Pas Bilong Ol Man
Gaden Long Olgeta Hap Mi laik tok tenkyu long ol gutpela stori “Gaden Long Olgeta Hap—Em Bai Kamap Tru?” (Epril 8, 1997) Tru tumas, ol gaden na ol kala inap helpim skin bilong yumi na mekim yumi amamas. Mi laikim dispela hap i gat het-tok olsem “Rot Bilong Kisim Paradais.” Dispela liklik stori i strongim tru bel bilong mi—i olsem wanpela man i singaut na i tok, dispela “rot [yu] mas bihainim.” Man! Em gutpela samting tru olsem bihain bai yumi kirap wok long taim san i kam antap na i go inap long taim san i go daun bilong mekim graun i kamap wanpela paradais! Mi save amamas long droim ol piksa, na wokim kain kain bilas samting long han, olsem na mi save amamas tu long ol gutpela piksa bilong ol nius bilong yupela.
V. R., long Ostrelia
Mi laik tok amamas long yupela long ol dispela stori. Mi amamas tru long kaunim ol. Mi gat klostu 80 krismas na mi amamas yet long lukautim banis bilong mi. Ol plaua na ol kaikai long gaden bilong mi i no gutpela inap long mi ken winim prais long ol, tasol mi amamas long raun long gaden na wok long en. Mi kaunim ol dispela stori na nau mi save gut bilong wanem ol man i laikim wok long ol gaden.
R. R., long Amerika
Marit i Mas Bruk? Taim mi kaunim stori “Marit i Mas Bruk Sapos Wanpela i Pamuk?” (Epril 8, 1997), mi pilim olsem Jehova i salim wanpela pas long mi. Dispela stori i kamapim stret olgeta samting i bin painim mi na ol samting mi pilim. Man bilong mi i bin pamuk, tasol em i tanim bel. Olsem stori bilong yupela i kamapim, mi pilim olsem mi stap insait long draipela win olsem saiklon. Mi tingting long lusim rong bilong em, tasol sampela taim mi sem long tingting bilong mi yet. Dispela stori i helpim mi long save olsem i stret mi gat kain tingting olsem na i no gat rong long dispela. Jehova i blesim tru ol hatwok bilong mipela na marit bilong mipela i no bin bruk.
L. P., long Frans
Marit bilong mi i bruk, tasol dispela stori i olsem wanpela gutpela blesing tru, long wanem, em i kamapim stret tru bel bilong mi. Mi inap pilim tru olgeta samting stori i kamapim. Mi save tu long sampela narapela em dispela stori i bin helpim ol. Planti man i hatwok long save long dispela hevi, olsem na stori hia bai helpim tru ol na givim save long ol.
M. C., long Aialan
Mi bin marit inap 9-pela yia long wanpela man i no Witnes na em i no bin stap gut long mi. Tasol taim mi kaunim ol paragraf aninit long liklik het-tok “Ol Inap Stretim Bek Marit o Nogat?” bel bilong mi i stap isi. Man bilong mi i laik bai mipela stap yet olsem marit, tasol em i ken poromanim yet ol narapela meri. Olsem na mi amamas bai mi katim marit. Nau mi mas kirap gen, na stap olsem wanpela mama wanpis.
M. S. B., long Trinidat
Tenkyu tru long gutpela stori em mi pilim tru. Ol dispela tok i gutpela tru bilong mekim wok long en bilong skelim olsem sapos wanpela i lusim tingting long rong bilong narapela na pas yet wantaim em, dispela bai gutpela o nogat. Olgeta taim mi bin ting olsem sapos man bilong mi i pamuk, mi no inap tru long lusim rong bilong em. Nau mi save olsem dispela tingting i no stret. Sori tru, dispela hevi i wok long go bikpela, tasol tenkyu tru long ol gutpela tok bilong Baibel yupela i kamapim bilong helpim ol marit. Pasin bilong wetim Jehova i helpim mi long karim dispela bikpela bel hevi na i strongim mi long lusim rong, long wanem, man bilong mi i bin sori tru (na i sori yet) long rong em i bin mekim.
S. N., long Amerika
Ol Yaupas i Litimapim Nem Bilong Jehova Taim mi kaunim dispela stori “Ol Yaupas i Litimapim Nem Bilong Jehova” (Epril 8, 1997), mi lukim piksa bilong ol manmeri i bung. Taim mi lukim planti brata na sista i makim tok long han bilong litimapim nem bilong Jehova dispela i strongim tru bilip bilong mi! Bel bilong mi i pilim tru na aiwara bilong mi i kamap planti taim, long wanem, mi amamas tru long pasin bilong ol long strong tru long lotuim Jehova, na ol i strongim tru bel, na dediket bilong ol. Tenkyu long kain stori olsem.
R. H., long Amerika