Kain Kain Sayor Samting i Wok Long Pinis—Bilong Wanem?
LONG Saina, ol i bin planim klostu 10,000 kain kain wit long 1949. Tasol long 1970 samting, i gat 1,000 kain wit tasol i stap na ol i kisim yet kaikai long en. Long Amerika, ol i bin planim 7,098 kain kain apel namel long 1804 na 1904, tasol samting olsem 86 pesen i lus pinis. Na buk Report on the State of the World’s Plant Genetic Resources for Food and Agriculture i tok moa, “95 pesen bilong kabis, 91 pesen bilong kon, 94 pesen bilong ol liklik bin, na 81 pesen bilong kain kain tomato i no stap moa.” Wankain samting i kamap long ol narapela kantri. Bilong wanem ol dispela sayor samting i wok long pinis wantu tasol? Sampela man i tok, wanpela bikpela as bilong dispela hevi i olsem: Long nau i gat ol traipela fam bilong ol kampani i kamap na ol liklik liklik fam bilong ol wan wan famili ol i pinis. Dispela samting i mekim na ol kain kain kaikai bilong ples ol i bin planim ol i lus pinis.
Kain kain sayor samting i wok long pinis na dispela inap bagarapim ol kaikai long gaden. Tingim bikpela hangre bilong poteto i bin kamap long Aialan long 1845 i go 1849. Long dispela taim inap olsem 750,000 manmeri i bin dai long hangre taim sik bilong poteto i pinisim klostu olgeta poteto. Wanem samting i kamapim dispela hevi? Wanpela ripot bilong Yunaitet Nesen i tok, as bilong dispela hevi em, ol i planim wanpela kain poteto tasol.
Namel long 1970 na 1989 ol i wokim 1,000 haus long olgeta hap bilong graun bilong bungim na lukautim ol kain kain diwai sayor. Tasol planti bilong ol dispela haus i wok long bagarap, na sampela ol i pasim pinis. I gat ripot olsem, long 30 kantri tasol i gat ol haus bilong lukautim gut ol pikinini bilong diwai sayor samting bambai ol i ken stap longpela taim.
Baibel i tok promis olsem, aninit long Kingdom bilong Krais, Jehova “bai i redim bikpela kaikai . . . [na] gutpela gutpela abus na nambawan wain tru bilong dring.” (Aisaia 25:6) Yumi ken tenkyu tru long God Jehova, em i Man bilong “givim kaikai long olgeta manmeri na olgeta abus,” na em i Man bilong wokim kain kain diwai sayor, long wanem, em bai givim planti kaikai long ol man!—Song 136:25; Stat 1:29.