Onarim “Samting God i Pasim Pinis”

1, 2. Hibru 13:4 i mas kirapim yumi long mekim wanem?

YU SAVE amamas long onarim Jehova? Ating yu amamas long mekim olsem! I stret yu onarim God, na em i tok promis tu long onarim yu. (1 Sml. 2:30; Prov. 3:9; Rev. 4:11) God i laik bai yu givim ona long ol wokman bilong gavman. (Rom 12:10; 13:7) Tasol i gat wanpela samting long laip bilong yu em yu mas onarim. Yu mas onarim marit bilong yu.

² Aposel Pol i tok: “Olgeta manmeri i mas tingim marit olsem samting i dia tumas. Marit i mas i stap klin.” (Hib. 13:4) Pol i no mekim wanpela tok nating, nogat. Em i kirapim ol Kristen long tingim marit olsem samting i dia tumas. Olsem wanem? Yu holim kain tingting olsem? Sapos yu marit pinis, yu tingim marit olsem samting i dia tumas?

3. Jisas i mekim wanem bikpela tok long sait bilong marit? (Lukim piksa long kirap bilong stadi.)

³ Jisas i onarim marit, olsem na taim yu onarim marit, yu bihainim eksampel bilong em. Taim ol Farisi i askim em sapos i stret long man i divos, Jisas i kolim gen tok bilong God long namba 1 marit: “Man bai lusim papa na mama bilong em, na tupela bai kamap wanpela bodi.” Jisas i tok moa: “Samting God i pasim pinis, man i no ken katim.”—Ritim Mak 10:2-12; Stt. 2:24.

4. Jehova i putim wanem lo long sait bilong marit?

⁴ Jisas i tok God yet i bin kamapim pasin bilong marit, na marit em samting bilong i stap oltaim. God i no tokim Adam na Iv olsem divos em rot bilong pinisim marit, nogat. Long gaden Iden, God i putim lo olsem man i mas maritim wanpela meri tasol na “tupela” i mas stap wantaim inap oltaim.

OL SENIS LONG SAIT BILONG MARIT

5. Sapos maritman o maritmeri i dai, poroman marit i stap fri long mekim wanem?

⁵ Adam i mekim sin, na sin i bringim dai i kam, na dai i pinisim marit. Taim aposel Pol i laik kamapim klia olsem ol Kristen i no stap aninit long Lo Bilong Moses, em i tok dai i save pinisim marit. Sapos maritman o maritmeri i dai, orait poroman marit i stap fri long marit gen.—Rom 7:1-3.

6. Olsem Lo Bilong Moses i kamapim, Jehova i holim wanem tingting long ol marit?

⁶ God i givim Lo bilong stiaim lain Israel na dispela Lo i tokaut long pasin em ol marit i mas bihainim. Lo i tok man i ken maritim 2-pela o 3-pela meri. Paslain long God i givim Lo, ol manmeri i bihainim pinis dispela pasin. Tasol Lo i tok man i mas lukautim gut meri na no ken mekim hatpela pasin. Sapos man Israel i maritim wanpela wokmeri nating na bihain em i maritim namba 2 meri, orait em i mas lukautim yet fes meri long kaikai, klos, na givim samting i stret long fes meri i mas kisim. God i laik bai man i lukautim gut meri. (Kis. 21:9, 10) Yumi no stap aninit long Lo Bilong Moses, tasol dispela Lo i helpim yumi long kliagut long tingting Jehova i holim long ol marit. Dispela i mas kirapim yu tu long onarim marit.

7, 8. (a) Lo 24:1 i kolim wanem risen bilong ol marit long divos? (b) Jehova i holim wanem tingting long pasin bilong kisim divos?

⁷ Lo i tok wanem long pasin bilong divos? God i tingim yet marit olsem samting i dia tumas; tasol i gat gutpela risen na em i orait long ol marit i ken divos. (Ritim Lo 24:1.) Man Israel i ken kisim divos sapos meri i ‘mekim bikpela rong.’ Lo i no kolim stret wanem “bikpela rong.” Ating em ol bikpela rong we i givim bikpela sem long meri na man bilong em. (Lo 23:14) Sori tru olsem long taim bilong Jisas, planti Juda i yusim “olgeta kain samting” olsem eskius bilong kisim divos. (Mat. 19:3) Yumi no ken bihainim pasin bilong ol.

⁸ Profet Malakai i kamapim klia tingting God i holim long pasin bilong divos. Long taim bilong Malakai, ol man i mekim pasin giaman na divosim ‘meri bilong ol em ol i bin maritim long taim ol i yangpela.’ Ating ol i laik maritim ol yangpela meri haiden. Malakai i kamapim klia tok bilong God, olsem: “Mi no laikim tru pasin bilong katim marit.” (Mal. 2:14-16) Dispela tok i stret wantaim tok Baibel i mekim long namba 1 marit, olsem: “[Man] bai pas wantaim meri bilong em, na tupela bai kamap wanpela bodi.” (Stt. 2:24) Jisas i strongim tingting em Papa bilong em i holim long sait bilong marit, na em i tok: “Samting God i pasim pinis, man i no ken katim.”—Mat. 19:6.

WANPELA RISEN TASOL BILONG DIVOS

9. Yumi kisim wanem stretpela save long tok bilong Jisas long Mak 10:11, 12?

⁹ Ating wanpela inap askim yu, ‘I gat risen long Kristen inap divos na marit gen?’ Jisas i tok: “Man i katim marit na maritim narapela meri, dispela man i mekim pasin adaltri, na em i rongim meri bilong em. Na sapos meri i katim marit na lusim man bilong em na maritim narapela, em i mekim pasin adaltri.” (Mak 10:11, 12; Luk 16:18) Jisas i onarim marit na em i laik bai ol narapela tu i mekim olsem. Sapos man o meri i mekim eskius na divosim poroman marit husat i stap gut long em na em i maritim narapela, orait em i mekim pasin adaltri. Maski em i divos, dispela i no pinisim marit. Long ai bilong God, tupela i stap yet olsem “wanpela bodi tasol.” Na tu, Jisas i tok sapos man i divosim meri maski meri i no mekim rong, dispela inap kirapim meri long mekim pasin adaltri. Bilong wanem yumi tok olsem? Long taim bilong Jisas, meri em man i divosim, em inap pilim olsem em i mas marit gen bambai i gat man bilong lukautim em long sait bilong mani. Tasol sapos meri i mekim olsem, em i mekim pasin adaltri.

10. Wanem wanpela risen tasol bilong Kristen long divos na marit gen?

¹⁰ Jisas i kolim wanpela risen tasol bilong divos. Em i tok: “Mi tokim yupela, sapos meri i no mekim pasin pamuk [Grik, por·neiʹa] na man i katim marit na maritim narapela meri, orait dispela man i mekim pasin adaltri.” (Mat. 19:9) Jisas i kolim wankain tok taim em i mekim Bikpela Tok Long Maunten. (Mat. 5:31, 32) Em i kamapim klia olsem ol marit i ken divos sapos poroman marit i mekim “pasin pamuk”—em ol pasin i nogut tru olsem adaltri, wok pamuk, man na meri husat i no marit i slip wantaim, man i slip wantaim man o meri i slip wantaim meri, na man i mekim pasin sem wantaim animal. Sapos maritman i mekim pasin pamuk, meri i ken mekim disisen long divosim em o stap yet wantaim em. Sapos meri i divosim em, orait long ai bilong God, marit bilong tupela i pinis.

11. Maski poroman marit i mekim pasin pamuk, wai na sampela Kristen i no kisim divos?

¹¹ Taim poroman marit i mekim pasin pamuk (por·neiʹa), tok bilong Jisas i no makim olsem divos tasol em rot bilong stretim hevi, nogat. Sapos maritman i mekim pasin pamuk, meri i ken stap yet wantaim em. Ating em i laikim yet man bilong em; em i redi long fogivim man na wok bung wantaim em long strongim gen marit bilong tupela. Sapos meri i divos na em i no marit gen, dispela bai putim hevi long em. Hau bai em i lukautim em yet long sait bilong klos na kaikai, na inapim laik bilong em long sait bilong maritpasin? Husat bai sambai long em na bai em i no ken i stap wanpis? Olsem wanem sapos tupela i gat pikinini? Em bai inap stiaim pikinini long bihainim tok i tru? (1 Kor. 7:14) Dispela i soim klia olsem bikpela hevi i save painim man o meri husat i kisim divos taim poroman marit i mekim pasin pamuk.

12, 13. (a) Wanem samting i kamap long marit bilong Hosea? (b) Wai na Hosea i kisim bek Gomer? (c) Ol marit inap kisim wanem skul long stori bilong Hosea?

¹² Yumi ken skelim stori bilong profet Hosea. God i tokim Hosea long maritim wanpela meri (Gomer), na dispela meri “bai go mekim pasin pamuk na [em] bai gat ol pikinini long rot bilong pasin pamuk bilong em.” Gomer “i gat bel na em i karim wanpela pikinini man bilong Hosea.” (Hos. 1:2, 3) Bihain, Gomer i karim pikinini meri na pikinini man long rot bilong pasin adaltri. Maski Gomer i mekim pasin adaltri planti taim, Hosea i stap yet wantaim em. Bihain, Gomer i lusim Hosea na em i kamap wokmeri nating. Tasol Hosea i baim bek Gomer. (Hos. 3:1, 2) Jehova i yusim Hosea long soim olsem planti taim em i fogivim lain Israel maski ol i givim baksait long em. Yumi inap kisim wanem skul long dispela stori?

¹³ Sapos poroman marit i mekim pasin pamuk, orait Kristen i gat disisen long mekim. Jisas i tok Kristen i stap fri long divos na marit gen, o em i ken fogivim poroman marit. I no gat rong long fogivim em. Hosea i kisim bek Gomer. Taim Gomer i go bek na stap wantaim Hosea, em i no ken slip nabaut wantaim ol narapela man. Hosea i no “slip” wantaim Gomer inap sampela haptaim. (Hos. 3:3, futnot.) Bihain, ating Hosea i slip gen wantaim Gomer, na dispela i soim klia pasin bilong God long redi long kisim bek lain bilong em na wok bung gen wantaim ol. (Hos. 1:11; 3:3-5) Ol marit inap kisim wanem skul long dispela stori? Sapos Kristen i mekim disisen long stap yet wantaim poroman marit na slip gen wantaim em, dispela i makim olsem em i fogivim poroman marit. (1 Kor. 7:3, 5) Olsem na Kristen i no inap divos. Tupela wantaim i mas tingim marit olsem samting i holi.

ONARIM MARIT MASKI I GAT HEVI

14. Olsem 1 Korin 7:10, 11 i tok, wanem samting inap kamap insait long marit?

¹⁴ Olgeta Kristen i mas onarim marit, wankain olsem Jisas na Jehova i mekim. Tasol yumi gat sin, olsem na sampela i no mekim olsem. (Rom 7:18-23) Long taim bilong ol aposel, sampela Kristen i karim hevi insait long marit. Pol i tok: “Maritmeri i no ken lusim man bilong em”; tasol sampela Kristen i bin mekim olsem.—Ritim 1 Korin 7:10, 11.

15, 16. (a) Maski hevi i kamap insait long marit, ol Kristen i mas tingting strong long mekim wanem? Bilong wanem? (b) Taim hevi i kamap insait long marit, Kristen i mas mekim wanem sapos poroman marit i no wanbilip?

¹⁵ Pol i no stori long risen bilong ol Kristen long seperet. Taim ol i seperet, dispela i no makim olsem maritman i mekim pasin pamuk na meri i stap fri long divos na marit gen, nogat. Pol i tok sapos meri i seperet, orait “em i no ken maritim narapela man o em i mas kamap wanbel gen wantaim man bilong em.” Long ai bilong God, tupela i stap yet olsem ol marit. Pol i tok sapos poroman marit i no mekim pasin pamuk, orait Kristen i mas stretim hevi na kamap wanbel gen wantaim em. Ol i ken lukim ol elda na kisim ol gutpela tok bilong Baibel long helpim ol. Ol elda i no inap stap long sait bilong man o meri, nogat, ol bai kamapim ol skultok bilong Baibel bilong stiaim tupela.

¹⁶ Planti hevi moa inap kamap sapos wanpela poroman marit tasol em i Kristen na em i laik bihainim ol stretpela lo bilong God. Long kain marit olsem, yu ting i stret long seperet sapos hevi i kamap? Baibel i tok man o meri i ken divos sapos poroman marit i mekim pasin pamuk, tasol Baibel i no kolim ol risen bilong seperet. Pol i tok: “Sapos meri i gat man husat i no bilip, tasol man i orait long i stap yet wantaim meri, orait em i no ken lusim man bilong em.” (1 Kor. 7:12, 13) Ol Kristen long nau tu i mas bihainim dispela tok.

17, 18. Wai na sampela Kristen i stap yet wantaim poroman marit maski ol i karim bikpela hevi?

¹⁷ Sampela meri Kristen i gat “man husat i no bilip” na pasin bilong em i soim klia olsem em i no “orait long i stap yet wantaim meri.” Ating em i paitim nogut tru meri, na meri i pilim olsem dispela i bagarapim helt bilong em o em inap lusim laip bilong em. Ating em i no lukautim meri na pikinini long sait bilong haus, kaikai, na klos samting, o em i stopim meri long mekim wok lotu. Long kain marit olsem, man inap mekim gutpela tok, tasol sampela meri Kristen i no “orait long i stap yet” wantaim man na ol i seperet. Tasol sampela Kristen i karim bikpela hevi moa, na ol i no seperet; ol i karim hevi na wok strong long stretim hevi insait long marit. Wai na ol i mekim olsem?

¹⁸ Maski man na meri i seperet, tupela i stap yet olsem marit. Sapos tupela i no stap wantaim, ol inap bungim sampela hevi olsem yumi kolim pinis. Aposel Pol i kolim narapela risen na ol marit i mas stap wantaim. Em i tok: “Man i no bilip, em i pas wantaim meri bilong em, na long dispela pasin em i kamap holi. Na meri i no bilip, em i pas wantaim man bilong em husat i bilip, na long dispela pasin em i kamap holi; sapos nogat, orait ol pikinini bilong yupela bai i no stap klin, tasol nau ol i stap holi.” (1 Kor. 7:14) Planti Kristen i stap yet wantaim poroman marit husat i no wanbilip maski ol i karim bikpela hevi. Bihain, ol i amamas tru olsem gutpela samting i kamap long pasin bilong i stap gut long poroman—poroman marit i kamap wanbilip.—Ritim 1 Korin 7:16; 1 Pita 3:1, 2.

19. Bilong wanem planti marit long kongrigesen Kristen i stap gut na i stap amamas?

¹⁹ Jisas i stori long risen na ol marit i ken divos, na aposel Pol i givim ol skultok long pasin bilong seperet. Jisas na Pol i laik bai ol wokman bilong God i onarim marit. Long planti kongrigesen long olgeta hap bilong graun, planti marit i stap gut na ol i stap amamas. Yu inap lukim sampela marit olsem long kongrigesen bilong yu. Ol gutpela brata i laikim tumas ol meri bilong ol, na ol sista i stap gutpela helpim bilong man bilong ol, na olgeta i soim olsem ol i onarim marit. Yumi amamas tru olsem planti milion Kristen i bihainim tok bilong God, em i tok: “Long dispela as man bai lusim papa na mama bilong em na em bai pas wantaim meri bilong em, na tupela bai kamap wanpela bodi tasol.”—Efe. 5:31, 33.