Baibel i Tok Wanem?

Marit i Mas Bruk Sapos Wanpela i Pamuk?

“Mi tok olsem long yupela. Sapos meri bilong wanpela man em i no bin mekim pasin pamuk, na man i rausim em na i maritim narapela meri, dispela man yet em i mekim pasin pamuk.”​—⁠Matyu 19:⁠9.

DISPELA tok bilong Krais Jisas i givim rot na Kristen i ken tingting long katim marit sapos poroman bilong em i bin pamuk.a Tasol olsem wanem sapos poroman i no gat rong, em i no laik marit i bruk na tupela marit i tingting long stretim bek i stap bilong ol? Wanem ol hevi bai painim tupela marit olsem? Na olsem wanem ol i ken winim ol dispela hevi? Nau yumi ken lukim tok bilong Baibel na olsem wanem Baibel i bekim ol dispela askim.

Haus i Bagarap

Pastaim yumi mas tingim bikpela hevi pasin pamuk i save mekim long marit. Olsem Krais Jisas i tok, As bilong marit em i laik tupela marit “i no i stap olsem tupela moa. Nogat.” Em i laik “tupela i kamap olsem wanpela bodi.” Na em i tok moa: “Olsem na samting God i pasim pinis, em man i no ken katim.” Tru tumas, God i bin wokim marit bambai man na meri i ken pas gut wantaim. Taim wanpela i brukim tok promis bilong marit long rot bilong pamuk, ol bikpela hevi tru i save kamap.​—⁠Matyu 19:6; Galesia 6:⁠7.

Samting i kamapim klia dispela samting, em bel hevi poroman i no gat rong em i save kisim. Ol samting pasin pamuk i save mekim long marit em i olsem bikpela win i bagarapim ol haus. Dokta Shirley P. Glass i tok: “Sampela marit [em poroman bilong ol i bin pamuk] i bin kam lukim mi bilong kisim helpim ol i tokim mi, sapos poroman marit i bin dai, i no hatwok long ol i karim dispela hevi.” Tru, ating sampela marit em poroman bilong ol i bin dai, ol i no wanbel long dispela tok. Tasol wanpela samting i kamap ples klia i olsem: Pamuk i save kamapim bikpela bel hevi. Sampela marit i no inap tru long lusim tingting long pasin nogut poroman i bin mekim long ol.

Taim yumi tingim bikpela bel hevi i save kamap, ating yumi gat askim olsem: ‘Pasin pamuk i mekim na nau marit i mas bruk?’ Nogat. Taim Jisas i stori long pasin pamuk long marit, em i tok dispela i givim rot long poroman i no gat rong long katim marit na i stret long lo bilong Baibel, tasol i no olsem em i mas katim marit. Sampela marit i save pasim tok wantaim long senisim sampela pasin bilong ol bilong strongim marit na marit i ken kamap gutpela gen​—⁠tasol i no gat wanpela pasin i mekim na wanpela marit i ken ting i orait long pamuk.

Taim tupela marit i stap gut wantaim, mobeta long dispela taim ol i senisim sampela pasin bilong ol sapos ol i mas senisim. Tasol maski poroman marit i pamuk, poroman bilong sampela, ol i no laik marit i bruk. Tasol poroman i no gat rong em i mas tingting gut; em i mas tingim ol hevi inap kamap. Ating meri bai tingim ol samting ol pikinini i mas kisim, na ol samting em yet i mas kisim long spirit, tingting, bel, skin, na mani tu.b Na meri i bihainim gutpela tingting sapos em i skelim gut marit bilong em​—⁠em na poroman inap stretim bek marit o nogat.

Ol Inap Stretim Bek Marit o Nogat?

Paslain long wanpela man i laik wokim gen haus em bikpela win i bin bagarapim, em i mas tingting gut​—⁠em inap stretim bek haus o nogat. Olsem tasol long marit em pasin pamuk i bin bagarapim. Paslain long tupela marit i ken stretim bek marit, ol i mas tingting gut​—⁠em bikpela samting long poroman i no gat rong​—⁠ol inap pas gut wantaim gen, na poroman i no gat rong em inap bilip gen long poroman o nogat.

Wanpela samting poroman i no gat rong em i mas tingim i olsem: Poroman i tanim bel tru o em i wok long pamuk yet long ‘bel bilong em.’ (Matyu 5:​27, 28) Olsem wanem? Em i tok promis long senisim pasin bilong em tasol em i no laik lusim hariap meri em i save pamuk wantaim em? (Kisim Bek 20:14; Wok Pris 20:10; Lo 5:18) Em i save aigris yet long ol meri? Em i save tok, em asua bilong poroman marit na em i bin pamuk? Sapos olsem, ating meri bai hatwok tru long bilip gen long man bilong em, a? Tasol sapos man i lusim meri em i pamuk wantaim em, na em i tok em asua bilong em na em i pamuk, na pasin bilong em i kamapim klia olsem em i laik strongim gen marit, ating meri bai ting i gat as na bihain em i ken bilip gen long man bilong em.​—⁠Matyu 5:⁠29.

Na olsem wanem? Meri i no gat rong, em inap lusim rong bilong poroman? Sapos em i mekim olsem, i no olsem em i no inap kamapim bel bilong em na tokim man olsem pasin em i bin mekim em i bin bagarapim tru bel bilong em, o em i mas mekim olsem i no gat wanpela hevi i bin kamap, nogat. Meri bai wok long daunim bel nogut bilong em na isi isi em inap pinis. Tasol bilong lusim rong, hap taim i mas lus pastaim, na sapos em i mekim olsem, dispela inap helpim marit na i gat gutpela as bilong tupela i ken pas gen wantaim.

Rausim “Pipia”

Taim poroman i no gat rong em i no laik marit i bruk, nau tupela marit i ken mekim wanem? Planti pipia bai stap nabaut nabaut long haus em bikpela win i bin bagarapim, olsem na i gat wok long rausim pipia. Wankain long samting nogut olsem “pipia” i bagarapim marit, ol i mas rausim dispela tu. Ol inap mekim olsem sapos narapela i kamapim tingting bilong bel long narapela. Sindaun 15:22 i tok: ‘Yu mas kisim tingting long arapela na bai wok bilong yu i ken kamap gutpela.’ Tok Hibru ol i tanim olsem ‘kisim tingting long arapela,’ i makim olsem pas gut wantaim, na long Song 89:​7 (NW), ol i tanim olsem ‘lain i pas gut wantaim.’ Olsem na tupela marit i no ken toktok nating, nogat; tupela i mas tok tru na kamapim tru ol tingting i stap long bel bilong ol.​—⁠Sindaun 13:⁠10.

Ating meri i no bin mekim rong, em i laik askim man bilong em long sampela samting. Olsem wanem na em i kirap na poromanim narapela meri? Tupela i poroman inap longpela taim o nogat? Husat moa i save long dispela samting? Tru, tupela marit bai hatwok long toktok long ol dispela samting, tasol ating poroman i no gat rong bai pilim olsem em i mas save long dispela inap long em i ken bilip gen long poroman. Sapos olsem, i gutpela sapos man i bin mekim rong em i no giaman​—⁠em i mas bekim stret ol askim bilong meri na em i mas tingim gut tingting na bel bilong meri. Long pasin sori na pasin isi em i mas kamapim tok long meri bilong em. Em i no ken lusim tingting​—⁠tupela i toktok bilong stretim hevi, ol i no toktok bilong narapela i bagarapim bel bilong narapela. (Sindaun 12:18; Efesus 4:​25, 26) Tupela marit i mas was gut, na bosim gut skin, na harim gut tok bilong poroman taim narapela i kamapim bel bilong em long samting i bin kamap.c​—⁠Sindaun 18:13; 1 Korin 9:25; 2 Pita 1:⁠6.

Ating ol Witnes Bilong Jehova i laik kisim helpim long ol elda bilong kongrigesen. Ol Kristen i mekim bikpela rong olsem pamuk samting, kwiktaim ol i mas autim rong bilong ol long ol elda, long wanem, ol elda i save tingim i stap bilong tupela marit na kongrigesen long ol samting bilong spirit. Ating taim em i bung wantaim ol elda, man i bin pamuk em i kamapim long ples klia em i tanim bel pinis, olsem na ol i no rausim em long kongrigesen. Sapos olsem, ol elda i ken helpim yet man na meri wantaim.​—⁠Jems 5:​14, 15.

Strongim Gen

Taim bel bilong tupela marit i stap isi liklik, nau ol inap strongim gen ol bikpela samting long marit bilong ol. Ol i no ken lusim pasin bilong toktok gut wantaim. Sapos ol i luksave olsem marit i no strong long sampela samting, orait, ol i mas mekim sampela senis.

Na em bikpela wok bilong man i bin mekim rong long mekim ol senis. Tasol meri tu i mas wok long strongim sampela samting long marit i no strong. Taim em i mekim olsem dispela i no makim olsem em asua bilong em na man i bin pamuk, o pasin nogut man i bin mekim em i samting nating, nogat; i no stret tru wanpela i mekim kain rong olsem pamuk. (Skelim wantaim Stat 3:12; 1 Jon 5:⁠3.) Ating sampela hevi i bin stap insait long marit bilong tupela na ol i no bin stretim. Tupela marit i mas wok wantaim bilong strongim gen marit. Olsem wanem? Tupela i mas wok wantaim long strongim sampela pasin na laik? Ol i bin slek long mekim ol samting bilong spirit? Wok bilong painimaut wanem ol samting i no strong long marit na wok bilong stretim, em i bikpela samting bilong strongim gen marit i bagarap.

Wok Bilong Lukautim

Maski wanpela haus i strong, olgeta taim i gat sampela wok yumi mas mekim bilong lukautim. Olsem na em i bikpela samting long lukautim marit em bipo i gat hevi. Maski hap taim i lus, tupela marit i no ken larim dispela i bagarapim wok bilong ol long mekim ol samting ol i bin pasim tok pinis long mekim. Sapos sampela taim hevi i kamap gen olsem ol i no toktok gut wantaim, ol i no ken bel hevi, ol i mas hariap long stretim dispela hevi na wok long kamap wanbel gen.​—⁠Sindaun 24:16; Galesia 6:⁠9.

Na bikpela samting tru, man na meri marit i mas tingim ol samting bilong spirit i nambawan bikpela samting. Ol i no ken larim ol samting bilong spirit, o marit bilong tupela, i stap olsem nambatu samting, na narapela samting i stap olsem nambawan. Song 127:1 i tok: “Sapos Bikpela i no wokim haus, ol kamda i wok nating.” Na Jisas i tok: “Man i harim dispela tok bilong mi na i no bihainim, em i olsem wanpela longlong man i sanapim haus bilong en antap long wesan tasol. Na ren i kam daun, na tait bilong wara i kamap, na win i kirap strong. Na ol dispela samting i sakim dispela haus, na em i pundaun. Yes, em i pundaun nogut tru.”​—⁠Matyu 7:​24-27.

Tru tumas, sapos tupela marit i sakim ol lo bilong Baibel long wanem ol i hatwok long bihainim, taim narapela traim i kamap long stap gut long poroman marit na no ken pamuk, marit bai kisim hevi gen. Tasol sapos tupela marit i bihainim ol lo bilong Baibel long olgeta samting, God bai blesim marit bilong tupela. Na strongpela samting tru bilong kirapim tupela long stap gut wantaim, em laik bilong ol long amamasim As bilong marit, em God Jehova.​—⁠Matyu 22:​36-40; Saveman 4:⁠12.

[Ol Futnot]