Pasin Adaltri

Pasin adaltri em i wanem samting?

OL MAN I TOK

Long sampela kantri, ol man i ting em i orait long mekim maritpasin wantaim wanpela husat i no poroman marit bilong en, na moa yet sapos man marit i mekim olsem. Na sampela i ting marit i bilong i stap sotpela haptaim tasol.

BAIBEL I TOK

Pasin adaltri i makim olsem long laik bilong ol yet, man marit o meri marit i slip wantaim wanpela husat i no poroman marit bilong em. (Jop 24:15; Sindaun 30:20) Pasin adaltri em samting nogut tru long ai bilong God. Long Israel bilong bipo, sapos man i mekim dispela pasin, orait ol i mas kilim em i dai. (Wok Pris 18:20, 22, 29) Jisas i bin skulim yumi olsem ol disaipel bilong em i no ken mekim pasin adaltri.—Matyu 5:27, 28; Luk 18:18-20.

AS NA EM I BIKPELA SAMTING

Man i mekim pasin adaltri i brukim tok promis em i bin mekim long poroman marit bilong em long de ol i marit. Na tu, man i mekim dispela pasin i mekim “sin long ai bilong God.” (Stat 39:7-9) Na pasin adaltri inap mekim na ol pikinini i no pas gut wantaim papamama bilong ol. Na tu, Baibel i tok lukaut olsem: “God bai kotim ol man i mekim . . . pasin adaltri.”—Hibru 13:4.

“Olgeta manmeri i mas tingim marit olsem samting i dia tumas. Marit i mas i stap klin.”—Hibru 13:4.

Yu ting i stret long brukim marit sapos poroman marit i mekim pasin adaltri?

BAIBEL I TOK

Baibel i orait long man o meri i ken katim marit sapos poroman marit i mekim pasin adaltri. (Matyu 19:9) Sapos poroman marit i mekim pasin adaltri, orait poroman bilong em inap skelim olsem em i laik katim marit o nogat. Dispela em samting wan wan yet i ken skelim.—Galesia 6:5.

Tasol long ai bilong God, marit em samting i holi na ol marit i mas i stap wantaim long laip olgeta bilong ol. (1 Korin 7:39) God i nolaik tru long wanpela man i katim marit maski i gat ol liklik hevi long marit, o em i no amamas long poroman marit bilong en. Olsem na i gutpela sapos ol marit i skelim gut olgeta samting paslain long ol i mekim disisen long katim marit.—Malakai 2:16; Matyu 19:3-6.

“Mi tokim yupela olsem, sapos meri i no mekim pasin pamuk na man bilong en i katim nating marit, orait dispela inap mekim meri i pundaun long pasin adaltri.”—Matyu 5:32.

Yu ting God i no inap lusim rong bilong man i mekim pasin adaltri?

BAIBEL I TOK

Nogat. Baibel i tok God i save marimari long ol man i tanim bel na lusim sin bilong ol, na dispela i makim tu man i mekim pasin adaltri. (Aposel 3:19; Galesia 5:19-21) Baibel i stori long ol man na meri em bipo ol i bin mekim pasin adaltri, tasol bihain ol i senisim pasin bilong ol na kamap pren bilong God.—1 Korin 6:9-11.

God i bin soim pasin marimari long King Devit bilong lain Israel long bipo. Devit i bin mekim pasin adaltri wantaim meri bilong wanpela ofisa long lain ami bilong em. (2 Samuel 11:2-4) Baibel i tokaut klia olsem God “i no laikim dispela samting Devit i bin mekim.” (2 Samuel 11:27) Olsem na Em i givim strongpela tok long Devit bilong stretim em, na Devit i tanim bel na God i lusim rong bilong em. Tasol Devit i mas karim hevi bilong dispela pasin nogut em i bin mekim. (2 Samuel 12:13, 14) Saveman King Solomon i luksave long dispela hevi na em i tok: “Sapos man i slip wantaim meri bilong narapela man, em i kranki olgeta na i longlong tru.”—Sindaun 6:32.

SAMTING YU KEN MEKIM

Sapos yu marit na yu bin mekim pasin adaltri, orait yu mas askim God na poroman marit bilong yu long lusim rong bilong yu. (Song 51:1-5) God i heitim tru pasin adaltri, olsem na yu tu i mas sakim dispela pasin. (Song 97:10) Yu mas strong long abrusim pasin bilong lukim ponografi, tingting long mekim maritpasin, o tok gris long wanpela i no poroman marit bilong yu, na ol narapela samting we inap kirapim laik bilong bel long mekim maritpasin wantaim wanpela i no poroman marit bilong yu.—Matyu 5:27, 28; Jems 1:14, 15.

Sapos poroman bilong yu i bin mekim pasin adaltri, orait yu ken bilip tru olsem God i pilim tru hevi bilong yu. (Malakai 2:13, 14) Olsem na askim God long stiaim na givim bel isi long yu, na dispela ‘bai strongim yu.’ (Song 55:22) Sapos yu laik lusim rong bilong poroman marit bilong yu na stap yet wantaim em, orait yutupela wantaim i mas wok strong long mekim ol samting bilong strongim gen marit bilong yutupela.—Efesus 4:32.

Devit i mekim pasin adaltri, tasol bihain em i tanim bel, olsem na profet Natan i tokim em: “Bikpela i rausim dispela sin bilong yu.”—2 Samuel 12:13.