Husat Em i Mama? Husat Em i Pikinini?
WANPELA dokta bilong stretim sik bilong tingting long Kalifonia, Yunaitet Stets, i tokaut olsem wok bos bilong ol papamama i wok long bagarap nau long dispela taim. Em i raitim tok olsem, “Long ofis bilong mi, mi harim planti toktok namel long ol papamama na ol pikinini na ol tok i olsem toktok namel long tupela bikpela man, i no olsem toktok namel long wanpela pikinini na wanpela papa o mama. Ol i toktok long ol samting olsem taim bilong ol pikinini i mas slip na long hamas mani ol bai givim long ol pikinini na ol wok bilong haus. Sampela taim i hatwok long save, husat em i papamama na husat em i pikinini.”
Baibel i givim gutpela tok long ol papamama. Em i givim tok lukaut long ol olsem, samting nogut inap kamap sapos papamama i putim strongpela tambu tumas, long wanem, dispela inap bagarapim bel bilong pikinini na em inap pilim olsem em i no inap mekim wanpela gutpela wok. (Kolosi 3:21) Tasol Baibel i tokim tu ol papamama long was gut long narapela bikpela samting—ol i no ken larim pikinini i bihainim laik bilong em yet tasol, na ol i no mekim gut wok bos bilong ol. Sindaun 29:15 i tok: “Sapos pikinini i bihainim laik bilong em yet oltaim, orait em bai i mekim mama bilong en i sem.” Narapela hap bilong Sindaun i tok: “Sapos wanpela man i isi tumas long wokboi bilong em long taim em i yangpela yet, bihain em bai kamap man i no save tok tenkyu long ol samting em i kisim.” (Sindaun 29:21, NW) Tru, dispela skripsa i toktok long ol wokboi, tasol ol tok bilong em i stret long ol pikinini tu.
Papamama i save larim tasol ol pikinini na ol i no stretim ol, bihain ol bai karim bikpela hevi—ol bai stap olsem wanpela famili i no gat lo i bosim ol. Olsem na mobeta yumi bihainim ol lo bilong Baibel! Bilong mekim olsem, yumi mas taitim bun, tasol gutpela samting inap kamap long en long olgeta taim bihain. Baibel i tok: “Skulim pikinini bilong yu long bihainim gutpela pasin, na em bai i wokabaut long dispela rot inap long em i lapun tru.”—Sindaun 22:6.