Pas Bilong Ol Man
Bagarapim Marit Tenkyu long ol stori “Taim Poroman Marit i Bagarapim Marit,” i stap long Kirap! bilong Me 8, 1999. Poroman bilong mi em i no bin stap gut long mi. Mipela i katim marit long 3-pela yia i go pinis, tasol bel bilong mi i bagarap yet. Ol dispela stori i bin helpim mi long save olsem mi no ken tingting tasol long ol samting nogut i bin painim mi, na mi mas kirap mekim gen ol samting mi mekim bipo.
V. B., long Trinidat
Mipela i katim marit na dispela i mekim na mi bel hevi tru, na mi pilim olsem mi samting nating, na planti kain kain sik i painim mi. Mi bel hevi yet, tasol bilip bilong mi long ol tok promis bilong Jehova, na pasin sori bilong ol brata long kongrigesen bilong mi, na pasin bilong ol long strongim bel bilong mi i mekim gut bel bilong mi!
A. B., long Kanada
Inap 9-pela mun i go pinis, man bilong mi em i lusim mi, na mi karim yet hevi long pasin bilong i stap wanpis. Olsem wanem bai mi wokabaut long rot na i no gat man long holim han bilong mi? Husat bai sindaun wantaim mi long ol miting Kristen? Husat bai go wantaim mi long lukim dokta? Tenkyu long kirapim mi long tingim gen olsem Jehova i no save lusim ol marit i no gat asua.
E. S., long Brasil
Tenkyu, tenkyu, tenkyu long ol dispela stori! Em i mekim gut bel bilong mi long save olsem, ol tingting i stap long bel bilong mi i wankain olsem tingting bilong ol narapela man i bin kisim dispela hevi. Tasol yupela i tok olsem: “Ating narapela i no bin mekim gutpela pasin sori long narapela, o mekim sampela tok amamas, o litimapim nem bilong poroman, em ol samting poroman i laik yu mekim long em.” Dispela tok i bagarapim bel bilong mipela sampela i bin wok strong bambai marit bilong mipela i gat hevi long en i ken wok gut. Taim man i tingting long slip wantaim narapela i no poroman tru bilong em, pasin bilong em inap kamap nogut, na i hatwok long mekim gutpela pasin sori long kain man olsem.
L. W., long Yunaitet Stets
Mipela i laik tok sori sapos dispela tok i bin bagarapim bel bilong sampela i save ritim nius bilong mipela. Tasol mipela i no laik tok olsem man i bagarapim marit, em i ken tok em asua bilong poroman bilong em na em i mekim olsem, nogat. Long blok “Asua Bilong Husat?” mipela i tok, man i bagarapim marit em asua bilong em yet na em i mekim olsem, maski poroman i no gat asua em i gat sampela “pasin kranki.” Tok i bin bagarapim bel bilong L. W., em i hap bilong stori i toktok long pasin bilong kamap wanbel gen. Long dispela stori, mipela i laik kamapim olsem em bikpela samting long toktok gut wantaim. Na dispela stori i kirapim ol marit i laik kamap wanbel gen long luksave long ol hevi long marit bilong ol, em ol i mas stretim hariap. Na ating i gat sampela tingting nogut bilong tupela i stap hait na ol i mas toktok long en. Taim ol i toktok long dispela samting, ating tupela wantaim bai tokaut long sampela pasin kranki bilong ol. Yumi olgeta i “save popaia.” (Jems 3:2) Tru, ating tupela bai hatwok long toktok long dispela hevi, tasol olsem dispela stori i tok, “em i bikpela samting long toktok gut wantaim bambai narapela i ken bilip gen long narapela.”—Edita.