Hatpela Tok, Bel i Bagarap

“Yu longlong lesmeri!”a Wanpela meri long Japan i tingim yet dispela tok​—⁠planti taim ol i sutim dispela kain tok long em taim em i liklik pikinini. Husat i bin tok olsem? Ol skulmanki? Ol brata susa bilong em? Nogat. Papamama i bin tok olsem. Em i tingting bek na tok: “Dispela kain tok i bin bagarapim tru bel bilong mi na mekim mi i bel hevi.”

Wanpela man long Yunaitet Stets i tingim taim em i pikinini yet na em i bin tingting planti na pret taim papa i kam long haus. Em i tok: ‘Inap long nau mi tingim yet bikpela pret bilong mi taim mi harim krai bilong ka bilong papa i kam insait long banis. Liklik susa bilong mi i save hait. Papa em wanpela man i laik mekim ol samting i kamap stret olgeta, na olgeta taim em i bin tok kros long mipela na tok mipela i no mekim gut ol wok mipela i mas mekim.’

Susa bilong dispela man i tok: “Mi no inap tingim wanpela taim papa o mama i bin holimpas mipela o kis long mipela o mekim wanpela kain tok olsem ‘Mi laikim yu tru,’ o ‘Mi amamas long yu.’ Na sapos pikinini i no harim papamama i tok ‘Mi laikim yu tru,’ i wankain olsem papamama i tok long olgeta de​—⁠‘Mi nolaik tru long yu.’ ”

ATING sampela bai tok, bel hevi ol dispela manmeri i bin kisim taim ol i pikinini yet i no bikpela samting. Tru, papamama bilong planti pikinini ol i save mekim strongpela tok long pikinini na mekim pasin i no stret long ol. Na ol nius na televisen i no save stori long ol dispela kain hevi. Samting nogut dispela hevi i save kamapim i no stap ples klia. Tasol sapos olgeta de papamama i nogutim pikinini long kain toktok na pasin olsem, dispela i save bagarapim bel na tingting bilong pikinini​—⁠na em inap nogutim em i go inap long taim em i dai.

Long 1951, ol saveman i skelim pasin sampela papamama i bin mekim long pikinini bilong ol em ol i gat 5-pela krismas, na long 1990 ol i skelim gen dispela samting. Ol saveman i painim planti bilong ol dispela pikinini nau ol i gat 50 krismas samting, na ol i laik save, pasin papamama i mekim long ol taim ol i pikinini yet em i bin mekim wanem long ol taim ol i bikpela pinis. Nupela save ol i kisim i kamapim klia olsem, ol pikinini i bin kisim planti hevi taim ol i go bikpela pinis, na bel na tingting bilong ol i no stap isi, na ol i gat planti hevi long marit, na wantaim ol pren bilong ol, na long ples wok tu, i no ol pikinini em papamama bilong ol i stap rabis o ol i gat planti mani o ol i gat hevi, nogat. Em pikinini bilong ol papamama i save pasim bel na ol i mekim olsem ol i no laikim tumas pikinini.

Dispela save ol i kisim i makim stret wanpela tok ol i bin raitim klostu 2,000 yia i go pinis: “Yupela papa, yupela i no ken mekim ol pikinini bilong yupela i kros, nogut ol i pilim olsem ol i no inap mekim wanpela gutpela wok.” (Kolosi 3:21) Sapos papamama i kolim kain kain nem nogut long pikinini na bagarapim bel bilong em, dispela inap mekim pikinini i kros, na em bai pilim olsem em i no inap mekim wanpela gutpela wok.

Buk Growing Up Sad i tok, i no longtaim i go pinis na ol dokta i ting ol pikinini i no save kisim bikpela bel hevi. Tasol bikpela hap taim liklik i lus na ol i tingim ol samting i kamap insait long dispela taim na nau ol i save, dispela tingting bilong ol i no stret. Ol man bilong raitim dispela buk i tok, long nau ol dokta i save ol pikinini inap kisim bikpela bel hevi na dispela hevi i painim planti pikinini. Wanpela as bilong bel hevi, em pasin bilong papamama long givim baksait long pikinini na mekim nogut long em. Ol man bilong raitim buk i tok: ‘Hevi bilong sampela pikinini i olsem: Olgeta taim papa o mama i bin sutim tok nogut long ol bilong daunim ol. Na sampela pikinini i pilim olsem ol i no pas gut wantaim papamama, ol i stap nating​—⁠papamama i no kamapim long ol olsem ol i laikim ol. Tarangu long pikinini i gat kain papamama olsem, long wanem, long pikinini​—⁠o long man i bikpela pinis​—⁠pasin sori i bikpela samting olsem san na wara i bikpela samting long purpur.’

Papamama i save laikim tumas ol pikinini bilong ol na ol i kamapim klia dispela samting, ol pikinini i lain long wanpela bikpela samting olsem: Man inap laikim ol; ol i no samting nating. Planti i gat tingting kranki long dispela samting na ol i ting sapos pikinini i kisim dispela kain tingting, olsem man i laikim em na em i no samting nating, em bai kisim pasin hambak na laikim em yet tasol. Tasol nogat. Wanpela meri bilong raitim buk i stori long dispela samting olsem: “Pikinini bilong yu i gat wanem tingting long em yet, dispela i gat strong na i makim husat em i laik poroman wantaim ol, na wanbel wantaim ol, na marit long husat, na em bai mekim gutpela wok o nogat.” Baibel i tok em i bikpela samting long kisim stretpela tingting na no ken hambak long yumi yet, long wanem, namba 2 bikpela lo i winim olgeta narapela lo i tok: “Yu mas laikim ol wantok olsem yu laikim yu yet.”​—⁠Matyu 22:​38, 39.

I hatwok long ting olsem wanpela papa o mama i laik bagarapim bel bilong pikinini, em wanpela samting inap bagarap kwiktaim, na ol i mekim long em olsem em i no inap mekim wanpela gutpela wok. Bilong wanem dispela samting i save kamap planti taim? Yumi ken mekim wanem na bai dispela pasin i no ken kamap?

[Futnot]