Yu Tingim Yet?

Yu bin ritim gut ol nupela Wastaua? Yu ken traim bekim ol dispela askim:

Olsem wanem Baibel i soim olsem God i pilim tru hevi bilong yumi?

Taim lain Israel i wok sleiv long Isip, God i pilim tru pen na hevi ol i karim. (Kis. 3:7; Ais. 63:9) God i wokim yumi wankain olsem em yet, olsem na yumi inap pilim tru hevi bilong ol narapela. Em i save pilim tru ol hevi bilong yumi, maski yumi yet i pilim olsem yumi no gutpela inap long em i laikim yumi.—wp18.3, p. 8-9.

Olsem wanem ol tok bilong Jisas i helpim ol man long daunim pasin bilong bel nogut?

Planti Juda long taim bilong Jisas i gat pasin bilong bel nogut. Krais i kamapim klia olsem man i mas daunim em yet na no ken bel nogut long ol manmeri bilong narapela skin kala. Em i kirapim ol disaipel long tingim narapela narapela olsem brata bilong ol.—w18.06, p. 9-10.

Yumi kisim wanem skul long risen na God i no larim Moses i go insait long Graun Bilong Promis?

Moses i pas gut tru wantaim Jehova. (Lo 34:10) Klostu long pinis bilong 40 yia we lain Israel i raun long ples drai nating, ol i komplein namba 2 taim long ol i no gat wara. God i tokim Moses long toktok long ston. Tasol Moses i paitim ston. Ating Jehova i kros bikos Moses i no bihainim tok bilong em o Moses i no givim glori long God long mirakel i kamap. (Nam. 20:6-12) Dispela stori i skulim yumi olsem em i bikpela samting long yumi mas bihainim tok bilong Jehova na givim glori long em.—w18.07, p. 13-14.

Olsem wanem yumi inap popaia sapos yumi skelim man long lukluk bilong em?

I gat 3-pela samting we i stiaim ol man long skelim ol narapela long lukluk bilong ol: skin kala o ples man i kam long en, mani kago, na krismas bilong man. Yumi mas bihainim pasin bilong God na mekim wankain pasin long olgeta kain man! (Apo. 10:34, 35)—w18.08, p. 8-12.

Olsem wanem ol Kristen i gat bikpela krismas inap helpim ol narapela?

Maski Kristen i gat bikpela krismas na asainmen bilong em i senis, God i no inap lusim tingting long em, na dispela Kristen inap helpim tru ol narapela. Em inap helpim ol poroman marit em ol i no kisim yet tok i tru na ol pablisa i slek long bilip. Na tu, em inap mekim Baibel stadi na mekim bikpela wok moa bilong autim tok.—w18.09, p. 8-11.

Wanem ol samting i stap long Tul Boks Bilong Skulim Ol Man?

I gat ol kontek kat na ol invatesen, 8-pela liklik nius, na Wastaua na Kirap! Tul boks i gat sampela buklet, 2-pela buk bilong stadi, na 4-pela gutpela vidio. Nem bilong wanpela vidio em Wai na i Gutpela Long Stadi Long Baibel?—w18.10, p. 16.

Olsem wanem Kristen inap “baim tok i tru” olsem Provep 23:23 i kirapim yumi long mekim?

Yumi no inap yusim mani long baim tok i tru. Tasol yumi mas lusim taim na mekim ol narapela samting bambai yumi inap kisim tok i tru.—w18.11, p. 4.

Yumi inap kisim wanem skul long pasin Hosea i mekim long meri bilong em, Gomer?

Gomer i mekim pasin adaltri planti taim, tasol Hosea i fogivim em na stap yet olsem poroman marit bilong em. Sapos poroman marit bilong wanpela Kristen i mekim pasin adaltri, Kristen i ken fogivim em. Sapos Kristen i slip gen wantaim poroman marit, orait Kristen i no inap kisim divos olsem Baibel i tok long mekim.—w18.12, p. 13.