, ol i bin pasim tok long kilim i dai pikinini bilong mipela. Long dispela taim nogut bipo, kain “bagarap” olsem i bin painim planti man. Tru, bel bilong mipela i hevi tru long em i dai pinis, tasol dispela samting i bin strongim mipela long autim tok i go yet na bilip tru long Jehova.
Helpim Ol Narapela Long Bilip Tru Long Jehova
Namel long yia 1964 na 1966 samting, long ol mun i olsem taim bilong san, meri pikinini bilong mi i save go i stap long liklik ples Skala Oropos long hap bilong nambis, longwe long Atens inap 50 kilomita. Long dispela taim i no gat wanpela Witnes i stap long dispela hap, olsem na mipela i save autim tok long ol man i sindaun klostu long mipela. Sampela fama bilong dispela hap ol i givim bel long harim tok. Ol i wok planti planti aua long san long gaden bilong ol, olsem na mipela i save stadi Baibel wantaim ol long biknait, na sampela i kamap Witnes.
Mipela i lukim olsem Jehova i blesim wok bilong mipela, olsem na long olgeta wik inap 15 yia, mipela i bin go long dispela ples bilong mekim Baibel-stadi wantaim ol man i laik harim tok. Inap olsem 30 man i kamap strong na kisim baptais. Wanpela grup-stadi i kamap, na mi kisim wok bilong lukautim ol miting. Bihain dispela grup i kamap wanpela kongrigesen, na nau winim 100 Witnes bilong dispela hap ol i insait long Kongrigesen Malakasa. Mipela i amamas olsem 4-pela bilong ol dispela man em mipela i bin helpim ol, nau ol i mekim wok autim tok long olgeta de.
Mi Gat Planti Samting
Mi dediketim laip bilong mi long Jehova, na bihain liklik, meri bilong mi i wok long kamap strong long spirit na em i kisim baptais. Insait long dispela hap taim ol man i bin mekim nogut long ol Witnes, bilip bilong meri i bin i stap strong na em i stap gut long Jehova—em i no surik liklik. I no gat wanpela taim na em i bin toktok planti long ol hevi i bin painim em long wanem planti taim mi bin go stap long kalabus, nogat.
Long ol yia i kamap i go pinis, mitupela wantaim i bin helpim planti man long kisim save long Baibel, na pasin bilong meri bilong mi long amamas long kamapim ol tok na mekim long pasin i no hatwok tumas long save long en, em i bin helpim gut planti man. Nau long dispela taim, em i save kisim ol nupela Wastaua na Kirap! i go long planti manmeri long olgeta taim.
Gutpela meri bilong mi i bin helpim gut mi, na ating dispela i mekim na 3-pela pikinini bilong mipela i stap laip yet, wantaim famili bilong ol, em 6-pela ol i bubu na 4-pela ol i pikinini bilong ol dispela bubu, olgeta ol i save mekim wok bilong Jehova. Tru, ol man i no bin mekim nogut long ol na birua long ol olsem ol i bin mekim long mitupela meri bilong mi, tasol ol i bilip tru long Jehova, na ol i wokabaut yet long rot Jehova i makim. Mipela olgeta bai amamas tru long stap gen wantaim George taim em i kirap bek pinis!
Mi Tingting Strong Long Mi Mas Bilip Tru Long Jehova
Insait long ol dispela yia i go pinis, mi bin lukim spirit bilong Jehova i wok i stap long bel bilong ol manmeri bilong Em. Oganaisesen bilong God, em spirit bilong em i bin stiaim, i bin helpim mi long save olsem mipela i no ken bilip long ol samting ol man i laik mekim. Ol tok promis bilong ol long kamapim gutaim, ol dispela promis i no gat as bilong en—ol i olsem wanpela bikpela tok giaman.—Song 146:3, 4.
Maski mi wok long go lapun na bikpela sik i painim mi, ai bilong mi i lukluk i go long Kingdom olsem em i wanpela samting tru. Mi bel hevi tru long mi bin lusim planti yia long mekim wok bilong lotu giaman na long mekim wok bilong kamapim gutaim long rot bilong ol wok politik. Tru tumas, sapos mi inap kisim bek ol dispela yia i go pinis, mi bai mekim gen wankain wok—mi bai mekim wok bilong Jehova, em i God yumi ken bilip tru long en.
(Nau tasol Kimon Progakis i dai pinis. Em i gat tingting long stap long graun.)
[Piksa long pes 26]
Piksa bilong Kimon wantaim meri bilong em, Giannoula