Yangpela Meri Bilong Rasia i Wetim Gutpela Samting
WANPELA yangpela meri i gat 15 krismas em i stap long Ukta, Rasia. Dispela taun i gat olsem 100,000 manmeri long en na i stap longwe long Mosko inap 1,200 kilomita long hap not-is. Meri hia i kamapim bel bilong em olsem, em i gat bikpela laik long gutpela sindaun i ken kamap long graun. Em i stori long dispela samting long pas em i salim long brens-ofis bilong ol Witnes Bilong Jehova long Rasia:
“Pren bilong mi i tokim mi olsem buk Nambawan Man Tru i Winim Olgeta Narapela Man i stori long i stap bilong Krais Jisas. Mi laikim tru ol buk, ol nius, na ol buklet bilong yupela. Mi laik stori long yupela long olsem wanem tingting bilong mi i kirap long kaunim ol buk bilong yupela. Dispela samting i kamap taim mi go long ofis bilong baim redio na telefon. Long dispela ofis mi painim wanpela liklik nius i stap long plua. Mi kisim dispela liklik nius, nem bilong en Bilong Wanem Yumi Gat Planti Hevi? na mi rausim pipia i stap long en na mi kirap kaunim dispela nius.
“Mi kaunim ol tok i stori long ol hevi bilong ol manmeri, na long skin bilong dispela liklik nius i gat piksa i kamapim gutpela sindaun long Paradais. Mi laik dispela samting i ken kamap. Mi gat laik tru long lukim olgeta manmeri i stap amamas, na ol i no sot long wanpela samting, na ol i no gat sik, na tu, mi laik lukim ol wanblut i dai pinis. . . . Mi laik save mi mas mekim wanem bambai mi ken kisim laip long Paradais i kamap long graun. Mi laik askim yupela long salim sampela ol buk samting long mi. Mi laik baim ol dispela buk na pe bilong salim ol i kam.”
Yu tu inap kisim sampela buk i ken helpim yu long bilip tru long tok promis i stap long Baibel, olsem yu inap kisim laip long Paradais long graun. Sapos yu laik kisim buklet God i Laik Yumi Mas Mekim Wanem? o yu laik bai wanpela Witnes i kam long haus bilong yu bilong mekim Baibel-stadi wantaim yu, no gat pe, orait raitim pas long IBSA, Box 636, Boroko, NCD 111, Papua New Guinea, o salim pas long atres i stret long yu olsem i stap long pes 5.